1. Fa omen sama e si wooko?

FA SAMA e si wooko na a pisi pe yu e tan? Aini omen kondee, sama e wooko taanga. Son sama e wooko te da den nai abi ten fu teke boo. Den nai abi ten fu de makandaa anga den osufamii. Boiti dati, den nai abi ten fu leli sani fu Gadu (Peleik. 2:23). Ma yu abi sama tu di á lobi wooko. Den e suku ala sowtu fasi fu den á sa wooko.​—Odo 26:13, 14.

2-3. Fa Yehofa anga Yesesi e si wooko?

² Enke fa u si, da yu abi sama di e wooko pasa peesi, anga sama di nai wani wooko. Ma meke u luku fa Yehofa anga Yesesi e si wooko. U sabi taki Yehofa lobi wooko. Yesesi meke u fusutan a sani ya kiin, di a taki: „Te anga now Nda e wooko ete. Miseefi e wooko ete” (Yoh. 5:17). Pakisei den somen engel, den sitali, anga den palaneiti di Yehofa meke. A omen moin sani Yehofa meke poti a goontapu ya tu. A psalm sikiifiman be abi leti di a taki: „Yehofa, den sani di i meke ipi tuutuu. A fasi fa i meke den e soi taki i koni. Goontapu fuu anga den sani di i meke.”​—Ps. 104:24.

³ Yesesi waka neen Dda baka. A yeepi Gadu „meke hemel”. A wooko makandaa anga Yehofa „enke wan sama di koni fu du en wooko” (Odo 8:27-31). Bakaten di Yesesi kon a goontapu, a be e du en wooko bun tu. Yesesi be e si a wooko di Yehofa be gi en fu du, enke nyanyan. Den sani di a du di a be de a goontapu ya e soi taki a Gadu be sende en kon a goontapu tuu.​—Yoh. 4:34; 5:36; 14:10.

4. Yehofa anga Yesesi e teke boo?

 ⁴ Enke fa u si, da Yehofa anga Yesesi e wooko taanga. A sani ya wani taki wi á mu e teke boo? Yehofa nai weli, neen meke a á de fu a teke boo. Ma toku Beibel e soi taki baka di Yehofa meke hemel anga goontapu „a teke boo” (Ek. 31:17). Yehofa be tapu fu meke sani fu di a be wani piisii anga den sani di a be meke kaba. Winsi fa Yesesi be e wooko taanga di a be de a goontapu, tokuso a be e teke boo. A be e meke ten fu sidon nyan anga den mati fi en.​—Mat. 14:13; Luk. 7:34.

5. San e taanga gi omen Kelesten fu du?

⁵ Beibel taki den sama di e dini Gadu mu lobi wooko, den á mu lesi (Odo 15:19). Kande yu e wooko fu solugu yu osufamii. Yesesi gi ala den bakaman fi en a wooko fu paati a bun nyunsu tu. Winsi fa yu e du ala den sani ya, i mu e teke boo tu. Ai taanga gi i fu fende ten sai fu wooko solugu yu osufamii, fu du a peleikiwooko, anga fu teke boo? Fa yu o sabi omen ten i mu teke fu wooko, anga omen ten i mu teke fu boo?

6. Enke fa Malikisi 6:30-34 e soi, da fa Yesesi be e si wooko anga a teke di u mu e teke boo?

⁶ U mu e si wooko enke fa Yehofa anga Yesesi e si en. A santa yeye be meke Kownu Salomo sikiifi taki: „Ala sani abi en ten.” A taki wan ten de fu paandi, fu meke osu, fu kee, fu dansi, fu lafu anga wan ten fu du taa sani (Peleik. 3:1-8). Wooko, anga teke boo, a tu pelensipali sani di wan sama mu du. Yesesi be e si den sani ya enke fa Yehofa e si den. Wan leisi den apostel be peleiki a hii dei, toku sama be e kon a den ete. Den „á be abi ten fu nyan seefi”. Neen meke Yesesi taigi den taki: „Meke u go a wan koo peesi fu boo pikinso.” (Leisi Malikisi 6:30-34.) Winsi fa Yesesi anga den disipel fi en á be e poi teke boo enke fa den be wani, tokuso Yesesi be sabi taki ala den be abi losutu fanowdu.

7. Sowtu wini wi o fende di wi o luku a weiti fu a Sabadei?

⁷ Ala sama abi losutu fanowdu. Son leisi wi abi fu fika son sani di u gwenti du fu boo pikinso. Wi e si a sani ya te u luku wan fu den weiti di Gadu be gi den Islayelisama. A be taigi den taki ala wiki den be mu holi a Sabadei. Winsi fa Kelesten ná abi fu holi a Weiti fu Mosesi, toku a omen sani u sa leli fu a Sabadei. A sani ya o yeepi u fu sabi efu wi e si wooko anga a teke di u mu teke boo enke fa Yehofa e si den sani ya.

