1-3. (a) San mu de wan fu den moo pelensipali sani di wi e biibi? (b) Saide a weki di dedesama o weki baka a wan pelensipali sani? (Luku a fowtow na a bigin.)

EFU wan sama akisi i san a den moo pelensipali sani di yu e biibi, san i be o taki? Kande i be o taigi gi en taki yu e biibi taki a Yehofa meke ala sani. Neen gi u libi. Kande i be o taigi en tu taki yu e biibi taki Yesesi dede gi u. I be o soi en taki a goontapu o toon paladeisi, da den sama di e dini Gadu o libi aini a paladeisi fu teego. Ma i be o taigi en taki yu e biibi taki dedesama o weki baka?

² Winsi fa u wani pasa a gaan banowtu fu libi fu teego a goontapu, toku a weki di dedesama o weki baka, a wan fu den pelensipali sani di wi e biibi. Apostel Pawlesi soi saide a sani ya pelensipali. A taki: „Efu dedesama ná o weki baka, da Kelestesi seefi á weki  tu.” Efu Yesesi á be weki baka, a á be o poi tii enke Kownu a hemel. A fu soso u be o peleiki tu. (Leisi 1 Korentesama 15:12-19.) Ma u sabi taki Yesesi weki baka. Wi á de enke den Saduseiman di á be e biibi taki dedesama poi weki baka. Winsi sama e soso u, toku wi e biibi taki Gadu poi weki dedesama.​—Malikisi 12:18; Toli 4:2, 3; 17:32; 23:6-8.

³ Pawlesi taki, wan fu den „fosi sani” di wi enke Kelesten e leli, na a weki di „dedesama o weki baka” (Hebrewsama 6:1, 2). Den sani di Pawlesi taki e soi taki a be e biibi taki dedesama o weki baka (Toli 24:10, 15, 24, 25). Winsi a sani ya a wan fu den fosi sani di u leli aini a Wowtu fu Gadu, tokuso a de fanowdu fu ondoosuku en finifini (Hebrewsama 5:12). Saide?

4. San a wantu sani di u sa akisi fu a weki di dedesama o weki baka?

⁴ Te sama e bigin sutudeli Beibel, den e leisi den toli di e soi fa dedesama be weki baka. Kande den leisi a toli fu Lasalesi. Den e leli tu taki Abalaham, Yopu anga Daniyeli be e biibi taki aini a ten di e kon dedesama o weki baka. Ma san i be o taki efu wan sama akisi i fu soi en aini Beibel saide a sa biibi taki dedesama o weki baka? Beibel e taki on ten dedesama o weki baka? Den piki fu den akisi ya o taanga u biibi.

5. San wi o luku aini a artikel ya?

⁵ Kande a moo makiliki gi i fu biibi taki wan sama di dede poi weki baka, efu a á dede langa ete (Yohanisi 11:11; Toli 20:9, 10). Ma Gadu man weki dedesama baka te a paamisi a sani ya omen yali a fesi? Te i luku en bun yu e biibi taki wan sama di be dede weki baka, enke fa Gadu be paamisi omen ondoo yali a fesi. Sama na a sama ya? Fa a sani ya o yeepi i fu biibi taki sama di dede o weki baka aini a ten di e kon?

6. San Psalm 118 taki fu Yesesi?

⁶ Meke u luku fa Psalm 118 be taki omen yali a fesi taki wan sama be o dede, da a be o weki baka. Kande a David sikiifi a psalm ya. Psalm 118 taki: „Yehofa wi e begi i, gaantangi, yeepi u baa!” A be taki tu: „A sama di e kon aini Yehofa nen mu fende belesi.” Na a Mesiyas a polofeititoli ya e taki. Di Yesesi go a Yelusalem na a 9 Nisan, wantu dei fosi a dede, neen wantu sama bali a sani ya gi en (Psalm 118:25, 26; Mateyesi 21:7-9). Psalm 118 be taki omen yali a fesi taki wan sama be o dede, da a be o weki baka. A taki: „Na a siton di den sama di e meke osu á be wani, toon a moo pelensipali siton.”​—Psalm 118:22.

