1. San sa pasa efu wan sama du wan gaan sondu?

 AINI a artikel di pasa, u si san Pawlesi be taigi a kemeente fu Korente fu du di wan man be du wan gaan sondu. A man ya á be wani kengi, neen meke den baala be puu en aini a kemeente. Ma enke fa a tekisi fu a sutudi ya e soi, da Gadu poi yeepi den sama ya fu daai den libi (Rom. 2:4). Fa den owluman sa yeepi wan sama di du wan gaan sondu?

2-3. Saw mu du efu u sabi taki wan baala efuso wan sisa du wan gaan sondu? Saide u mu du a sani ya?

² Efu den owluman á sabi taki wan sama du wan gaan sondu, den naw poi yeepi en. Neen meke saw mu du efu u sabi taki wan sama du wan sondu di sa meke den puu en aini a kemeente? U mu taigi a sama di du a sondu taki a mu go suku yeepi a den owluman.​—Yes. 1:18; Toli 20:28; 1 Peit. 5:2.

³ Ma kow taki wan sama sabi taki a du wan gaan sondu, neen aa wani go taki anga den owluman, saw mu du? Daw mu go taigi den owluman. A so a sama o fende a yeepi di a abi fanowdu. Efu u du sani na a fasi ya, da we soi u baala efuso u sisa taki u lobi en, bika u sabi taki den owluman o yeepi en. Efu a sama á wani kengi, en anga Yehofa sa poli. Boiti dati, efu sama di nai dini Yehofa yee a sani di a sama du, den o bigin taki ogii fu a foluku  fu Yehofa. Neen meke winsi aa makiliki, we go a den owluman, bika u lobi Yehofa anga den baala anga sisa.​—Ps. 27:14.

FA DEN OWLUMAN E YEEPI DEN SAMA DI DU WAN GAAN SONDU?

4. San den owluman o meke moiti fu du efu wan sama du wan gaan sondu?

⁴ Efu wan sama aini a kemeente du wan gaan sondu, den owluman e teke dii owluman aini a kemeente fu taki anga a sama. a Den baala ya mu abi sakafasi. Den á mu e suku fini tumisi. Den e holi a pakisei tu taki winsi den wani yeepi a sama, na a sama seefi mu wani kengi (Deit. 30:19). Di Kownu David be du wan sondu, a be fusutan taki a fowtu, neen meke a be wani kengi. Ma a ná ala sama di du wan gaan sondu e wani kengi (2 Sam. 12:13). Son wan fu den sama ya nai wani aliki te Yehofa e puu kaasi gi den (Gen. 4:6-8). A wooko fu den owluman a fu yeepi wan sama di du wan gaan sondu fu kengi a fasi fa ai libi. San owluman mu holi a pakisei te den e taki anga wan sama di du wan gaan sondu?

5. Sowtu manii owluman mu abi te den e taki anga wan sama di du wan gaan sondu? (2 Timotiyesi 2:24-26) (Luku a fowtow tu.)

⁵ Den owluman sabi taki winsi wan sama du wan gaan sondu, toku en a wan sikapu fu Yehofa di a lobi (Luk. 15:4, 6). Neen meke te den miti anga sowan sama, den nai taki goofu anga en. Den nai si enke a kowownu den mu poti wantu akisi gi en fu kon sabi san pasa. Ma den o meke moiti fu soi den manii di sikiifi a 2 Timotiyesi 2:24-26. (Leisi en.) Den mu abi sakafasi. Den mu abi switifasi tu. A so den o poi yeepi a sama fu kengi en manii.

6. Fa den owluman e seeka fosi den taki anga wan sama di du wan gaan sondu? (Romesama 2:4)

⁶ Den owluman e meke moiti fu du sani enke fa Yehofa wani. Den e holi a sani di Pawlesi be taki a pakisei tu. A be taki: ‘A di Gadu abi bun-ati meke a wani yeepi u fu daai u libi.’ Neen meke den e meke moiti fu soi switifasi gi den sama ya enke fa Yehofa e soi switifasi gi den. (Leisi Romesama 2:4.) Owluman a sikapuman, neen meke den mu du sani enke Kelestesi te den e luku a kemeente (Yes. 11:3, 4; Mat. 18:18-20). Fosi den owluman taki anga wan sama di du wan gaan sondu, den e begi Yehofa, bika den wani yeepi a sama fu kengi. Den o luku san  Beibel anga den buku fu we taki tu. Boiti dati, den o begi Yehofa fu a yeepi den fu fusutan fa a sama e fii. Den o meke moiti fu fusutan fa a du kon taki a sama meke a fowtu.​—Odo 20:5.

7-8. Fa den owluman sa soi pasensi enke Yehofa te den e taki anga wan sama di du wan gaan sondu?

