1-2. Enke fa a ondoofenitoli fu Angelito e soi, da san ala wi abi fu du?

I MMA anga dda a Yehofa Kotoigi? Winsi i mma anga dda a Yehofa mati, toku i mu holi a pakisei taki i nai toon wan mati fu Yehofa fu di i mma anga dda e dini en. A iseefi mu meke moiti fi yu anga Yehofa toon mati.

² Luku a toli fu wan baala den e kai Angelito. En mma anga dda a Kotoigi. Ma di a baala ya be moo yonkuu, a á be fii enke en anga Yehofa a be mati. A taki: „Mi be e dini Yehofa fu di ala den famii fu mi be e dini en.” Bakaten a baala ya bigin leisi Beibel ala dei, a be e teke ten pakisei den sani di a leisi, a bigin begi Yehofa ala yuu tu. San a be a bakapisi? Angelito taki: „Mi kon fusutan taki a wan kodo fasi fa mi sa toon wan mati fu mi Dda Yehofa, a te miseefi meke moiti fu sabi en moo bun.” A toli fu Angelito e meke u pakisei a wantu pelensipali akisi: A te wan sama sabi wantu sani fu Yehofa, da dati wani taki en anga Yehofa a mati? San u mu du fu kon sabi Yehofa bun?

3. Saide te wan sama sabi wantu sani fu Yehofa, anga te wan sama sabi Yehofa bun a ná aseefi?

³ Kande wi e si enke u sabi Yehofa fu di u sabi en nen, u sabi wantu sani di a du, anga wantu sani di a taki. Ma dati á wani taki u sabi Yehofa tuutuu. Efu u wani sabi  Yehofa bun, u mu kon sabi den manii fi en. Na a sani de o yeepi u fu sabi saide ai taki son sani anga saide ai du son sani. A o yeepi u tu fu sabi efu Yehofa lobi a fasi fa wi e denki anga den sani di wi e du. Te u fusutan san Yehofa wani u du, da u mu meke moiti fu du sani enke fa a wani.

4. San u sa biibi te u luku den toli fu Mosesi anga Kownu David?

⁴ Kande son sama o soso u fu di u wani dini Yehofa. Kande den o du sani fu tapu u fu go a den komakandaa. Ma efu wi e fitoow Yehofa, noiti a o gwe fika u. Efu u holidoo, wi anga en o toon mati fu teego. U man sabi Yehofa tuutuu? Eeye, u poi. Den toli fu den man enke Mosesi anga Kownu David di be abi sondu e soi taki u poi kon sabi Gadu. Wi o luku san den man ya du, da wi o piki den tu akisi ya: Fa den du kon leli sabi Yehofa? San u sa leli fu den?

5. Sowtu bosoloiti Mosesi be teke?

⁵ Mosesi du san a leli. Di Mosesi be abi 40 yali, a be wani de makandaa anga den Islayelisama, a foluku fu Gadu. A á be wani den kai en „a manpikin fu a umanpikin fu Farao” (Heb. 11:24). Mosesi á be wani balinen. Di a holibaka gi den Hebrewsama di be de saafu a Egepte, a soi taki a á be e feele Farao, wan makiti tiiman di sama be e si enke wan gadu. A sani ya e soi kiin taki Mosesi biibi be taanga. A be e fitoow Yehofa, neen meke fanafu a ten de, en anga Yehofa toon mati te enke a dede.​—Odo 3:5.

6. San a toli fu Mosesi e leli u?

⁶ San a sani ya e leli u? Leti enke Mosesi, ala u mu luku san wi o du. U mu luku efu wi o dini Gadu makandaa anga a foluku fi en. Kande wi abi fu fika son sani fu man dini Gadu. Kande sama di á sabi Yehofa o du ogii anga u. Ma efu wi e fitoow u Dda di de a hemel, u sa biibi taki a o holibaka gi u!

7-8. San Mosesi be leli fu Yehofa?

⁷ Mosesi tan meke moiti fu kon sabi den manii fu Yehofa, a be e du san a wani tu. Di Yehofa akisi Mosesi fu a go puu den Islayelisama a Egepte, a omen leisi Mosesi taigi Yehofa taki a ná o poi du a wooko de. Gadu be e booko en ede anga Mosesi, a be e fusutan fa ai fii, neen meke a be yeepi en (Ek. 4:10-16). A sani ya gi Mosesi deki-ati fu go taigi Farao san Gadu be taki o miti en. Baka dati Mosesi si fa Yehofa koboloiki en kaakiti fu kibii den Islayelisama. A si tu fa a kii Farao anga den suudati fi en aini a Lebi Se.​—Ek. 14:26-31; Ps. 136:15.

⁸ Baka di Mosesi puu den Islayelisama a Egepte, den sama ya be e kuutukuutu ala yuu. Ma toku Mosesi be e si fa Yehofa be e pasensi anga a foluku fi en di a be puu a katibo (Ps. 78:40-43). Mosesi si fa Yehofa soi sakafasi tu, bika di Mosesi begi en fu a á kii den Islayelisama, a aliki en.​—Ek. 32:9-14.

