1. Te u luku den sani di Yehofa meke, da san u sa akisi useefi?

TE U luku ala den sani di Yehofa meke, da kande wi e fii enke a psalm sikiifiman David di be taki: ‘Te mi luku hemel, den sani di i meke, a mun anga den sitali di i meke, da san a wan libisama di yu e poti pakisei neen? San a wan pikin fu wan libisama di yu e solugu en?’ (Ps. 8:3, 4) Kande leti enke David, wi e foondoo taki Yehofa e poti pakisei a wi te u luku den somen gaan sani di a meke. Ma fanafu di Yehofa meke den fosi sama, Adan anga Efa, neen a soi kiin taki ai poti pakisei a libisama, bika a be teke den aini a osufamii fi en.

2. San Yehofa be abi a pakisei di a meke Adan anga Efa?

² Adan anga Efa a be den fosi pikin fu Yehofa a goontapu. Yehofa be taigi den taki: ‘Meke pikin fuu a goontapu da u de basi fi en’ (Gen. 1:28). Gadu be wani Adan anga Efa meke pikin, da den anga den pikin fu den be mu seeka a goontapu te enke a hii goontapu be toon wan paladeisi. Efu u fosi mma anga dda be du sani enke fa Yehofa be taki, da tide na a dei den anga ala den bakapikin fu den be o de aini a osufamii fu Yehofa ete.

3. Saide u sa taki a wan bun posisi Yehofa be gi Adan anga Efa aini a osufamii fi en?

³ A wan bun peesi Yehofa be gi Adan anga Efa aini a osufamii fi en. Aini Psalm 8:5 David e taki sowtu posisi Yehofa gi libisama di a meke den. A be taki: ‘I poti en  pikinso lagi moo den engel. I gi en gaandi, i meke en a wan foondoo fasi.’ A tuu taki Yehofa á gi libisama aseefi makiti, kaakiti efuso koni di a gi den engel (Ps. 103:20). Toku Beibel taki a pikinso namo u de a den engel ondoo. A ná wan bun posisi Yehofa be gi u fosi mma anga dda noh?

4. San pasa anga Adan anga Efa di den taangayesi Gadu? San wi o luku aini a artikel ya?

 ⁴ A tyali taki Adan anga Efa ná aliki Gadu. Di den taangayesi Yehofa, a puu den aini a osufamii fi en. Aini a artikel ya, wi o luku den takuu bakapisi di a sani di Adan anga Efa du, tyai gi den bakapikin fu den. Winsi fa Adan anga Efa taangayesi Yehofa, toku Yehofa e teke den bakapikin fu den di wani aliki en aini a osufamii fi en. Wi o luku wantu fasi fa Yehofa soi taki u pelensipali gi en. Wi o luku tu san u mu du fu soi taki u wani de aini a osufamii fi en. Baka dati wi o luku den wini di den pikin fu Yehofa di o tan a goontapu ya o fende aini a ten di e kon.

5. Fa u sa soi taki ai bigi gi u taki Gadu meke wi enke fa a de?

⁵ Yehofa meke libisama enke fa enseefi de. A sani ya a wan gaandi (Gen. 1:26, 27). Fu di Yehofa meke wi enke fa enseefi de, meke u poi abi denseefi manii fi en. Wantu fu den moin manii fu Yehofa a lobi, tyali-ati, anga a du di ai du sani a wan letifasi ala yuu. Useefi poi abi den manii ya (Ps. 86:15; 145:17). Te wi e meke moiti fu abi den manii fu Yehofa, wi e soi taki wi e teke den sani di ai du gi u fu bigi (1 Peit. 1:14-16). Te wi e du sani enke fa u Dda di de a hemel wani, wi e moo piisii. Fu di Yehofa meke wi enke fa a de, meke u poi abi ala den manii di o meke a teke wi aini en osufamii.

