1, 2. San omen sama e pakisei te den yee a wowtu paladeisi?

A OMEN baala anga sisa fu taa kondee be go a wan konkelesi a Seoul, wan peesi a Koreya. Di den e komoto na a peesi pe a konkelesi be e holi, neen den baala anga sisa fu Koreya gi den odi. A omen fu den be e kee di den be e wai ana gi denseefi. Den be e bali taigi denseefi taki: „Wi o miti aini a Paladeisi!” Sowtu paladeisi i denki den be e taki?

² Aini a ten ya a omen sani sama e kai paladeisi. Son sama e si enke paladeisi a wan anainsitoli. Taawan e si enke solanga den e piisii, da aini paladeisi den de. Son sama e si enke efu angii e kii den neen den doo wan nyanyan tafaa, a paladeisi den doo. Omen yali pasa, wan uman be si wan moin peesi di be lai boomiki. A peesi be moin gi a uman ya te neen a taki: „Disi a wan paladeisi!” Te na a dei fu tide den e kai a peesi de Paladeisi ete, ma ala yali eisi e kai na a peesi ya te da a hei 15 meter. San yu e pakisei te i yee a wowtu Paladeisi? Yu e angii fu a Paladeisi?

3. San na a fosi tekisi fu Beibel di e taki fu a Paladeisi?

 ³ Beibel e taki fu wan paladeisi di be de kaba anga wan paladeisi di mu kon ete. Genesesi 2:8, na a fosi tekisi fu Beibel di e taki fu a Paladeisi. Aini Hebrewtongo na a dyali Eden. A wowtu „Eden” wani taki „piisii”. A dyali de be e meke sama piisii tuu. A be moin, a be lai sani fu nyan. Libisama anga meti be e libi aini freide tu.​—Genesesi 1:29-31.

4. Saide u sa taki a dyali Eden a be wan paladeisi?

⁴ A Hebrew wowtu gi „dyali” a paradeisos aini Giikitongo. Wan buku taki te wan Giikisama be yee a wowtu paradeisos, a be e pakisei wan moin peesi pe ogii ná o miti en. Boiti dati a be e pakisei wan peesi anga omen bon di e meke nyanyan. Wan peesi pe i sa fende kiin wataa, anga bun gaasi gi meti enke diya anga sikapu.​—(The Cyclopaedia by M’Clintock and Strong); luku Genesesi 2:15, 16 tu.

5, 6. Saide Adan anga Efa á be man tan aini a Paladeisi moo? San son sama e akisi denseefi?

⁵ Aini sowan dyali Yehofa be poti Adan anga Efa. Ma a di den ná aliki Yehofa, meke den á be man tan aini a Paladeisi moo. Den pikin di den meke seefi á be man tan aini a Paladeisi (Genesesi 3:23, 24). Winsi fa sama á be e tan aini a Paladeisi moo, toku a gei enke a be de ete te enke a dei di a Fuudu be kon aini a ten fu Nowa.

⁶ Kande son sama e akisi denseefi taki: ’Goontapu o toon wan Paladeisi baka?’ Saide u sa biibi taki a sani ya o pasa? Saide yu e biibi taki yu anga den sama fi i o libi aini Paladeisi a goontapu ya? I man soi wan sama saide a sa biibi taki goontapu o toon wan paladeisi aini a ten di e kon?

7, 8. (a) San Gadu be paamisi Abalaham? (b) San Abalaham be e pakisei di Gadu paamisi en taki ala sama o fende belesi?

⁷ Beibel na a moo bun buku di o yeepi u fu sabi den sani di u wani sabi fu a Paladeisi, bika a Yehofa meke den sikiifi a buku ya. Neen na a sama di be meke a fosi Paladeisi. Luku san Gadu be taigi en mati Abalaham. A be taigi Abalaham taki a o meke den bakapikin fi en ipi enke „a santi fu a lanpeesi fu a se”. Boiti dati Yehofa paamisi Abalaham wan pelensipali sani. A taigi en taki: „Den bakapikin fi yu o meke ala den foluku a goontapu fende belesi, fu di i du san mi taki” (Genesesi 22:17, 18). Bakaten Yehofa paamisi Abalaham manpikin anga en galanpikin aseefi sani.​—Leisi Genesesi 26:4; 28:14.