9. Fa Hebrewsama 11:27 e soi taki Yehofa anga Mosesi a be tuutuu mati?

⁹ Baka di den Islayelisama komoto a Egepte, Mosesi anga Yehofa be toon moo bun mati. Beibel taki a leti enke Mosesi be e si en Dda di de a  hemel. (Leisi Hebrewsama 11:27.) Beibel e soi u taki Mosesi anga Yehofa a be bun mati bika a taki: „Yehofa be e taki fesi a fesi anga Mosesi, leti enke fa wan sama e taki anga en mati.”​—Ek. 33:11.

10. San u mu du efu u wani sabi Yehofa bun?

¹⁰ San a sani ya e leli u? Efu u wani sabi Yehofa bun, wi á mu meke moiti fu sabi den manii fi en namo, ma u mu du san a wani tu. Aini a ten ya Yehofa wani „ala sowtu sama kon fii, den mu sabi a waaleiti soifili tu” (1 Tim. 2:3, 4). Wan fasi fa u sa du san Yehofa wani, a fu yeepi sama fu kon sabi en.

11. Fa a yeepi di wi e yeepi sama fu sabi Yehofa e meke u kon sabi en moo bun?

¹¹ Te wi e yeepi sama fu kon sabi Yehofa, useefi e kon sabi en moo bun. Wi e si taki Yehofa e booko en ede anga sama, bika ai yeepi u fu fende sama di wani toon en mati (Yoh. 6:44; Toli 13:48). Wi e si a kaakiti fu Yehofa te wi e si fa den sama di wi e sutudeli anga den e fika son takuu gwenti anga fa den e kon abi den manii di wan Kelesten mu abi (Kol. 3:9, 10). Wi e si tu taki ai pasensi anga den sama na a pisi pe wi e peleiki, bika ai sende u go a den omen leisi fu di a wani den kon sabi en fu den sa tan a libi te a o poli a goontapu ya.​—Rom. 10:13-15.

12. Enke fa Ekisodesi 33:13 e soi, da san Mosesi akisi Yehofa? Saide a akisi en a sani ya?

¹² Mosesi be e teke en fu bigi taki en anga Yehofa a be mati. Yehofa meke Mosesi du omen wonduu. A be sabi Yehofa bun tu. Ma toku a be begi Yehofa fu a yeepi en fu a sabi en moo bun. (Leisi Ekisodesi 33:13.) Winsi fa Mosesi be pasa 80 yali kaba di a akisi Yehofa a sani ya, toku a be sabi taki a omen sani a be mu leli ete fi en Dda di de a hemel.

13. San a wan fasi fa u sa soi taki ai bigi gi u taki wi anga Yehofa a mati?

¹³ San a sani ya e leli u? Winsi on langa wi e dini Yehofa kaba, toku ala yuu u mu soi taki ai bigi gi u taki wi abi a gaandi fu dini en. Wan fasi fa u sa soi taki wi e teke en fu bigi taki wi anga Yehofa a mati, a te wi e begi.

14. Saide begi a wan fu den pelensipali sani di u mu du efu u wani sabi Gadu moo bun?

¹⁴ Efi i wani yu anga wan sama toon bun mati, i mu e taki anga en ala yuu. Neen meke na ala yuu i mu e begi Gadu. Noiti i mu feele fu taigi en fa yu e fii (Efe. 6:18). Wan sisa den e kai Krista, di e tan a Tolukukondee taki: „Te mi e taigi Yehofa fa mi e fii, anga te mi e si fa ai yeepi mi, mi e moo fitoow en. Mi e moo lobi en tu. A si di mi e si fa Yehofa e piki den begi fu mi, yeepi mi fu si en enke mi Dda anga mi mati.”

15. San Yehofa be taki fu Kownu David?

¹⁵ Di Kownu David meke, en mma anga en dda, anga den sama di be lontu en be e dini Yehofa kaba. Ma tokuso a ná fu di David famii be e dini Yehofa meke enseefi be e dini en. A meke moiti fu toon Gadu mati. Yehofa be lobi en tuutuu. Yehofa seefi be kai David ’wan man di a lobi’ (Toli 13:22). Fa a du kon taki David anga Yehofa be toon bun mati?

16. San David be e si te a be luku den sani di Yehofa meke?

 ¹⁶ David be kon sabi Yehofa, fu di a be e poti pakisei a den sani di Yehofa meke. Di David be yonkuu, a omen yuu langa a be e de a doose e luku den sikapu fi en dda. Kande a den ten ya a be bigin poti pakisei a den sani di Yehofa meke. Te a be luku go a tapu te neti, a á be e si sitali namo da a kaba, ma a be e si den manii fu a Sama di meke den tu. David be sikiifi taki: „Hemel e gafa Gadu. Den sani di wi e si a tapu e soi u san a meke anga en ana” (Ps. 19:1, 2). Te David be luku a fasi fa libisama meke, a be e si taki Yehofa koni tuutuu (Ps. 139:14). Te David be luku ala den sani di Yehofa meke, a be e si kiin taki noiti a o man fusutan ala sani fu Yehofa.​—Ps. 139:6.

