1. San a wani taki fu daai u libi?

 TE U du wan sani di á bun, Gadu wani u tapu anga a sani de. Beibel taki wan sama di daai en libi e soi taki a sani di a be du e hati en, a nai du a sani de moo tu. Den sani di wan sama e du e soi efu a sani di a be du e hati en tuutuu.​—Luku a wowtu ‘daai libi’ na a pisi di den e kai ‘San den wowtu ya wani taki’

2. Saide ala sama mu daai den libi? (Nehemiya 8:9-11)

² Ala sama mu daai den libi. Saide? Bika dei nai pasa di u nai meke fowtu. Fu di wi a bakapikin fu Adan anga Efa, meke useefi abi sondu. Na a sondu ya e meke we dede (Rom. 3:23; 5:12). Nawan sama á poi taki a naabi sondu. Apostel Pawlesi a wan man di biibi be taanga, ma toku a bunbun moiti a be mu meke fu aa du sani di á bun (Rom. 7:21-24). A sani ya wani taki u mu e fii booko-saka naamo fu den fowtu di u be meke? Nono. Yehofa a wan Gadu di abi tyali-ati, a wani u de koloku. Pakisei a toli fu den Dyu fu a ten fu Nehemiya. (Leisi Nehemiya 8:9-11.) Yehofa á be wani den e tyali naamo fu den sondu di den be du aini a ten di pasa. A be wani den dini en anga piisii. Yehofa sabi taki te wan sama daai en libi, a sani ya e meke a sama piisii. Neen meke ai leli u taki u mu daai u libi. Efu u tapu anga den sondu di u be e du aini a ten di pasa, u sa biibi taki a Dda fu u di abi tyali-ati o gi u paadon.

3. San wo luku aini a artikel ya?

³ Aini a artikel ya, wo leli moo sani fu a daai di u mu daai u libi. Wo leli dii sani. Wo luku fosi san Yehofa be leli den Islayelisama fu a daai di den be mu daai den libi. Bakadati  wo si fa Yehofa e yeepi sama fu daai den libi. Enke lasiti, wo luku san Yesesi be leli den disipel fi en fu a sani ya.

SAN YEHOFA BE LELI DEN ISLAYELISAMA FU A DAAI DI DEN BE MU DAAI DEN LIBI?

4. San Yehofa be leli a foluku fi en fu a daai di den be mu daai den libi?

⁴ Di Yehofa gi den Islayelisama a weiti fi en, den be paamisi en taki den o aliki en. Yehofa be paamisi den tu taki efu den aliki en, a be o belesi den. A be taigi den taki: ‘Den weiti di mi e gi u tide, á taanga tumisi fu holi. Den á de faawe fu u tu’ (Deit. 30:11, 16). Efu den á be aliki en, neen den go dini taa Gadu, aa be o kibii den moo. Ma a sani ya á wani taki Yehofa á be o si den na ain moo seefiseefi. Den ‘be sa daai kon neen baka’ (Deit. 30:1-3, 17-20). A sani ya e soi taki den be mu daai den libi. Efu den be du a sani ya, den anga Yehofa be o toon mati baka. A be o belesi den tu.

5. Fa Yehofa be e pasensi anga a foluku fi en winsi fa son yuu den á be e aliki en? (2 Kownu 17:13, 14)

⁵ A omen leisi den Islayelisama be e taangayesi Yehofa. Den be e dini pobiki, den be e du omen taa sani di Yehofa e buuse tu. Den be fii a bakapisi fu den sani di den be du. Ma Yehofa á be poti den a wanse, a be e yeepi den ete fu den kon dini en baka. Na ala yuu a be e sende den polofeiti fi en go na a foluku fu yeepi den fu daai den libi, da den kon dini en anga den hii ati baka.​—Leisi 2 Kownu 17:13, 14.