⁷ Den owluman e soi pasensi enke Yehofa. Den e pakisei fa Yehofa be yeepi sama di be meke wan fowtu aini a ten di pasa. Yehofa be abi pasensi anga Kain. A be taigi en san be o pasa efu aa be wani kengi. A be taigi en tu taki sani be o waka bun gi en efu a be aliki (Gen. 4:6, 7). Yehofa be sende polofeiti Natan fu poti David a pasi. Natan be gi wan ageisitoli di be yeepi David fu kengi (2 Sam. 12:1-7). Na ala yuu Yehofa be e sende den polofeiti fi en fu wasikoi den Islayelisama te den á be e aliki en (Yel. 7:24, 25). Aa be e wakiti fu den kengi fosi a be yeepi den. Te den be e tan meke aseefi fowtu, a be e taigi den naamo taki den mu kengi.

⁸ Owluman e meke moiti fu waka a Yehofa baka te den e taki anga wan sama di du wan gaan sondu. Enke fa 2 Timotiyesi 4:2 e soi, da den e du a sani ya ‘anga pasensi’. Owluman di wani yeepi wan sama di be du wan sondu mu abi pasensi. Efu a owluman ati boon efuso a gei enke en ede simpan, aw taanga gi a sama di meke a fowtu fu kengi.

9-10. Fa owluman sa yeepi wan sama di du wan gaan sondu fu fusutan taki a du wan sani di sa poli en anga Yehofa?

⁹ Den owluman o meke moiti fu sabi san meke a sama du a sondu. Kande den e akisi denseefi taki: San meke a sama bigin gwa baka a waaleiti? A be e sutudeli anga enseefi? A be e go a peleikiwooko? A be e begi Yehofa ete? A be e meke moiti fu koti pasi gi sani di á bun? Anga sama a be e paa? San a den sani di a be e du fu meke piisii? San a den bosoloiti di a be e teke? A fusutan fa Yehofa e fii fu a sani di a du?

¹⁰ Den owluman sa poti akisi gi a sama fu yeepi en fu pakisei san meke a go a baka a waaleiti. A wan switifasi den e du a sani ya. Ma den á mu akisi a sama sani di á de fanowdu (Odo 20:5). Leti enke fa Natan be gi wan ageisitoli fu yeepi David fu fusutan san a be du, a letiso den owluman sa gi wan ageisitoli fu yeepi a sama fu fusutan taki a fowtu. Kande a fosi leisi di den o taki anga a sama, den o si taki ai hati en taki a meke wan fowtu. Kande aw wani kengi a fasi fa a be e tyai enseefi.

11. Fa Yesesi be e libi anga sama di be du wan gaan sondu?

¹¹ Den owluman e meke moiti fu waka a Yesesi baka. Yesesi be yeepi Pawlesi di a be akisi en taki: ‘Sawlesi, Sawlesi, saide ye du ogii anga mi du?’ A sani ya be yeepi Pawlesi fu fusutan taki a sani di a be e du á bun (Toli 9:3-6). Yesesi be taigi a uman Iseibel taki: ‘Mi gi en ten fu a daai en libi.’​—Openb. 2:20, 21.

12-13. Fa owluman sa gi wan sama di du wan gaan sondu ten fu kengi? (Luku a fowtow tu.)

¹² Fu di den owluman e meke moiti fu waka a Yesesi baka, meke den nai si enke wan sama di du wan sondu á poi kengi. Son sama a baka te den owluman taki anga den fosi den e bigin du sani taa fasi. Neen meke den owluman o meke moiti fu taki anga a sama omen leisi. Kande a baka a fosi takimakandaa anga den  owluman, fosi a sama o pakisei den sani di den owluman taigi en. Aw soi sakafasi, da a begi Yehofa fu a gi en paadon (Ps. 32:5; 38:18). Den sani ya sa meke a sama di be du a sondu bigin denki taa fasi te den owluman go taki anga en baka.

¹³ Efu den owluman wani yeepi a sama di sondu fu kengi, den mu abi switifasi. Den mu e fii gi taawan tu. Boiti dati, den o begi Yehofa fu a belesi a moiti fu den. Den o begi en tu fu a yeepi a sama fu kengi en manii.​—2 Tim. 2:25, 26.

14. Sama e yeepi wan sama di du wan gaan sondu fu kengi? Saide u taki so?

¹⁴ Efu a sama di be sondu kengi, ná pikin piisii we piisii (Luk. 15:7, 10). Den owluman e meke moiti fu yeepi a sama fu kengi, ma sama e yeepi en tuutuu? Luku san Pawlesi be taki: ‘Kande Gadu o soi tyali-ati gi den’ (2 Tim. 2:25). Enke fa a tekisi e soi, da a Yehofa e yeepi wan sama di be sondu fu kengi a fasi fa a be e tyai enseefi. Pawlesi be taki fu den wini di wan sama e fende te a kengi. A sama e kon fusutan a waaleiti moo bun, ai kisi enseefi baka, ai komoto aini a akaapana fu Saatan.​—2 Tim. 2:26.