6. Fa a fasi fa Yehofa meke a goontapu e soi taki a lobi libisama?

⁶ Yehofa be seeka wan moin peesi gi u fu tan. Fosi Yehofa meke den fosi libisama, a be seeka a goontapu gi den (Yopu 38:4-6; Yel. 10:12). Yehofa a wan Gadu di lobi gi sama sani, neen meke a omen bun sani a meke gi libisama fu den be sa piisii fu a libi (Ps. 104:14, 15, 24). Te Gadu be e luku den sani di a meke, a be e si taki ala den bun (Gen. 1:10, 12, 31). Yehofa soi taki libisama pelensipali gi en, di a poti den enke basi fu ala den sani di a meke a goontapu (Ps. 8:6). Yehofa wani libisama di ná abi sondu, solugu den sani di a meke fu teego aini wan paladeisi. Yu e gi Yehofa daa taki a seeka sani fu gi u wan bun libi aini a ten di e kon?

7. Enke fa Yowsuwa 24:15 e soi, da sowtu okasi Yehofa gi libisama?

⁷ Yehofa gi libisama a okasi fu denseefi luku san den wani du anga den libi. (Leisi Yowsuwa 24:15.) Yehofa lobi u, a wani sani waka bun anga u, neen meke ai piisii te wan sama bigin dini en (Ps. 84:11; Odo 27:11). A omen bun sani u sa du anga a gaandi di Yehofa gi u fu luku san u wani du anga u libi. Meke u luku fa Yesesi be e du sani, winsi fa a be sa du san a wani.

8. Fa Yesesi be e koboloiki a gaandi di Yehofa gi en fu du san a wani?

⁸ Wan fasi fa u sa waka a Yesesi baka, a te wi e si taawan pelensipali moo useefi. Wan leisi, Yesesi anga den apostel be wooko hii dei. Di den weli, neen den go suku wan peesi fu boo pikinso. Ma di den doo ape, wan gaan kulu sama be de ape e  wakiti den, fu di den be wani Yesesi leli den. Di Yesesi si den sama, en ati á weli a den. San a du? Beibel taki ‘a bigin leli den omen sani’, bika tyali fu den be e kisi en (Malik. 6:30-34). Te wi e koboloiki u ten anga u kaakiti fu yeepi taawan leti enke Yesesi, da u Dda di de a hemel e piisii anga u (Mat. 5:14-16). Te wi e du a sani ya, wi e soi taki u wani de aini a osufamii fu Yehofa.

9. Sowtu kado Yehofa gi libisama?

⁹ Yehofa gi libisama a gaandi fu meke pikin. Den mu yeepi den pikin ya fu dini en tu. Winsi fa den engel poi du omen sani di libisama á poi du, toku Yehofa á gi den a gaandi fu meke pikin. Neen meke efi yu abi pikin, i mu si en enke wan gaan sani taki Yehofa gi yu a gaandi ya. Yehofa gi mma anga dda a faantiwowtu fu kiya den pikin fu den anga den leli fi en (Efe. 6:4; Deit. 6:5-7; Ps. 127:3). A omen sani a olikanisâsi fu Yehofa seeka gi mma anga dda fu yeepi den fu kiya den pikin fu den enke fa Yehofa wani. Wi abi buku, felon, poku, anga taa sani di e yeepi mma anga dda fu du a sani ya. Ala den sani ya e soi kiin taki u Dda di de a hemel anga en Manpikin, lobi pikinnengee (Luk. 18:15-17). Te mma anga dda e kiya den pikin fu den enke fa Yehofa wani, ai piisii anga den. Den mma anga dda ya e yeepi den pikin fu kon aini a osufamii fu Yehofa. A so denseefi o fende a okasi fu libi fu teego aini a ten di e kon.

10-11. Sowtu wini wi o fende fu di Yehofa meke en Manpikin kon dede gi u?

¹⁰ Yehofa meke en wan kodo Manpikin kon dede gi u fu u be sa kon aini a osufamii fi en baka. Enke fa u be luku aini  paragraaf fo, da Yehofa be puu Adan anga Efa aini en osufamii fu di den be taangayesi en. A sani di den du ya, meke den bakapikin fu den lasi a gaandi ya tu (Rom. 5:12). A fuseefi Adan anga Efa be taangayesi Yehofa, neen meke a be abi leti fu puu den aini en osufamii. Ma san be o pasa anga den bakapikin fu den? Fu di Yehofa lobi libisama, meke a seeka sani gi den sama di wani aliki en fu kon aini en osufamii baka. A meke en wan kodo Manpikin, Yesesi Kelestesi kon dede gi u, fu fii u fu sondu (Yoh. 3:16; Rom. 5:19). Na a dede fu Yesesi, meke Yehofa be poi teke 144.000 libisama fu go tan a hemel enke en manpikin.​—Rom. 8:15-17; Openb. 14:1.