6. Saide Yehofa be e koboloiki den polofeiti fi en fu soi a foluku taki den mu daai den libi? (Luku a fowtow tu.)

⁶ Te den Islayelisama á be aliki Yehofa, a be e sende den polofeiti fu wasikoi den taki efu den á kengi a fasi den e libi, sani o miti den. Yehofa be taigi Yelemiya fu taigi a foluku taki: ‘Islayeli, u daai baka gi mi, ma gaantangi daai kon baka a mi . . . Mi ati naw boon ai moo, bika mi lobi yu  ete . . . Mi ati naw boon a yu fu teego. Poti pakisei a den fowtu dii meke, bika i nai aliki Yehofa’ (Yel. 3:12, 13). Yehofa be taigi Yoweli fu a taigi a foluku taki: ‘U daai kon baka a mi anga u hii ati’ (Yowe. 2:12, 13). Yesaya be taki: ‘U tapu anga den ogii di we du, mia wani si den moo. Ná du ogii moo’ (Yes. 1:16-19). Yehofa be meke Eseikiyeli akisi a foluku taki: ‘U denki ai switi gi mi te wan ogii sama dede? Wa sabi taki a wani mi wani a fika den ogii di ai du fu a tan a libi noh? Mi nai piisii te wan sama dede. Daai kon baka a mi, dai libi’ (Eseik. 18:23, 32). Yehofa e piisii te sama e tapu anga den sondu di den be e du, bika a wani den libi fu teego. Ma a te wan sama daai en libi fosi Yehofa e yeepi en?

7. Te u luku a toli fu polofeiti Hoseya anga en uman, da san Yehofa be wani leli a foluku fi en?

⁷ Meke u luku a toli fu Gomer, a uman fu polofeiti Hoseya. Wo si san Yehofa be wani leli a foluku fi en. Baka di a du ogii neen man osu, a fika Hoseya neen a go teke wan taa man. San Yehofa du? Fu di Yehofa poi si sama ati, meke a be taigi Hoseya taki: ‘Daai go a yu uman baka. Winsi a teke wan taa man, i mu lobi en leti enke fa Yehofa lobi den Islayelisama, winsi fa den e dini taa gadu’ (Hos. 3:1; Odo 16:2). Holi a pakisei taki a wan gaan sondu a uman fu Hoseya be du. Ma Yehofa be wani Hoseya gi en uman paadon, da a poti en a osu baka. Yehofa be wani soi a foluku fi en taki ai booko en ede anga den. a Winsi fa den be e tan du ogii, toku a be lobi den ete. A toli ya e soi u taki Yehofa sabi ala sani fu wan sama. A wani yeepi wan sama di e tan du sondu fu daai en libi (Odo 17:3). Meke u luku fa Yehofa e du a sani ya.

FA YEHOFA E YEEPI SAMA DI E SONDU FU DAAI DEN LIBI

8. San Yehofa be du fu yeepi Kain fu daai en libi? (Genesesi 4:3-7) (Luku a fowtow tu.)

⁸ A Kain na a fosi pikin fu Adan anga Efa. Leti enke fa ala den taa bakapikin fu Adan anga Efa be abi sondu, a so Kain seefi be abi sondu tu. A be e fii fu du sani di á bun. Ma aa be e meke moiti fu basi den fii ya. Beibel taki: ‘Den sani di a be e du á be bun’ (1 Yoh. 3:12). Kande na a sani ya meke Yehofa ‘á be e piisii anga a ofaandi fu Kain’. Ma pe fu a kengi a fasi fa a be e denki, ‘en ati boon fu ogii, a be masi en fesi’. San Yehofa du? A taki anga Kain. (Leisi Genesesi 4:3-7.) Yehofa taki switi anga en. A be taigi en taki efu a be bigin du san bun, a be o belesi en. A be wasikoi en tu taki a boon di en ati be boon be sa meke a du wan ogii. A tyali taki Kain ná aliki Yehofa. Aa be wani a yeepi en fu a daai en libi. U si taki Kain ná aliki Yehofa, ma a sani ya wani taki Yehofa nai yeepi sama di meke wan fowtu moo fu daai den libi? Nono.

