1. Enke fa Hebrewsama 12:1 e soi, da saw mu du fu man lon a siteelon te na a kaba?

 BEIBEL e maiki a libi fu wan Kelesten anga wan siteelon. Den sama di lon a siteelon te na a kaba o fende teego libi (2 Tim. 4:7, 8). U mu du ala saw man fu tan lon a siteelon, bika a kaba koosube. Apostel Pawlesi be lon a siteelon fu libi te na a kaba. Neen meke a be taki saw yeepi u fu wini a siteelon ya. A be taki ‘u mu towe ala den lai fu wi . . . u mu holidoo te wi e lon a siteelon di u mu lon ete.’​—Leisi Hebrewsama 12:1.

2. San a wani taki fu ‘towe ala den lai fu wi’?

² Pawlesi be taki ‘u mu towe ala den lai fu wi’. San a be wani taki anga a sani ya? Pawlesi be wani soi taki wa mu tyai lai di á de fanowdu. Den lai ya sa meke u nai lon gaw moo. Den sa meke u weli tu. Neen meke efu u wani holidoo te na a kaba, da u mu ondoosuku useefi gawgaw fu si efu we tyai lai di á de fanowdu. Efu u si taki we tyai den sowtu lai de, u mu towe den wantenwanten. Ma na a taase wa mu poti den lai di u mu tyai a wan se, bika efu u be o du a sani de, u naw man tan lon a siteelon di u mu lon (2 Tim. 2:5). San a den lai di u mu tyai?

3. (a) Enke fa Galasiyasama 6:5 e soi, da san u mu tyai? (b) San wo luku aini a artikel ya? Saide wo luku den sani ya?

³ Leisi Galasiyasama 6:5. Pawlesi kai wan sani aini a tekisi ya di u mu tyai. A be taki: ‘Ala sama o tyai en faantiwowtu.’ Pawlesi e taki aini a tekisi ya fu wan fu den lai di useefi mu tyai. Wan fu den sani ya na a dini di u mu dini Gadu enke fa a wani. Sama á poi tyai a lai ya gi  taawan. Aini a artikel ya, wo luku san a den lai fu wi anga faw sa tyai den. Wo luku tu san a wantu lai di we tyai di á de fanowdu. Boiti dati, wo si faw sa towe den lai de. Te we tyai den lai fu wi anga te we towe den lai di á de fanowdu, a sani ya o yeepi u fu tan lon a siteelon fu libi.

4. Saide aa taanga giw fu holi useefi na a paamisi di u paamisi Yehofa taki wo dini en fu teego? (Luku a fowtow tu.)

⁴ A paamisi di u paamisi Yehofa taki wo dini en fu teego. Te wan sama paamisi Yehofa taki aw libi enke fa a wani, ai paamisi en taki aw dini en, aw du san a wani tu. U mu du saw paamisi Yehofa. Ala den sani di u paamisi Yehofa a wan gaan faantiwowtu, ma den á taanga giw tumisi, bika Yehofa meke u fu du san a wani (Openb. 4:11). Yehofa meke wi anga a fii fu kon sabi en anga fu dini en. Boiti dati, a meke wi enke fa enseefi de. Neen meke u poi kon koosube neen. We piisii fu du san a wani (Ps. 40:8). Te we du san Gadu wani, we waka neen  Manpikin baka. A sani ya o meke u ‘fende kaakiti baka’.​—Mat. 11:28-30.

5. Saw yeepi i fu du sai paamisi Yehofa? (1 Yohanisi 5:3)

⁵ Saw yeepi i fu tyai den lai fii? Tu sani sa yeepi i. A fosi sani, i mu kon moo lobi Yehofa. Yo man du a sani ya te ye teke ten pakisei ala den bun di Yehofa du gii, anga den sani di aw du gii aini a ten di e kon. O moo i lobi Yehofa, o moo aw makiliki gii fu aliki en. (Leisi 1 Yohanisi 5:3.) Du fu tu sani, waka a Yesesi baka. Yesesi be poi du san Gadu wani, bika a be e begi Yehofa fu a yeepi en. A be e poti ala en pakisei a den wini di a be o fende aini a ten di e kon tu (Heb. 5:7; 12:2). Leti enke Yesesi, i sa begi Yehofa fu a gii kaakiti. I sa begi en tu fu a yeepi i fu tan poti pakisei na a howpu di wi abi fu libi fu teego. Efii lobi Yehofa anga i hii ati, neen ye waka neen Manpikin baka, yo man du den sani dii paamisi en.

