1. San David taki fu a sakafasi fu Yehofa?

U POI taki Yehofa abi sakafasi? Eeye. David be taki: ‘Yu e gi mi i skelt fu kibii mi, na a sakafasi fi yu e hei mi’ (2 Sam. 22:36; Ps. 18:35). Kande David be e pakisei a dei di polofeiti Samuweli be kon na a osu fi en dda fu salufu en fu a toon a kownu fu Islayeli. David dda be abi aitin manpikin. Neen a be a moo yonkuuwan, ma toku neen Yehofa teke fu toon kownu a Saul peesi.​—1 Sam. 16:1, 10-13.

2. San wi o luku aini a artikel ya?

² David seefi be e biibi den sani di a sikiifiman fu Psalm 113 be taki fu Yehofa. A be taki: ‘Ai bendi te a doti fu luku hemel anga goontapu. Ai diki a pootiman puu a doti. Ai diki en puu aini asisi. Da ai meke a sidon anga den heiheiman, ai meke a sidon anga den pelensipali sama fu a foluku fi en’ (Ps. 113:6-8). Aini a artikel ya, wi o luku fosi fa Yehofa soi taki a abi sakafasi anga fa u sa waka neen baka. Wi o luku tu san u sa leli fu Kownu Saul, polofeiti Daniyeli anga Yesesi.

3. San Yehofa du gi u? San a sani ya e soi?

³ Den sani di Yehofa e du gi sondu libisama e soi taki a abi sakafasi. A gi wi a okasi fu u dini en. Boiti dati, ai si wi enke en mati (Ps. 25:14) Yehofa meke en Manpikin kon dede gi u fu pai fu u sondu, neen meke u poi toon en mati. A sani ya e soi taki Yehofa e booko en ede anga u tuutuu.

4. Fa Yehofa meke u? Saide a meke u na a fasi ya?

 ⁴ Wan taa sani di e soi taki Yehofa abi sakafasi, na a fasi fa a meke u. A meke wi enke fa enseefi de. A gi wi a okasi fu luku san u wani du anga u libi, a nai dwengi u. Yehofa wani u dini en fu di u lobi en. A wani u dini en tu fu di wi e biibi taki sani o go bun anga u te wi e du sani enke fa a taki (Deit. 10:12; Yes. 48:17, 18). Wi e teke en fu bigi taki Yehofa du a sani ya gi u.

5. Fa Yehofa e leli u fu abi sakafasi? (Luku a fowtow a fesise fu A Wakititolen.)

⁵ Te wi e luku ala den sani di Yehofa e du, da wi e si taki useefi mu meke moiti fu abi sakafasi. A Yehofa na a moo koni Sama fu hemel anga goontapu, tokuso a de kabakaba fu aliki fa taawan e denki. Wan fasi fa a du a sani ya, a di a gi en Manpikin a okasi fu yeepi en meke ala taa sani (Odo 8:27-30; Kol. 1:15, 16). Winsi fa Yehofa abi ala makiti, tokuso ai meke taawan yeepi en anga son sani. A poti Yesesi enke Kownu fu a Kownukondee fi en. A poti 144.000 sama tu fu yeepi Yesesi anga a wooko ya (Luk. 12:32). Fosi Yehofa poti Yesesi a wooko, a leli en fa fu de wan bun Kownu anga Gaan Pilisite (Heb. 5:8, 9). Boiti dati, a leli den taa sama di o tii makandaa anga Yesesi fa den mu du a wooko di a gi den. Ma dati á wani taki Yehofa e sidon luku fa den e du a wooko di a gi den fu du, bika ai fitoow den. A sabi taki den o du sani enke fa a wani.​—Openb. 5:10.

6-7. Fa dda, mma, anga owluman sa waka a Yehofa baka?

⁶ Winsi fa u Dda di de a hemel abi ala makiti, toku ai meke sama yeepi en  anga son sani. Na aseefi sani u mu du tu. Yu a wan dda, wan mma efuso wan owluman? Leti enke Yehofa, meke taawan yeepi yu anga den wooko di yu abi fu du. Ma yu á mu e suku fowtu a den ala yuu te i gi den wan wooko fu du. Efi yu e waka a Yehofa baka, a omen wooko yu o poi du. Yu o man yeepi taawan tu fu den á feele fu tyai faantiwowtu. Yu o man yeepi den tu fu biibi taki den poi du den wooko bun (Yes. 41:10). San a wantu taa sani di sama di abi faantiwowtu sa leli fu Yehofa?

