1. Saide dopu de taanga fanowdu? (Luku a fowtow na a bigin.)

A OMEN dunsu sama di e sutudeli Beibel e dopu ala yali. Gaanse fu den yonkuu. Kande son wan fu den kiya a waaleiti. Yu a wan fu den yonkuuwan ya? U wani gafa i efu yu a wan fu den yonkuuwan ya, bika disi na a moo bun sani di i be sa du. Efu wan Kelesten wani fende teego libi a mu dopu.​—Mateyesi 28:19, 20; 1 Peitilisi 3:21.

2. Saide yu á mu feele fu paamisi Yehofa taki yu o libi enke fa a wani?

² Te wan sama dopu, Yehofa e belesi en a omen fasi. Boiti dati a sama abi wan nyun faantiwowtu. San na a faantiwowtu de? A dei di i be e dopu, a baala di be holi a dopu lezing be akisi i taki: „Fu di i poti biibi aini a ofaandi fu Yesesi Kelestesi, den sondu di i be du fosi e hati i, i paamisi Yehofa tu taki yu o libi enke fa a wani?  I be piki, iya. I paamisi Yehofa taki yu o lobi en. I paamisi en tu taki yu o dini en anga i hii ati. A mu hati i taki i be paamisi Yehofa a sani de? Kweti! Noiti a o hati i taki i meke Yehofa tii a libi fi i. Den sama di á sabi Yehofa de aini a goontapu fu Saatan. Saatan nai booko en ede anga den. A nai booko en ede anga i tu. Ná pikin switi a o switi gi en efi i gwe fika Yehofa leti enke fa a gwe fika Yehofa. Bika a sabi taki i ná o fende a libi di Yehofa paamisi i.

3. Fa Yehofa belesi i di i paamisi en taki yu o libi enke fa a wani?

³ Pakisei fa Yehofa belesi i di i paamisi en taki yu o libi enke fa a wani, neen i dopu. Fu di i gi Yehofa i libi meke i poi taki: „Yehofa de anga mi. Mi nai feele. San libisama poi du anga mi?” (Psalm 118:6) Sani á de di bun enke te i sabi taki Yehofa de anga i anga te i sabi taki yu e meke a piisii.

4, 5. (a) Fa u mu si a paamisi di u paamisi Yehofa taki wi o libi enke fa a wani? (b) Sowtu tesi e miti Kelesten?

⁴ A dini di u mu dini Yehofa á de enke wan famii gudu di mma anga dda e fika gi u. Winsi yu e tan anga i mma anga i dda ete, a iseefi mu meke moiti fu toon Yehofa mati. Saide yu á mu feegete a sani ya? Nawan sama sabi sowtu tesi o miti en aini a ten di e kon. Kande i be nyoni ete di i dopu. Ma di i kon moo bigi i kon abi taa polobelema. I kon e fii fu du son sani. Wan meisyo taki: „Gaanse leisi wan Kotoigi pikin ná o fika a waaleiti fu di a á poi nyan fuuyali kuku a sikoo. Ma te a fii fi en fu siibi anga wan sama kon moo taanga, da a de taanga fanowdu fu a biibi taki den weiti fu Yehofa o meke a abi wan bun libi.”

⁵ Leti enke fa tesi e miti yonkuuwan, a so ai miti gaansama tu. Son tesi di e miti gaansama, a sani di den á be denki taki o miti den. Kande den abi polobelema aini den toowlibi. Kande den siki. Kande sani e miti den a pe den e wooko tu. A ná abi toobi omen yali wi abi, te tesi miti u, u mu soi taki u nai gwe fika Yehofa.​—Yakowbesi 1:12-14.

6. (a) San a wani taki fu paamisi Yehofa taki yu o dini en? (b) San Filipisama 4:11-13 e leli u?

⁶ Winsi san e miti i, noiti i mu feegete san i paamisi Yehofa. I paamisi en taki yu o dini en. I mu du san i paamisi, winsi i mati efuso i mma anga dda nai dini en moo (Psalm 27:10). Winsi san e miti i, i mu begi Yehofa fu a yeepi i fi i du san i paamisi.​—Leisi Filipisama 4:11-13.

7. San a wani taki fu feti fu fende a libi „anga ala feele anga beifi”?

⁷ Yehofa wani yu anga en de mati. Ma u mu meke moiti efu u wani de en mati. U mu meke moiti tu fu fende a libi. Filipisama 2:12 taki: „Anga ala feele anga beifi u mu e feti naamo fu u fende a libi.” A sani ya e soi taki u mu e sidon denki san u mu du fu wi á gwe fika Yehofa, winsi san e miti u. Noiti u mu si enke wi o man dini  Yehofa sondee fu meke moiti. Yu á mu feegete taki omen sama di dini Yehofa omen yali, gwe fika en bakaten. San o yeepi i fu fende a libi?