⁸ A á sikiifi a nawan peesi aini Beibel taki Abalaham be denki taki te sama tyai denseefi bun, da den o go libi aini hemel. Neen meke di Gadu paamisi Abalaham taki „ala den foluku a goontapu” o fende belesi, Abalaham be musu e pakisei fa a o de te a sani ya o pasa a goontapu ya. Ma na a sani ya wawan e soi taki goontapu o toon wan paladeisi?

9, 10. Sowtu paamisi e yeepi u fu biibi taki goontapu o toon wan paladeisi?

 ⁹ Gadu be meke David, wan fu den bakapikin fu Abalaham sikiifi taki wan ten o kon pe „den ogii sama ná o de moo” (Psalm 37:1, 2, 10). „A den safu-ati sama o fende goontapu. Den o piisii fu a libi, bika ala sani o waka bun.” David be taki tu taki: „Den sama di e libi a wan letifasi o fende a goontapu. A den o tan neen fu teego” (Psalm 37:11, 29; 2 Samuweli 23:2). Fa i denki den sama di be wani libi enke fa Gadu wani be e fii, di den yee a sani ya? A sani ya be e yeepi den fu biibi taki wan ten e kon pe goontapu o fuu anga sama di e libi a wan letifasi. Goontapu o toon wan paladeisi enke a dyali Eden.

¹⁰ Den Islayelisama be taki den e dini Yehofa ma baka wan pisiten gaanse fu den á be e dini en moo. Neen meke Gadu be meke den Babilonsama go feti anga a foluku fi en, a meke den poli a kondee, neen den tyai den go a katibo (2 Koloniki 36:15-21; Yelemiya 4:22-27). Ma Gadu be meke en polofeiti taki a fesi taki baka 70 yali, a foluku fi en be o go a den kondee baka. Den polofeititoli ya kon tuu kaba, ma u sa leli wan sani fu den aini a ten ya. Wi o luku fa wantu fu den toli ya o yeepi u fu biibi taki goontapu o toon wan paladeisi.

11. Fa Yesaya 11:6-9 kon tuu? San u sa akisi useefi?

¹¹ Leisi Yesaya 11:6-9. Gadu be meke Yesaya taigi a foluku fi en taki di den o go a den kondee baka sani o go bun aini a kondee. A á be de fu den feele taki meti efuso libisama o du ogii anga den. Sani be o waka bun gi yonkuuwan anga gaandiwan. A sani ya nai meke i pakisei fa a libi be switi aini Eden noh? (Yesaya 51:3) Yesaya be taki „a leli fu Yehofa o fuu goontapu enke fa a se fuu anga wataa”. A ná aini Islayeli wawan a sani ya be o pasa, ma a hii goontapu. On ten a sani ya o pasa? A sani ya e soi go na a ten di e kon.

12. (a) Fa Yehofa belesi den sama di be komoto a katibo a Babilon? (b) San e soi taki den sani di sikiifi a Yesaya 35:5-10 o kon tuu aini a ten di e kon?

¹² Leisi Yesaya 35:5-10. Pakisei a sani ya. Bakaten Yesaya be taki te den Islayelisama be o go a den kondee baka, meti á be o du ogii anga den. Sama á be o du ogii anga den tu. A be taki tu taki nyanyan be o lai aini a kondee, bika wataa be o lai aini a kondee enke fa a be de aini Eden (Genesesi 2:10-14; Yelemiya 31:12). Na a ten fu den Islayelisama wawan a sani ya be o pasa? A polofeititoli taki den beendiman o si, den sama di lan o waka baka, den sama di dofu o yee tu. Ma den sani  ya á be pasa na a ten di den Islayelisama komoto a Babilon. Ma Gadu be wani soi anga a polofeititoli ya taki a o deesi ala sowtu siki aini a ten di e kon.

13, 14. Fa Yesaya 65:21-23 kon tuu di den Islayelisama komoto a katibo? Sowtu pisi fu a polofeititoli ya mu kon tuu ete? (Luku a fowtow na a bigin.)