⁷ Beibel e soi taki Yehofa e akisi den engel fi en fa den e denki fu son sani (1 Kow. 22:19-22). Dda anga mma, fa u sa waka a Yehofa baka? Te yu e gi den pikin fi i wooko fu du, akisi den fa den wani du a wooko. Efi i si enke a fasi fa den wani du a wooko bun, da gi den a okasi fu du a wooko enke fa den taki.

8. Fa Yehofa soi taki a be e pasensi anga Abalaham anga Sala?

⁸ Yehofa abi pasensi. Disi a wan taa fasi fa ai soi taki a abi sakafasi. Yehofa e pasensi anga den sama di e dini en, te den e akisi en a wan lesipeki fasi saide ai du son sani. Di Abalaham be akisi Yehofa efu a be o de wan koni sani fu poli Sodom anga Gomora, Yehofa ati á be boon neen (Gen. 18:22-33). Yehofa pasensi anga Sala tu. Di Sala yee taki Yehofa paamisi taki a o de anga bee winsi fa a be gaandi kaba, Sala lafu fu di a á be e kaba biibi. Ma tokuso Yehofa ati á boon neen (Gen. 18:10-14). Yehofa tan soi taki ai lesipeki Sala.

9. Fa dda, mma, anga owluman sa waka a Yehofa baka?

⁹ Fa dda, mma anga owluman sa waka a Yehofa baka? San yu e du te i pikin efuso wan sama aini a kemeente akisi i saide yu e du son sani? Yu e wani soi den ala yuu taki a fasi fa yu e du sani moo bun? Efuso yu e puubei fu fusutan fa den e denki? Te dda, mma, anga owluman e meke moiti fu abi sakafasi enke Yehofa, sani e waka bun aini a osufamii anga a kemeente. U luku kaba fa Yehofa soi taki a abi sakafasi, anga fa u sa waka neen baka. Now wi o luku san u sa leli fu wantu sama aini Beibel.

10. Fa Yehofa e yeepi wi anga a Beibel?

¹⁰ Yehofa a ‘Gaan Leliman’ fu u, meke sama sikiifi omen toli aini Beibel fu di a wani u leli wan sani fu den toli ya (Yes. 30:20, 21). Efu wi e teke ten luku a libi fu sama aini Beibel di be abi sakafasi anga taa moin manii, wi o leli omen sani. U sa leli omen sani tu te u luku san miti den sama di á be abi den manii ya.​—Ps. 37:37; 1 Kor. 10:11.

11. San wi e leli fu a toli fu Saul?

¹¹ Luku a toli fu Kownu Saul. Biginbigin a á be e fii enseefi. Di den be go fu poti en enke Kownu seefi a á be wani, bika a be e si enke a á be o poi tyai a faantiwowtu ya (1 Sam. 9:21; 10:20-22). Ma bakaten Saul be kon abi heimembee, neen meke a be bigin du sani di a á be abi leti fu du. Wan leisi Saul be mu wakiti polofeiti Samuweli fu kon tyai wan ofaandi. Ma di Samuweli á doo na a yuu, Saul á wakiti fu Yehofa yeepi a foluku fi en. Enseefi boon a ofaandi, winsi fa a á be abi a leti fu du a sani de. Fu di a be kon abi heimembee meke Yehofa á be  lobi en moo. Yehofa á be wani en enke kownu moo tu (1 Sam. 13:8-14). A toli ya e leli u taki u mu luku bun fu wi á du sani di u ná abi a leti fu du.

12. Fa Daniyeli soi taki a be abi sakafasi?

¹² Meke u luku san u sa leli fu polofeiti Daniyeli. Daniyeli be abi sakafasi en hii libi. Ala yuu a be e begi Yehofa fosi a du wan sani. Di a be taigi Nebukadnesar san a deen fi en wani taki, a á be wani sama gafa en, ma a soi den kiin taki a Yehofa be meke a sabi san a deen be wani taki (Dan. 2:26-28). San a sani ya e leli u? Efu wan baala efuso sisa gafa i fu wan lezing di i holi, efuso fu den wini di yu e fende aini a peleikiwooko, i mu soi den kiin taki a di Yehofa yeepi i meke i man du den sani ya. A so yu e soi taki yu abi sakafasi (Filip. 4:13). Te wi e du sani na a fasi ya, wi e soi tu taki wi e waka a Yesesi baka. Saide u taki so?

13. San wi e leli fu Yesesi te u luku san a taki a Yohanisi 5:19, 30?

¹³ Winsi fa Yesesi a be a Manpikin fu Gadu, toku a be sabi taki a be abi Yehofa fanowdu. (Leisi Yohanisi 5:19, 30.) Noiti a be meke moiti fu teke a makiti fi en Dda. Filipisama 2:6 e taki: ‘Winsi fa Yesesi be de enke Gadu, toku a á be denki fu teke a makiti fu Gadu anga taanga, fu a be sa de aseefi enke Gadu.’ Ala yuu Yesesi be e du sani enke fa en Dda wani. A be sabi san a be abi a leti fu du anga san a á be mu du.

