1. Saw yeepi i fu piisii te ye sutudeli den polofeititoli fu Beibel?

 WAN yonkuu baala den e kai Ben taki a lobi sutudeli den polofeititoli fu Beibel. I lobi sutudeli den polofeititoli di sikiifi aini Beibel, efuso ye si enke den taanga tumisi fu fusutan? Kande a nai switi gii fu sutudeli den polofeititoli fu Beibel. Ma tei sabi saide Yehofa meke sama sikiifi den sani ya poti aini en Wowtu, a sani ya o yeepi i fu kon lobi den.

2. San wo luku aini a artikel ya?

² A artikel ya naw soi u saw sa leli fu den polofeititoli namo, ma aw soi u faw mu sutudeli den tu. Bakadati wo ondoosuku tu polofeititoli di sikiifi aini a Beibel buku Daniyeli. Wo si tu fa den polofeititoli ya sa yeepi wi aini a ten ya.

3. Saw mu du efu u wani fusutan den polofeititoli fu Beibel?

³ Efu u wani fusutan den polofeititoli di sikiifi aini Beibel, da u mu suku yeepi. Luku a ageisitoli ya. Kow taki ye go a wan peesi di ya kaba sabi bunbun, ma wan mati fii di yu anga en e go sabi a peesi bun. A sabi pilisisi pe u de. A sabi pe den pasi e go tu. I be o teke en fu bigi taki a mati fii be wani tyai i go na a peesi pei be mu go. Yehofa de enke a mati aini a ageisitoli ya. A sabi pilisisi fa sani o waka aini a ten di e kon. Neen meke efu u wani fusutan den polofeititoli di sikiifi aini Beibel, u mu akisi Yehofa fu a yeepi u.​—Dan. 2:28; 2 Peit. 1:19, 20.

4. Saide Yehofa meke sama sikiifi polofeititoli poti aini Beibel? (Yelemiya 29:11) (Luku a fowtow tu.)

⁴ Leti enke fa mma anga dda wani den pikin fu den abi wan bun libi, a so Yehofa wani wi abi wan bun libi tu.  (Leisi Yelemiya 29:11.) Mma anga dda á poi taki fa sani o waka aini a ten di e kon, ma Yehofa poi taigi u pilisisi fa sani o waka aini a ten di e kon. Yehofa be meke sama sikiifi wantu polofeititoli aini Beibel fu wantu pelensipali sani di mu pasa (Yes. 46:10). Neen meke den polofeititoli di de aini Beibel, a wan kado di u Dda di de a hemel giw. Saw yeepi u fu biibi taki den sani di Beibel taki o pasa tuutuu?

5. San yonkuuwan sa leli fu a toli fu Max?

⁵ Yonkuuwan e miti anga omen sama a sikoo di nai lesipeki a Beibel. Son yuu den sani di den e du anga den sani di den e taki, e meke yonkuu baala anga sisa akisi denseefi efu den sani di den e leli a tuu. Luku a toli fu wan baala den e kai Max. A taki: ‘Di mi be e go a sikoo mi be e akisi miseefi efu a Gadu meke sama sikiifi a Beibel.’ Max mma anga en dda be e wooko anga a Beibel te den be e piki den akisi fi en. Ma Max seefi be du wan sani tu. A taki: ‘Mi be e sutudeli den polofeititoli anga miseefi. Mi be e paati den sani di mi leli anga taa yonkuu baala anga sisa tu.’ San a be a bakapisi? Max taki: ‘Baka di mi du a sani ya mi be e biibi taki a Gadu meke sama sikiifi a Beibel.’

6. Sai mu du efii nai kaba biibi son sani fu Beibel? Saide i mu du a sani ya?

⁶ Leti enke Max, efu ai taanga gii fu biibi son sani fu Beibel, da ya mu fii wan fasi. Ma i mu du wan sani wantenwanten. Tei nai kaba biibi son sani fu Beibel, a sani ya de enke fuusu di e poli a biibi fii saafisaafi. Efi ya wani fuusu poli a biibi fii, akisi iseefi taki: ‘Mi e biibi den sani di Beibel taki o pasa aini a ten di e kon?’ Efii nai kaba biibi den sani ya, dai mu sutudeli den polofeititoli di kon tuu kaba. Luku fai sa du a sani ya.

