SUTUDI-ARTIKEL 33
SINGI 130 Gi taawan paadon
Fa Yehofa wani u libi anga sama di du wan gaan sondu?
‘Efu wan fu u du wan ogii, da wi abi wan yeepiman.’ —1 YOH. 2:1.
SAN WO LELI
Wo luku saw sa leli fu a kemeente fu Korente di wan baala be du wan gaan sondu.
1. San Yehofa wani gi ala sama?
YEHOFA meke u fu u man du saw wani. Ala dei we teke bosoloiti. Son bosoloiti di we teke pelensipali moo son wan. Ma a moo pelensipali bosoloiti di wan sama sa teke, a fu a paamisi Yehofa taki aw libi enke fa a wani. Te a du a sani ya ai kon aini a gaan osufamii fu Yehofa. Aw dini en makandaa anga den baala anga sisa. Yehofa wani ala sama du a sani ya. Saide? Bika a lobi sama. A wani sani waka bun anga u. A wani wi anga en toon mati. Boiti dati, a wani u libi fu teego.—Deit. 30:19, 20; Gal. 6:7, 8.
2. San Yehofa wani den sama di du wan gaan sondu du? (1 Yohanisi 2:1)
2 Yehofa nai dwengi sama fu dini en. Ala sama sa luku san den wani du. Ma san den owluman mu du efu wan Kelesten du wan gaan sondu? Efu aa wani tapu anga a sani di ai du, den o puu en aini a kemeente (1 Kor. 5:13). Winsi den baala puu wan sama aini a kemeente, Yehofa wani a sama tapu anga a sani di ai du, da a daai kon neen baka. Disi a wan fu den pelensipali sani fu saide Yehofa meke Yesesi kon dede gi u. A wani gi den sama ya paadon. (Leisi 1 Yohanisi 2:1.) Yehofa a wan Gadu di lobi sama tuutuu. Neen meke a wani den sama di du wan gaan sondu tapu anga a sani di den e du.—Sak. 1:3; Rom. 2:4; Yak. 4:8.
3. San wo luku aini a artikel ya?
3 Yehofa e taigi u kiin fa ai si den sama di du wan gaan sondu. A wani u si den sama ya enke fa ai si den. Aini a artikel ya, wo si saw sa leli fu a sani di Pawlesi be taigi a kemeente fu Korente di wan baala be du wan gaan sondu. Bakadati wo luku san a taigi a kemeente baka di a baala tapu anga a sani di a be du. Wo si fa Yehofa e si den sama di du wan gaan sondu tu.
SAN BE PASA DI WAN BAALA BE DU WAN GAAN SONDU?
4. San be pasa aini a kemeente fu Korente? (1 Korentesama 5:1, 2)
4 Leisi 1 Korentesama 5:1, 2. Di Pawlesi be e go luku den kemeente enke zendeling du fu dii leisi, a be yee wan sani di be meke a dyombo. A sani ya be pasa aini a nyun kemeente di be opo a Korente. Wan baala aini a kemeente be siibi anga en dda uman. Sama di á be e dini Gadu seefi be sabi taki a libi de á bun. A kemeente á be e si a sani ya fu wan gaan sani. Neen meke den á be puu en aini a kemeente. Kande son sama be e denki taki te den be o fika a baala aini a kemeente, da den e soi tyali-ati enke Yehofa. Ma Yehofa nai holibaka gi a fasi fu libi de. Son sama di á be e dini Yehofa be dyombo di den yee a sani ya. Den be bigin taki ogii fu a foluku fu Yehofa. Boiti dati, efu den á puu en aini a kemeente son sama be o bigin waka neen baka. San Pawlesi be taigi a kemeente fu du?
5. San Pawlesi be taigi a kemeente fu du? San a be wani taki anga a sani ya? (1 Korentesama 5:13) (Luku a fowtow tu.)
5 Leisi 1 Korentesama 5:13. Yehofa be meke Pawlesi sikiifi wan biifi gi a kemeente a Korente. A be sikiifi aini a biifi taki den mu puu a man ya aini a kemeente. Fa den sama aini a kemeente be mu libi anga a man ya? Pawlesi be taigi den taki den á mu ‘paa anga en moo’. San a be wani taki anga a sani ya? A be taki ‘nyan seefi den á mu nyan anga en’ (1 Kor. 5:11). Efi ye nyan makandaa anga wan sama, yu anga en o gi toli. Pawlesi be wani soi den taki den á be mu paa anga a man ya efu aa be de fanowdu. A sani ya be o kibii a kemeente (1 Kor. 5:5-7). Ma a sani ya be o yeepi a man fu fusutan tu taki a du wan sani di hati Yehofa. Boiti dati, a be o yeepi en fu tapu anga a sani di a be e du.