8. San a wani taki fu sutudeli Beibel? Saide a sani ya de taanga fanowdu?

⁸ Efu u wani de Yehofa mati, u mu e aliki en. U mu e taki anga en tu. A moo pelensipali fasi fa wi e aliki Yehofa, a te wi e sutudeli Beibel anga den buku fu a olikanisâsi. Te u leisi wan sani, u mu teke ten pakisei san u leisi. Ma a sutudeli di wi e sutudeli Beibel á de enke te wan pikin e leli wan sani di a mu meke a sikoo. A ná sabi u mu sabi den sani di wi e leisi namo a ede, ma u mu si en enke wan piisii sani fu leli nyun sani di o yeepi u fu sabi Yehofa moo bun. A sani ya o yeepi u fu kon koosube a Gadu. Enseefi o kon koosube a u.​—Yakowbesi 4:8.

9. San yeepi i fu sutudeli Beibel moo bun?

⁹ A olikanisâsi fu Yehofa meke omen sani fu yeepi i fu ondoosuku Beibel. Yu abi wan pisi a jw.org. den e kai „Jongeren”. Te i go na a pisi di den e kai „Projecten voor Bijbelstudie”, yu e fende sani di e yeepi i fu si fa i mu wooko anga den sani di sikiifi aini Beibel. Boiti dati jw.org abi wantu werkbladen di sa yeepi i fu sutudeli a buku di den e kai „San Bijbel  e leri wi trutru?” Den artikel ya sa yeepi i fi i biibi kon moo taanga. Den e soi tu fa i sa taki anga sama fu den sani di yu e biibi. A artikel di den e kai „Jonge mensen vragen . . . Hoe maak ik Bijbellezen leuker?”, di de aini a Ontwaakt! fu april 2009 e soi wantu sani tu di i sa du te yu e sutudeli. Efi i wani fende a libi, i mu meke moiti fu sutudeli Beibel, da i teke ten pakisei san i leisi.​—Leisi Psalm 119:105.

10. Saide wan Kelesten di dopu mu e begi?

¹⁰ Te wi e sutudeli Beibel, a Yehofa e taki anga wi. Ma te wi e begi, da a wi e taki anga Yehofa. Wi á mu e si begi enke wan gwenti namo, efuso enke wan sani di mu yeepi u fu sani waka bun. Te wi e begi, a taki wi e taki anga a Gadu di meke u. Pakisei a sani ya: Yehofa wani yee san i wani taigi en! (Leisi Filipisama 4:6.) Neen meke Beibel taki te den booko ede fi i e moo yu, i mu „fiingi den lai fi i gi Yehofa” (Psalm 55:22). Miliyunmiliyun baala anga sisa fende wini fu a sani ya. Iseefi sa fende wini tu.

11. Saide i mu gi Yehofa daa ala yuu?

¹¹ A ná te u wani Yehofa yeepi u wawan u mu e begi. Beibel taki: „Soi taki yu e teke sani fu bigi” (Kolosesama 3:15). Son leisi wi e booko wi ede anga den polobelema fu u te, da u nai si den bun sani di e pasa aini u libi moo. Puubei a sani ya: Meke moiti ala dei fu pakisei dii sani di e bigi gi i, da i gi Yehofa daa fu den sani ya. Wan yonkuu sisa di dopu di a be abi 12 yali taki: „Sama á de a goontapu efuso hemel di u mu gi daa enke Yehofa. Ala okasi di u fende u mu gi en daa fu den sani di ai du gi u.”

12, 13. Fa iseefi si taki Yehofa bun? Saide a de taanga fanowdu fu pakisei fa Yehofa yeepi i?

¹² Yehofa yeepi kownu David fu holidoo di omen tesi be e miti en. Neen meke David be sabi san a be e taki, di a sikiifi taki: „Tesi, da yu o si taki Yehofa bun. A sama di e go kibii neen o de koloku” (Psalm 34:8). A sani ya e soi taki useefi mu si a bun-ati fu Yehofa. Te yu e leisi Beibel, den buku fu a olikanisâsi anga te yu e go a komakandaa, yu e si fa Yehofa yeepi taa sama fu dini en, winsi sowtu tesi e miti den. Ma o moo yu e kon koosube a Yehofa, o moo a de fanowdu fu si fa ai yeepi i. Fa iseefi si taki Yehofa bun?

¹³ Yehofa soi bun-ati gi ala Kelesten a wan pelensipali fasi. A wani u kon koosube neen anga en manpikin. Yesesi taki: „Nawan sama poi kon a  mi efu Nda di sende mi kon, á hali en” (Yohanisi 6:44). Yu e biibi taki a Yehofa hali i kon neen? Efuso yu e denki taki, ’Yehofa hali mma anga nda kon neen, ma mi a waka mi e waka a den baka’. Ná feegete taki di i paamisi Yehofa taki yu o libi enke fa a wani, di i dopu, yu anga en toon mati. Beibel taki: „Efu wan sama lobi Gadu, da Gadu sabi a sama de” (1 Korentesama 8:3). I mu teke en fu bigi taki Yehofa meke i de aini en olikanisâsi.