7. Faw sa waka a Daniyeli baka te we sutudeli den polofeititoli fu Beibel? (Daniyeli 12:10) (Luku a fowtow tu.)

⁷ U sa waka a Daniyeli baka te u luku a fasi fa a be e sutudeli den polofeititoli. Daniyeli be sabi fu saide ai sutudeli den polofeititoli, bika a be wani sabi a tuu. Daniyeli be abi sakafasi tu. A be sabi taki efu a tan koosube a Yehofa neen ai aliki en, a be o yeepi en fu fusutan den polofeititoli di sikiifi aini Beibel (Dan. 2:27, 28; Leisi Daniyeli 12:10.) Fu di Daniyeli be abi sakafasi, meke a be e fitoow Yehofa tu (Dan. 2:18). Boiti dati, a be e sutudeli finifini. A pisiten di a be de a libi a be e suku piki aini a pisi fu Beibel di be de a ten de (Yel. 25:11, 12; Dan. 9:2). Faw sa waka a Daniyeli baka?

8. Saide son sama e sutudeli den polofeititoli fu Beibel? Saw mu du?

⁸ Saide ye sutudeli den polofeititoli fu Beibel? Ye sutudeli den polofeititoli fu  Beibel fu dii wani sabi a waaleiti? Efu a so a de, da Yehofa o yeepi i (Yoh. 4:23, 24; 14:16, 17). Ma son sama a fu taa sani ede den e sutudeli den polofeititoli. Den e sutudeli den, bika den wani soi sama taki a Beibel a ná Gadu a komoto. Den sama ya fende taki den sa taki gi denseefi san bun anga san á bun. Ma wa de enke den sama ya, bika u sabi saide we sutudeli Beibel. Boiti dati, wi abi ete wan pelensipali manii fanowdu efu u wani fusutan den polofeititoli fu Beibel.

9. Sowtu manii u mu abi efu u wani fusutan den polofeititoli fu Beibel?

⁹ U mu abi sakafasi. Yehofa taki aw yeepi den sama di abi sakafasi (Yak. 4:6). Neen meke u mu begi Yehofa fu a yeepi u fu fusutan den polofeititoli fu Beibel. Efu wi abi sakafasi, wo teke den sani di den baala di e tii a wooko e leli u, bika a Yehofa poti den a wooko (Luk. 12:42). Yehofa a wan Gadu di á lobi buuya, neen meke a wan kulu sama namo ai koboloiki fu yeepi u fu fusutan a Beibel.​—1 Kor. 14:33; Efe. 4:4-6.

10. San a toli fu Esther e leli i?

¹⁰ Ondoosuku sani finifini. Bigin sutudeli wan polofeititoli dii lobi. Na a sani ya wan sisa den e kai Esther du. A be wani sabi moo sani fu den polofeititoli di e taki fu a Mesiyas. A taki: ‘Di mi be abi 15 yali, mi bigin ondoosuku sani fu si efu a tuu taki den polofeititoli di e taki fu a Mesiyas be sikiifi fosi Yesesi be kon a goontapu.’ Den sani di a leisi aini den bukulolo fu a Dede Ze yeepi en fu biibi taki den polofeititoli fu a Mesiyas a tuu. A taki: ‘Son wan fu den polofeititoli ya be sikiifi fosi a ten fu Kelestesi. A Gadu den musu komoto. Son yuu a omen leisi mi be mu leisi wan toli fosi da mi fusutan en.’ Esther e piisii taki a du a sani ya. Baka di a sutudeli wantu polofeititoli finifini, a taki: Mi be man si kiin taki den sani di sikiifi aini Beibel a tuu.’

11. Sowtu wini we fende te we biibi taki a Wowtu fu Gadu e taki a tuu?

¹¹ Te we si fa son polofeititoli di de aini a Wowtu fu Gadu kon tuu kaba, we fitoow Yehofa anga u hii ati. We wooko anga den sani di ai taigi u tu. Boiti dati, den polofeititoli di de aini Beibel e soi u saw pasa aini a ten di e kon. Neen meke te we sutudeli den polofeititoli, a howpu fu we kon moo taanga, winsi sai miti u. Meke u luku tu polofeititoli di Daniyeli be sikiifi. Den polofeititoli ya e kon tuu nownow. Efu we fusutan den bun, da wo man du sani anga koni.