14. San Yesesi du di sama be akisi en fu du wan sani di a á be abi a leti fu du?

¹⁴ Luku san Yesesi du di Yakowbesi, Yohanisi anga den mma go akisi en fu a du wan sani di a á be abi a leti fu du. Yesesi taigi den kiin taki neen Dda wawan abi a leti fu taki sama o sidon neen leti ana anga en kukutu ana aini a Kownukondee (Mat. 20:20-23). Yesesi be sabi taki a ná abi a leti fu du son sani. A abi sakafasi. Noiti a du wan sani di Yehofa á sende en fu du (Yoh. 12:49). Fa u sa waka a Yesesi baka?

15-16. Fa u sa du a sani di sikiifi a 1 Korentesama 4:6?

¹⁵ Wi e soi taki wi abi sakafasi enke Yesesi te wi e du san sikiifi a 1 Korentesama 4:6. A sikiifi ape taki: ‘Wi á mu du  sani di á sikiifi aini den santa buku.’ Neen meke te sama akisi u fa wi e pakisei fu son sani, wi á mu wani dwengi den fu si a toli enke fa wi e si en. U mu denki bun fosi u piki den. Pe fu u taigi den fa wi e denki, a be o moo bun fu soi den san Beibel e taki. U sa soi den tu san den buku fu a olikanisâsi e taki fu a toli. Te wi e du a sani ya, da wi e soi taki wi e fusutan taki wi á sabi ala sani. Boiti dati, wi e soi anga a sani ya taki wi abi sakafasi. Wi e soi tu taki wi e fusutan taki a fasi fa Yehofa e denki, bun moo a fasi fa wi e denki.​—Openb. 15:3, 4.

¹⁶ Te wi abi sakafasi, wi e gi Yehofa gaandi. Ma wi e fende wini tu te wi abi sakafasi. Meke u luku fa sakafasi e yeepi u fu piisii, anga fa ai yeepi u fu libi bun anga taawan.

17. Saide wan sama e moo de koloku te a abi sakafasi?

¹⁷ Te wi abi sakafasi, wi e moo de koloku. Saide u sa taki a sani ya? Te wi e holi a pakisei taki wi á poi du ala sani, wi e moo teke en fu bigi te taawan e yeepi u. Luku a toli fu den tin kokobeman di Yesesi be deesi. Di Yesesi deesi den man ya, a wan fu den namo daai kon baka fu gi en daa. A man ya be sabi taki a á be o poi deesi enseefi. Fu di a be abi sakafasi, meke a be teke en fu bigi taki Gadu be yeepi en. A gafa Gadu tu fu a gaan bun di a du gi en.​—Luk. 17:11-19.

18. Fa sakafasi e yeepi u fu libi bun anga taawan? (Romesama 12:10)

¹⁸ Sama di abi sakafasi e libi bun anga  taawan, neen meke den sama ya e abi bun mati. Den e poti pakisei a den bun manii fu taawan. Den e fitoow taawan. Sama di abi sakafasi e poolo te den si taki wan sama sabi du wan sani. Den lobi gafa taawan tu.​—Leisi Romesama 12:10.

19. Saide wi á mu abi heimembee?

¹⁹ Ai taanga gi sama di abi heimembee fu gafa taawan. Den lobi sitee anga taawan. Pe fu den leli taawan fa den mu du son sani, a denseefi e wani du ala sani, bika den e fii enke den sabi du sani moo taawan. Sama di abi heimembee e wani sama poti pakisei a den ala yuu, neen meke den e dyalusu te taawan sabi du son sani moo den (Gal. 5:26). Sama di abi heimembee nai abi bun mati. Efi i si enke yu abi a manii ya, begi Yehofa fu yeepi i ‘kengi a fasi fa yu e denki’ fi i sa kon abi sakafasi.​—Rom. 12:2.

20. Saide u mu meke moiti fu abi sakafasi?

²⁰ Ai bigi gi u taki Yehofa soi u fa u mu abi sakafasi. Den sani di a du gi den sama di e dini en e soi taki a abi sakafasi, neen meke u wani de enke en. Boiti dati, u wani waka a den sama di kai aini Beibel baka di be abi sakafasi. Meke u gafa Yehofa ala yuu, bika a fiti fu u gafa en (Openb. 4:11). Efu u meke moiti fu abi sakafasi, wi anga Yehofa o de mati fu teego, bika a lobi sama di abi sakafasi.