YU A wan sama di sabi kiyoo? Ala u mu akisi useefi a sani ya. Beibel be taki aini a ten ya, sama á be o „sabi kiyoo” (2 Tim. 3:2). Kande i miti sama kaba di e fii enke a musu sama musu du sani gi den. Den sowtu sama ya e si enke a á de fanowdu fu gi taawan daa fu san den du gi den. Nawan fu wi á be o wani den sowtu sama ya enke mati, ná so noh?

Ma a foluku fu Yehofa mu de taa fasi. Beibel taki u mu e ’soi taki wi e teke sani fu bigi’ (Kol. 3:15; 1 Tes. 5:18). Wi e fende wini te wi e teke sani fu bigi ala yuu. Meke u luku wantu wini di wi e fende.

Wi e fii bun te wi e teke san taawan e du gi u fu bigi, neen meke u mu meke moiti fu abi a manii ya. Wan sama e fii bun te ai gi taawan daa, ma te wan sama gi u daa fu wan sani di u du wi e fii bun tu. Saide te wan sama gi wan taawan daa, a den tu man e fii bun? We, meke u luku wan toli: Te i si taki wan taa sama de kabakaba fu du wan sani gi i, da yu e fii taki a sama e booko en ede anga i. Te i si a sani ya, yu e fii bun. A so Rut be musu fii tu. Bowas be soi switifasi gi en. A sani ya be meke Rut piisii, di a si taki wan sama be e booko en ede anga en.​—Rut 2:10-13.

Wan sama di u mu e gi daa ala yuu, a Gadu. Son leisi i musu e pakisei den somen sani di Gadu du gi i den ten di pasa, anga den sani di ai du gi i nownow (Deit. 8:17,18; Toli 14:17). Ma wi á mu e luku den sani di Gadu du gi u namo da a kaba, u mu teke ten pakisei ala den sani di a du gi wi anga den sama fu u. Te yu o du a sani ya, yu o si kiin taki a Sama di meke ala sani lobi i tuutuu. Yu o si tu taki ai teke den sani di yu e du gi en fu bigi.​—1 Yoh. 4:9.

Yu á mu e pakisei den sani di ai gi wi anga fa ai belesi u namo, ma i mu e gi Yehofa daa tu fu den bun di ai du gi i (Ps. 100:4, 5). Te wi e gi sama daa, a sani ya e meke u moo piisii.

Te wi e soi taawan taki den sani di den e du gi wi e bigi gi u, wi anga den e toon moo bun mati. Ala wi e fii bun te taawan e soi taki den e teke san u du gi den fu bigi. Te i gi wan sama daa fu wan sani di a du gi i, u tu man e toon moo bun mati (Rom. 16:3, 4). Boiti dati, wan sama di e teke san taawan du gi en fu bigi, lobi yeepi taawan a sani. Te den si san taawan du gi den, denseefi e wani du bun gi taa sama tu. Te wi e yeepi taawan, wi e moo de koloku. Yesesi be taki: „Te wan sama e gi taawan sani, ai de koloku moo te taawan e gi en sani.”​—Toli 20:35.

Robert Emmons, di e wooko a wan universiteit a Kaliforniya be teke fesi a wan ondoosuku di sama be du fu a teke di sama e teke sani fu bigi. A taki: „Efu u wani teke den sani di taawan du gi u fu bigi, u mu fusutan fosi taki ala sama abi taawan fanowdu. Son leisi taawan e yeepi wi a sani, ma taa leisi a wi abi fu yeepi den a sani.” Te i luku en bun, da ala wi abi taawan fanowdu fu man tan a libi anga fu de koloku. Kande den sani di wi e nyan a taa sama e paandi den. Te u siki wi abi dataa  fanowdu fu yeepi u (1 Kor. 12:21). Wan sama di sabi kiyoo e teke san taawan e du gi en fu bigi. I gwenti gi taawan daa te den du wan sani gi i?

Te wi e teke san taawan e du gi u fu bigi, ai yeepi u fu poti pakisei a den bun sani fu a libi. Ai yeepi u tu fu wi á booko wi ede tumisi anga den sani di nai go bun. Efi yu e teke sani fu bigi, yu o si taki a omen bun sani e pasa aini i libi. A sani ya o yeepi i fu du san apostel Pawlesi be taki. A be taki: „U mu e piisii ala yuu fu Masaa ede.”​—Filip. 4:4.

Yu o si taki a sani ya o yeepi i fi yu á booko yu ede tumisi anga sani. Wan sama di e teke sani fu bigi, nai dyalusu anga taawan. En ati nai boon sosokaali. Sama di e teke sani fu bigi, nai feti a gudu baka. Den e piisii anga san den abi.​—Filip. 4:12.

U sabi taki Saatan o piisii efu u booko-saka te tesi miti wi aini den lasiti dei ya. A be o piisii efu u be e poti pakisei a sani di e meke u fii booko-saka. A be o piisii tu efu u be lobi kuutu. Efu wi abi den manii ya, a o moo taanga gi u fu paati a bun nyunsu. A moo makiliki gi wan sama di e teke sani fu bigi, fu kon abi den manii di a santa yeye e meke sama abi. A sani ya e meke den piisii fu di den e poti pakisei a den sani di Gadu du gi den. Den e piisii tu fu di den e biibi taki Gadu o du den sani di a paamisi u.​—Gal. 5:22, 23.

Enke wan Yehofa Kotoigi, i sabi taki den sani di sikiifi aini a artikel ya a tuu. Tokuso a á makiliki ala yuu fu soi taki yu e teke sani fu bigi. Ma yu á mu gi abaa. I poi abi a manii ya. San i mu du? Teke ten ala dei fu pakisei wantu sani aini a libi di e bigi gi i. Efi yu e du a sani ya, a o moo makiliki gi i fu e teke sani fu bigi. A sani ya o meke i piisii moo den sama di lobi pakisei den booko-ede fu a libi ala yuu. Teke ten pakisei den bun sani di Gadu anga taa sama e du gi i. A sani ya o meke i fii bun. Kande i sa sikiifi den sani ya aini wan pikin buku. Kande i sa sikiifi wan efuso tu sani di sama du gi i ala dei i, di meke i fii bun a dei de.

Ondoosukuman kon si taki te sama abi a gwenti fu teke san taawan du gi den fu bigi, a sani ya sa kengi a fasi fa a fusutan fu den e wooko. A sani ya e yeepi den fu piisii aini a libi. Neen meke a bun fu e pakisei fa Gadu e belesi i. Pakisei den bun sani di yu e miti. Teke den sani ya fu bigi! Ná si enke a kowownu i fende den sani ya, ma „gi Yehofa daa, bika a bun”. „Gi Gadu daa fu ala sani.”​—1 Kolon. 16:34; 1 Tes. 5:18.