A á gei enke a dati Didibii be abi a pakisei. Bika a á taigi Efa taki efu a nyan a sii di Gadu be taigi den taki den á mu nyan, en sikin o dede da wan sani fi en di sama á poi si o libi go doo a wan taa peesi. Saatan koboloiki wan sineki fu taigi Efa taki di a o nyan a sii, ’a ná o dede seefiseefi’. A be wani soi en taki di a be o nyan a sii fu a bon, sani be o go moo bun anga en. A á be o abi fu aliki Gadu moo fu man libi fu teego a goontapu ya.​—Gen. 2:17; 3:3-5.

Nownow sama e leli taawan taki te wan sama dede, wan sani fi en de di e libi go doo. Efu a ná aini a dyali Eden a falisi leli ya bigin, da pe a bigin? Wi á sabi pilisisi. Ma u sabi taki ala den sama di be e dini falisi gadu aini a ten fu Nowa, be dede aini a Fuudu. Nawan fu den falisi biibi di be de fosi a Fuudu, de moo bika a Nowa anga den pikin fi en wawan be tan a libi baka a Fuudu.

A musu de taki a wan pisiten baka a Fuudu sama bigin anga a falisi leli taki te wan sama dede wan sani fi en e libi go doo. Di Gadu buuya a tongo di sama be e taki na a ten fu Babel, neen sama ’paati go na ala se fu goontapu’. A so a leli ya paati go na ala se (Gen. 11:8, 9). Winsi wi á sabi pilisisi on ten a falisi leli ya bigin, tokuso u sa biibi taki a Saatan Didibii, „a dda fu lei” kon anga a leli ya. Ai piisii taki a falisi leli ya paati na a hii goontapu.​—Yoh. 8:44.