8. Enke fa Ekisodesi 31:12-15 e soi, da san den Islayelisama be mu du na a Sabadei?

⁸ Beibel taki baka sigisi „dei” neen Gadu kaba meke sani a goontapu (Gen. 2:2). Ma a sani ya á wani taki Yehofa á be e wooko moo. Yehofa lobi wooko. Beibel taki „te anga now” Yehofa e wooko ete (Yoh. 5:17). Den Islayelisama be mu wooko sigisi dei aini a wiki, da du fu seibin dei den be mu teke boo enke Yehofa. Gadu taki a Sabadei a be wan maiki gi en anga den Islayelisama. Den Islayelisama ’be mu teke boo na a dei de. A be wan santa dei gi Yehofa’. (Leisi Ekisodesi 31:12-15.) Nawan sama be mu wooko na a dei de. Gaansama, pikinnengee, saafu, anga den meti seefi á be mu wooko na a dei de (Ek. 20:10). A sani ya be e yeepi a  foluku fu poti pakisei na a dini di den be e dini Yehofa.

9. Fa den keliki fesiman fu a ten fu Yesesi be e si a Sabadei?

⁹ A Sabadei be e tyai wini gi a foluku fu Gadu, ma aini a ten fu Yesesi den keliki fesiman be meke a dei ya toon wan hebi gi a foluku. Den be e fende taki a be fowtu fu kuuna pikinso alisi fu nyan. Den be fende taki a fowtu fu deesi sama na a Sabadei tu (Malik. 2:23-27; 3:2-5). Ma Yehofa á be wani a Sabadei de enke wan hebi gi en foluku. Yesesi meke den sama di be e aliki en fusutan a sani ya kiin.

10. Enke fa Mateyesi 12:9-12 e soi, da fa Yesesi be e si a Sabadei?

¹⁰ Yesesi anga den bakaman fi en be e wooko anga a Weiti fu Mosesi, neen meke den be e holi a Sabadei. * Ma Yesesi soi kiin anga den sani di a be e taki anga den sani di a be e du taki a á fowtu fu du bun gi taawan na a Sabadei. A be taki: „A á fowtu fu du bun a wan Sabadei.” (Leisi Mateyesi 12:9-12.) A á be e si enke a wan sondu fu soi switifasi gi sama a wan Sabadei. Yesesi soi anga den sani di a be e du taki a be fusutan saide Yehofa be taigi a foluku fi en taki den mu teke boo na a Sabadei. Te a foluku be teke boo a dei de, a sani ya be e yeepi den fu poti pakisei na a dini di den be e dini Gadu. Yesesi mma anga en kweki dda be  e si a Sabadei enke wan dei fu dini Gadu. Wi e si a sani ya te wi e leisi san be pasa di Yesesi be go a Nasaleti, a foto pe a kiya. Beibel taki: „Di [Yesesi] doo Nasaleti a peesi pe a kiya, a go na a snoga enke fa a be gwenti du na a Sabadei, neen a opo taampu fu leisi.”​—Luk. 4:15-19.

11. Sama be leli Yesesi fu lobi wooko?

¹¹ Yowsefu, a kweki dda fu Yesesi be e si wooko enke fa Yehofa e si en. Neen meke a leli Yesesi a tembee wooko (Mat. 13:55, 56). Yesesi be e si fa Yowsefu be e wooko taanga fu solugu a gaan osufamii fi en. Bakaten Yesesi taigi den bakaman fi en taki: „A wookoman mu fende en pai” (Luk. 10:7). A sani ya e soi kiin taki Yesesi be gwenti wooko taanga.

12. Sowtu tekisi e soi san Beibel e taki fu taanga wooko?

¹² Apostel Pawlesi seefi be sabi san a wani taki fu wooko taanga. A moo pelensipali wooko di a be e du, a fu yeepi sama fu kon sabi Yesesi anga den sani di Yesesi be e leli sama. Ma Pawlesi be e wooko fu solugu enseefi tu. Den Kelesten a Tesalonika be sabi taki Pawlesi be e „wooko taanga dei anga neti” fu di a á be wani nawan sama „pai omen moni fu solugu” en (2 Tes. 3:8; Toli 20:34, 35). Di Pawlesi taki a be e wooko taanga, kande na a tenti wooko a be e taki. Di a be de a Korente, a be e tan anga Akwila anga Preskela. A toowpaa ya be e „meke tenti” tu, neen meke Pawlesi be e wooko makandaa anga den. Di Pawlesi taki a be e wooko „dei anga neti”, dati á wani taki a á be e teke boo. A ná ala yuu a be e meke tenti. A á be e du a wooko ya a Sabadei. Te Sabadei be doo a be e go peleiki gi den Dyu, bika denseefi á be e wooko a Sabadei.​—Toli 13:14-16, 42-44; 16:13; 18:1-4.

