1. San omen sama di e dini Yehofa du? Saide den du den sani ya?

AINI a ten ya, miliyunmiliyun sama di e dini Yehofa, fika son sani fu di den wani du moo gi Yehofa. A omen baala anga sisa á toow, son sama di toow á meke pikin ete, son osufamii nai libi bigi. Ala den sama ya e du den sani ya fu di den wani du moo gi Yehofa. Den sama ya nai suku fini anga sani. Den e biibi taki Yehofa o gi den ala san den abi fanowdu. Yehofa o solugu den tuu? Eeye. Saide u sa biibi a sani ya? We, Yehofa be belesi Abalaham, ‘a dda fu ala sama di e biibi’, neen meke u sa biibi taki a o belesi den sama ya tu fu di den soi taki den e biibi en.​—Rom. 4:11.

2. (a) Enke fa Hebrewsama 11:8-10, 16 e soi, da saide Abalaham be de kabakaba fu gwe fika Ur? (b) San wi o luku aini a artikel ya?

² Abalaham be gwe fika a switi libi di a be abi a Ur. Saide? Bika a be e wakiti ‘a foto di abi wan tuutuu fondamenti’. (Leisi Hebrewsama 11:8-10, 16.) San na a ‘foto’ ya? San be miti Abalaham a pisiten di a be e wakiti fu a foto ya meke? Fa u sa de enke Abalaham anga den sama aini a ten ya di waka neen baka? Wi o luku den akisi ya aini a artikel ya.

3. San na a ‘foto’ di Abalaham be e wakiti?

³ A foto di Abalaham be e wakiti na a Kownukondee fu Gadu. A Yesesi na a Kownu fu a Kownukondee ya. Boiti dati, 144.000 salufu Kelesten o tii makandaa anga Yesesi a hemel. Pawlesi be kai a Kownukondee ya ‘a foto fu a  libilibi Gadu, a Yelusalem di de a hemel’ (Heb. 12:22; Openb. 5:8-10; 14:1). Yesesi be leli den bakaman fi en taki den mu begi fu a Kownukondee ya kon, da a wani fu Gadu o pasa a goontapu, leti enke fa ai pasa a hemel.​—Mat. 6:10.

4. Enke fa Genesesi 17:1, 2, 6 e soi, da san Abalaham be sabi fu a foto, efuso a Kownukondee di Gadu be paamisi en?

⁴ Abalaham be sabi fa a Kownukondee fu Gadu be o sete? Nono. A omen ondoo yali a sani ya be de wan kibii toli (Efe. 1:8-10; Kol. 1:26, 27). Ma Abalaham be sabi taki son wan fu den bakapikin fi en be o toon kownu, leti enke fa Yehofa be paamisi en. (Leisi Genesesi 17:1, 2, 6.) Abalaham be e biibi den sani di Gadu be paamisi en anga en hii ati. A be de leti enke a be e si a Salufuwan, efuso a Mesiyas di be o toon Kownu fu Gadu Kownukondee. Neen meke Yesesi be taigi den Dyu fu a ten fi en taki: ‘U dda Abalaham be e piisii fu di a be e angii fu si a dei fu mi. We, a si en tu. A piisii di a si en’ (Yoh. 8:56). A sani ya e soi taki Abalaham be sabi taki wantu bakapikin fi en be o de aini a Kownukondee di Yehofa be sete, neen meke a be de kabakaba fu wakiti te enke Yehofa du a sani di a paamisi en.

5. Fa Abalaham soi taki a be e wakiti a foto di Gadu be o sete?

⁵ Fa Abalaham soi taki a be e wakiti a foto, efuso a Kownukondee fu Gadu? Noiti Abalaham go meke osu aini wan kondee efuso holibaka gi wan libisama tiimakiti. A á be e tan langa a wan peesi tu. Boiti dati, Abalaham á puubei fu sete en eigi kownukondee, ma a be e tan du sani enke fa Yehofa wani. A be e wakiti Yehofa tu fu du san a be paamisi en. Den sani ya e soi taki Abalaham be e fitoow Yehofa tuutuu. Meke u luku wantu polobelema di be miti en. Wi o luku tu san u sa leli fu Abalaham.