6. Saide u mu e tyai den faantiwowtu fu wi aini a osufamii? (Luku a fowtow tu.)

⁶ Den faantiwowtu di wi abi aini a osufamii. Aini a siteelon fu libi, u mu lobi Yehofa anga Yesesi moo den famii fu u (Mat. 10:37). Ma a sani ya á wani taki u nai tyai den faantiwowtu fu u di wi abi aini a osufamii moo. Wa mu si enke a solugu di u mu solugu wi osufamii e tapu u fu du sani di e meke Yehofa anga Yesesi piisii. Efu u wani Yehofa anga Yesesi piisii anga u, da u mu e tyai den faantiwowtu di wi abi aini a osufamii (1 Tim. 5:4, 8). Wo moo piisii efu we du a sani ya. Yehofa sabi taki wan osufamii o de koloku te man anga uman lobi denseefi, te den e lesipeki denseefi, anga te mma anga dda lobi den pikin fu den. Boiti dati, den mu e leli den pikin fu den. Den pikin mu e aliki den mma anga den dda tu.​—Efe. 5:33; 6:1, 4.

7. Fai sa du den sani di Yehofa wani i du aini a osufamii?

⁷ Saw yeepi i fu tyai den lai fii? Winsi ya wan man, uman efuso pikin, ala u mu wooko anga den leli fu Beibel. Ya mu du sani enke fai wani. Ya mu du sani tu enke den sama na a pisi pe ye tan efuso enke fa koniman e taki (Odo 24:3, 4). Wooko anga den buku fu a olikanisâsi fu u tei mu du wan sani. Den buku ya o soi i fai mu wooko anga den leli fu Beibel. Den artikel di den e kai ‘Yepi gi na osofamiri’ sa yeepi toowpaa, mma anga dda, anga yonkuuwan aini a ten ya. b Meke moiti fu wooko anga san Beibel taki winsi taa sama aini a osufamii nai du en. Efi ye du a sani ya, Yehofa o belesi a osufamii fii.​—1 Peit. 3:1, 2.

8. Fa den bosoloiti di we teke sa abi kaakiti aw tapu?

⁸ A faantiwowtu di wi abi fu den bosoloiti di we teke. Yehofa gi ala sama a okasi fu teke den eigi bosoloiti. A wani u teke bun bosoloiti, bika a wani u de koloku. Ma efu we teke don bosoloiti, a nai puu den bakapisi fu a bosoloiti di u teke (Gal. 6:7, 8). Neen meke a wiseefi e tyai a bakapisi fu wan bosoloiti di u teke, wan sani di u taki efuso du. U kosensi o fon u efu u du wan sani di á bun. A sabi di u sabi taki wo tyai faantiwowtu fu den bosoloiti di we teke, o yeepi u fu taki  den sondu fu u. Aw yeepi fu du sani taa fasi tu. Boiti dati, wo meke moiti fu wa du aseefi sondu baka. Efu we du den sani ya, wo man tan lon a siteelon fu libi.

9. Sai sa du efii be teke wan don bosoloiti? (Luku a fowtow tu.)

⁹ Saw yeepi i fu tyai den lai fii? Efii teke wan don bosoloiti, da sai sa du? Holi a pakisei taki te wan sani pasa kaba ya poi kengi en moo. Ná lasi i ten anga i kaakiti fu dii wani soi saide i be abi leti fu du wan sani. Ya mu gi taawan a fowtu fu wan sani dii du tu. Meke moiti fu fusutan taki i be meke wan fowtu. Du a moo bun sani dii sa du nownow. Efii kosensi e fon i fu wan fowtu dii meke, begi Yehofa. Taigi en sowtu sondu i du. Akisi en fu a gii paadon (Ps. 25:11; 51:3, 4). Efii be du sani di hati taawan fii, dai mu akisi den paadon. Efu a de fanowdu tu i sa suku yeepi a den owluman (Yak. 5:14, 15). Leli wan sani fu den fowtu dii meke. Meke moiti fi ya meke aseefi fowtu baka. Efii du a sani ya, i sa biibi taki Yehofa o soi tyali-ati gii. Aw yeepi i tu.​—Ps. 103:8-13.

