DIANA pasa 80 yali kaba, ma a omen sani miti en aini den yali di pasa. En man be abi Alzheimer (a siki ya e meke a sama e lasi enseefi). A be de a wan peesi pe den e solugu gaansama, ma a dede bakaten. Den tu boi fu Diana seefi kon dede. Boiti dati a be abi kanker neen bobi. Ma toku te den baala anga sisa si Diana a komakandaa efuso peleikiwooko, a piisiipiisii ai de ala yuu.

John du a kelen-owluman wooko moo enke 43 yali. A be lobi a wooko ya. Noiti a be sa wani fika a wooko ya fu go du taa sani. Ma toku a be abi fu fika a wooko ya fu go solugu wan famii fi en di siki. Te baala anga sisa di sabi John miti en a den gaan komakandaa, den e si taki a á kengi. Ai piisii ete enke fa a be e piisii fosi.

San yeepi Diana anga John fu e piisii? San o yeepi wan sama di de a nowtu fu e piisii? Fa wan sama sa e piisii winsi a abi fu fika wan wooko di a lobi? Beibel e piki den akisi ya. A taki: „Den sama di e libi leti, o piisii anga den sani di Yehofa du gi den” (Psalm 64:10). Wi o fusutan a sani ya moo bun te u sabi san e meke wan sama piisii tuutuu anga san á poi meke wan sama piisii tuutuu.

Son sani e meke sama piisii. Te tu sama di lobi denseefi toow, den e piisii. Mma anga dda e piisii tu te den meke wan pikin. Boiti dati te wan sama fende wan gaandi aini a olikanisâsi fu Yehofa ai piisii. Den sani ya e meke sama piisii, bika a Yehofa gi u den enke kado. A Yehofa sete a toowlibi. Neen gi sama a gaandi fu meke pikin tu. Boiti dati neen e gi u wooko fu du aini en olikanisâsi.​—Genesesi 2:18, 22; Psalm 127:3; 1 Timotiyesi 3:1.

Toku son wan fu den sani ya nai meke sama piisii ala yuu. A tyali taki son sama waka gi den toowpaa. Son leisi wan fu den toowpaa e lasi libi (Eseikiyeli 24:18; Hoseya 3:1). Son leisi pikin nai aliki den mma anga den dda. Den nai aliki Gadu tu. Boiti dati son pikin e gwe fika Yehofa. A toli fu Samuweli  anga David e soi a sani ya kiin. Den manpikin fu Samuweli á be e dini Yehofa anga den hii ati. David osulibi á be e waka bun fu di a be sondu anga Batseiba (1 Samuweli 8:1-3; 2 Samuweli 12:11). Te den sowtu sani ya pasa, sama nai piisii. A soso tyali anga pen den e tyai.

Na aseefi sani e pasa te wi á man du san u be e du gi Yehofa moo fu di u siki, fu di u mu solugu u famii efuso te sani kengi aini a olikanisâsi. Omen sama di be mu fika a wooko di den be e du gi Yehofa taki den nai piisii moo enke fa den be e piisii di den be e wooko gi Yehofa.

A sani ya e soi taki den sani di u taki a fesi nai meke sama piisii ala yuu. Ma sani de di e meke sama piisii winsi den abi polobelema? Eeye, bika Samuweli, David anga taa sama be e piisii winsi fa sani be e miti den.

Yesesi be sabi san e meke sama piisii tuutuu. Beibel taki fosi Yesesi kon a goontapu a be e ’piisii ala yuu fu di a be de anga Yehofa’ (Odo 8:30). Di Yesesi be de a goontapu a omen sani be e miti en. Ma toku a be e piisii fu du san en Dda wani (Yohanisi 4:34). Ma fa sani waka den lasiti yuu fosi a dede? A be e piisii ete di a be e fii pen? Beibel taki: „A di a be e pakisei a piisii di a be o piisii aini a ten di e kon, meke a be de kabakaba fu dede na a pina ponsu” (Hebrewsama 12:2). Yesesi taki tu sani di o yeepi u fu sabi san e meke wan sama piisii tuutuu.

Wan leisi di den 70 disipel fu Yesesi komoto a peleikiwooko den be e piisii, bika den be du omen sani. Den be puu ogii yeye a sama tapu tu. Ma Yesesi taigi den taki: „Wi á mu piisii fu di den ogii yeye e du san u taki. Ma u mu piisii fu di u nen sikiifi a hemel” (Lukasi 10:1-9, 17, 20). A sani di e meke wan sama moo piisii, a te en anga Yehofa a mati, a ná te ai du wan apaiti wooko aini a olikanisâsi.