6. Fa a foto Ur be de?

⁶ Abalaham be gwe fika wan gudu foto di be abi ala sani. Gaan sikotu be lontu Ur, wataa be lontu a foto a dii se. A den sani ya be e kibii a foto fu sama á kon aini  makiliki. Sabiman fende sani di e soi taki den sama fu Ur be go a bunbun sikoo. Den be sabi leisi, den be sabi sikiifi tu. Boiti dati, sama be e du bisnis aini a foto. Anga siton den osu fu den sama be meke. Den osu sikin be gaata, den be felifi tu. Son wan fu den osu be abi 13 te anga 14 kambaa. Den be e sima den dyali lontu tu.

7. Saide Abalaham be mu biibi taki Yehofa o kibii en anga en osufamii?

⁷ Abalaham be mu biibi taki Yehofa o kibii en anga en osufamii. Saide? Abalaham anga Sala be mu gwe fika den bunbun osu aini Ur fu go tan aini tenti a Kaana-an. Hei sikotu anga wataa á be lontu den moo fu kibii den. A be moo makiliki gi feyanti fu kon feti anga den.

8. San be miti Abalaham?

⁸ Winsi fa Abalaham be e du san Yehofa taki, toku a ná ala yuu sani be e go bun anga en. Son leisi a be e taanga gi en fu solugu en osufamii. Wan leisi wan gaan angiiten be de aini a kondee di Yehofa be sende en go, neen meke Abalaham be abi fu go tan a Egepte wan pisiten. Ma di a doo Egepte neen Farao teke a uman fi en. Ná pikin booko Abalaham be musu e booko en ede di Farao be teke en uman Sala tyai gwe. Ma Yehofa sitaafu Farao, neen a meke a tyai Abalaham uman go gi en baka.​—Gen. 12:10-19.

9. Sowtu polobelema be de aini a osulibi fu Abalaham?

⁹ A ná ala yuu Abalaham osulibi be e waka bun. En uman Sala á be poi meke pikin. A omen yali den be e kusumi fu a sani ya. Bakaten Sala gi Abalaham a umansaafu fi en Hagar fu meke pikin gi en. Ma di Hagar kon de anga bee, a bigin soso Sala. Hagar soso Sala te neen Sala bigin libi ogii anga en. Bakaten Hagar be abi fu lowe.​—Gen. 16:1-6.

10. San Abalaham be mu du anga Ismayeli anga Isaki di be sa meke a taanga gi en fu fitoow Yehofa?

¹⁰ Te fu kaba Sala be kon de anga bee, neen a meke wan manpikin gi Abalaham. Abalaham kai a boi ya Isaki. Abalaham be lobi Ismayeli anga Isaki, ma Ismayeli be e libi ogii anga Isaki. Neen meke Yehofa be taigi Abalaham fu a sende Ismayeli anga en mma Hagar gwe (Gen. 21:9-14). Bakaten Yehofa akisi Abalaham fu gi en Isaki enke wan ofaandi (Gen. 22:1, 2; Heb. 11:17-19). Ala den tu leisi ya, Abalaham be abi fu fitoow Yehofa taki sani be o waka bun anga den boi fi en te a be o du sani enke fa a taki.