15. Fa den owluman o tan meke moiti fu yeepi wan sama di kengi?

¹⁵ Te wan sama di be du wan sondu kengi a fasi fa a be e tyai enseefi, den owluman o go e luku fa ai go anga en. Den o meke moiti fu yeepi en fu taanga en biibi. Den o meke moiti fu yeepi en tu fu a koti pasi gi den tesi fu Saatan (Heb. 12:12, 13). Den owluman á mu taigi taa sama san a sama du. Ma san den mu taigi a kemeente?

‘I MU PUU KAASI GI EN NA ALA SAMA FESI’

16. Enke fa 1 Timotiyesi 5:20 e soi, da sama a den sama di Pawlesi be e taki?

¹⁶ Leisi 1 Timotiyesi 5:20. Pawlesi be taigi Timotiyesi taki a mu puu kaasi gi  den sama di e sondu ‘na ala sama fesi’. San Pawlesi be wani taki anga a sani ya? A sani ya á wani taki ala den baala anga sisa aini a kemeente ‘na ala sama’. A den sama di be sabi a ogii di a sama du Pawlesi be e taki. Kande den sama ya be si san pasa, efuso kande a sama seefi taigi den. A den sama ya wawan den owluman o taigi taki a toli seeka.

17. Kow taki gaanse sama aini a kemeente sabi taki wan sama du wan gaan sondu, da san den baala mu piki a kemeente? Saide den mu du a sani ya?

¹⁷ Son yuu gaanse sama aini a kemeente e sabi taki wan sama du wan gaan sondu, efuso kande den yee taki a du wan gaan sondu. Efu gaanse sama aini a kemeente sabi a sani ya, da a den ‘na ala sama’. Wan owluman o piki a kemeente taki sowan baala efuso sisa kisi pii-ain. Saide? Pawlesi be taki: ‘A sani ya de enke wan wasikoi gi den taawan’ fu den á sondu.

18. Kow taki a sama di du a gaan sondu á doo 18 yali ete, da san den owluman mu du? (Luku a fowtow tu.)

¹⁸ San den owluman e du efu a sama di du a gaan sondu á doo 18 yali ete? Den owluman o meke tu owluman taki anga a sama di du a sondu anga en mma anga en dda. b Den o akisi a mma anga dda san den e du fu yeepi a pikin fu kengi a fasi fa ai tyai enseefi. Efu a pikin e wooko anga den sani di en mma anga en dda e taigi en, den owluman o gi den taanga-sikin fu yeepi a pikin fu den go doo. Den  sabi taki a mma anga dda Yehofa gi a faantiwowtu fu puu kaasi gi den pikin fu den (Deit. 6:6, 7; Odo 6:20; 22:6; Efe. 6:2-4). Ma den o go e akisi a mma anga dda fu a pikin fa ai go anga en. A so den o sabi efu ai fende a yeepi di a abi fanowdu. San den owluman o du efu wan pikin di dopu kaba e tan du sani di á bun? We, efu a sani ya e pasa, da dii owluman o taki anga a pikin. En mma anga en dda sa de na a takimakandaa tu.

‘YEHOFA LOBI SAMA TUUTUU, A ABI TYALI-ATI’

19. Fa owluman e meke moiti fu waka a Yehofa baka te den e taki anga wan sama di du wan gaan sondu?

¹⁹ A den owluman Yehofa gi a faantiwowtu fu kibii a kemeente. A so den sama di e tan du sondu naw tyobo a kemeente (1 Kor. 5:7). Den e du ala san den man fu yeepi a sama di du a sondu fu kengi. Boiti dati, den e howpu taki a sama kengi a fasi fa ai tyai enseefi. Saide? Bika den owluman e meke moiti fu waka a Yehofa baka. Yehofa ‘lobi sama tuutuu, a abi tyali-ati’ (Yak. 5:11). Apostel Yohanisi be e libi bun anga den baala anga sisa. A be taki: ‘Mi pikin, mi e sikiifi den sani ya gi u, fu u sa wai pasi gi ogii. Ma tokuso efu wan fu u du wan ogii, da wi abi wan yeepiman na a Dda. A sama de a Yesesi Kelestesi, di e du sani a wan letifasi.’​—1 Yoh. 2:1.

20. San wo luku aini a taa artikel?

²⁰ A tyali taki a ná ala yuu son sama e wani kengi te den du wan sani di á bun. Neen meke son yuu den baala e abi fu puu son sama aini a kemeente. San den owluman o du efu a sani ya pasa? Wo taki fu a toli ya aini a taa artikel.