U be si aini a artikel de taki libisama anga den engel mu sabi a piki fu wan pelensipali akisi. Den mu sabi fa a gaan nen fu Yehofa o santa. A toli ya e soi taki a Yehofa na a moo bun sama di sa tii wi. Ma wan taa sani tu a efu libisama o tan aliki Gadu.

Saide a de fanowdu nownow fu taki fu a pelensipali akisi di abi fu du anga a nen fu Yehofa anga a santa di a nen fi en mu santa? Meke u luku dii sani.

A fosi sani: Saatan poli a nen fu Yehofa aini a dyali fu Eden. A akisi di Saatan poti gi Efa, e soi taki a be wani Efa si Yehofa enke wan giili Gadu di e akisi den sama di e dini en sani di den á poi du. Bakadati Saatan taki den sani di Yehofa taki a ná tuu. A kai Yehofa leiman. A so Saatan poli a nen fu Yehofa. Di a du a sani ya, neen a toon ‘Didibii’ di wani taki ‘ogii-ati leiman’ (Yoh. 8:44). Efa biibi den lei fu Saatan, neen meke a ná aliki Yehofa. A sani di a du ya e soi taki aa be wani Yehofa tii en (Gen. 3:1-6). Te anga a dei fu tide Saatan e tan poli a nen fu Yehofa. Ai paati lei taki Yehofa naabi bun manii. Den sama di e biibi den lei ya nai aliki Yehofa. Neen meke a foluku fu Gadu e si en enke wan gaan sani te sama e poli a nen fu Yehofa. Na a poli di sama e poli a nen fu Yehofa meke ogii lai a goontapu so.

Du fu tu sani: Yehofa wani sani go bun anga den sani di a meke. Neen meke Yehofa o kiin a nen fi en. A sani ya pelensipali gi en. Neen meke a be taki: ‘Mio santa a gaan nen fu mi’ (Eseik. 36:23). Yesesi seefi be soi san mu de a moo pelensipali sani gi ala den sama di e dini Yehofa te den e begi. A be taki: ‘I nen mu santa’ (Mat. 6:9). Beibel e soi wi ala yuu taki u mu gi a nen fu Yehofa gaandi. Luku wantu tekisi aini Beibel di e soi a sani ya: ‘Taigi ala sama fu a gaandi di a nen fu Yehofa mu fende’ (1 Kolon. 16:29; Ps. 96:8). ‘U singi gafa a gaan nen fi en’ (Ps. 66:2). ‘Mio gafa a nen fii fu teego’ (Ps. 86:12). Wan leisi di Yesesi be de aini a tempel a Yelusalem, a be taki: ‘Nda, gi a nen fii gaandi.’ Neen Yehofa piki Yesesi komoto a hemel taki: ‘Mi be gi mi nen gaandi kaba. Ma mio gi en gaandi baka.’​—Yoh. 12:28. a

Du fu dii sani: Den sani di Yehofa o du aini a ten di e kon abi fu du anga a nen fi en. Saw pasa na a kaba fu a Dunsu Yali Tii fu Kelestesi? Libisama anga den engel o akisi denseefi efu a de fanowdu fu santa a nen fu Yehofa ete? Fu fende a piki fu den  akisi ya, da u mu luku den tu pelensipali sani ya: Efu libisama o tan aliki Gadu anga efu Gadu abi a leti fu de u Tiiman. Den sama di tan aliki Gadu mu soi ete taki den nai gwe fika en? Nono. A ten de den naw abi sondu moo, bika den pasa a lasiti tesi kaba. Den sama ya o libi fu teego. I si enke libisama anga den engel o tan akisi denseefi efu Gadu abi a leti fu tii wi, efuso taki paatifasi o de a den mindii? Nono. A ten de ala den sama di de a hemel anga goontapu o sabi taki a Yehofa abi a leti fu tii wi fu teego. Ma fa a de anga a nen fu Yehofa?

A ten de ala sama o sabi taki a nen fu Yehofa santa. Nawan sama o man poli a nen fu Yehofa moo. A nen fu Yehofa o de a moo pelensipali sani gi ala den sama di e dini en. Saide? Bika den o si den gaan sani di ai du. Fu di Yesesi abi sakafasi meke aw gi a tii neen dda baka. ‘A so Gadu o de ala sani gi ala sama’ (1 Kor. 15:28). Bakadati, ala sama a hii goontapu o piisii, bika den o ‘fii a wan foondoo fasi enke pikin fu Gadu’ (Rom. 8:21). A so a sani di Yehofa be abi pakisei o kon tuu. Aw meke den pikin fi en a hemel anga goontapu toon wan gaan famii.​—Efe. 1:10.

Fa ala den sama a hemel anga goontapu o fii te ala den sani ya pasa? Den o fii bun. Den o gafa a gaan nen fu Yehofa. A psalm sikiifiman David be sikiifi taki: ‘Meke sama gafa a nen fu Yehofa . . . Meke den gafa a nen fu Yehofa fu teego’ (Ps. 72:18, 19). Tyaipi sani o de fu saide u mu gafa Yehofa.

A nen fu Yehofa e soi sama neen tuutuu. Te we pakisei a nen fi en, da we denki a lobi fi en (1 Yoh. 4:8). Ala yuu wo holi a pakisei taki a fu di Yehofa lobi u meke a meke u. A fu di a lobi u meke a meke en Manpikin kon dede giw tu. Boiti dati, a fu di a lobi u meke a soi u taki a abi a leti fu de u Tiiman. A fu teego wo si fa Yehofa e soi den engel, libisama, anga den taa sani di a meke taki a lobi den. A fu teego wo kon koosube aw Dda. A fu teego wo singi gafa a gaan nen fi en tu.​—Ps. 73:28.