SAIDE nda ati be boon so? Meke mi gi yu a toli. Mi meke a 29 yuli 1929. Mi kiya a Bulacan, wan kampu a Filipeinikondee. Den sama fu mi a be pootiman. Di mi be nyoni, den suudati fu Yapan be kon feti anga Filipeinikondee. A kampu fu u á be de koosube a pe a feti be e feti, neen meke wi á fii a feti bunbun fasi. Wi á be abi laadiyow, tv anga kolanti. A sama be e gi u toli fu a feti.

Mi be abi seibin baala anga sisa. Di mi be abi aitin yali, neen mi gaanmma anga mi gaandda meke mi go tan anga den. Winsi fa den be e go a Lomusu keliki, toku mi gaandda be lobi taki fu taa keliki anga den mati fi en. A be e teke den buku di den mati fi en be e gi en tu. Mi sabi ete taki a be soi mi a Beibel anga wantu buku di be e taki fu den sani di falisi keliki e leli sama. Den buku ya be de aini Tagalogtongo. * (Luku a maiki a ondoo) Mi be lobi leisi Beibel, moomoo den buku Mateyesi, Malikisi, Lukasi anga Yohanisi. Na a sani ya meke mi be wani waka Yesesi baka.​—Yohanisi 10:27.

Den suudati fu Yapan komoto aini a kondee aini 1945. A pisiten de, mma anga nda akisi mi fu go tan anga den baka. Mi gaandda gi mi taanga-sikin fu go. A so mi go tan anga den baka.

Aini december fu a yali 1945, Yehofa Kotoigi fu a foto Angat be kon peleiki aini a foto pe u be e tan. Wan gaandi Kotoigi kon peleiki a wi osu, neen a soi u san Beibel e taki fu den „lasiti dei” (2 Timotiyesi 3:1-5). A kai u fu go sutudeli Beibel a wan kampu di be de koosube. Mi go, winsi fa mma anga nda á go. A wan sani fu 20 sama be de na a Beibelsutudi. Son wan fu den be e akisi sani fu Beibel.

Mi á be e fusutan a toli di den be e gi, neen meke mi be wani gwe. Ma di den bigin singi wan Kownukondee singi, neen mi á gwe moo, bika mi  be lobi a singi. Baka a singi neen den begi. Baka dati den kai u fu go a wan komakandaa di be o holi a taa sonde a Angat.

A komakandaa ya be holi a famii Cruz osu. Son wan fu wi waka wan sani fu aitin kilometer fu go na a komakandaa. A wan sani fu 50 sama be de na ape. Mi foondoo di mi si fa pikinnengee be e gi piki, winsi fa den toli di den be e taki be muliki. Baka di mi go a komakandaa omen leisi, neen Damian Santos wan gaandi pionili, akisi mi efu mi wani siibi neen osu. A neti de u taki fu omen Beibel toli.

A ten de, solanga i be sabi den moo pelensipali leli fu Beibel, i be sa dopu. Baka di mi go a wantu komakandaa, den baala akisi mi efu mi wani dopu. Mi taigi den taki: „Eeye mi wani.” Mi be sabi taki mi wani toon ’wan saafu fu Masaa’ (Kolosesama 3:24). U go a wan liba di be de koosube, neen mi anga wan taa sama dopu na a 15 februari 1946.

Mi be fusutan taki Kelesten di dopu mu peleiki ala yuu enke Yesesi. Nda be si enke mi yonkuu tumisi fu peleiki. A be fende taki a ná fu di mi dopu, da dati wani taki mi mu go peleiki. Ma mi soi en taki Gadu wani ala Kelesten paati a bun nyunsu fu a Kownukondee (Mateyesi 24:14). Mi be abi fu du san mi paamisi Gadu. Neen meke nda taigi mi a sani di mi be taki na a bigin. A á be wani mi go peleiki. Disi na a fosi leisi di mi be abi fu fika sani a baka fu dini Yehofa.

Famii Cruz kai mi fu go tan anga den a Angat. Den gi mi anga Nora, a moo yonkuu umanpikin fu den taanga-sikin fu du a pioniliwooko. U bigin pionili 1 november 1947. Nora go pionili a wan taa foto. Mi tan du a pioniliwooko a Angat.