Yehofa be meke Pawlesi sikiifi wan biifi gi a kemeente fu soi den taki den be mu puu a man di e be du a gaan sondu aini a kemeente, bika aa be wani kengi a fasi fa a be e libi (Luku paragraaf 5)
6. San a kemeente du di den fende a biifi fu Pawlesi? San a man di be du a gaan sondu du?
6 Baka di Pawlesi sende a biifi gi den Kelesten a Korente, a be e pakisei san den be o du. Bakaten Titesi taigi Pawlesi wan sani di be meke a piisii tuutuu. Den baala anga sisa be wooko anga a sani di Pawlesi taigi den, den be puu a man di be du a ogii aini a kemeente (2 Kor. 7:6, 7). Boiti dati baka wantu mun, a man di be du a ogii be soi taki a sani di a be du be hati en. A kengi a fasi fa a be e libi, neen a bigin du sani baka enke fa Yehofa wani (2 Kor. 7:8-11). San Pawlesi taigi a kemeente fu du now?
FA A KEMEENTE LIBI ANGA A MAN DI BE DU A GAAN SONDU?
7. San a man di be du a gaan sondu du baka di den puu en aini a kemeente? (2 Korentesama 2:5-8)
7 Leisi 2 Korentesama 2:5-8. Pawlesi be taki ‘a sitaafu di gaanse fu u gi en sai en kaba’. A sani ya e soi taki baka di den puu a man aini a kemeente, a be fusutan taki a be mu kengi a fasi fa a be e libi. Fu di a be kengi a fasi fa a be e libi, meke den be mu teke en baka aini a kemeente.—Heb. 12:11.
8. San Pawlesi be taigi a kemeente bakaten?
8 Fu di a man be kengi a fasi fa a be e libi, meke Pawlesi be taigi den owluman fu den teke en baka aini a kemeente. A be taigi den tu taki: ‘U mu gi en paadon anga u hii ati, daw toosutu en.’ A be wani den soi a man anga den sani di den be e taki, anga den sani di den be e du, taki den gi en paadon tuutuu. A so a man di be du a ogii be o piisii taki a kon baka aini a kemeente.
9. Saide a be taanga gi son baala anga sisa fu gi a man di be du a ogii paadon?
9 A be musu taanga gi son sama fu bali wadaa gi a man di be du a ogii di den teke en baka aini a kemeente. Saide u taki so? Kande son sama ati be e boon ete taki a be tyai polobelema kon aini a kemeente. Kande a be hati son sama fii tu. Neen meke a bunbun moiti den be mu meke fu du sani enke fa Yehofa wani. Kande son sama be e fii enke den á be mu teke a man ya moo aini a kemeente, bika a wan gaan sondu a be du. (Luku Lukasi 15:28-30 tu.) Saide den be mu soi a baala di be daai kon baka taki den lobi en tuutuu?
10-11. San be sa pasa efu den owluman á be wani gi a man di be du a gaan sondu paadon?
10 Fai denki a man be sa fii efu den owluman á be wani teke en baka aini a kemeente? Fa a be o fii efu baka di den teke en aini a kemeente, den baala anga sisa á be e libi bun anga en? Pawlesi be taki aw ‘kusumi te da a lasi-ati’. A be sa fii enke aa bun moo fu dini Yehofa. Kande a be o fii enke a sosokaali ai meke moiti fu meke en bun baka anga Yehofa.
11 San a wan taa sani di be sa pasa efu a kemeente á be wani gi a man ya paadon? We, den anga Yehofa be sa poli. Saide? Bika a sani ya be o soi taki den nai waka a Yehofa baka. Te wan sama di be du wan gaan sondu soi taki a sani di a be du e hati en tuutuu, Yehofa e gi en paadon. A Saatan naabi tyali-ati anga sama, neen meke neen baka den be o waka efu den á be gi a man paadon. Saatan be o meke den tapu a man fu kon dini Yehofa baka.—2 Kor. 2:10, 11; Efe. 4:27.