10. Saide a wan hebi te wan sama e suku fu du sani di aa poi du? (Galasiyasama 6:4)

¹⁰ Te ye fii enke ala yuu i mu du moo. Efu we maiki useefi anga taawan, wo wani du sani di wa poi du. (Leisi Galasiyasama 6:4.) Efu ala yuu we maiki useefi anga taawan, wo dyalusu anga den. Wo bigin sitee anga den tu (Gal. 5:26). Efu we meke moiti fu du san taawan e du, winsi fa wa poi du den sani di den e du, u sa du ogii anga useefi. Beibel taki ‘te ai teke langa fu wan sama fende san ai angii fi en, da a sani ya sa meke a kusumi te da a siki neen ati’ (Odo 13:12). Wo lasi-ati tu efu u wani wan sani di noiti wo man fende. Efu be o du a sani ya, wo weli. Boiti dati, u naw poi lon gaw moo aini a siteelon fu libi.​—Odo 24:10.

11. Saw yeepi i fi ya du sani di ya poi du?

¹¹ Saw yeepi i fu towe den lai fii? Ná suku fu du moo enke san Yehofa wani i du. Aa wani i du sani di ya poi du (2 Kor. 8:12). I sa biibi taki Yehofa nai maiki den sani di ye du anga san taawan e du (Mat. 25:20-23). Yehofa e teke a wooko di ye wooko gi en anga i hii ati fu bigi. Ai teke en fu bigi tu taki i nai gwe fika en. Boiti dati, ai bigi gi en taki ye holidoo. I mu abi sakafasi. Kande ya poi du ala sai wani nownow, fu dii kon gaandi, siki, efuso kande fu di wan taa sani e tapu i fu du moo gi Yehofa. Leti enke Barsilai efii si taki a gusontu efuso a yali fii o meke a taanga gii fu tyai wan faantiwowtu, ya mu teke en (2 Sam. 19:35, 36). Leti enke Mosesi, i mu akisi taawan fu yeepi i. Boiti dati, i sa meke taawan tyai son faantiwowtu efu a de fanowdu (Ek. 18:21, 22). Efi ye du a sani ya, da ye soi taki yu abi sakafasi. Sakafasi o yeepi i tu fi ya du moo enke sai poi du, bika a sani de sa meke i weli fu lon a siteelon fu libi.

12. Aw mu tyai a faantiwowtu fu den don bosoloiti di taawan e teke?

¹² Te we fii enke aw mu tyai a faantiwowtu fu den don bosoloiti di taawan e teke. Wa poi teke bosoloiti gi taawan. A ná ala yuu wo poi kibii den gi den bakapisi fu den bosoloiti di den teke tu. Son leisi wan yonkuu baala efuso sisa sa daai baka gi Yehofa. Ná pikin tyali en mma anga en dda o tyali fu di a du a sani ya. Mma anga dda di e gi denseefi a  fowtu fu a don bosoloiti di a pikin fu den teke, e poti wan hebi gi denseefi. Yehofa á wani mma anga dda tyai a faantiwowtu de.​—Rom. 14:12.

13. San mma anga dda sa du efu wan pikin fu den teke wan don bosoloiti?

¹³ Saw yeepi i fu towe den lai fii? Holi a pakisei taki Yehofa meke u fu teke u eigi bosoloiti. A gi ibii sama a okasi fu du san den wani. A gi ibii sama a okasi tu fu luku efu den o dini en efuso den naw dini en. Enke mma anga dda, Yehofa sabi taki ye meke fowtu. Ma a wani i du ala sai poi fu kiya den pikin fii. A bosoloiti di a pikin fii teke neen faantiwowtu, a nai faantiwowtu (Odo 20:11). Ma enke mma anga dda kande ye booko yu ede fu wantu fowtu dii be meke. Efu a so a de, taigi Yehofa fa ye fii. Akisi en fu a gii paadon. A sabi taki te wan sani pasa kaba, ya poi kengi en moo. Boiti dati, Yehofa á wani i kibii a pikin fii gi den bakapisi fu a bosoloiti di a teke. Holi a pakisei taki efu a pikin fii e meke moiti fu daai kon baka a Yehofa, a de kabakaba fu teke en baka.​—Luk. 15:18-20.