11. Saide Abalaham be mu wakiti Yehofa anga pasensi?

¹¹ Abalaham be abi fu wakiti anga pasensi fu si fa Yehofa be o du den sani di a paamisi en. A gei Abalaham be pasa 70 yali kaba di en anga en osufamii be foloisi komoto a Ur (Gen. 11:31–12:4). A wan sani fu wan ondoo yali Abalaham tan aini tenti aini Kaana-an, a omen leisi a be abi fu foloisi tu. Abalaham dede di a be abi 175 yali (Gen. 25:7). Ma Abalaham á be si fa Yehofa gi den bakapikin fi en a kondee di a be paamisi den. A á be de a libi moo fu si fa Gadu sete a Kownukondee fi en tu. Toku Beibel e taki Abalaham ‘libi wan bun libi. A be gaandi fosi en boo koti’ (Gen. 25:8). Winsi fa sani be e miti Abalaham, tokuso en biibi be taanga. Ala yuu a be e wakiti Yehofa anga pasensi tu. San be yeepi Abalaham fu holidoo? A fu di en anga Yehofa a be mati. Yehofa kibii Abalaham en hii libi langa.​—Gen. 15:1; Yes. 41:8; Yak. 2:22, 23.

12. San wi e wakiti aini a ten ya? San wi o luku now?

 ¹² Leti enke Abalaham, useefi e wakiti ‘a foto di abi wan tuutuu fondamenti’. U nai wakiti fu den meke a foto ya, bika Gadu Kownukondee sete aini 1914 a hemel kaba (Openb. 12:7-10). Ma wi e wakiti fu a yuu doo te a Kownukondee fu Gadu o tii hii goontapu. Leti enke Abalaham anga Sala, a omen polobelema sa miti u fosi a yuu ya doo. Sama de aini a ten ya di holidoo enke Abalaham? Den ondoofenitoli aini den Wakititolen e soi taki a omen baala anga sisa e biibi Yehofa. Den e soi tu taki den abi pasensi enke Abalaham anga Sala. Meke u luku wantu fu den ondoofenitoli ya, anga san u sa leli fu den.

13. San a ondoofenitoli fu Baala Walden e leli i?

¹³ U mu de kabakaba fu fika son sani efu u wani du moo gi Yehofa. Leti enke Abalaham u mu de kabakaba fu fika son sani efu u wani poti a Kownukondee fu Gadu a fesi (Mat. 6:33; Malik. 10:28-30). Luku a toli fu wan baala den e kai Bill Walden. * Aini a yali 1942, di Bill be de aini a lasiti kalasi fu universiteit, a bigin sutudeli anga Yehofa Kotoigi. Wan fu den muneli di be e leli en be seeka sani gi Bill fu fende wan bunbun wooko baka te a be kaba sikoo. Ma Bill á be wani a wooko ya. A be taigi a muneli taki a be wani du moo gi Gadu, neen meke a á poi teke a wooko ya winsi fa a be o meke tyaipi moni. Baka dati den be sende kai Bill fu go a suudati. A be abi fu pai wan butu fu 10.000 Ameekan dala fu di a á be wani go a suudati. Den be leisi 5 yali sitaafu gi en tu. Den sooto Bill 3 yali, baka dati den losi en. Bakaten a go na a Gileyad sikoo, neen den sende en go na Afiikan enke zendeling. Bill toow anga wan sisa den e kai Eva. A libi á be makiliki gi den na Afiikan. Baka wan pisiten, den daai go  na Ameekankondee baka fu solugu Bill mma. Bill taki: ‘Mi ain e fuu anga wataa te mi pakisei a moin gaandi di mi abi fu wooko gi Yehofa moo enke 70 yali kaba. Ala yuu mi e gi en daa fu di a gi mi a gaandi fu dini en na a fasi ya.’ I si enke iseefi poi du a fuuten diniwooko?

14-15. San i leli fu a toli fu Baala anga Sisa Apostolidis?

¹⁴ Yu á mu si enke te yu e dini Yehofa anga i hii ati, da sani ná o miti i. A toli fu Abalaham e leli u taki winsi wan sama e dini Yehofa anga en hii ati, tokuso a ná ala yuu sani o go enke fa a wani (Yak. 1:2; 1 Peit. 5:9). A ondoofenitoli fu Aristotelis Apostolidis * e soi taki a sani ya a tuu. A baala ya dopu aini 1946 a Giikikondee. Aini 1952, a meke mofu fu toow anga wan sisa den e kai Eleni. Ala den tu man be wani du a fuuten diniwooko. Ma a tyali taki Eleni be kon siki. Bakaten dataa kon si taki kanker be kisi en neen ede. Den dataa koti en neen den puu a kanker. Baka dati den toow. Ma di den toow wantu yali neen a kanker bigin goo baka. Di den dataa koti Eleni du fu tu leisi, a be kon lan a son pisi fi en sikin, a á be poi taki bun moo tu. Eleni be e peleiki fayafaya ete, winsi fa a be siki. A pisiten de lanti be e du ogii anga den Kotoigi aini a kondee, ma toku Eleni á be gi abaa.

