1-2. (a) Sowtu fesa sama e holi aini son kondee? (Luku a faki „ San a be a Piisii-yali?”) (b) Fu san Yesesi be taki a Lukasi 4:16-18?

AINI son kondee, te wan kownu tii 50 yali, da den e fii wan fesa aini a kondee. Son leisi a wan dei, wan wiki, efuso moo langa den e fii a fesa ya. Ma te fu kaba a fesa ya e kon a wan kaba. Gawgaw sama e feegete fa den be e piisii na a fesa ya.

² Aini a artikel ya, wi o luku wan piisii-yali di pelensipali moo a wan di den Islayelisama be mu holi ala 50 yali. A wan hii yali den be e fii a fesa ya. Aini a Piisii-yali, den Islayelisama be e kon fii. Saide a de fanowdu fu sabi fa sani be e waka aini a Piisii-yali? Fu di a fasi fa sani be e waka te a fesa ya be doo, e meke u pakisei a sani di Yehofa seeka fu fii wi fu ala ten. Di Yesesi be de a goontapu, a be taki fu a fii di u be o fii.​—Leisi Lukasi 4:16-18.

3. Enke fa Lefitikesi 25:8-12 e soi, da sowtu wini a foluku fu Gadu be e fende te a Piisii-yali be doo?

³ Wi o luku san na a Piisii-yali di Yehofa be seeka gi a foluku fi en a fositen. A sani ya o yeepi u fu fusutan san Yesesi be wani taki, di a be taki sama o fii. Yehofa be taigi den Islayelisama taki: „Du fu 50 yali mu de wan santa yali gi u. Ala sama aini a kondee mu fii. A wan Piisii-yali. Ibiiwan fu u mu daai go neen osu anga en famii baka.” (Leisi Lefitikesi 25:8-12.) Aini a artikel di pasa, u be si sowtu wini den Islayelisama be e fende fu a Sabadei di den be mu holi ala wiki. Ma sowtu wini den be e fende te a Piisii-yali be doo? Meke u taki wan Islayeliman be abi tyaipi  paiman, neen a be seli en goon fu man pai a paiman ya, te a Piisii-yali be doo, a be e fende a goon fi en baka. A so a man ya be sa „daai go neen osu” baka. Bakaten den pikin fi en be sa fende a goon ya. Son leisi wan man be e meke paiman te, da a be abi fu seli wan fu den pikin fi en enke saafu fu pai a paiman. Son leisi neen seefi be e go wooko enke saafu fu pai a paiman ya. Te a Piisii-yali be doo, a be sa daai go neen „famii” baka. Den á be abi fu tan wan saafu fu ala ten. Den toli ya e soi taki Yehofa e booko en ede anga a foluku fi en tuutuu.

4-5. Saide Kelesten mu sabi san be e pasa aini a Piisii-yali fu den Islayelisama?

⁴ San a be wan taa wini fu a Piisii-yali? Yehofa be taigi den taki: „Nawan fu wi o pina, bika u Gadu Yehofa, o belesi wi aini a kondee di Yehofa gi u fu tan” (Deit. 15:4). Aini a ten ya, sani e waka taa fasi. Guduman e kon moo gudu, pootiman e kon moo pooti.

⁵ Kelesten nai wooko anga a Weiti fu Mosesi. Neen meke u nai du den sani di a foluku fu Gadu be mu du aini a Piisii-yali. Te a Piisii-yali be doo, da den sama di be abi saafu be mu meke den go a osu baka, den sama di be abi paiman á be abi fu pai den paiman moo. Efu wan Islayelisama be seli en goon, a be e fende en baka (Rom. 7:4; 10:4; Efe. 2:15). Ma winsi fa u nai holi a weiti ya moo, toku u mu sabi fa a weiti ya be e wooko. Saide? Bika Yehofa seeka sani fu fii wi fu sondu, leti enke fa a be seeka sani fu puu den Islayelisama a katibo.

6. Fu san libisama mu kon fii?

⁶ Ala u mu fii, bika wi a saafu fu sondu. Wi e siki, wi e gaandi, baka dati wi e dede. Son sama e si den sani ya kiin te den e luku den fesi a sipikii, efuso te den mu go a dataa fu di den siki. Te u meke wan fowtu, wi e lasi-ati tu. Apostel Pawlesi be taki á sondu di de aini en sikin be e basi en’. Baka dati a taki: „A libi fu mi  tyali oo! Sama o yeepi mi anga a sikin ya di e tyai mi go kii?”​—Rom. 7:23, 24.

7. Enke fa polofeiti Yesaya be taki, da san be o pasa aini a ten di e kon?

⁷ Wi e piisii tuutuu taki Yehofa seeka sani fu fii wi fu sondu. A Yesesi a o koboloiki fu fii wi. Moo enke 700 yali fosi Yesesi kon a goontapu, polofeiti Yesaya be sikiifi taki aini a ten di e kon sama be o fii. A fii di a polofeiti be taki fi en be o bun moo a fii di den Islayelisama be e kon fii te a Piisii-yali be doo. A sikiifi: „A yeye fu Yehofa, a Moo Heiwan de a mi tapu. A salufu mi fu mi paati bun nyunsu gi den bun ati sama. A sende mi fu deesi den soo fu den sama di booko-saka. A sende mi fu taigi den sama di de a katibo taki den o fii” (Yes. 61:1). Sama a den sama di o fii enke fa a polofeititoli fu Yesaya e soi?

