WI E fii bun te sama e libi bun anga u. Wi e fii bun fu di u sabi taki den e booko den ede anga u. Ai bigi gi u te taawan e libi bun anga wi, ma san o yeepi u fu libi bun anga taawan?

Wan sama di abi switifasi e booko en ede anga taawan. Den sani di ai du anga den sani di ai taki e soi taki ai booko en ede anga taawan. A ná lesipeki namo ai lesipeki sama, ma ai libi bun anga den fu di a lobi den. Ai meke moiti fu fusutan fa den e fii tu. Switifasi a wan fu den manii di a santa yeye e meke sama abi (Galasiyasama 5:22, 23). Yehofa wani u soi switifasi gi taawan. Meke u luku fa Yehofa anga en Manpikin soi den manii ya anga fa u sa waka a den baka.

Yehofa e soi switifasi gi ala sama, winsi den e du ’ogii efuso den á sabi kiyoo’ (Lukasi 6:35). Ai „meke a san pii gi den ogii sama anga den bun sama. Ai meke alen kai gi den sama di e libi a wan letifasi anga den sama di nai libi a wan letifasi” (Mateyesi 5:45). Den sama di nai biibi taki a Yehofa meke ala sani seefi e fende wini fu den bun di ai du gi u.

Yehofa soi switifasi gi Adan anga Efa baka di den sondu. Baka di den sondu den „booko figa uwii, neen den nain den kon a wan fu tapu den senpeesi”. Ma Yehofa be sabi taki den be o abi bunbun koosi fanowdu di den be o komoto aini a dyali Eden, bika a be fuuku a doti. A doti be lai „maka anga takuu uwii” tu. Neen meke Yehofa meke ’langa koosi anga meti buba’ gi den fu den wei.​—Genesesi 3:7, 17, 18, 21.

Winsi fa Yehofa e soi switifasi gi ’ogii sama anga bun sama’, toku ai moo soi switifasi gi den sama di e dini en anga den hii ati. Aini a ten fu polofeiti Sakaliya wan engel be e booko en ede di a si taki den Islayelisama á be e meke a tempel a Yelusalem moo. Di a taigi Yehofa fa a be e fii Yehofa aliki en anga pasensi neen a „toosutu” en (Sakaliya 1:12, 13). Na aseefi fasi Yehofa be toosutu polofeiti Eliya tu. Eliya be fii booko-saka te neen a begi Yehofa fu a kii en. Ma Yehofa be soi en taki ai booko en ede anga en. A sende wan engel go toosutu en. A taigi Eliya tu taki a neen wawan de. Eliya fende taanga-sikin fu go doo anga a wooko fi en di Yehofa toosutu en (1 Kownu 19:1-18). Ma fu ala den sama di be e dini Yehofa, on du fu den i si enke a be moo soi switifasi gi?

Di Yesesi be de a goontapu, sama be man si taki a abi switifasi. A á be e libi ogii anga sama. A á be e dwengi sama fu du san a wani tu. A be e booko en ede anga sama.  A be taki: „Ala den sama di e wooko taanga anga den sama di e tyotyo, u kon a mi, da mi o gi u kaakiti baka. . . . Bika mi tyatyali safu” (Mateyesi 11:28-30). A di a be abi switifasi meke sama be e waka neen baka winsi pe a be e go. A di a be e fii gi den meke a be e gi den nyanyan, a be e deesi den, a be e leli den ’omen sani’ fi en Dda tu.​—Malikisi 6:34; Mateyesi 14:14; 15:32-38.

Yesesi be sabi fa sama e fii, neen meke a be e soi switifasi gi den. A be e yeepi ala sama di go neen winsi a á be makiliki gi en (Lukasi 9:10, 11). Pakisei a uman di be e lasi buulu. A be wani betee neen meke a holi a koosi fu Yesesi. A Weiti fu Mosesi be e soi taki a á be mu du a sani de, bika a á be kiin (Lefitikesi 15:25-28). San Yesesi du? A á taki goofu anga en. A be si taki a uman e feele. Tyali be e kisi Yesesi bika a 12 yali langa a uman ya tyotyo. A taigi en taki: „Mi umanpikin, a biibi fi i meki i betee. Ná booko yu ede moo. I ná o abi a takuu siki ya moo” (Malikisi 5:25-34). Yesesi be abi switifasi tuutuu!

Den toli di u luku e soi taki te wi abi switifasi wi o go e yeepi taawan. Yesesi soi taki a sani ya de taanga fanowdu di a be gi a ageisitoli fu a Samaliyaman. Fufuuman be fon wan Dyu, den teke ala den sani fi en, neen den fika en fu a dede. Di wan Samaliyaman si en, tyali kisi en winsi fa den Dyu anga den Samaliyasama á be e koti. A Samaliyaman be abi switifasi neen meke a yeepi a man. A kiin den soo fi en neen a tyai en go a wan peesi pe den e yuu kambaa. A pai a sama di be abi a peesi fu a solugu a Dyu. Boiti dati a be de kabakaba fu pai moo efu a be fanowdu.​—Lukasi 10:29-37.

Te wi abi switifasi, wi o go e holi taawan a pakisei. A o yeepi u fu gi taawan taanga-sikin tu anga den sani di wi e taki efuso den sani di wi e du. Beibel taki: „Tyaipi booko-ede e meke wan sama booko-saka, ma te wan sama taki switi anga en, da ai piisii” (Odo 12:25). Te wi abi switifasi anga bunfasi wi o go e taki sani di e gi taawan taanga-sikin. A sani ya o meke den fii bun. * (Luku a maiki a ondoo.) Te wi e taki switi anga den, den o si taki wi e booko wi ede anga den. A sani ya o yeepi den fu holidoo te nowtu e miti den.​—Odo 16:24.

