1-2. San wi o luku aini a artikel ya?

MEKE u taki yu e wakiti wan mati fi i fu tyai wan sani kon gi i di yu abi taanga fanowdu. Fa i be o fii efu a á doo na a yuu di u be taki? Kande yu ati be o boon neen. Odo 13:12 e taki: ‘Te ai teke langa fu wan sama fende san ai angii fi en, da a sani ya sa meke a kusumi te da a siki neen ati.’ Ma efi i kon yee taki a wan bunbun sani du a mati fi i meke a á doo na a yuu di yu anga en be taki, yu ati ná o boon neen moo. A o moo makiliki gi i fu wakiti en tu.

² Aini a artikel ya, wi o luku wantu leli fu Beibel di o yeepi u fu wakiti Yehofa anga pasensi (Mika 7:7). Baka dati wi o luku tu okasi pe wi o abi fu wakiti Yehofa, anga sowtu wini den sama di e wakiti Yehofa o fende.

3. San Odo 13:11 e leli u?

³ Odo 13:11 e soi saide a pelensipali fu abi pasensi. Ai taki: ‘Te wan sama fende tyaipi gudu wan pasi, ai kaba gawgaw, ma te wan sama e tyai sani kon a wan pikinpikin, den gudu fi en e moo ipi dei fu dei.’ San a tekisi ya e leli u? Ai soi taki wan sama di e du sani anga koni, abi pasensi. Ai denki bun fosi a du son sani.

4. San Odo 4:18 e leli u?

⁴ Odo 4:18 e taki: ‘A pasi fu a sama di e du sani a wan letifasi, de enke te a peesi e kiin a mamanten. Ai kiin saafisaafi te enke a kiin kelle.’ A tekisi ya e soi u taki a  Yehofa seefi e yeepi a foluku fi en fu si sani moo kiin. Ai soi tu fa wan Kelesten e kengi saafisaafi fu du sani enke fa Yehofa wani. Ai teke ten fosi wan sama toon Yehofa mati. Efu wi e sutudeli a Wowtu fu Gadu ala yuu, da wi e meke moiti fu du den sani di wi e leli, wi o kon abi denseefi manii di Kelestesi be abi. Te wi e du a sani ya, wi o sabi Gadu moo bun tu. Wi o poti pakisei a wan ageisitoli di Yesesi be gi fu yeepi u fu fusutan a pisi ya moo bun.

5. Sowtu ageisitoli Yesesi gi di e soi taki ai teke ten fu wan sama bigin libi enke fa Yehofa wani?

⁵ Yesesi be gi wan ageisitoli fu soi fa a bun nyunsu fu a Kownukondee di wi e paati, e goo aini a ati fu wan sama di wani sabi a tuu. A be taki: ‘A sii e booko ain da ai goo kon bigi, ma a sama di paandi en á sabi fa ai du goo. Saafisaafi a doti seefi e meke nyanyan. A sii e goo fosi, da ai meke nyanyan, da te fu kaba a nyanyan e lepi’ (Malik. 4:27, 28). San Yesesi be wani leli wi anga a sani ya? A be wani soi u taki leti enke fa wan sii di paandi e goo saafisaafi, a so wan sama di e sutudeli Beibel e kengi saafisaafi (Efe. 4:22-24). Te a sani ya e pasa, u mu holi a pakisei taki a Yehofa e yeepi a sama fu kengi.​—1 Kor. 3:7.

6-7. San wi e leli fu a fasi fa Yehofa meke a goontapu?

⁶ Ala yuu te Yehofa e du sani, ai teke ten fu du en bun. Ai du sani anga pasensi, bika a á wani sama poli en nen. Boiti dati, a wani taawan fende wini fu den sani di ai du. Luku a fasi fa Yehofa meke a goontapu. A á meke ala sani gbullu a wan pasi, ma a teke en ten seeka den poti enke fa den mu de.

⁷ Beibel taki di Yehofa be o meke a goontapu, a luku on bigi a be o meke en. A maiki en, neen a poti den fosi siton fi en (Job 38:5, 6). Te Yehofa be kaba  meke wan sani, a be e teke en ten luku a sani di a meke (Gen. 1:10, 12). A be musu e switi gi den engel fu si den sani di Yehofa be e meke. Kande den be e sidon e luku sowtu nyun sani a be o meke. Beibel taki den engel be lobi den sani di Gadu meke te, neen den be e bali gafa en (Yopu 38:7). San a sani ya e leli u? A omen dunsu yali Yehofa wooko fu meke ala sani, ma di a luku den sani di a meke, a be si taki den be bun.​—Gen. 1:31.

8. San wi o luku aini den paragraaf di e kon?

⁸ Aini den paragraaf di pasa, u si taki a pelensipali fu abi pasensi. Now wi o poti pakisei a tu okasi pe wi abi fu wakiti Yehofa anga pasensi.

