1-2. (a) San a sondu? Faw sa wini sondu? (Luku a pisi di den e kai ‘San den wowtu ya wani taki’.) (b) San wo luku aini a artikel ya anga den taa artikel aini A Wakititolen ya? (Luku a pisi di sikiifi a bladzijde 32 gi den leisiman di den e kai ‘Bun leisiman’.)

 I WANI sabi on fuu Yehofa lobi i? Luku sai mu du efii wani fende a piki fu a akisi ya: Meke moiti fu kon sabi san Yehofa du fu puu sondu anga dede gi u. Sondu a a wan ogii-ati feyanti. Ala dei we meke fowtu. Boiti dati, fu di wi abi sondu meke we dede (Rom. 5:12). Ma bun nyunsu de, bika Yehofa o puu sondu gi u.

² A moo enke 6.000 yali kaba Yehofa e yeepi libisama fu den anga en toon mati, winsi fa den abi sondu. Saide? A fu di a lobi u. Senten na a bigin di Yehofa meke libisama neen a lobi den. A di a lobi u meke a du omen sani fu yeepi u te u meke wan fowtu. A sabi taki a sondu e meke we dede, ma aa wani u dede. A wani u libi fu teego (Rom. 6:23). A wani iseefi libi fu teego tu. Aini a artikel ya, wo poti pakisei a dii akisi: (1) Sowtu howpu Yehofa gi u winsi fa wi abi sondu? (2) San den sama aini a ten fu Beibel be e du fu meke Yehofa piisii? (3) San Yesesi du fu puu sondu anga dede gi libisama?

SOWTU HOWPU YEHOFA GI U WINSI FA WI ABI SONDU?

3. San be pasa aini a dyali fu Eden?

³ Di Yehofa meke a fosi man anga uman, a be wani den  abi wan bun libi. A be gi den wan moin peesi fu tan, den be abi wan bun toowlibi tu. Boiti dati, Yehofa be gi den wan moin wooko. Den be mu meke a goontapu fuu anga den bakapikin fu den. Den be mu meke a hii goontapu toon wan paladeisi enke a dyali fu Eden. A wan sani namo Yehofa be taigi den taki den á mu du. A be taigi den kiin taki efu den ná aliki en, den o dede. Ala u sabi san pasa. Wan ogii engel di á lobi Gadu anga libisama koli den. Adan anga Efa du san a engel taigi den. Den á be e biibi Yehofa moo, a Sama di be lobi den tuutuu. Enke faw sabi, da a sani di Yehofa be taki pasa tuu. Fu di Adan anga Efa sondu, meke a libi á be e switi gi den moo. Den kon gaandi, te fu kaba den dede.​—Gen. 1:28, 29; 2:8, 9, 16-18; 3:1-6, 17-19, 24; 5:5.

4. Saide Yehofa e buuse sondu? Fa Yehofa e yeepi u fu dini en winsi fa wi abi sondu? (Romesama 8:20, 21)

⁴ Yehofa meke sama sikiifi a toli ya aini Beibel fu u fusutan wan pelensipali sani. A toli ya e yeepi u fu fusutan saide Yehofa e buuse sondu so. Sondu e paati wi anga Yehofa. A sondu meke we dede (Yes. 59:2). Saatan e buuse Yehofa anga libisama, neen meke a koli Adan anga Efa. Te anga a dei fu tide ai koli sama ete. Di Adan anga Efa sondu aini a dyali fu Eden, kande Saatan be e denki taki a kaba gi Yehofa, a naw poi du san a be abi a pakisei moo. Ma Saatan á be sabi fa Yehofa lobi libisama. Winsi fa Adan anga Efa sondu, toku a sani di Yehofa be abi a pakisei gi libisama á kengi. A lobi libisama ete, neen meke a gi u howpu. (Leisi Romesama 8:20, 21.) Yehofa be sabi taki son wan fu den bakapikin fu Adan anga Efa be o lobi en, den be o aliki en tu. Neen meke a du wan sani fu yeepi den sama ya fu den anga en toon mati. Dyonson aw fii den, aw puu sondu anga dede gi den. Ma san Yehofa du fu meke a sani di a be abi a pakisei gi libisama kon tuu?

5. On ten Yehofa gi libisama howpu? (Genesesi 3:15)

⁵ Leisi Genesesi 3:15. Yehofa gi libisama howpu di a leisi sitaafu gi Saatan. Gadu be taki ‘wan pikin’ be o fii libisama. Na a pikin ya o masi Saatan ede. Aw seeka ala den sani di Saatan be poli senten aini a dyali fu Eden (1 Yoh. 3:8). Ma fosi a sani ya pasa, Saatan be o gi a pikin ya mankei, a be o du sani di be o tyai dede kii en. Ná pikin hati a sani ya be o hati Yehofa. Ma Yehofa be de kabakaba fu nyan pina, neen meke a fika a pikin ya fu pina fu a sa puu sondu gi libisama.