7. Fa den Dyu soi taki den á be wani Yesesi enke a Mesiyas?

 ⁷ A den Dyu fesiman a „den sama di e meke a osu”. A ná si namo den á be e si Yesesi enke a Mesiyas efuso Kelestesi. Ma a omen Dyu be dwengi Pilatus fu kii Yesesi tu (Lukasi 23:18-23). Den be abi wan ana aini a dede fu Yesesi.

8. Fa Yesesi be o man de „a moo pelensipali siton”?

⁸ Efu den be buuse Yesesi te den kii en, da fa a be o du toon „a moo pelensipali siton”? A be abi fu weki baka. Yesesi be soi a sani ya kiin di a be gi a toli fu wan man di e paandi goon. A man ya be sende bosikopuman go a den sama di be e wooko gi en. Den sama di be e wooko gi a man ya du ogii anga ala den bosikopuman. Bakaten a sende en manpikin, fu di a be e si enke den be o aliki en. Ma den sama di be e wooko gi en kii a manpikin fi en. Baka di Yesesi gi den a toli ya, a taki san sikiifi a Psalm 118:22 (Lukasi 20:9-17). Apostel Peitilisi taki fu aseefi tekisi ya di a be e taki anga ’den tiiman fu den Dyu, den gaanwan fu a foluku, anga den leliman fu a Dyu weiti di be kon makandaa a Yelusalem’. Peitilisi taigi den taki: ’A Yesesi Kelestesi fu Nasaleti u sipikii a wan ponsu, ma Gadu weki en puu a dede.’ Baka dati a taki, neen „na a siton di den sama di e meke a osu á be wani. Neen toon a moo pelensipali siton”.​—Toli 3:15; 4:5-11; 1 Peitilisi 2:5-7.

9. San Psalm 118:22 be taki a fesi?

⁹ Wi e si kiin taki Psalm 118:22 be taki omen ondoo yali a fesi taki wan sama di be o dede, be o weki baka. A tekisi e soi taki sama be o buuse a Mesiyas. Den be o kii en tu. Ma a be o weki baka, da a be o toon a moo pelensipali siton. Di Yesesi weki baka, a toon a moo pelensipali siton. A sama di Gadu sende kon fu „meke u fii”.​—Toli 4:12; Efeisesama 1:20.

10. (a) San Psalm 16:10 be taki a fesi? (b) Fa u du sabi taki a ná David Psalm 16:10 e taki?

 ¹⁰ Meke u luku wan taa tekisi di e soi taki wan sama be o dede, da a be o weki baka. A baka wan dunsu yali fosi a sani di sikiifi aini a tekisi ya pasa. A tekisi ya e soi taki u sa biibi taki dedesama o weki baka, winsi on langa Beibel taki a sani ya a fesi. Aini Psalm 16 David be taki: „I ná o fika mi aini geebi. I ná o fika a sama di nai gwe fika i, aini geebi-olo” (Psalm 16:10). David á be wani soi anga a sani ya taki a á be o dede fu den beli en aini geebi. Gadu Wowtu e soi kiin taki David dede, neen „den beli en na a Foto fu David” (1 Kownu 2:1, 10). Efu a ná David a tekisi e taki, da sama ai taki?

11. On ten Peitilisi taki fu Psalm 16:10?

¹¹ Moo enke wan dunsu yali di David sikiifi a sani ya, neen Peitilisi soi sama Psalm 16:10 be e taki. Wantu wiki baka di Yesesi weki baka, Peitilisi be taki anga omen dunsu Dyu anga taa sama. (Leisi Toli 2:29-32.) A membee den taki David be dede neen den beli en. A taigi den tu taki David be taki a fesi taki a Mesiyas be o ’weki baka’. Beibel nai soi taki den sitee anga Peitilisi di a taki a sani ya.

12. Fa a sani di sikiifi a Psalm 16:10 kon tuu? San a sani ya e soi fu a paamisi di Gadu paamisi u taki dedesama o weki baka?