14. Saide a tyali di wan sama e tyali fu wan fowtu di a be meke a wan lai di a mu towe?

¹⁴ Te we tan tyali fu wan fowtu di u be meke. Te u du wan sondu, tyali e kisi u fu a sani di u du. Ma Yehofa á wani u tan tyali fu wan fowtu di u be meke. A sani ya a wan lai di u mu towe. Fa wo du man sabi efu we tan tyali fu wan fowtu di u be meke? Efu u taki sowtu sondu u du, neen u soi taki a sani di u be du e hati u, u sa biibi taki Yehofa o giw paadon. U mu meke moiti tu fu wa du aseefi sondu baka (Toli 3:19). Baka te u du den sani ya, Yehofa á wani u tan tyali fu wan fowtu di u be meke. A sabi taki efu we tan pakisei a sani ya, na ala yuu aw go e hati u taki u be meke wan fowtu (Ps. 31:10). Boiti dati, efu we tan tyali, a sa  pasa taki u tapu fu lon a siteelon fu libi.​—2 Kor. 2:7.

15. Saw yeepi i efi ye tan tyali fu wan fowtu dii be meke? (1 Yohanisi 3:19, 20)

¹⁵ Saw yeepi i fu towe den lai fii? Efi ye tan tyali fu wan fowtu dii be meke, poti ala i pakisei a fa Yehofa e gi ‘sama paadon tuutuu’ (Ps. 130:4). A omen sama di be du wan sondu soi taki a sani di den be du e hati den tuutuu. Yehofa paamisi den sama ya taki: ‘Mi naw membee den sondu fu den moo’ (Yel. 31:34). Dati wani taki Yehofa nai pakisei a sondu fii moo, bika a gii paadon kaba. Neen meke ya mu si enke den sani di e miti i nownow, a fu di Yehofa á gii paadon meke den e miti i. Boiti dati, ya mu e kuutu iseefi fu dii lasi son gaandi aini a kemeente. Yehofa nai tan pakisei den fowtu dii be meke, iseefi á mu tan pakisei den tu.​—Leisi 1 Yohanisi 3:19, 20.

16. Saw mu fusutan enke sama di e lon a siteelon fu libi?

¹⁶ Te we lon a siteelon fu libi u mu ‘lon fu u sa wini’ (1 Kor. 9:24). Wo man du a sani ya te we fusutan taki den lai di u mu tyai anga den lai di u mu towe a ná aseefi. Aini a artikel ya u taki fu wantu sani di u mu tyai anga wantu sani di u mu towe. Ma taa sani de tu. Yesesi be taki u mu luku bun fu ‘sani enke nyan pasa maiki, diingi pasa maiki anga den booko-ede fu a libi á meke wi ati kon ibi’ (Luk. 21:34). Den sowtu tekisi ya sa yeepi u fu kengi den sani di u mu kengi fu man tan lon a siteelon fu libi.

17. Saide u sa biibi taki wo wini a siteelon fu libi?

¹⁷ U sa biibi taki wo wini a siteelon fu libi, bika Yehofa o giw a kaakiti di wi abi fanowdu (Yes. 40:29-31). Neen meke ya mu lon saafisaafi. Waka na apostel Pawlesi baka di be e lon fu fende a pai di de neen fesi (Filip. 3:13, 14). Sama á poi lon a siteelon ya gii, ma Yehofa poi yeepi i fii wini. Yehofa poi yeepi i fu tyai den lai fii. A poi yeepi i fu towe den lai di á de fanowdu tu (Ps. 68:19). Fu di Yehofa e yeepi i, meke i poi tan a lon a siteelon fu libi. Boiti dati, yo wini.