SAN DEN SAMA AINI A TEN FU BEIBEL BE E DU FU MEKE YEHOFA PIISII?

6. San Abel, Nowa, anga den taa sama di be e dini Yehofa anga den hii ati be du fu den anga Yehofa toon mati?

⁶ Aini den ten di pasa, a saafisaafi Yehofa soi libisama san den mu du fu den anga en toon mati. Abel a be du fu tu pikin fu Adan anga Efa. Neen na a fosi sama di toon mati anga Gadu baka di Adan anga Efa taangayesi Yehofa. Abel be lobi Yehofa, a be wani a piisii anga en. Neen meke a be tyai wan ofaandi gi Gadu. En a be wan sikapuman, neen meke a be teke wantu fu den yonkuu sikapu fi en, neen a tyai den enke ofaandi gi Yehofa. San Yehofa du di Abel du a sani ya? ‘A be e piisii anga a ofaandi di Abel tyai gi en’ (Gen. 4:4). Yehofa be  lobi den ofaandi di taa sama be e tyai gi en tu fu di den be lobi en. Wan fu den sama ya a Nowa (Gen. 8:20, 21). A teke di Yehofa be e teke den ofaandi di den be e tyai gi en, e soi taki winsi fa libisama abi sondu, toku den anga en sa toon mati. b

7. Abalaham be de kabakaba fu gi a boi fi en enke ofaandi. San a sani ya e leli u?

⁷ Abalaham a be wan man di be e fitoow Yehofa. Yehofa be akisi en fu a du wan sani di á be makiliki. A be taigi en taki a mu gi en Isaki enke wan ofaandi. A sani ya be musu taanga gi Abalaham, ma toku a aliki Yehofa. Di a be e go fu kii Isaki, Yehofa tapu en fu aa kii en. A toli ya e soi san Yehofa be o du aini a ten di e kon. A be o gi a wan kodo Manpikin fi en enke ofaandi. A sani ya e soi taki Yehofa lobi libisama tuutuu.​—Gen. 22:1-18.

8. San den ofaandi di sama be mu gi Gadu na a ten fu a Weiti e soi? (Lefitikesi 4:27-29; 17:11)

⁸ Di Yehofa be gi den Islayelisama a Weiti, a be taigi den taki den mu tyai meti enke ofaandi fu fende paadon fu den sondu fu den. (Leisi Lefitikesi 4:27-29; 17:11.) Den ofaandi ya be e soi taki Yehofa be o du wan moo gaan sani fu fii libisama. Gadu be meke den polofeiti sikiifi sani fu a pikin di a be paamisi den. Den be e soi taki a pikin ya na a wan kodo Manpikin fu Gadu di be o pina te enke a dede. A be de enke wan pikin sikapu di sama e tyai go kii (Yes. 53:1-12). Pakisei a sani ya: Yehofa be paamisi taki aw gi a Manpikin fi en enke ofaandi fu fii libisama. A wan gaan sani Yehofa du ya. A meke en Manpikin dede gi ala libisama. A dede gi yu tu.

SAN YESESI DU FU PUU SONDU GI LIBISAMA?

9. San Yohanisi a Dopuman be taki fu Yesesi? (Hebrewsama 9:22; 10:1-4, 12)

⁹ Aini a yali 29, Yohanisi a Dopuman be si Yesesi fu Nasaleti neen a taki: ‘Luku a Pikin Sikapu fu Gadu di o puu sondu a goontapu!’ (Yoh. 1:29) Den wowtu ya e soi taki a Yesesi na a pikin di Gadu be paamisi senten. Yesesi be o gi en libi enke wan ofaandi. A Manpikin fu Yehofa be kon fu fii libisama, a be o puu sondu gi den fu teego.​—Leisi Hebrewsama 9:22; 10:1-4, 12.

10. Fa Yesesi soi taki a ‘sondu sama a be kon gi’?

¹⁰ Yesesi be e booko en ede anga sama di be e fii booko-saka fu di den be meke fowtu. Neen meke a be e kai den fu den toon en bakaman. A be sabi taki a sondu e meke libisama e tyotyo. Neen meke a be wani yeepi den sama di be e sondu. A be taki: ‘Gusontu sama naabi dataa fanowdu, a siki sama abi dataa fanowdu.’ A be taki tu taki: ‘Mia kon a goontapu gi bun sama, a sondu sama mi kon gi’ (Mat. 9:12, 13). Yesesi be e du san a tekisi ya taki. Di den wataa ain fu wan uman di be sondu kai neen futu, a taki switi anga en, neen a taigi en taki a gi en paadon fi en sondu (Luk. 7:37-50). Boiti dati Yesesi be leli a Samaliya-uman wan pelensipali sani, winsi fa a be sabi taki a uman ya á be e libi wan kiin libi (Yoh. 4:7, 17-19, 25, 26). A sondu e meke we dede. Ma Yehofa gi Yesesi a makiti fu meke den sama fu u di dede kon a libi baka.​—Mat. 11:5.