¹³ Leisi Yesaya 65:21-23. Di den Dyu komoto a katibo go a den kondee baka, den á go fende moin osu anga doloifi goon aini a kondee. A di Yehofa belesi den meke den be kon abi den sani ya. Pakisei fa den be e poolo di denseefi meke osu fu tan. Pakisei fa den be e fii di den be e nyan den sani di den be paandi.

¹⁴ A polofeititoli ya taki wi o „libi langa enke wan bon.” Son bon e libi omen dunsu yali. A te libisama gusontu fosi den o man libi langa so. Boiti dati libisama o libi na a wan enke fa Yesaya be taki a fesi. Ná pikin switi a libi o switi te a goontapu o toon wan paladeisi. A sani ya o pasa tuutuu!

15. Sowtu belesi wi o fende enke fa Yesaya be taki?

¹⁵ Pakisei den sani di u luku dyonson ya. Den sani ya e soi taki goontapu o toon wan paladeisi aini a ten di kon. Goontapu o fuu anga sama di Gadu belesi. Sama ná o feele taki meti efuso ogii-ati man o du ogii anga den. Den sama di beendi, den sama di dofu anga den sama di lan o betee. Ala sama o meke den eigi osu, den o paandi den eigi goon. Den o libi langa moo den bon tu. Beibel e soi kiin taki goontapu o toon wan paladeisi. Ma kande son sama o taki den polofeititoli ya nai soi kiin taki goontapu o toon wan paladeisi. Fa i be o piki sowan sama? San meke yu e biibi taki goontapu o toon wan paladeisi? Yesesi, a moo pelensipali sama di be libi a goontapu ya soi u saide u sa biibi a sani ya.

16, 17. On ten Yesesi be taki fu a Paladeisi?

¹⁶ Yesesi á be du nawan ogii, ma toku den be lei gi en neen den sipikii en a wan ponsu. Den be sipikii tu ogiiman neen se tu. Wan fu den man be kon fusutan taki Yesesi a wan kownu, neen a begi Yesesi taki: „Yesesi membee mi te i de aini i Kownukondee” (Lukasi 23:39-42). Iseefi sa fende wini fu a sani di Yesesi piki a ogiiman ya. A toli ya sikiifi a Lukasi 23:43. Son koniman poti wan komma fosi a wowtu „tide”. Den sikiifi en so: „Tuutuu mi e taigi i taki, tide yu o de anga mi aini a Paladeisi.” Son sama e taki a ná ape den be mu poti a komma. Ma san Yesesi be abi a pakisei di a taki „tide”?

¹⁷ Aini son tongo, te den e sikiifi wan sani den e poti komma fu meke sama fusutan san den wani taki. Ma aini den fosi buku fu Beibel di be sikiifi aini Giikitongo, a ná ala yuu den be e poti sani enke komma anga taa maiki fu yeepi sama fu fusutan san den e leisi. Neen meke kande wi e akisi useefi taki: San Yesesi be wani taki seefi? A taigi a be taigi a man taki: ’Mi e taigi i taki, tide yu o de anga mi aini a Paladeisi’ efuso a be taigi en taki ’mi e taigi  i tide, taki yu o de anga mi aini a Paladeisi?’ Son sama di sikiifi a tekisi ya aini taa tongo poti a komma a „tide” fesi, taawan poti en neen baka. Na a fasi fa den fusutan a sani di Yesesi taki, meke den poti a komma a fesi efuso a baka. I sa fende ala den tu fasi fa den sikiifi a tekisi ya aini den Beibel fu a ten ya.

18, 19. San o yeepi u fu fusutan a sani di Yesesi be taki?