¹⁵ A 30 yali langa Aristotelis solugu a uman fi en. A pisiten de, en a be owluman. A be de aini a Komte di be e luku den peesi pe den e holi konkelesi tu. Boiti dati, a be yeepi meke wan peesi pe den be o holi den gaan komakandaa. Aini 1987, Eleni kisi wan gaan mankei di a be de aini a peleikiwooko. Dii yali langa a be de a kowma, baka dati a dede. Aristotelis taki fa a be e fii di den sani ya miti en. A taki: ‘Ná pikin sani miti mi aini den yali ya. Mi á be denki son wan fu den sani ya be sa miti mi. Mi be abi fu meke taanga moiti fu holidoo. Yehofa gi mi a kaakiti di mi be abi fanowdu fu pasa den tesi ya’ (Ps. 94:18, 19). Ná  pikin lobi Yehofa lobi den sama di e dini en anga den hii ati, winsi sowtu polobelema e miti den.

16. San Baala Knorr be taigi a uman fi en?

¹⁶ Pakisei den wini di yu o fende aini a ten di e kon. Abalaham be e poti pakisei a den sani di Yehofa be paamisi en. Na a sani ya be e yeepi en fu holidoo te tesi be e miti en. Na aseefi sani ya Sisa Audrey Hyde be meke moiti fu du tu. A sisa ya be toow anga Baala Nathan H. Knorr. Di kanker kii Baala Nathan, neen a sisa ya toow anga Baala Glenn Hyde. Ma a baala ya seefi be kon siki bakaten. A be kisi wan siki di be e meke ai lasi enseefi. * Sisa Audrey taki a sani di be yeepi en fu holidoo anga piisii, na a sani di Baala Knorr be taigi en wantu wiki fosi a dede. A taki: ‘Nathan be taigi mi taki: “Te u holidoo te enke u dede, u sabi taki wi o fende den sani di Yehofa paamisi u. Noiti moo wi o pina.” A taigi mi tu taki: “Luku go a fesi, bika a fesi a pai di yu o fende de.” . . . A taki tu: “Du ala san i poi fu yeepi taawan. A sani de o yeepi i fu piisii.”’ A wan bun sani a taigi en di a taki a mu tan du bun gi taawan. A taigi en tu taki a mu tan meke moiti fu piisii anga ‘a howpu di a abi’.​—Rom. 12:12.

17. (a) Saide a nownow u mu poti pakisei na a howpu di wi abi? (b) Te u luku san sikiifi a Mika 7:7, da san u mu du efu u wani fende den sani di Yehofa paamisi u?

¹⁷ Aini a ten ya a moo de taanga fanowdu fu poti pakisei na a howpu di wi abi. Den sani di e pasa a goontapu nownow e soi taki na a lasiti pisi fu den lasiti dei wi e libi. Dyonson a Kownukondee fu Gadu o tii hii goontapu. Wan fu den sani di o meke u piisii tuutuu, na a weki di Gadu o weki den sama fu u di dede baka. A ten de, Yehofa o pai Abalaham fu di a wakiti anga pasensi. A o weki Abalaham anga den famii fi en baka, bika den be wakiti anga pasensi fu di den be e biibi. Yu o de ape fu bali wadaa gi den? We, efi i de kabakaba fu fika son sani fu du moo gi Yehofa, efi yu e holidoo winsi san e miti i, efi yu e wakiti Yehofa anga pasensi, da yu o de ape fu bali wadaa gi den.​—Leisi Mika 7:7.