9. Fa Yehofa be yeepi David fu daai en libi?

⁹ Ná pikin lobi Yehofa be lobi Kownu David. A be taki ‘ai meke a piisii’ (Toli 13:22). Ma David be du wantu sani di á bun. A be teke sama uman, a be kii sama tu. Enke fa a Weiti fu Mosesi be e soi da David be mu dede (Lef. 20:10; Num. 35:31). Ma Yehofa be wani yeepi David fu kengi. b A be sende polofeiti Natan fu go  taki anga a Kownu, winsi fa a be kibii a sondu fi en. Natan be gi wan ageisitoli fu yeepi David fu fusutan taki a be du wan gaan sondu. A sani ya meke a be fusutan taki a be du wan sani di hati Yehofa, neen meke a be wani soi taki a sani di a be du e hati en (2 Sam. 12:1-14). A be sikiifi wan psalm fu soi taki a sani di a be du be e hati en tuutuu (Ps. 51). A omen sama di be du wan gaan sondu e fende taanga-sikin te den leisi a psalm ya. Ai yeepi den fu den daai den libi tu. We piisii taki Yehofa be yeepi David.

10. Fa a pasensi di Yehofa e pasensi anga u anga a gi di ai gi u paadon e meke u fii?

¹⁰ Yehofa e buuse sondu (Ps. 5:4, 5). Ma a lobi u, neen meke a wani yeepi u te u du wan sondu. Na ala yuu Yehofa e yeepi sama. Winsi a wan gaan sondu wan sama du, a de kabakaba fu yeepi en, bika a wani en anga en toon mati. A sabi di u sabi taki Yehofa e gi sama paadon e gi u taanga-sikin te ye. Efu we pakisei a pasensi di Yehofa abi anga sama, wo fende taanga-sikin fu tan dini en. Boiti dati efu u meke wan fowtu, wo soi taki a sani di u du e hati u. Meke u luku now san Yesesi be leli den disipel fi en fu a daai di u mu daai u libi.

SAN DEN DISIPEL FU YESESI BE LELI FU A DAAI DI U MU DAAI U LIBI?

11-12. Sowtu ageisitoli Yesesi be gi fu leli u taki Yehofa de kabakaba fu gi sama paadon? (Luku a fowtow a fesise fu A Wakititolen.)

¹¹ Aini a ten fu den fosi Kelesten, a yuu be doo fu a Mesiyas be kon. Enke faw be si aini a artikel di pasa, da Yehofa be meke Yohanisi a Dopuman anga Yesesi Kelestesi leli a foluku saide a pelensipali fu den daai den libi.​—Mat. 3:1, 2; 4:17.

¹² Di Yesesi be de a goontapu, a be e leli sama taki Yehofa lobi gi sama paadon. We si a sani ya te we luku a toli fu a lasi manpikin. A boi be komoto neen dda osu, neen a go kaba a soso. A du omen sani di á bun. Ma baka wan pisiten ‘a kisi enseefi’, neen a daai go a osu baka. San a dda du? Yesesi taki ‘di en dda si a opo uku e kon, tyali kisi en neen a lon go neen.  A baasa en neen a bosi en’. A boi be e si enke en dda naw gi en paadon. Neen meke a be akisi en dda efu a be sa toon wan fu den wookoman fi en. En dda be de kabakaba fu gi en paadon. A be kai en ‘mi boi’. A be kai en kon a osu baka. A dda taki: ‘A be lasi, ma u fende en baka’ (Luk. 15:11-32). Di Yesesi be de a hemel, a be e si fa tyali be e kisi en Dda te wan sama be du wan sondu. Neen meke a be e gi den sama di be daai den libi paadon. Ná pikin taanga-sikin a toli ya e gi u. Ai soi u taki Yehofa a wan Gadu di abi tyali-ati.

