Den sani di sikiifi a Deitolonomi 22:25-27 a ná fu soi efu a man be fowtu, bika solanga wan man be suwa anga wan uman, a wan sondu a be du. Ma a weiti ya a be fu luku efu den be mu sitaafu a uman tu. Meke u luku a pisi ya moo fini.

Wantu vers a fesi e taki fu wan man di siibi anga wan uman di be meke mofu fu toow anga wan taa man, ma aini a „foto” a sani ya pasa. A wan sondu a du, bika te wan uman be meke mofu fu toow anga wan man, da a leti enke a be toow kaba. Ma a wan sondu a uman be du tu? A uman „á bali aini a foto”. Efu a be bali, sama be o yee fu go yeepi en. Neen meke a den tu man den be e sitaafu, bika da a uman seefi be abi aini.​—Deit. 22:23, 24.

Ma aini Deitolonomi 22:25-27 a Weiti e taki fu wan taa sani. A taki: „Efu a doose fu a foto wan man suwa anga wan uman di meke mofu fu toow anga wan taa man, da a man di suwa anga a uman mu dede. Neen wawan u mu kii. Ma wi á mu du nawan sani anga a uman. A uman á du wan sondu fu fende dede sitaafu. A sani di a man du, na aseefi enke te wan man go feti anga wan taawan neen a naki en kii. A man suwa anga a uman a doose fu a foto. A uman di meke mofu fu toow bali, ma nawan sama be de ape fu yeepi en.”​—Deit. 22:25-27.

Efu sowan sani be pasa, da den kuutubakaa be o gi a uman leti, bika a bali, ma „nawan sama be de ape fu yeepi en”. A uman á be waka gi a man fi en. Den be o sitaafu a man bika a be suwa anga wan uman di be meke mofu fu toow anga wan taa man.

A weiti ya e soi taki a uman á be du wan sondu, ma na a taase ai soi kiin taki a man be sondu fu di a be suwa anga wan uman. Boiti dati a uman di a be suwa anga en a be sama uman. U sa biibi taki den kuutubakaa be e ’ondoosuku a toli bun’. Baka dati den be e wooko anga den weiti fu Gadu fu man koti a kuutu a wan letifasi.​—Deit. 13:14; 17:4; Ek. 20:14.