12. San den futu di ‘mokisa anga ayee anga safu tokotoko’ wani taki? (Daniyeli 2:41-43)

¹² Leisi Daniyeli 2:41-43. Di Daniyeli be puu a deen gi Kownu Nebukadnesar, a taki den futu fu a pobiki meke anga ‘ayee di mokisa anga safu tokotoko’. Te we  maiki a polofeititoli ya anga den taa polofeititoli di sikiifi aini a buku Daniyeli anga Openbaring, da we si taki den futu fu a pobiki wani taki Ameekankondee anga Ingiisikondee. Den tu kondee ya e wooko makandaa anga denseefi. A den moo abi makiti a hii goontapu. Daniyeli be taki fu a tiimakiti ya taki: ‘A kownukondee ya o taanga a wanse, da a swaki na a taa se.’ Saide wan pisi be o swaki? Bika den sama di den e tii di wani taki a tokotoko ‘naw poi wooko bun anga denseefi.’ Neen meke a tiimakiti ya á poi taanga enke ayee. b

13. Sowtu pelensipali tuu toli u kon sabi fu a polofeititoli ya?

¹³ A omen pelensipali sani we kon sabi te we luku den sani di Daniyeli sikiifi fu a pobiki di Nebukadnesar be deen. A omen sani we leli fu a futu fu a pobiki ya. A fosi sani di u kon sabi, a taki a tiimakiti fu Ingiisikondee anga Ameekankondee e soi taki den taanga. Na Ameekankondee anga Ingiisikondee be wini a Fosi Goontapu Feti anga Du Fu Tu Goontapu feti. Ma a tiimakiti ya swaki tu, bika den sama di den e tii e feti anga denseefi anga lanti. Du fu tu sani di u kon sabi, a taki a tiimakiti fu Ingiisikondee anga Ameekankondee na a lasiti tiimakiti di o tii fosi a Kownukondee fu Gadu poli ala den kownukondee fu libisama. Winsi taa tiimakiti e du sani fu fooseli a tiimakiti fu Ingiisikondee anga Ameekankondee, toku den naw man teke den peesi. Bika a ‘siton’ di wani taki a Kownukondee fu Gadu o naki a futu fu a pobiki booko pisipisi. Den futu fu a pobiki wani taki a tiimakiti fu Ingiisikondee anga Ameekankondee.​—Dan. 2:34, 35, 44, 45.

14. Te we fusutan a polofeititoli fu den futu di meke anga ayee anga tokotoko, da fa a sani ya o yeepi u fu du sani anga koni?

¹⁴ Ye biibi taki a polofeititoli fu Daniyeli di e taki fu a futu di mokisa anga tokotoko a tuu? Efi ye biibi a sani ya, da yo du sani anga koni. I naw suku fu meke tyaipi moni efuso fu kon gudu, bika i sabi taki dyonson a ogii goontapu fu Saatan ya o poli (Luk. 12:16-21; 1 Yoh. 2:15-17). A fusutan dii kon fusutan a polofeititoli ya o yeepi i tu fu du a peleikiwooko fayafaya (Mat. 6:33; 28:18-20). Neen meke a bun fu akisi iseefi taki: ‘Den bosoloiti di mi e teke e soi taki mi e biibi taki dyonson a Kownukondee fu Gadu o poli den tiimakiti fu libisama?’