9. On ten wi abi fu wakiti Yehofa?

⁹ Baka te u begi, wi abi fu wakiti Yehofa fu a piki a begi fu u. Kande wi e begi Yehofa fu a gi u kaakiti fu holidoo te wan tesi e miti u, efuso fu yeepi wi anga wan swakifasi di wi abi. Kande Yehofa á piki a begi fi i na a yuu di i be denki. Saide a ná ala yuu Yehofa e piki den begi fu u wantenwanten?

10. Saide u mu abi pasensi te wi e begi Yehofa?

¹⁰ Yehofa e aliki den begi fu u (Ps. 65:2). Te wi e taigi Yehofa ala san de a wi ati, a sani ya e soi taki wi e fitoow en (Heb. 11:6). Ma te u begi Yehofa fu a yeepi u, useefi mu meke moiti du wan sani tu (1 Yoh. 3:22). Efi yu e begi Yehofa fu yeepi i fu tapu anga wan gwenti di a á lobi, iseefi mu e du ala san i poi fu tapu anga a sani ya. Di Yesesi be de a goontapu, a be yeepi u fu fusutan taki a ná ala yuu Yehofa o piki den begi fu u wantenwanten. A be taki: ‘E akisi naamo, da wi o fende, e suku naamo, da wi o fende, e koko a doo naamo, da den o opo a doo gi u’ (Mat. 7:7, 8). Efu wi e meke moiti fu du a sani di Yesesi taki ya, da wi e begi Yehofa ala yuu, u sa biibi taki u Dda di de a hemel o piki den begi fu u.​—Kol. 4:2.

11. Fa Hebrewsama 4:16 e yeepi u te wi e fii enke Yehofa e daaidaai fu piki den begi fu u?

¹¹ Winsi ai gei enke Yehofa e teke langa tumisi fu piki den begi fu u, toku a paamisi u taki a o piki den na a moo bun yuu. (Leisi Hebrewsama 4:16.) Neen meke te Yehofa á piki wan begi fu u na a yuu di u be wani, wi ati á mu boon neen. A omen yali kaba sama e begi fu a Kownukondee fu Gadu kon. Yesesi seefi be leli u taki u mu begi fu a sani ya (Mat. 6:10). Ma a be o de wan don sani fu gwe fika Yehofa fu di wi e fende taki a kaba á kon na a yuu di libisama be wani (Hab. 2:3; Mat. 24:44). A moo bun sani di u sa du, a fu tan begi Yehofa, da u wakiti en fu a piki a begi fu u na a moo bun yuu. A kaba o kon na a yuu di a mu kon, bika Yehofa poti a dei anga a yuu kaba di a o poli a goontapu ya. Di a ten ya o doo, useefi o si taki na a moo bun yuu Yehofa tyai a kaba kon.​—Mat. 24:36; 2 Peit. 3:15.

12. On ten a sa taanga gi u fu abi pasensi?

¹² Te sani nai waka a wan letifasi, wi abi fu wakiti Yehofa. Aini a goontapu ya, sama lobi libi ogii anga sama fu taa nasi, sama di komoto a taa kondee, efuso sama di kiya a wan taa fasi. Son leisi den e libi ogii anga sama di siki efuso malengii. Aini omen kondee sama e libi  ogii anga a foluku fu Yehofa fu di den e meke moiti fu du san Beibel e taki. Efu wan fu den sani ya e miti i, holi a sani di Yesesi be taki a pakisei. A be taki: ‘Na a sama di holidoo te na a kaba o fende wini’ (Mat. 24:13). Ma san i mu du efi i kon sabi taki wan sama aini a kemeente du wan gaan ogii? Efu den owluman sabi a taki kaba, yu o fika en gi den da i wakiti anga pasensi fu Yehofa seefi seeka sani? San den owluman abi fu du son yuu te wan sama du wan gaan ogii?

13. San Yehofa wani owluman du te wan sama du wan gaan sondu?

¹³ Te den owluman kon sabi taki wan sama aini a kemeente du wan gaan sondu, den e begi Yehofa fu a yeepi den fu si sani enke en (Yak. 3:17). Den owluman e meke moiti fu yeepi a sama di sondu fu daai kon a Yehofa baka (Yak. 5:19, 20). Den e du ala san den poi fu kibii a kemeente. Den e meke moiti tu fu toosutu den sama di fii a takuu bakapisi fu a sani di a sama du (2 Kor. 1:3, 4). Te den owluman kon sabi taki wan sama du wan gaan sondu, den mu meke moiti fu sabi fa sani waka pilisisi fosi den kuutu a toli. Baka dati den e begi Yehofa fosi den koboloiki Beibel fu gi a sama a sitaafu di fiti a sani di a du (Yel. 30:11). Den owluman nai daaidaai fu du sani, ma den nai feti du sani tu. Te owluman aini a kemeente e meke moiti fu du sani enke fa Yehofa wani, da sani e waka bun aini a kemeente. Ma winsi den owluman du sani pilisisi enke fa Yehofa wani, toku taa sama aini a kemeente sa fii den takuu bakapisi fu a sondu di a sama du ete. San i sa du efu wan sama aini a kemeente du wan hati sani anga i?

