• ‘Mi be e si enke mi man be e siibi anga wan taa uman tuutuu.’

• ‘Sen be e kisi mi. Mi be e si enke mia moin. Mi be e fii enke mia bun.’

• ‘Mia be e taki anga nawan sama. Mi be e kusumi. Mia be abi nawan sama fu toosutu mi.’

• ‘Mi be e si enke Yehofa nai booko en ede anga mi.’

Den wowtu di sikiifi a tapu ya e soi fa wan uman e fii te en man e luku porno. Efu wan man e luku porno efuso sekisi fowtow wantu mun efuso omen yali langa sondee fi en uman sabi, a sani ya sa meke en uman nai fitoow en moo. Wan sisa be taki: ‘Mi be e si enke mia sabi ala sani fu a man fu mi. Mi be e si enke ai kibii sani gi mi.’

A artikel ya meke fu yeepi uman di man e luku porno. a Ai taki fu wantu leli fu Beibel di sa toosutu den. Ai soi tu taki Yehofa wani yeepi den, bika a lobi den. Boiti dati, aw yeepi den fu fii bun. Aw yeepi den tu fu den á gwe fika Yehofa. b

Ya poi si ala den sani dii man e du, ma i sa du sani fi ya kusumi tumisi. Poti pakisei a den sani di wo taki ya.

Ya mu si enke a yu a fowtu komoto. Wan uman sa si enke a meke wan fowtu, kande fu di en man e luku porno. Alice c be e si enke aa bun sai. A be e si enke aa moin gi a man fi en. A be e akisi enseefi taki: ‘Saide mi man e luku taa uman?’ Danielle taki: ‘A sani di mi man be e du be e meke mi fii booko-saka. Mi ati be e boon a miseefi. Mi be e si enke na a boon di mi ati be e boon meke sani nai go bun aini mi toowlibi.’

Efu a so ye fii, da holi a pakisei taki Yehofa naw akisi i faantiwowtu fu a sani dii man e du. Yakowbesi 1:14 taki: ‘Tesi e miti wan sama fu di den fii fi en e koli en’ (Rom.  14:12; Filip. 2:12). Pe fii gii seefi a fowtu, holi a pakisei taki Yehofa e si a moiti di ye meke fi ya gwe fika en.​—2 Kolon. 16:9.

Wan uman sa si enke en man e luku porno, kande fu di aa bun efuso moin gi en. Ma a sani ya a ná tuu. Ondoosukuman taki te wan man e luku porno, da uman á de di poi siibi anga en te da a sai en.

Ná booko yu ede tumisi. Catherine taki a hii dei a be e denki taki en man e luku porno. Frances taki: ‘Mi be e booko mi ede te mia be sabi pe mi man de. A hii dei mi be e kusumi.’ Son sisa e taki fa sen e kisi den te den de anga taa baala anga sisa di sabi sowtu polobelema den man fu den abi. Son wan fu den e fii enke a den wawan de, bika nawan sama nai fusutan den.

Aa fowtu taki ye fii so. Ma efu na ala yuu ye poti pakisei na a sani de, yo moo booko yu ede. Poti pakisei na a de di yu anga Yehofa de mati, bika a sani ya o yeepi i fu holidoo.​—Ps. 62:2; Efe. 6:10.

Te ye leisi den toli fu uman aini Beibel di be e tyali, dai teke ten pakisei sai leisi, a sani ya o yeepi i. Den uman ya be fende taanga-sikin di den begi Yehofa. A ná ala yuu Yehofa be e puu den polobelema fu den, ma a be e yeepi den fu den á buuya. Wan fu den uman ya a Hana. ‘Sani be e moo Hana tuutuu.’ Baka di Hana ‘begi Yehofa wan hii pisiten’ a be e fii moo bun, winsi fa aa be sabi fa sani o waka aini a ten di e kon.​—1 Sam. 1:10, 12, 18; 2 Kor. 1:3, 4.

Suku yeepi a den owluman. Den baala ya de enke wan peesi ‘pe sama sa go kibii gi gaan winta, wan peesi pe sama sa go kibii te gaan alen e kon’ (Yes. 32:2). Den baala ya sa yeepi i fu fende wan sisa dii sa taki anga en. Aw toosutu i tu.​—Odo 17:17.

I si enke i sa yeepi i man fu tapu anga a gwenti fu luku porno? Kande. Beibel e soi taki efii wani losi wan polobelema efuso efii wani wini wan taanga feyanti, da ‘tu sama bun moo wan’ (Peleik. 4:9-12). Ondoosukuman kon si taki te toowpaa e wooko makandaa, a sani ya sa yeepi a man fu tapu anga  a gwenti fu luku porno. A uman o leli fu fitoow en man baka tu.