¹² Peitilisi soi taki a sani di a be taki a tuu, di a taki aseefi sani di David be taki a Psalm 110:1. (Leisi Toli 2:33-36.) Den tekisi di Peitilisi soi den sama be yeepi den fu biibi taki Yesesi a „Masaa anga Kelestesi”. Den sama be kon fusutan taki a di Yesesi weki baka, neen a sani di sikiifi a Psalm 16:10 pasa. Bakaten di apostel Pawlesi taki anga den sama fu Antiyokiya wan peesi aini Pisidiya, a denseefi tekisi de a koboloiki. A sani ya be doo den sama ati. Den be wani sabi moo tu. (Leisi Toli 13:32-37, 42.) A sani ya e soi taki useefi sa biibi taki a sani di Psalm 16:10 be taki pasa tuu, winsi on langa Beibel be taki en a fesi.

13. San u sa akisi useefi fu a weki di dedesama o weki baka?

¹³ Ai gi u taanga-sikin fu sabi taki wan sama be dede, neen a weki baka enke fa Beibel be taki omen ondoo yali a fesi. Ma toku son sama sa akisi denseefi taki: ’A sani ya wani taki a omen ondoo yali mi o abi fu wakiti fu si den sama fu mi di dede? On ten dedesama o weki baka?’ Yesesi be taigi den apostel fi en taki a omen sani den á sabi. A be taigi den tu taki a omen sani den á poi sabi. A taki: „A á de fanowdu fu u sabi a yuu anga a dei. Na a Dda wawan abi a leti fu sabi a sani de” (Toli 1:6, 7; Yohanisi 16:12). Ma u sabi pikinso on ten sama di dede o kon a libi baka.

14. Saide Yesesi na a moo pelensipali sama di be kon a libi baka?

 ¹⁴ Fu ala den sama di be weki baka, Yesesi a be a moo pelensipali wan. Efu Yesesi á be weki baka, nawan fu wi be o abi a howpu taki den sama fu u di dede o weki baka. Fosi Yesesi, wantu sama di be dede be kon a libi baka. Eliya anga Elisa be weki dedesama. Ma nawan fu den sama ya de a libi moo. Den dede, neen den toon doti. Ma Yesesi „weki baka. A ná o dede moo. Dede á neen basi moo”. A o ’libi fu teego’ a hemel.​—Romesama 6:9; Openbaring 1:5, 18; Kolosesama 1:18; 1 Peitilisi 3:18.

15. Saide Beibel taki Yesesi na a fosiwan „di kon a libi baka”?

¹⁵ Fu ala den sama di kon a libi baka fu go a hemel, a Yesesi na a moo pelensipali wan. Neen na a fosi sama di go a hemel enke wan yeye di a weki baka (Toli 26:23). Ma boiti Yesesi, taa sama be o abi a okasi fu go a hemel te den weki baka. Yesesi be paamisi den apostel fi en taki den be o tii makandaa anga en (Lukasi 22:28-30). Ma a te den be dede fosi den be o go a hemel. Leti enke Yesesi den o weki baka enke wan yeye. Pawlesi sikiifi taki: „Kelestesi kon a libi baka tuutuu. Fu den sama di dede neen na a fosiwan di kon a libi baka.” Pawlesi taki taa sama be o de tu di be o weki baka fu go libi a hemel. A be taki: „Ibii sama o kon a libi baka te en yuu doo. Kelestesi fosi weki baka. Baka dati den sama di de fu Kelestesi o weki te a daai kon baka.”​—1 Korentesama 15:20, 23.

16. San e yeepi u fu sabi on ten sama o weki baka fu go a hemel?

¹⁶ Den sani di Pawlesi taki e yeepi u fu sabi on ten sama be o weki baka fu go a hemel. A be o pasa na a ten di Yesesi be o toon Kownu. A omen yali kaba Yehofa Kotoigi e soi sama aini a Beibel taki a 1914 Yesesi toon kownu. Fanafu a ten de, neen den lasiti dei fu a goontapu ya bigin.

17, 18. San o pasa anga son wan fu den salufu Kelesten di Yesesi o kon?