¹¹ Boiti den sama di o go a hemel, a omen miliyun taa sama e dini Gadu anga den hii ati. Den sama ya abi a howpu fu libi fu teego a goontapu, baka te den pasa a lasiti tesi na a kaba fu a dunsu yali tii fu Kelestesi (Ps. 25:14; Rom. 8:20, 21). Na a howpu di wi abi ya meke nownow kaba u sa kai Yehofa, u Dda (Mat. 6:9). Ala den sama di o weki baka, o leli fa fu dini Yehofa enke fa a wani. Yehofa o teke den sama di e du sani enke fa a wani, aini en osufamii.

12. Sowtu akisi wi o piki aini den paragraaf di e kon?

¹² Enke fa u si kaba, da a omen gaandi Yehofa gi libisama. Wan fu den gaandi di a gi u, a di a teke libisama fu toon en manpikin a hemel. Boiti dati, den sama di abi a howpu fu tan a goontapu ya, o toon en pikin tu, aini a nyun goontapu (Openb. 7:9). San u sa du nownow kaba fu soi Yehofa taki u wani de aini a osufamii fi en fu teego? Wi o luku a akisi ya aini den paragraaf di e kon.

13. San u mu du efu u wani kon aini a osufamii fu Yehofa? (Malikisi 12:30)

¹³ Te wi e dini Yehofa anga u hii ati, wi e soi taki u lobi en. (Leisi Malikisi. 12:30.) Wan fu den moo gaan kado di Yehofa gi libisama, na a dini di u poi dini en. Efu u lobi Yehofa wi o go e wooko anga den weiti fi en (1 Yoh. 5:3). Yehofa wani ala sama di e dini en, du san en Manpikin be taigi u. Yesesi be taki u mu yeepi sama fu kon sabi Yehofa, da u dopu den (Mat. 28:19). A be taigi u tu taki u mu lobi taawan (Yoh. 13:35). Yehofa e teke ala den sama di e holi den weiti fi en, aini a gaan osufamii fi en di de a goontapu ya.​—Ps. 15:1, 2.

14. Fa u sa soi taki u lobi taawan? (Mateyesi 9:36-38; Romesama 12:10)

¹⁴ I mu lobi taawan. Lobi na a moo pelensipali manii fu Yehofa (1 Yoh. 4:8). Fosi u be sabi Yehofa, neen a soi kaba taki a lobi u (1 Yoh. 4:9, 10). Te wi e du sani di e soi taki u lobi taawan, da wi e waka a Yehofa baka (Efe. 5:1). Wan fu den moo bun fasi fa u sa soi taki u lobi taawan, a te wi e yeepi den fu kon sabi Yehofa fosi a lati. (Leisi Mateyesi 9:36-38.) Na a yeepi di wi o yeepi den fu kon sabi Yehofa, o meke denseefi fende a okasi fu kon aini a osufamii fi en. Baka te wan sama dopu, u mu tan soi taki u lobi en ete (1 Yoh. 4:20, 21). Fa u sa du a sani ya? Wan fasi fa u sa soi taki u lobi u baala anga sisa, a te u nai denki ogii fu den. Wi e soi taki u lobi u baala anga sisa tu, te wi e si den pelensipali moo u.​—Leisi Romesama 12:10; Filip. 2:3.

15. Anga sama u mu e libi bun?

¹⁵ I mu e libi bun anga ala sama. Efu u wani tan aini a osufamii fu Yehofa, u mu e du san a Wowtu fi en e taki. Yesesi be leli u taki u mu e libi bun anga ala sama, winsi a u feyanti (Luk. 6:32-36). A ná ala yuu a sani ya makiliki. Efi i si taki ai taanga gi i fu libi bun anga ala sama, da meke moiti fu du sani enke Yesesi. Te wi e meke moiti fu du sani enke fa Yehofa wani, anga te wi e waka a Yesesi baka, da wi e soi u Dda di de a hemel taki u wani tan aini a osufamii fi en fu teego.