Efii man e meke moiti fu tapu anga a gwenti fu luku porno, aw abi bun bakapisi. A begi Yehofa fu a gi en kaakiti? A suku yeepi a den owluman? (2 Kor. 4:7; Yak. 5:14, 15) A seeka sani fu aa poi luku porno moo? Ai meke moiti fu nai de ala yuu neen computer efuso telefon? Ai tan faawe fu sani di sa de enke wan tesi gi en? (Odo 27:12) A wani i yeepi en tuutuu? Efu ai du den sani ya, da kande yo poi yeepi en.

Saide u taki so? Meke u luku wan toli. Felicia toow anga Ethan di be e luku porno di a be yonkuu. Felicia e du sani fu meke a moo makiliki gi Ethan fu taki anga en te ai fii fu luku porno. Ethan taki: ‘Mi nai koli mi uman. Mi nai kibii sani gi en. Ai yeepi mi fu tan faawe fu sani di sa de enke wan tesi gi mi. A lobi akisi mi faaigo anga mi. Ai yeepi mi tu fu mia go a internet tumisi.’ Ai hati Felicia taki Ethan lobi luku porno. Ma a taki: ‘A boon di mi ati e boon anga a fasi fa mi e fii, nai yeepi Ethan fu tan faawe fu a takuu gwenti ya. Baka di u taki fu den sani di e moo en, a sani ya be yeepi mi anga a fasi fa mi e fii.’

Den sowtu takimakandaa ya nai yeepi a man namo fu tapu anga a luku di ai luku porno, ma ai yeepi a uman tu fu fitoow en man baka. Te wan man de kabakaba fu taki fu den swakifasi fi en, san ai du ala dei, anga pe ai go, a sani ya o meke a moo makiliki gi en uman fu fitoow en baka, bika a nai kibii sani gi en.

I si enke i sa yeepi i man na a fasi ya? Kande u sa leisi a artikel ya, da u taki fi en. A man fii mu wani tapu anga a gwenti ya. A mu du sani tu di o meke i fitoow en baka. Pe fu a man fii holi i na ati, a mu meke moiti fu fusutan fa ye fii. I mu holibaka gi a moiti di ai meke tu fu tapu anga a takuu gwenti ya. I mu gi en a okasi fu a du sani di o meke i fitoow en baka. Ala u tu man mu sabi saide wan sama e luku porno anga fa a sa tapu anga a gwenti ya. d

Efi ye si enke wo kwali te wo taki anga useefi, da u sa akisi wan owluman di u sabi bun fu sidon anga u. I mu sabi taki winsi i toowpaa tapu anga a gwenti fu luku porno, toku a sa teke ten fosi yo ma fitoow en  baka. Ma ya mu gi abaa. Poti pakisei a den pikinpikin sani di e soi taki sani e go bun aini i toowlibi. Holi a pakisei taki efu ala u tu man abi pasensi, a toowlibi fu u o kon taanga baka.​—Peleik. 7:8; 1 Kor. 13:4.

Efu baka wan pisiten i man bigin luku porno baka, da a sani ya wani taki noiti aw man tapu anga a takuu gwenti ya? A naabi fu de so. Efu a be abi a gwenti ya wan hii pisiten kaba, da kande aw abi fu feti anga a gwenti ya en hii libi langa. Winsi wan sama tapu anga a gwenti ya omen yali, toku a sa bigin luku porno baka. Ma efu aa wani a sani ya pasa, da a mu du omen sani fu kibii enseefi. Kande a mu tan wooko anga den sani di a be seeka fu aa luku porno moo, winsi a tapu anga a gwenti ya kaba (Odo 28:14; Mat. 5:29; 1 Kor. 10:12). A mu ‘meke moiti fu denki taa fasi’. A mu ‘buuse ogii’  tu. A mu buuse porno anga iniiwan taa sani di á kiin. Wan fu den sani ya na a pee di sama e pee anga den sen peesi fu meke den fii bun (Efe. 4:23; Ps. 97:10; Rom. 12:9). I man de kabakaba fu du den sani ya? Efu a meke moiti, aw poi tapu anga a takuu gwenti ya. e

Sai sa du efii toowpaa nai meke moiti fu tapu anga a gwenti fu luku porno? A sani ya sa meke i lasi-ati. A sa meke yu atiboon tu. Boiti dati, i sa fii enke i man á lobi i. Ma fika ala sani gi Yehofa. A sani ya o yeepi i fi ya booko yu ede tumisi (1 Peit. 5:7). Meke moiti fu kon moo koosube a Yehofa. Sutudeli, begi, dai teke ten pakisei sai leisi. Efi ye du den sani ya, Yehofa seefi o kon koosube ai tu. Yesaya 57:15 taki Yehofa e tan anga den sama di taawan e ‘tyotyo anga den sama di abi sakafasi’, bika a wani yeepi den. A wani den de koloku. Meke moiti fu de a moo bun Kelesten dii sa de. Suku yeepi a den owluman. Tan howpu taki wan dei a man fii o kengi anga en hii ati.​—Rom. 2:4; 2 Peit. 3:9.