Di mi pionili tu yali, neen Earl Stewart, wan baala di be e wooko a Betel, holi wan lezing gi moo enke 500 sama a Angat. A holi a lezing aini Ingiisitongo, neen mi taigi den sama den moo pelensipali sani fu a lezing aini Tagalogtongo. Disi a be a fosi leisi di mi du a sani ya. Bakaten mi poti omen lezing aini Tagalogtongo. Fa a waka mi be man du a sani ya? A seibin yali namo mi go a sikoo, ma den sama di be e leli mi be lobi taki Ingiisitongo. Boiti dati mi be lobi leisi den buku fu a olikanisâsi aini Ingiisitongo, bika buku á be de ipi aini Tagalogtongo. Neen meke mi be man fusutan Ingiisitongo. A sani ya be yeepi mi fu man poti den Ingiisi lezing aini Tagalogtongo.

Baala Stewart taigi den kemeente taki ala den zendeling di be de aini a kondee be o go na a gaan  konkelesi fu 1950 di be o holi a New York aini Ameekankondee. Neen meke a beikantoo be wani wan efuso tu pionili go yeepi a Betel. Mi a wan fu den sama di den baala be kai. A so mi gwe fika sani di mi be gwenti ete wan leisi, fu wooko a Betel.

Mi go a Betel a 19 yuni 1950. A beikantoo be de a wan gaan bigi gaandi osu. A dyali a be 1 hectare. Bon be lai na a dyali. A wan sani fu 12 baala di á be toow be e wooko de. Fuuku mamanten mi be e wooko aini a kukuu, da den neigin yuu ten, mi be e go tiiki koosi. Den á puu mi a Betel di den zendeling kon baka. Mi be e du ala san den baala be akisi mi. Mi be e paki den buku di u be e sende gi den kemeente efuso sama di be poti den nen fu fende buku. Boiti dati mi be e taki anga den sama di be e kon luku Betel anga den sama di be e telefon kon a Betel.

Aini 1952 mi anga sigisi taa baala fu Filipeinikondee go na a Gileyad-sikoo. Disi a be du fu 20 leisi di a sikoo ya holi. Ná pikin poolo mi be poolo. Di u be de na Ameekankondee, u si omen sani di wi á be sabi. U leli omen sani tu. Den sama fu Ameekankondee be e libi taa fasi.

U leli wooko anga masini anga taa sani di den e koboloiki aini kukuu. Noiti u be si son wan fu den sani ya ete. Boiti dati a kondee be de taa fasi! Di mi opo wan mamanten, neen mi si doose weti fan. Dati na a fosi leisi di mi si eisi. Ná pikin moin a be moin. Anga ala a peesi be koo.

Ma mi á be e booko mi ede anga den sani ya, bika mi lobi den sani di mi be e leli na a Gileyad-sikoo. Den baala di be e leli u be sabi leli sama bun. Den soi mi fa mi mu ondoosuku Beibel. A Gileyad-sikoo yeepi mi fu mi biibi kon moo taanga.

Baka a sikoo den baala sende mi go wan pisiten a Bronx, wan peesi aini New York enke spesuutu pionili. Neen meke mi be poi go na a New World Society konkelesi a Bronx aini yuli 1953. Baka a konkelesi den baala sende mi go a Filipeinikondee baka.

Den baala fu Betel be poti mi enke kelen owluman. A wooko ya yeepi mi fu waka moo bun a Yesesi baka. Bika Yesesi be e go a den foto anga den kampu di be de a faawe fu yeepi a foluku fu Yehofa (1 Peitilisi 2:21). A omen peesi mi be mu go enke kelen-owluman. Mi be e go a central Luzon, a moo gaan tabiki fu Filipeini. Mi go a  den peesi enke Bulacan, Nueva Ecija, Tarlac, anga Zambales. Efu mi be wani go a son peesi, mi be abi fu pasa den Madre mongo di be lai siton. Loko anga besi á be e lei a den peesi ya. Son leisi mi be abi fu akisi den man di be e lei den gaan wagi di e tyai udu fu mi sa sidon a den udu tapu. A omen leisi den tyai mi, ma a á be makiliki fu sidon a den udu tapu.

Gaanse fu den kemeente á be bigi. Boiti dati son wan fu den a be nyun kemeente. Neen meke den baala be e poolo te mi be e soi den fa den sa holi komakandaa anga fa den sa du a peleikiwooko moo bun.