11. Saide sama di be sondu be e fii bun te den be go a Yesesi?

 ¹¹ We fusutan moo bun now saide sama di be sondu be e fii bun te den be go a Yesesi. A be e fusutan fa den be e fii. A be e soi switifasi gi den tu, neen meke den á be e feele fu taki anga en (Luk. 15:1, 2). A be e gafa den sama di be e biibi en (Luk. 19:1-10). A fasi fa Yesesi be e libi anga sama e soi a tyali-ati di en Dda abi (Yoh. 14:9). Te we luku den sani di Yesesi be e taki anga a fasi fa a be e libi anga sama, we si taki Yehofa a wan Gadu di abi tyali-ati. A lobi libisama winsi fa den abi sondu, neen meke a wani yeepi den. Yesesi be e yeepi den sama di be wani kengi a fasi fa den be e libi.​—Luk. 5:27, 28.

12. San Yesesi be e leli sama fu a dede di a be o dede?

¹² Yesesi be sabi taki aw abi fu gi en libi enke wan ofaandi. Na ala yuu a be e taigi den bakaman fi en taki sama o lei gi en da den o sipikii en a wan ponsu (Mat. 17:22; 20:18, 19). A be sabi taki na a dede fi en o fii libisama fu sondu enke fa Yohanisi anga den taa polofeiti be taki. Boiti dati, Yesesi be taki baka di aw dede, aw ‘hali ala sowtu sama kon’ neen (Yoh. 12:32). Ala den sama di e biibi Yesesi, di e meke moiti fu waka neen baka, e meke Yehofa piisii. Efu den e du a sani ya den  naw ‘de saafu fu sondu moo’ (Rom. 6:14, 18, 22; Yoh. 8:32). Yesesi be abi deki-ati, a be de kabakaba fu dede a wan ogii-ati fasi fu fii wi.​—Yoh. 10:17, 18.

13. Fa Yesesi dede? San a dede fu Yesesi e leli u fu Yehofa? (Luku a fowtow tu.)

¹³ A wan fu den bun mati fu Yesesi konkuu en. Bakadati den feyanti fi en kisi en, den soso en, den lei gi en, te fu kaba den suudati tyai en go sipikii a wan ponsu. Ná pikin pen Yesesi be e fii, tokuso a holidoo. Ma den sani ya be e moo du Yehofa ogii te a be e luku fa sama be e pina a Manpikin fi en. Yehofa be sa du wan sani fu Yesesi á nyan a pina de, ma a gi pasi fu a sani ya pasa. Yehofa be lobi Yesesi tuutuu, ma saide a fika en fu a pina te enke den kii en? A di a lobi u. Yesesi be taki: ‘Gadu be lobi a goontapu te, neen a sende en wan kodo Manpikin kon dede gi u, da iniiwan sama di e biibi en naw dede, ma den o fende teego libi.’​—Yoh. 3:16.

14. San a dede di Yesesi dede gi u e leli i?

¹⁴ A dede di Yesesi dede gi u e soi taki ná pikin lobi Yehofa lobi den bakapikin fu Adan anga Efa. A sani ya e soi on fuu Yehofa lobi i. A gi wi a moo bun sani di a be abi, a be de kabakaba fu meke a Manpikin fi en dede fu wi ede (1 Yoh. 4:9, 10). Yehofa wani wi anga en toon mati winsi fa wi abi sondu ete. A wani puu sondu gi u aini a ten di e kon tu.

15. Saw mu du efu u wani fende wini fu a kado di Gadu gi u di a meke Yesesi kon dede gi u?

¹⁵ Na a dede di Gadu meke en Manpikin kon dede gi u, meke u poi fende paadon fu u sondu. Ma efu u wani Gadu gi u paadon, u mu du wan sani. Saw mu du? Yohanisi a Dopuman anga Yesesi be taki saw mu du: ‘U daai u libi, bika a Kownukondee fu Gadu di de a hemel koosube’ (Mat. 3:1, 2; 4:17). Efu u wani wi anga Yehofa toon mati, efu u wani a gi u paadon fu den sondu fu u, daw mu daai u libi. Ma san a wani taki fu daai u libi? Fa a daai di wo daai u libi o meke Yehofa piisii winsi fa wi abi sondu? Wo piki den akisi ya aini a taa artikel.