14, 15. Fa a peleikiwooko sa yeepi i fi i biibi kon moo taanga?

¹⁴ I si a bun-ati fu Yehofa tu di a yeepi i fu taki anga taawan fu den sani di yu e biibi aini a peleikiwooko efuso a sikoo. A á makiliki fu peleiki gi den pikin di yu anga den e go na a wan sikoo. Kande yu e akisi iseefi san den o taki. A á makiliki tu fu taki san yu e biibi a omen sama fesi. Ma san o yeepi i?

¹⁵ Pakisei saide yu e biibi den sani di sikiifi aini Beibel. Wan sani di o yeepi i fu du a sani ya, a den werkbladen di de a jw.org. Luku efu den de aini a tongo di yu e taki. Den o yeepi i fu sidon denki den sani di yu e biibi. Den o yeepi i fu si tu saide yu e biibi den sani di sikiifi aini Beibel. Boiti dati yu o si fa i sa taki anga taawan fu den sani di yu e biibi. Efi i man si kiin taki den sani di yu e biibi a tuu, anga efu yu e seeka iseefi bun, yu o wani taki anga taawan fu Yehofa.​—Yelemiya 20:8, 9.

16. San o yeepi i fu yu á feele fu taigi taawan san yu e biibi?

¹⁶ Ma winsi i seeka bun, tokuso kande yu e feele fu taki anga taawan fu den sani di yu e biibi. Wan sisa be dopu di a be abi 13 yali, ma nownow a abi 18 yali. A sisa ya taki: „Mi sabi san mi e biibi, ma son leisi ai taanga gi mi fu soi wan sama finifini san mi e biibi. A sisa ya e meke moiti fu a á feele te ai taki anga taawan fu den sani di ai biibi. Ai taki anga den enke fa a gwenti taki. A taki: „Den pikin fu mi kalasi nai feele fu taki den sani di den e du, neen meke miseefi á mu feele fu taigi sama san mi e du. Son leisi te mi anga den e taki, da mi e taigi den taki: ’Taade ya mi be e leli sama den sani di sikiifi aini Beibel, neen . . .’ Da mi e fende a okasi taigi den san mi abi a pakisei. Winsi fa a ná fu Beibel mi e taki anga den na a bigin, toku omen fu den e akisi mi fa mi e leli sama den sani di sikiifi aini Beibel. Son leisi den e poti omen akisi gi mi. Te mi bigin taki so anga den, ai moo makiliki gi mi fu peleiki gi den. Te mi kaba taki anga den mi e fii bun!”

17. San a wan taa sani di o yeepi i fu peleiki gi taawan?

 ¹⁷ Te taawan e si taki yu e booko yu ede anga den efuso e lesipeki den, ai moo makiliki gi den fu lesipeki i. Den o lesipeki den sani di yu e biibi tu. Luku san wan sisa fu 17 yali di den e kai Olivia taki. A sisa ya be dopu di a be moo yonkuu. A taki: „Mi be e si enke te mi be o taki fu Beibel anga sama, den be o si enke ná pikin santa mi santa.” Ma bakaten a bigin si a sani ya taa fasi. A á be e booko en ede tumisi anga san sama be o taki, ma a be e denki taki: „A omen yonkuuwan á sabi nawan sani fu Yehofa Kotoigi. A wi a den wan enkii Kotoigi di den e si. Neen meke na a fasi fa wi o tyai useefi o meke den aliki u. Ma fa sani o waka efu sen e kisi u efuso wi e feele fu taki fu a biibi fu u? Kande den o si taki u nai piisii anga a fasi fa u de. Kande den o wisiwasi u fu di den si taki wi e feele fu taki fu a biibi fu u. Ma efu u nai feele fu soi den san wi e biibi anga saide wi e biibi son sani, den o moo lesipeki u.”

18. San i mu du fu fende a libi?

¹⁸ U si taki a de taanga fanowdu fu meke moiti fu fende a libi. Fu man du a sani ya, i mu e leisi a Wowtu fu Gadu, i mu e teke ten pakisei san i leisi, i mu e begi Yehofa tu. Boiti dati i mu e pakisei fa Yehofa yeepi i. Efu yu e du den sani ya yu o moo si kiin taki yu anga Yehofa a mati. A sani ya o gi i taanga-sikin fu taki anga taawan fu den sani di yu e biibi.​—Leisi Psalm 73:28.

19. Saide a de fanowdu fu meke moiti fu fende a libi?

¹⁹ Yesesi taki: „Efu wan sama wani waka a mi baka, da a á mu teli enseefi moo, ma a mu teke en pina udu, da ai waka a mi baka naamo” (Mateyesi 16:24). Efu u wani waka a Yesesi baka, u mu paamisi Yehofa taki wi o libi enke fa a wani, da u dopu. Ma te wan sama dopu, a bigin ai bigin libi wan bun libi aini a ten ya. A o yeepi u fu fende a teego libi aini a nyun goontapu. Neen meke i mu du ala san i man fu fende a libi.