16. San u mu du efu wi á wani tyai polinen kon aini a osufamii fu Yehofa?

¹⁶ Luku bun fi yu á poli a osufamii fu Yehofa nen. Gaanse leisi den moo pikinwan aini wan osufamii, lobi waka a den moo gaanwan baka. Efu den moo gaanwan e du san Beibel taki, da den o waka a den baka. Ma efu den moo gaanwan bigin du sani di Yehofa á lobi, da den pikinwan o waka a den baka tu. A letiso a de anga a osufamii fu Yehofa. Efu wan Kelesten di be e dini Yehofa anga en hii ati, bigin taki lei fu a olikanisâsi, efuso bigin du sani di Yehofa á lobi, da taawan sa waka neen baka. Den sama di e du den sani ya e poli a nen fu a osufamii fu Yehofa (1 Tes. 4:3-8). U mu luku bun fu u nai waka a den sowtu sama ya baka. Wi á mu meke nawan sani poli wi anga u Dda di de a hemel.

17. Anga san u mu luku bun? Saide u mu luku bun anga a sani ya?

¹⁷ I mu e fitoow Yehofa, ná fitoow den sani fu a goontapu ya. Yehofa paamisi u taki efu u poti a Kownukondee fi en a fesi, da u du sani enke fa a wani, a o gi u nyanyan, koosi anga wan peesi fu tan (Ps. 55:22; Mat. 6:33). Efu wi e holi a sani ya a pakisei, u ná o fitoow den sani fu a goontapu ya, bika u sabi taki den á poi meke u piisii tuutuu. A te wan sama e  du sani enke fa Yehofa wani fosi a o poi piisii tuutuu (Filip. 4:6, 7). Winsi yu abi a moni fu bai omen sani, toku i mu luku efi yu o abi a ten anga a kaakiti fu solugu ala den sani ya. I mu luku tu efu den sani di i poi bai anga moni, nai toon den moo pelensipali sani gi i. Yu á mu feegete taki Yehofa gi u wan wooko fu du. Yu á mu meke nawan sani puu i pakisei na a wooko di Yehofa gi u. Wi á wani de enke a yonkuman di á be wani toon Yesesi bakaman, fu di a be lobi den gudu fi en. A sani di a du ya meke a lasi a okasi fu toon wan manpikin fu Yehofa.​—Malik. 10:17-22.

18. Sowtu belesi den sama di e aliki Yehofa o fende?

¹⁸ Den sama di e aliki Yehofa o fende a okasi fu dini en fu teego aini a ten di e kon. Den sama di o tan a goontapu o fende a gaandi fu seeka a goontapu te enke a toon wan paladeisi. Dyonson moo, a Kownukondee fu Gadu o seeka a goontapu ya. Yesesi o puu ala den takuu bakapisi fu a sondu fu Adan anga Efa. Yehofa o weki miliyunmiliyun sama di dede, da a o gi den a okasi fu libi fu teego aini wan paladeisi a goontapu (Luk. 23:42, 43). Te den sama di e dini Yehofa ná o abi sondu moo, den o kon de enke fa Gadu be meke u fu de na a bigin.​—Ps. 8:5.

19. San u mu e holi a pakisei?

¹⁹ Efi yu a wan fu den sama di o libi fu teego a goontapu ya, da a wan moin howpu yu abi. Gadu lobi i, a wani i tan aini a osufamii fi en fu teego. Efi i wani tan aini a osufamii fu Gadu, i mu du ala san i poi fu dini en enke fa a wani. I mu e libi anga den sani di Gadu paamisi wi a pakisei. I mu e si a gaandi di Yehofa gi u fu dini en enke wan gaan sani. Efi yu e du den sani ya, da aini a ten di e kon, yu o poi gafa u Dda di de a hemel fu teego.