17. San wi e leli te wi e sidon pakisei den sani di Gadu meke?

¹⁷ San a sani ya e leli u? I mu e teke ten luku den moin sani di Yehofa meke. Luku san den bon, den moin boomiki, den meti anga den sama di yu e si, e leli i fu Yehofa. Efi yu e du a sani ya, ala dei yu o leli omen sani fi i Dda di lobi i (Rom. 1:20). Boiti dati ala dei yu o kon moo lobi en.

18. Enke fa Psalm 18 e soi, da san David be sabi?

¹⁸ David be e si fa Yehofa be e yeepi en. Di David be e luku den sikapu fi en dda, a be si kiin taki a Yehofa be yeepi en fu kii wan lew anga wan beer di be wani nyan den sikapu fi en dda. Di a kii a gaan gadyaa suudati di den e kai Goliyat, a be si kiin tu taki a Yehofa be yeepi en (1 Sam. 17:37). A be sabi tu taki a Yehofa be yeepi en fu a dyalusu Kownu Saul á fende en kii (Ps. 18, den wowtu na a bigin). Efu David be abi bigifasi, a be o denki neen seefi be du ala den sani ya. Ma fu di a be abi sakafasi, meke a be e si taki a Yehofa be e yeepi en.​—Ps. 138:6.

19. San a toli fu David e leli u?

¹⁹ San a sani ya e leli u? Wi á mu begi Yehofa fu a yeepi u namo da a kaba, ma u mu meke moiti fu si on ten a yeepi u, anga fa ai yeepi u. Efu wi abi sakafasi, wi o holi a pakisei taki wi á poi du ala sani, wi abi Yehofa fanowdu. Ala yuu te u si fa Yehofa yeepi u, wi anga en o toon moo bun mati. Isaac, wan baala fu Fidyi di e dini Yehofa omen yali kaba, si taki a sani ya a tuu. A taki: „Te mi luku mi libi, mi e si kiin fa Yehofa yeepi mi fanafu a ten di mi bigin sutudeli Beibel te anga now. A sani ya meke mi e si Yehofa enke mi mati.”

20. Saide David anga Yehofa a be bun mati?

²⁰ David meke moiti fu waka a Yehofa baka. Yehofa meke wi anga denseefi manii fi en (Gen. 1:26). Te u sabi den manii fu Yehofa, a o moo makiliki gi u fu waka neen baka. Di David kon sabi den manii fi en Dda di de a hemel, a meke moiti fu waka neen baka anga a fasi fa a be e libi anga taawan. David sondu di a siibi anga Batseiba, baka dati a kii a man fi en (2 Sam. 11:1-4, 15). Ma Yehofa gi David paadon, bika David seefi be lobi gi taawan paadon. David anga Yehofa a be bun mati. Den Islayelisama be lobi en tuutuu. Yehofa be e gi den taa kownu taanga-sikin fu waka neen baka.​—1 Kow. 15:11; 2 Kow. 14:1-3.

21. Enke fa Efeisesama 4:24 anga 5:1 e soi, da sowtu wini wi o fende te wi e „du sani enke fa u sabi taki Gadu seefi be o du sani”?

 ²¹ San a sani ya e leli u? U mu meke moiti fu „du sani enke fa u sabi taki Gadu seefi be o du sani”. Te wi e meke moiti fu du sani enke Yehofa, wi e fende wini fu a sani ya. A sani ya e yeepi u fu moo sabi en. Te wi e meke moiti fu abi den manii fu Gadu, wi e soi taki u neen pikin.​—Leisi Efeisesama 4:24; 5:1.

22-23. Sowtu wini wi o fende te wi e du den sani di wi e leli fu Yehofa?

²² U si taki efu u wani sabi Yehofa moo bun, u mu e luku den sani di a meke. U mu e leisi a Wowtu fi en, da u teke ten pakisei san u leli. A Beibel abi omen toli fu sama di be e dini Gadu anga den hii ati, di u sa waka a den baka. Sama enke Mosesi anga David. Yehofa seeka sani gi u fu sabi en. Now a useefi mu meke moiti fu sabi en.

²³ Noiti wi o kaba leli sani fu Yehofa (Peleik. 3:11). A moo pelensipali sani a ná den somen sani di wi e leli fu Yehofa, ma na a du di wi e du den sani di wi e leli. Efu wi e meke moiti fu du san wi e leli, neen wi e waka a u Dda baka, a sani ya o yeepi u fu toon en mati (Yak. 4:8). A soi u kiin aini en Wowtu taki noiti a o gwe fika den sama di e meke moiti fu sabi en moo bun.