13. San wi e leli te u luku a libi fu Pawlesi?

¹³ U sa waka na apostel Pawlesi baka. Winsi fa a be mu wooko fu solugu enseefi, tokuso a be e „paati a bun nyunsu fu Gadu” ala yuu (Rom. 15:16; 2 Kor. 11:23). A be e gi taawan taanga-sikin fu peleiki fayafaya tu. Akwila anga Preskela be e du a „wooko fu Kelestesi Yesesi” makandaa anga Pawlesi (Rom. 12:11; 16:3). Pawlesi be gi den baala anga sisa a Korente taanga-sikin fu „wooko taanga gi Masaa” (1 Kor. 15:58; 2 Kor. 9:8). Yehofa be meke apostel Pawlesi sikiifi taki: „Efu wan sama á wani wooko a á mu nyan tu.”​—2 Tes. 3:10.

14. San Yesesi be wani taki anga a sani di sikiifi a Yohanisi 14:12?

¹⁴ A moo pelensipali wooko di u mu du aini a ten ya, na a paati di u mu paati a bun nyunsu, anga a yeepi di u mu yeepi sama fu toon Yesesi bakaman. Yesesi be taki den bakaman fi en be o du gaan sani moo en. (Leisi Yohanisi 14:12.) A sani ya á be wani taki u be o du wonduu enke Yesesi. Ma a be wani soi u taki den bakaman fi en be o peleiki gi moo sama. Den be o du a wooko ya langa moo en tu.

15. San u mu akisi useefi? Saide u mu akisi useefi den sani ya?

¹⁵ Efi yu e wooko a wan bodeleifi, akisi iseefi den sani ya: ’Sama sabi mi na a wookope enke wan sama di e wooko taanga? Mi e kaba mi wooko na a yuu di mi mu kaba en?’ Efi yu e du den sani ya, i basi o lesipeki i. A o moo makiliki gi i tu fu peleiki gi den sama ai wookope. Efi i wani sabi fa yu e si a peleikiwooko, akisi iseefi den sani ya: ’Sama sabi mi enke  wan fayafaya peleikiman? Mi e seeka fosi mi go aini a peleikiwooko? Mi e daaidaai fu go baka a den sama di wani sabi moo? Boiti a osu fu osu wooko, mi e teke ala okasi di mi fende fu peleiki?’ Efi yu e du den sani ya, yu o lobi a peleikiwooko.

16. Fa Yesesi anga den apostel fi en be e si a teke di wan sama mu teke boo? Fa gaanse sama aini a ten ya e si a sani ya?

¹⁶ Yesesi be sabi taki en anga den apostel fi en be mu e teke boo, fu kisi denseefi baka. Ma omen sama aini a ten fu Yesesi anga a ten ya, de enke a guduman aini wan fu den ageisitoli di Yesesi be gi. A man ya be taki: „Mi o teke boo fosi. Mi o nyan, diingi, piisii” (Luk. 12:19; 2 Tim. 3:4). A man ya be e si piisii anga a teke di a be mu teke boo, enke den moo pelensipali sani. Ma Yesesi anga den apostel fi en á be e poti pakisei a denseefi namo. Den á be e si piisii enke a moo pelensipali sani.

17. San wi e du anga a ten di wi abi fu teke boo?

¹⁷ Kelesten e meke moiti fu waka a Yesesi baka. Neen meke den nai teke a ten di den abi fu boo, fu losutu a sikin namo, ma den e koboloiki en tu fu go a den komakandaa anga fu paati a bun nyunsu. Wi e si a yeepi di u mu yeepi sama fu toon Yesesi bakaman, anga a go di u mu e go a den komakandaa enke pelensipali sani (Heb. 10:24, 25). Winsi a wan taa kondee u go a fakansi, toku wi e meke moiti fu wi á misi nawan komakandaa. Wi e meke moiti fu paati a bun nyunsu gi den sama di wi e miti tu.​—2 Tim. 4:2.

18. San Yesesi, a Kownu fu u wani u du?

¹⁸ Ai bigi gi u taki Yesesi Kelestesi, a Kownu fu u, nai akisi u sani di wi á poi du (Heb. 4:15). A wani u wooko taanga fu man solugu useefi. A wani wi e teke boo fu losutu a sikin. Ma a wani wi e du ala san u man tu fu yeepi sama fu toon en bakaman. Aini a taa artikel wi o luku san Yesesi du fu puu wi a katibo.