15. Sama na ‘a kownu fu noord’ anga ‘a kownu fu zuid’ aini a ten ya? (Daniyeli 11:40)

¹⁵ Leisi Daniyeli 11:40. Daniyeli kapitel 11 e taki fu tu kownu efuso tiimakiti di e sitee anga denseefi, bika den wani abi makiti a hii goontapu. Te we maiki den polofeititoli ya anga den taawan di sikiifi aini Beibel, da we si taki ‘a kownu fu noord’ a Rosiyakondee anga den kondee di e holibaka gi en. ‘A kownu fu zuid’ na a tiimakiti fu Ingiisikondee anga Ameekankondee. c

16. San ‘a kownu fu noord’ e du anga a foluku fu Gadu?

¹⁶ Ná pikin sani e miti den baala anga  sisa di e tan na a pisi pe ‘a kownu fu noord e tii’. Sama e fon son Kotoigi. Ma a ná dati wawan, den e poti den a sitaafu-osu fu a biibi fu den ede. Den sani di ‘a kownu fu noord’ e du anga den baala anga sisa fu u e taanga den biibi. Saide? Bika den sani di e miti den baala anga sisa e meke den polofeititoli di Daniyeli be sikiifi kon tuu d (Dan. 11:41). A sabi di u sabi a sani ya e yeepi u fu tan poti pakisei na a howpu di wi abi. Boiti dati, ai yeepi u fu tan dini Yehofa.

17. Sowtu tesi be e miti den baala anga sisa di e tan na a pisi pe ‘a kownu fu zuid’ e tii?

¹⁷ Aini a ten di pasa ‘a kownu fu zuid’ be e libi ogii anga a foluku fu Gadu. Na a ten fu a Fosi Goontapu Feti anga Du Fu Tu Goontapu feti, den be poti tyaipi baala anga sisa a sitaafu-osu, bika den á be wani go a feti. Boiti dati, den be puu son pikin fu baala anga sisa a sikoo, bika den  á be wani singi gi a faaka. Baka wantu yali, den baala anga sisa di e tan na a pisi pe a kownu fu zuid e tii kisi taa tesi pe den be mu soi taki den nai gwe fika Yehofa. Meke u taki den e sitemu, kande wan Kelesten sa fende taki wan palitei efuso wan politikiman bun moo a taawan. Winsi a nai sitemu toku a sa teke se aini en ati, bika kande a wani wan palitei efuso wan politikiman wini. Neen meke winsi u nai teke se aini politiki, toku u mu luku bun fu u nai teke se aini wi ati.​—Yoh. 15:18, 19; 18:36.

18. San we du te u si fa den tu kownu e sitee anga denseefi? (Luku a fowtow tu.)

¹⁸ Den sama di nai biibi den polofeititoli fu Beibel sa feele bunbun fasi te den si fa ‘a kownu fu zuid’ e tan sitee anga ‘a kownu fu noord’ (Dan. 11:40). Ala den tu kownu ya abi bom di sa kii ala sama a goontapu. Ma u sabi taki Yehofa naw gi den a okasi fu du a sani ya (Yes. 45:18). Neen meke te we si fa ‘a kownu fu zuid’ e sitee anga ‘a kownu fu noord’, u nai feele. A taanga u biibi e kon moo taanga. A sitee di den e sitee anga denseefi e soi taki a kaba fu a goontapu de koosube.

19. Saw mu holi a pakisei te we taki fu den polofeititoli fu Beibel?

¹⁹ Wa sabi fa son polofeititoli aini Beibel o kon tuu. Polofeiti Daniyeli seefi á be sabi san den polofeititoli di a be sikiifi wani taki (Dan. 12:8, 9). Winsi wa sabi pilisisi fa son polofeititoli o kon tuu, toku dati á wani taki den naw kon tuu. U sa biibi taki Yehofa o yeepi u fu sabi saw mu sabi. Aw du en na a yuu di a poti, leti enke fa a be du kaba.​—Amos 3:7.

20. Sowtu simpan polofeititoli o kon tuu dyonson? Saw mu du?

²⁰ Den foluku o taki: ‘Freide de, ala sani e go bun! (1 Tes. 5:3) Te den o taki a sani ya, da den tiiman fu goontapu o feti anga den falisi keliki. Den o poli den (Openb. 17:16, 17). Bakadati den o kon feti anga a foluku fu Gadu (Eseik. 38:18, 19). Te a sani ya o pasa, da a lasiti feti fu alimakedon o bigin (Openb. 16:14, 16). U sa biibi taki aa fika langa moo fosi den sani ya o pasa. Fosi a ten de doo, u mu soi taki u lobi u Dda di de a hemel, bika wo tan poti pakisei a den polofeititoli fu Beibel. Wo yeepi taawan fu du aseefi sani ya tu.