Wan leisi di Yesesi be e taki anga wan kulu sama, wan Dyu uman be foondoo te neen a taigi Yesesi taki en mma musu e poolo anga  en. Ma Yesesi taigi en taki: „A den sama di e yee a wowtu fu Gadu, da den du san a wowtu e taki o de koloku!” (Lukasi 11:27, 28) Wi e fii bun te u pikin e tyai denseefi bun. Ma a sani di e meke u moo piisii a te wi e du san Yehofa taki anga te u toon en mati.

Wi e fii bun te u sabi taki Yehofa e piisii anga wi. Winsi fa a á switi te tesi e miti u, toku den á poi tapu u fu piisii. Efu u holidoo te tesi e miti u, wi o moo piisii (Romesama 5:3-5). Boiti dati Yehofa e gi den sama di e fitoow en santa yeye. Piisii a wan fu den manii di a yeye e meke sama abi (Galasiyasama 5:22). A sani ya e yeepi u fu fusutan saide Psalm 64:10 taki: „Den sama di e libi leti, o piisii anga den sani di Yehofa du gi den.”

A sani ya e soi u tu saide Diana anga John be e piisii winsi fa den abi polobelema. Diana taki: „Mi go kibii a Yehofa enke fa wan pikin e go kibii neen mma. Mi si taki Yehofa belesi mi, bika a yeepi mi fu man peleiki anga piisii ala yuu.” San yeepi John fu du ala san a man gi Yehofa anga piisii winsi fa a á man du a wooko di a be lobi moo? A taki: „Fanafu 1998 di mi fende a gaandi fu gi leli na a Dinali Sikoo, mi sutudeli Beibel moo fini.” A taki a á be taanga tumisi gi en anga en uman di den be abi fu fika a kelen-wooko, bika den be de kabakaba fu du ala san Yehofa akisi den. A taki: „A nai hati u taki u du a sani ya.”

A omen taa sama kon si taki a sani di sikiifi a Psalm 64:10 a tuu. Wan toowpaa be wooko moo enke 30 yali na a Beikantoo fu Ameekankondee. Bakaten den sende den go du a spesuutu-pioniliwooko. Den taki: „Te i lasi wan sani di i lobi ai hati i, ma yu á poi tyali fu teego.” Di den fende a gaandi fu du a spesuutu-pioniliwooko, den á daaidaai. Den bigin peleiki makandaa anga den baala anga den sisa fu a nyun kemeente. Den taki: „U begi Yehofa fu wantu sani. Di u si taki a piki den begi fu u, u fende taanga-sikin. A sani ya be meke u piisii tu. Di den go aini a nyun kemeente a á teke langa, neen wantu baala anga sisa bigin pionili tu. Boiti dati wi abi tu Beibelsutudi di e meke moiti.”

A á makiliki fu e piisii ala yuu. Son leisi wi o go e fii booko-saka. Ma Yehofa e gi u taanga-sikin anga den sani di sikiifi a Psalm 64:10. Winsi wi e fii booko-saka u sabi taki efu wi holidoo te tesi e miti u, ’wi o piisii anga den sani di Yehofa du gi u’. Wi e wakiti a sani di Yehofa paamisi u tu. A paamisi u taki a o „meke nyun hemel anga wan nyun goontapu”. A ten de nawan sama o abi sondu moo. ’Wi o piisii fu teego’ te Yehofa o du den sani ya.​—Yesaya 65:17, 18.

Pakisei fa a libi o de. U ná o siki moo. Wi o go e fii bun ala mamanten te wi opo. Den sani di e fooseli wi aini a ten ya ná o de moo. Pen ná o de moo tu. Yehofa paamisi u taki ’u ná o membee den fositen sani moo’. Wi o bali wadaa gi den sama fu u di o weki baka. Leti enke fa a mma anga a dda fu a meisyo fu 12 yali be fii di Yesesi be weki a meisyo, a letiso wi o fii tu. Beibel taki: „Ná pikin piisii den be e piisii” (Malikisi 5:42). Ala den sama di o de a goontapu a ten de o go e libi a wan letifasi. Den „o piisii anga den sani di Yehofa du gi den” fu teego.