Pawlesi be taigi den Kelesten a Tesalonika taki: ‘Efu wan sama á wani du den sani di u taki aini a biifi ya, u mu luku bun anga en. Wi á mu paa anga en moo, da sen o kisi en’ (2 Tes. 3:14). A den owluman Pawlesi be e taigi a sani ya. Fosi, den owluman be e piki a kemeente efu wan sama á be wani wooko anga den leli fu Beibel. Den baala anga sisa naw paa anga sowan sama moo. A te den de aini a peleikiwooko efuso te den de a komakandaa wawan den o go e mosoo anga en.

Ma u kon fusutan a sani di Pawlesi be taki moo bun. Ibii Kelesten mu luku san aw du te a sani ya pasa. Saide we fusutan a sani di Pawlesi taki a 2 Tesalonikasama 3:14 taa fasi nownow? Luku san Pawlesi be wani soi di a be e taki fu a sani ya.

Pawlesi be yee taki son sama aini a kemeente ‘be e tyai denseefi a wan fasi di á fiti’. A be poti den a pasi, ma den á be wani aliki en. Wan leisi di a go luku den a be taigi den taki: ‘Efu wan sama á wani wooko aa mu nyan tu.’ Son sama á be e wani wooko fu solugu denseefi. Winsi den be poi wooko, toku den á be e du nawan sani. Boiti dati, den be e mumui aini taa sama libi. Fa Kelesten mu du sani te wan sama e tyai enseefi so?​—2 Tes. 3:6, 10-12.

Pawlesi taki: ‘U mu luku bun’ anga den sama ya. A Giiki wowtu di a taki ya e soi taki u mu konikoni anga a sama, bika a sa meke u du sani di á bun. Na ala sama aini a kemeente Pawlesi be e taki, a ná den owluman wawan (2 Tes. 1:1; 3:6). Neen meke efu den baala anga sisa si taki wan sama nai wooko anga den leli fu Beibel, ‘den naw paa anga en moo’.

A sani ya wani taki den be mu libi anga a sama ya enke wan sama di den baala puu aini a kemeente? Nono. Pawlesi taki: ‘I mu e poti en a pasi enke i baala.’ A sani ya e soi taki den baala anga sisa sa mosoo anga sowan sama ete, a den komakandaa efuso a peleikiwooko. Te den e holi wan sani fu piisii anga denseefi, den naw kai en. Saide? Pawlesi taki da ‘sen o kisi en’ te u nai paa anga en moo. A sani de o meke a tapu anga a sani di a be e du.​—2 Tes. 3:14, 15.

Fa Kelesten o sabi on ten den mu luku bun anga wan sama? Enke fa Pawlesi taki, daw mu sabi efu a sama e tyai enseefi a wan fasi di á fiti. A ná ala yuu wi anga taa sama o du sani na aseefi fasi, bika ala sama kosensi e wooko taa fasi. Ma dati á wani taki a sani di a sama du fowtu, bika Beibel nai kuutu en. A ná den sama di du wan hati sani anga u a be e taki tu, ma a den sama di á wani wooko anga den leli fu Beibel.

Aini a ten ya, efu u si taki wan baala efuso wan sisa á wani wooko anga den leli fu Beibel, a useefi sa bosoloiti taki u naw paa anga en moo. Fu di a sani ya a wan bosoloiti di ibii sama mu teke, meke u naw taki fi en anga taa sama, winsi a wan sama di wi anga en e tan aini aseefi osu. Ma wo go e de makandaa anga a sama ete aini a peleikiwooko anga den komakandaa. Efu a kengi a fasi fa a be e tyai enseefi, da wo bigin paa anga en baka.