12. Fa a kemeente be sa waka a Yehofa baka?
12 Fa a kemeente aini Korente be o soi taki den e waka a Yehofa baka? A te den be o gi wan sama di be du wan gaan sondu paadon enke fa Yehofa e gi sama paadon. Luku san wantu Beibel sikiifiman be taki fu Yehofa. David be taki: ‘Yehofa, ya wan bun Gadu. I de kabakaba fu gi sama paadon’ (Ps. 86:5). Mika be sikiifi taki: ‘Sowtu Gadu de enke i? Ye gi a foluku fii paadon fu den sondu fu den. I nai tan pakisei den fowtu di den meke’ (Mika 7:18). Yesaya be taki: ‘Meke a sama di e du ogii fika den ogii di ai du. Meke a puu den takuu pakisei neen ede. Meke a daai kon a Yehofa baka, bika aw soi tyali-ati gi en. Meke a daai kon a wi Gadu baka, bika aw gi en paadon anga en hii ati.’—Yes. 55:7.
13. Saide den be teke a man di be du a gaan sondu baka aini a kemeente? (Luku a faki di den e kai ‘ On ten den be teke a man di be du a gaan sondu baka aini a kemeente?’)
13 Efu den baala anga sisa be wani soi taki den e waka a Yehofa baka, da den be mu gi a man paadon. Den be mu soi en tu taki den lobi en. Pawlesi taki efu den gi a man paadon, da den e soi taki den e ‘aliki aini ala sani’ (2 Kor. 2:9). Winsi fa a wantu mun namo den be puu a man aini a kemeente, toku a kengi. Neen meke den owluman be mu teke en baka aini a kemeente.
KUUTU SANI ENKE YEHOFA, SOI TYALI-ATI ENKE EN
14-15. San we leli fu a sani di be pasa a Korente? (2 Peitilisi 3:9) (Luku a fowtow tu.)
14 A fasi fa den baala be du sani aini a kemeente fu Korente sikiifi aini Beibel fu ‘leli u wan sani’ (Rom. 15:4). A toli ya e leli u taki efu wan sama du wan gaan sondu neen a nai kengi, den o puu en aini a kemeente. Son sama e si enke fu di Yehofa abi tyali-ati da aw fika wan sama di du wan gaan sondu aini a kemeente. Ma a ná so Yehofa e soi tyali-ati gi sama. Yehofa a wan Gadu di abi tyali-ati so na tuu, ma aa lobi ala sani di sama e du. Yehofa naw kengi a fasi fa ai du sani fu sama ede (Yud. 4). Efu wan sama du wan gaan sondu, neen aa wani kengi, Yehofa naw fika en aini a kemeente. Efu a be fika a sama, a sani ya be o soi taki a naabi tyali-ati, bika a be sa tyai ogii gi a kemeente.—Odo 13:20; 1 Kor. 15:33.
15 A toli ya e leli u tu taki Yehofa á wani nawan sama dede. A wani yeepi den. Ai soi tyali-ati gi den sama di kengi a fasi fa den be e denki anga a fasi fa den be e du sani. Ai soi tyali-ati gi den sama di wani toon en mati baka. (Eseik. 33:11; Leisi 2 Peitilisi 3:9.) Di a man fu Korente kengi a fasi fa a be e libi, Yehofa be taigi a kemeente taki den mu gi en paadon, da den bali wadaa gi en baka aini a kemeente.
We waka a Yehofa baka te we soi den sama di den teke aini a kemeente baka taki u lobi den. We waka a Yehofa baka tu te we soi switifasi gi den (Luku paragraaf 14-15)
16. Tei luku a fasi fa Yehofa be du sani di a man fu Korente be du wan gaan sondu, da fa ye fii?
16 Te u luku a fasi fa sani be waka aini a kemeente fu Korente, we si taki Yehofa a wan Gadu di lobi sama. Ai du sani a wan letifasi (Ps. 33:5). Den manii fu Yehofa e meke u moo lobi en. I daai en go i daai en kon, ala wi abi sondu, neen meke ai bigi gi u taki Yehofa abi tyali-ati. Ai bigi gi u tu taki Yehofa meke Yesesi kon dede gi u, bika na a sani ya meke a poi gi u paadon. A sabi di u sabi taki Yehofa lobi u, e meke u fii bun te ye, bika we si taki a wani sani waka bun anga u.
17. San wo luku aini a taa artikel?
17 Efu wan sama du wan gaan sondu aini a ten ya, da fa den owluman sa du sani enke Yehofa te den e yeepi wan sama fu kon aini a kemeente baka? Fa a kemeente mu du sani te den baala puu wan sama aini a kemeente, efuso te den teke wan sama baka? Wo piki den akisi ya aini a taa artikel.
SINGI 109 Lobi taawan anga i hii ati