¹⁷ Beibel taki moo fu a weki di sama be o weki baka fu go a hemel. A taki: „U wani u sabi tu san o pasa anga den wan di dede kaba . . . efu wi e biibi taki Yesesi dede neen a weki baka, da u mu biibi tu taki Gadu o weki den bakaman fu Yesesi tu . . . Wi di o de a libi ete te Masaa kon, ná o weki fosi den wan di be dede kaba. Bika Masaa seefi o saka komoto a hemel. A o taki enke wan gaan engel . . . den bakaman fu Kelestesi di be dede a fesi, fosi o weki baka. Baka dati, da wi di de a libi ete, o opo go aini den woluku fu go miti den. Wi o miti Masaa a tapu. A so wi o de anga Masaa fu teego.”​—1 Tesalonikasama 4:13-17.

¹⁸ Wan pisiten baka di Yesesi toon  kownu, neen den salufu Kelesten di dede bigin weki baka. Den salufu Kelesten di o de a libi na a ten fu a gaan banowtu „o opo go aini den woluku” (Mateyesi 24:31). San a sani ya wani taki? Den sama di „o opo go aini den woluku” ná o „dede”. A sani ya wani taki den ná o dede langa fosi den weki baka. Ma te den dede den „o kengi wantenwanten, fosi i pingi yu ain, te den boo a lasiti tutu”.​—1 Korentesama 15:51, 52.

19. San na a „moo bun fasi” fa sama o weki baka?

¹⁹ Gaanse Kelesten fu a ten ya ná go tii anga Kelestesi a hemel, bika den á salufu. Ma den e wakiti a „dei fu Yehofa” di a o puu ogii a goontapu. Wi á sabi on ten a kaba o kon. Ma den sani di e pasa nownow e soi taki a de koosube (1 Tesalonikasama 5:1-3). Di a nyun goontapu fu Gadu o kon, sama o weki baka fu libi a goontapu. Den o abi a okasi fu libi fu teego a goontapu. Den ná o abi sondu moo. A libi di den sama di o weki baka o fende, ’bun moo’ a libi fu den sama di be weki baka aini a ten di pasa, bika den sama di be weki aini a ten di pasa dede baka.​—Hebrewsama 11:35.

20. Saide u sa biibi taki sani ná o waka buuyabuuya te sama o weki baka aini a paladeisi?

²⁰ Beibel taki den sama di e weki baka fu go a hemel e weki ’te den yuu doo’ (1 Korentesama 15:23). Neen meke u sa biibi taki te sama o weki baka fu libi a goontapu, sani ná o waka buuyabuuya. Ma kande wi e akisi useefi taki: A den sama di dede enke lasiti fosi o weki baka, fu den sama di sabi den bali wadaa gi den? Na a bigin fu a dunsu yali di Yesesi o tii enke kownu den o weki baka? A den sama di be e tii a foluku fu Gadu fosi o weki fu seeka sani aini a nyun goontapu? San o pasa anga den sama di á be e dini Yehofa? On ten den o weki baka? Pe den o weki? A omen sani de di u wani sabi. Ma u ná abi fu booko wi ede anga den sani de nownow. A moo bun fu wakiti fu si fa sani o waka. U sa biibi taki wi o piisii te u si san Yehofa o du.

21. San yu e biibi?

²¹ Fu di a ten de á doo ete, meke u mu meke moiti fu a biibi di wi e biibi Yehofa kon moo taanga. A meke Yesesi paamisi u taki den sama di dede o weki baka. A á feegete den (Yohanisi 5:28, 29; 11:23). Enke fa u luku aini a artikel ya, da Yehofa o weki dedesama baka. Wan taa sani di e meke u biibi a sani ya, a di Yesesi be taki, gi Yehofa, Abalaham, Isaki anga Yakopu „de a libi” (Lukasi 20:37, 38). Wi abi omen buweisi di e meke u man taki enke apostel Pawlesi taki: „Miseefi e biibi taki Gadu o weki den dedesama baka.”​—Toli 24:15.