13-14. San apostel Peitilisi leli fu a daai di u mu daai u libi? San a leli taawan fu a sani ya? (Luku a fowtow tu.)

¹³ Yesesi be leli apostel Peitilisi wan pelensipali sani fu a gi di Yehofa e gi sama di du wan sondu paadon. A omen fowtu Peitilisi be meke, ma Yesesi be de kabakaba fu gi en paadon. Baka di a be taki dii leisi taki aa sabi a Masaa fi en, a be fii booko-saka te, aa be sabi san a mu du (Mat. 26:34, 35, 69-75). Ma di Yesesi weki baka, a meke Peitilisi si en di a be de en wawan (Luk. 24:33, 34; 1 Kor. 15:3-5). Yesesi be sabi taki a sani di Peitilisi be du be hati en, neen meke a be wani yeepi en fu a fusutan taki a gi en paadon.​—Malik. 16:7.

¹⁴ Peitilisi be fusutan san a wani taki fu daai en libi. A be sabi fa wan sama e fii te taawan gi en paadon tu. Neen meke a be e taigi sama san a be leli. Wan leisi di den be e holi a Pinksterfesa, Peitilisi be taigi wan kulu Dyu taki a den meke sama kii a Mesiyas. Ma a be taigi den taki: ‘U daai u libi, u teke a se fu Yehofa, da aw gi u paadon fu den sondu fu u’ (Toli 3:14, 15, 17, 19). Peitilisi taki wan sama di sondu mu daai en libi. A sani ya wani taki wan sama e bigin denki sani di bun, a nai du a  sani di a be e du moo, da ai bigin du sani di e meke Yehofa piisii. Den apostel seefi be sabi taki Yehofa gi den paadon tuutuu. A leti enke a be sibi den sondu fu den puu, a nai si den moo. Baka omen yali apostel Peitilisi be taigi den fosi Kelesten taki: ‘Yehofa . . . abi pasensi anga u, bika aa wani nawan sama dede. A wani ala sama fende a okasi fu tapu anga den sondu fu den’ (2 Peit. 3:9). Te we soi taki den sondu di u be du e hati u, Yehofa o gi u paadon winsi u be du wan gaan sondu. A sabi di u sabi a sani ya e meke u fii bun.

15-16. (a) San apostel Pawlesi leli fu a gi di Yehofa e gi sama paadon? (1 Timotiyesi 1:12-15) (b) San wo luku aini a taa artikel?

¹⁵ A omen ogii Pawlesi fu Tarsus be du. A be e libi ogii anga den bakaman fu Kelestesi. A omen Kelesten be e si enke noiti aw kengi. Ma Yesesi be sabi taki Pawlesi poi kengi. A be sabi taki a poi daai en libi. En anga en Dda be e si den bun manii fu Pawlesi. Yesesi be taki: ‘A miseefi teke a man ya’ (Toli 9:15). Yesesi be du wan wonduu fu yeepi Pawlesi fu a daai en libi (Toli 7:58–8:3; 9:1-9, 17-20). Bakaten Pawlesi toon wan Kelesten. Enke wan apostel, Yesesi be gi en wooko fu du. Ná pikin bigi a be e bigi gi Pawlesi taki Yehofa anga Yesesi be soi tyali-ati gi en. (Leisi 1 Timotiyesi 1:12-15.) Pawlesi be taki: ‘A di Gadu abi bun-ati meke a wani yeepi u fu daai u libi.’​—Rom. 2:4.

¹⁶ Wan leisi a be yee taki wan man aini a kemeente fu Korente be du wan gaan sondu, ma den á be puu en aini a kemeente. San a be taigi den taki den mu du? Te we luku den sani di Pawlesi taki, wo si fa Yehofa e soi taki a lobi sama te ai puu kaasi gi den. Wo si faw sa waka neen baka tu. Aini a taa artikel, wo luku san be pasa aini a kemeente fu Korente.