Bakaten den baala sende mi fu go du a kelen wooko a Bicol. Ná pikin bigi a peesi ya bigi. Den baala be sende omen spesuutu pionili go a den peesi pe Kotoigi á be doo ete. A weisei fu wan fu den peesi pe u be de, a be wan gaan olo. Tu udu be kaasi abaa na a olo mofu. Di mi taampu a den udu tapu wan leisi, neen mi kai anga den go aini a olo. A wan hii pisiten mi be abi fanowdu fu wasi seeka fosi mi go nyan.

Di mi be e du a kelen wooko mi be bigin pakisei Nora. A be de enke spesuutu pionili a Dumaguete foto. Na aseefi yuu mi anga en bigin pionili. Mi go luku en. Baka dati, neen u bigin sikiifi biifi gi useefi. U toow aini 1956. A wiki baka di u toow, u go a wan kemeente a Rapu Rapu tabiki fu du a kelen wooko. U be abi fu subi mongo. Den pasi be langa tu. Ma mi be e piisii taki a mi anga Nora be de. U be e piisii tu taki u be poi holibaka gi den baala anga sisa a den faawe peesi ya.

Di u du a kelen wooko fo yali, den baala kai u fu go wooko na a beikantoo. U bigin wooko ape aini yanuari 1960. Den yali di mi wooko a Betel, mi leli omen sani fu den baala di abi gaan faantiwowtu aini a olikanisâsi fu Yehofa. Nora du omen sowtu wooko a Betel anga piisii.

Ai bigi gi mi fu si taki moo anga moo sama e kon dini Yehofa aini Filipeini. Di mi be kon a Betel enke yonkuman di á toow, a 10.000 peleikiman namo be de aini a kondee. Nownow a moo enke 200.000 peleikiman de aini Filipeini. A omen ondoo baala anga sisa e wooko na a Betel fu Filipeini fu holibaka gi a peleikiwooko.

Baka wan pisiten, u be kon si taki a Betel osu be nyoni tumisi. Neen den baala di e tii a wooko a hii goontapu akisi u fu suku wan peesi fu meke wan moo gaan beikantoo. Mi anga a baala di be e teke fesi a pe den e doloki buku, waka na ala den osu di be de koosube fu a beikantoo fu akisi den sama efu den wani seli a dyali fu den. Nawan sama á be wani seli den dyali gi u. Wan fu den sama taigi u taki: „Sineisi nai seli, a bai den e bai.”

Ma wan dei wan sani di wi á be denki pasa. Wan fu den biiti sama fu u taigi u taki a o foloisi go na a Ameekankondee. Neen a akisi u efu u wani bai a peesi fi en. Baka dati wan taa sama fu a biiti taigi u taki a o seli a peesi fi en gi u tu. Boiti dati a gi den taa biiti sama taanga-sikin fu seli a peesi fu den gi u. A man di be taigi u taki „Sineisi nai seli” seefi seli a peesi fi en gi u. Aini wan satu pisiten, a peesi fu a beikantoo be bigi dii toon moo fa a be de. Mi e biibi taki a Yehofa seefi be wani a sani ya pasa.

A mi a be a moo yonkuuwan a Betel aini 1950. Nownow a mi anga mi uman a den moo gaansama di e wooko a Betel. A nai hati mi taki mi waka a Yesesi baka winsi pe a be e sende mi go. Winsi fa mma anga nda poti mi a doo, toku Yehofa gi mi wan gaan famii di e dini en. Mi e biibi taki Yehofa e gi wi san wi abi fanowdu, winsi sowtu faantiwowtu a gi wi aini a olikanisâsi. Mi anga Nora e teke en fu bigi taki Yehofa e solugu u a omen fasi. Wi e gi taawan taanga-sikin fu denseefi wooko gi Yehofa fu den si fa a o belesi den.​—Maleyaki 3:10.

Yesesi be kai Leifi, wan man di be e piki lantimoni fu waka neen baka. San Leifi du? „Leifi opo, a fika ala sani, neen a bigin waka neen baka” (Lukasi 5:27, 28). Miseefi be abi fu fika omen sani fu waka a Yesesi baka. Mi e gi taawan taanga-sikin fu du aseefi sani fu Yehofa sa belesi den tu.