Ala sama poi soi switifasi gi taawan bika Gadu meke wi enke fa enseefi de (Genesesi 1:27). Yuliyus a be wan edeman fu den Rome suudati. Neen be abi a faantiwowtu fu tyai Pawlesi go a Rome. Di a be e tyai Pawlesi go a Rome, a be soi switifasi gi en. Di den doo a foto di den e kai Sidon ’a gi Pawlesi pasi fu a go a den mati fi en’ (Toli 27:3). Di Pawlesi anga wantu taa sama be sungu, den sama fu Malta be yeepi den. Den be „libi bun” anga den. Den meke faya gi den fu waan (Toli 28:1, 2). A wan bun sani den sama ya be du, ma efu wan sama wani Yehofa piisii, a ná wan leisi namo a mu soi switifasi, na ala yu a mu e du a sani ya.

Yehofa wani u soi switifasi gi taawan ala yuu. Neen meke a taki u mu ’wei a fasi ya enke koosi a u sikin’ (Kolosesama 3:12). Ma a ná ala yuu a sani ya makiliki. Saide? Kande sen e kisi u, wi e si enke taawan bun moo wi, efuso kande wi e denki useefi namo. Kande ai taanga gi u tu fu soi switifasi gi wan sama di du wan hati sani anga u. Ma efu u begi Yehofa fu a gi wi en santa yeye, da u meke moiti fu waka neen baka, a o yeepi u fu soi switifasi gi taawan.​—1 Korentesama 2:12.

San o yeepi u fu moo abi switifasi? Akisi iseefi den sani ya: ’Mi e aliki te taawan  e taki? Mi e meke moiti fu fusutan fa den e fii? Mi e poti pakisei a taawan fu sabi on ten den abi yeepi fanowdu? San na a lasiti leisi di mi be soi wan sama di ná mi famii efuso mi mati, taki mi e booko mi ede anga en?’ Meke moiti fu sabi den sama di de koosube fi i moo bun, moomoo den baala anga sisa fu a kemeente. A sani ya o yeepi i fu sabi san e gi den booko-ede. Yu o sabi san den abi fanowdu tu. A taa sani di i mu du, a fu meke moiti fu libi anga taawan leti enke fa i wani den libi anga i (Mateyesi 7:12). Begi Yehofa tu fu a yeepi i, da a o belesi a moiti di yu e meke fu soi switifasi gi taawan.​—Lukasi 11:13.

Pawlesi taki switifasi, a wan fu den sani di yeepi en fu a du a peleikiwooko bun (2 Korentesama 6:3-6). A di Pawlesi be e soi switifasi gi taawan meke den be lobi en. Den be e si kiin taki Pawlesi be e booko en ede anga den (Toli 28:30, 31). Efu useefi e soi switifasi gi ala sama, den o wani sabi moo fu a waaleiti. Den sama di e libi ogii anga u sa kengi tu, te wi e soi switifasi gi den (Romesama 12:20). Kande bakaten den o wani sabi moo fu Beibel.

Ala sama o go e soi switifasi gi taawan aini a Paladeisi. Wi o soi switifasi gi den sama di o weki baka. Son wan fu den a fositoon sama o libi bun anga den. A sani ya o gi den taanga-sikin fu soi switifasi gi taawan tu. Den sama di abi takuu manii efuso den sama di á wani yeepi taawan ná o tan a libi te Gadu Kownukondee o tii. A den sama di lobi taawan anga den sama di e libi bun anga taawan o libi fu teego aini a Paladeisi (Psalm 37:9-11). Ala sama o libi aini freide. Ogii ná o miti sama moo! Ma wi e fende wini nownow tu, te wi e soi switifasi gi taawan. Sowtu wini wi e fende?

Beibel taki: „Wan man di e libi bun anga taawan e fende wini” (Odo 11:17). Te wan sama abi switifasi, taawan e lobi en. Den e libi bun anga en tu. Yesesi taki: „A fa yu e libi anga taawan, a so sama o libi anga i” (Lukasi 6:38). Wan sama di abi switifasi e meke mati gawgaw. En anga den mati fi en nai poli tu.

Apostel Pawlesi be taigi den baala anga sisa fu Korente taki: „U mu libi bun anga useefi, tyali mu e kisi u gi taawan, gi useefi paadon” (Efeisesama 4:32). Te ala sama aini a kemeente e meke moiti fu gi taawan paadon, te den e fii gi taawan, a kemeente e moo taanga. Den e libi na a wan tu. Wi á mu e suku pikinpikin fowtu a taawan. Wi á mu e kuutu den efuso taki sani di e hati den. Winsi a kalapu wi e meke, wi á mu taki sani fu hati taawan (Odo 12:18). A sani ya o yeepi den baala anga sisa fu dini Yehofa anga piisii.

U leli taki u sa soi switifasi ala yuu te wi e taki. U sa soi a manii ya aini ala san wi e du tu. Te wi e soi switifasi a Yehofa baka wi e waka, a Gadu di lobi gi taawan sani (Efeisesama 5:1). A sani ya e meke a kemeente kon moo taanga. Ai gi taawan taanga-sikin fu dini Yehofa tu. Meke u du ala san u poi fu soi taawan taki den sama di e dini Yehofa abi switifasi!