14. Sowtu toli aini Beibel sa yeepi i fu du sani enke fa Yehofa wani te wan baala efuso sisa du wan hati sani anga i?

¹⁴ Wan baala efuso sisa du wan hati sani anga i? A omen toli de aini Beibel fu sama di be wakiti Yehofa anga pasensi te taawan be libi ogii anga den. Den toli ya o yeepi u fu si fa u sa wakiti Yehofa anga pasensi, te wan baala efuso sisa du wan hati sani anga u. Wan fu den toli ya, a du fu Yowsefu. Winsi fa den baala fu Yowsefu be libi ogii anga en toku a á be  holi den na ati. Fu di a be tan poti ala en pakisei na a dini di a be e dini Yehofa, meke Yehofa be belesi en bakaten (Gen. 39:21). Yowsefu be e poti pakisei na ala den fasi fa Yehofa be e belesi en, neen meke a be poi gi den baala fi en paadon (Gen. 45:5). Efu wi e wakiti Yehofa anga pasensi leti enke Yowsefu, a o belesi u. A o yeepi u tu fu tan dini en anga u hii ati winsi san e miti u.​—Ps. 7:17; 73:28.

15. San yeepi wan sisa fu du sani enke fa Yehofa wani di sama be e libi ogii anga en?

¹⁵ Kande a sani di miti i ná ogii enke a sani di be miti Yowsefu, toku nawan sama e fii bun te taawan e libi ogii anga en. Efu wan sama du wan sani anga i, winsi a wan sama di nai dini Yehofa, toku wi o fende wini te wi e wooko anga den leli fu Beibel (Filip. 2:3, 4). Luku a toli fu wan sisa. Wan leisi wan uman neen wookope be e paati omen lei fu a sisa ya. Di a sisa yee den sani di a uman taki, ná pikin hati a hati en, toku a á go ligei anga a uman. A meke moiti fu du sani enke Yesesi. Te sama be e taki ogii fu Yesesi, a á be e piki den (1 Peit. 2:21, 23). Fu di a sisa ya á be wani du wan sani di be o hati en bakaten, meke a fika a taki. Bakaten a sisa kon yee taki a uman di be e taki en sani, be siki wan gaan siki wan hii pisiten kaba. Di a sisa yee a sani ya, a poolo taki a á be go ligei anga a uman, bika a be fusutan taki kande na a siki fi en be e meke ai du son sani.

16. San i mu holi a pakisei efu wan sani e fuka i nownow? (1 Peitilisi 3:12)

¹⁶ Efu wan sama e libi ogii anga i, holi a pakisei taki Yehofa de koosube fu den sama di booko-saka (Ps. 34:18). Yehofa e piisii te a si fa yu e wakiti en anga pasensi. Ai piisii tu te a si taki yu e fika den booko-ede fi i gi en (Ps. 55:22). A Yehofa na a Sama di o kuutu a hii goontapu. Ai si ala san e miti i, bika sama á poi kibii sani gi en. (Leisi 1 Peitilisi 3:12.) Neen meke efu wan sani e fuka i nownow, holi a pakisei taki a moo bun sani di i sa du, a fu wakiti Yehofa.

17. San Yehofa paamisi wi aini Yesaya 30:18?

¹⁷ Dyonson moo, u Dda di de a hemel o belesi u di a Kownukondee fi en o seeka a goontapu ya. Yesaya 30:18 e taki: ‘Yehofa e wakiti anga pasensi fu du bun sani gi u. A o opo taampu fu soi u tyali-ati. Bika Yehofa a wan Gadu di e kuutu sani a wan letifasi. Ala den sama di e wakiti en anga pasensi o de koloku.’ Yehofa o belesi ala den sama di e wakiti en. Ai belesi wi aini a ten ya kaba, ma a o moo belesi wi aini a ten di e kon.

18. Fa sani o de aini a ten di e kon?

¹⁸ Te den sama di e dini Yehofa o go aini a nyun goontapu, den ná o abi nawan fu den booko-ede di wi abi aini a ten ya moo. Ogii ná o de moo, pen ná o de moo tu (Openb. 21:4). Nawan sama o abi fu booko en ede taki a ná o fende den sani di a abi fanowdu, bika Yehofa paamisi u taki nyanyan anga taa sani di wi abi fanowdu o lai a goontapu (Ps. 72:16; Yes. 54:13). Ná pikin piisii wi o piisii di a ten ya o doo.

19. San Yehofa e seeka u gi nownow?

¹⁹ Nownow kaba Yehofa e seeka u fu libi aini a nyun goontapu. Neen meke u mu e meke moiti fu kengi den manii fu u fu du sani enke fa Yehofa wani. Yu á mu gwe fika Yehofa te sani nai go enke fa i be denki. Wan moo bun ten de a u fesi e kon, neen meke i mu wakiti Yehofa anga pasensi te enke a yuu doo di a o seeka a goontapu ya.