¹⁸ Pakisei san Yesesi be taigi den bakaman fi en. A be taki: „A Manpikin fu libisama o tan dii dei anga dii neti aini geebi.” Boiti dati a be taki: „Den o soso en, den o towe wataamofu neen, den o wipi en, da den kii en. Ma baka dii dei a o weki baka” (Mateyesi 12:40; 16:21; 17:22, 23; Malikisi 10:34). Apostel Peitilisi sikiifi taki ala den sani ya pasa tuu (Toli 10:39, 40). A sani ya e soi kiin taki Yesesi á go aini a Paladeisi a dei di en anga a ogiiman dede. Beibel taki Yesesi ’be de a geebi’ dii dei langa te enke Gadu weki en.​—Toli 2:31, 32. *

¹⁹ A di Yesesi be wani paamisi a man taki a o de anga en aini a paladeisi, meke a taigi en taki: „Tuutuu mi e taigi  i tide.” Sama be gwenti taki so na a ten de. A so den be e taki na ten fu Mosesi tu. Wan leisi Mosesi be taki: „Den sani di mi e taigi u tide mu de aini wi ati.”​—Deitolonomi 6:6; 7:11; 8:1, 19; 30:15.

20. San e holibaka gi a fasi fa wi e fusutan a sani di Yesesi be paamisi?

²⁰ Wan man fu Midden Oosten di e poti Beibel aini taa tongo taki: „Na a wowtu ’tide’ den sama mu poti pakisei. Den mu leisi en so: ’Tuutuu mi e taigi i tide, yu o de anga mi aini Paladeisi.’ Na a dei de Yesesi paamisi a ogiiman a sani ya. Ma a bakaten fosi a sani di a paamisi en be o pasa.” A man ya taki a so sama e taki na a pisi wataa de. Den be e taki so fu soi taki ’den o du a sani di den paamisi a dei de’. Wan gaandi pampila aini Siriatongo, di den fende aini den ten fu a yali 500 sikiifi a tekisi ya so: ’Amen, mi e taigi i tide taki mi anga yu o de aini a dyali fu Eden.’ Ala wi e fende taanga-sikin fu a sani di Yesesi paamisi ya.

21. Pe a ogiiman á go? Saide u sa taki a sani ya?

²¹ Di Yesesi be taki anga a ogiiman, a á be e taki fu wan Paladeisi di de a hemel. Fa u du sabi a sani ya? Wan fu den sani di e yeepi u, a di u sabi taki a ogiiman á be sabi seefi taki Yesesi be meke wan kuudei anga den apostel fi en fu tii anga en a hemel (Lukasi 22:29). Boiti dati a ogiiman á be dopu (Yohanisi 3:3-6, 12). Neen meke di Yesesi be e taki anga a man ya, a fu a paladeisi di o de a goontapu ya a be e taki. I poi de aini a paladeisi ya?

22, 23. Sowtu howpu i sa abi?

²² David be taki wan ten o kon pe „den sama di e libi a wan letifasi o fende a goontapu” (Psalm 37:29; 2 Peitilisi 3:13). Di David be taki a sani ya, a be taki fu a ten di ala sama a goontapu o du san Gadu wani. A polofeititoli di sikiifi a Yesaya 65:22 taki: „Mi foluku o libi langa enke wan bon.” A sani ya e soi taki den sama di o dini Yehofa aini a nyun goontapu o libi omen dunsu yali. A sani ya o pasa tuutuu? Eeye, Openbaring 21:1-4 taki, Gadu o belesi libisama. Wan fu den sani di a o du gi den na a puu di ’a o puu dede’.

²³ Den sani di Beibel taki fu a Paladeisi á taanga fu fusutan. Adan anga Efa be lasi a gaandi di den be abi fu libi aini a Paladeisi, ma goontapu o toon Paladeisi baka. Gadu paamisi taki a o belesi libisama a goontapu. David taki den safu-ati sama anga den sama di e libi a wan letifasi o fende a goontapu. Den o tan neen fu teego. Boiti dati den polofeititoli di sikiifi aini a Beibel buku Yesaya e yeepi u fu poti pakisei na a ten di wi o libi fu teego aini wan moin paladeisi a goontapu ya. On ten a sani ya o pasa? A sani ya o pasa te a sani di Yesesi paamisi a ogiiman o kon tuu. Iseefi sa de aini a Paladeisi ya. A sani di den baala anga sisa be taki na a konkelesi a Koreya o kon tuu a ten de: „Wi o miti aini a Paladeisi!”