8. Sama a den sama di o fii enke fa a polofeititoli fu Yesaya e soi?

⁸ A pelensipali polofeititoli ya bigin kon tuu, baka di Yesesi bigin anga a wooko fi en a goontapu. Yesesi be leisi a polofeititoli fu Yesaya ya gi den Dyu di be kon makandaa aini a snoga a Nasaleti. Yesesi be taki fi enseefi taki: „A yeye fu Yehofa de a mi tapu. A salufu mi fu mi paati bun nyunsu gi den pootiman. A sende mi fu taigi den sama di de a katibo taki den o fii, fu meke den beendi sama si. A sende mi fu fii den sama di e fii booko-saka. A sende mi tu fu taigi den sama fu a ten di Yehofa o soi sama bun-ati” (Luk. 4:16-19). Fa Yesesi meke a polofeititoli ya kon tuu?

9. Fa omen sama aini a ten fu Yesesi be denki a be o fii den?

⁹ Aini a ten fu Yesesi a polofeititoli fu Yesaya di Yesesi be leisi aini a snoga, bigin kon tuu. U sabi a sani ya fu di Yesesi seefi be taki: „Tide den wowtu di u yee dyonson de, kon tuu” (Luk. 4:21). Omen fu den sama di yee san Yesesi taki a dei de, be denki taki sani be o kengi aini a kondee. Den be denki taki Yesesi be o puu den a Rome ondoo. Kande den be e denki enke den tu man di be taki: „U be denki na a man ya be o fii Islayeli” (Luk. 24:13, 21). Ma u sabi taki Yesesi be e gi den bakaman fi en taanga-sikin fu saka denseefi na a tiimakiti fu Rome ondoo. A be taigi den taki den be mu „pai a Gaankownu san a fu a Gaankownu”  (Mat. 22:21). Efu Yesesi á be fii sama fu a tiimakiti fu a ten de, da fa a be fii den?

10. San a wan fasi fa Yesesi fii sama?

¹⁰ Gadu Manpikin be kon a goontapu fu fii sama fu tu sani. A fosiwan: Yesesi yeepi sama fu fii fu den falisi leli di den keliki fesiman fu a ten de be e paati. Den Dyu be de enke saafu fu den leli ya. Den keliki fesiman be meke omen weiti di be e fooseli a foluku (Mat. 5:31-37; 15:1-11). Den sama di be mu yeepi a foluku fu dini Gadu seefi á be e dini Gadu enke fa den be mu dini en. Den be de enke beendiman di be wani soi taawan pe den be mu waka. Den á be e si Yesesi enke a Mesiyas, den á be e teke den sani di a be e leli tu, neen meke den á be fende paadon fu den sondu fu den (Yoh. 9:1, 14-16, 35-41). Den sani di Yesesi be e leli, anga den sani di a be e du, yeepi den sama di be abi sakafasi fu si fa den be sa fii fu falisi leli.​—Malik. 1:22; 2:23–3:5.

11. San na a taa fasi fa Yesesi fii sama?

¹¹ Wan taa fasi fa Yesesi fii sama, a di a opo pasi gi den fu fende paadon fu sondu. Fu di Yesesi dede gi u, meke Gadu sa gi sama paadon, te den e biibi taki a dede fu Yesesi o tyai wini gi den (Heb. 10:12-18). Yesesi be taki: „Efu a Manpikin puu wi a katibo, wi o fii tuutuu” (Yoh. 8:36). A fii ya, bun moo a fii di wan Islayelisama be e fii te a Piisii-yali be doo. Saide u sa taki a sani ya? Wan Islayelisama di be kon fii, be sa toon wan saafu baka, bakaten a be o dede tu. Ma a fii di Yesesi meke u fii, a fu alaten.

12. Sama a den fosi sama di fende wini fu a fii di Yesesi be taki fi en aini a snoga?

¹² Yehofa be salufu man anga uman di be e dini en anga den hii ati, anga santa yeye na a Pinksterfesa fu a yali 33. A be teke den enke en manpikin di be o go a hemel fu tii makandaa anga Yesesi (Rom. 8:2, 15-17). A den sama ya a den fosi sama di fende wini fu a fii di Yesesi be taki fi en aini a snoga a Nasaleti. Den man anga uman ya a ná be saafu moo fu den falisi leli, anga weiti di den Dyu keliki fesiman be e poti gi a foluku. Yehofa be e si den tu enke sama di fii fu sondu anga dede. A Piisii-yali fu Kelesten bigin di Yehofa salufu den bakaman fu Kelestesi anga santa yeye aini a yali 33. A Piisii-yali ya o kon a wan kaba na a kaba fu a Dunsu Yali Tii fu Yesesi. Sowtu  bun sani o pasa ete aini a Piisii-yali fu Kelesten?

13-14. Sama a den taa sama di e fende wini fu a fii di Yesesi be taki fi en aini a snoga?

¹³ Aini a ten ya, a omen miliyun sama fu ala lo, anga kondee e dini Yehofa anga den hii ati. Den sama ya a den „taa sikapu” (Yoh. 10:16). Gadu á teke den fu go tii anga Yesesi a hemel. Ma den abi a howpu fu libi a goontapu fu teego enke fa Beibel e taki. Na a howpu ya yu abi?

¹⁴ Leti enke den salufu Kelesten, iseefi sa fende wini nownow kaba fu a sani di Yesesi du gi u. Fu di yu e biibi taki a dede fu Yesesi e tyai wini gi i, meke i sa akisi Yehofa fu a gi i paadon fu sondu. A sani ya o meke yu anga Yehofa toon mati, yu o abi wan kiin kosensi tu (Efe. 1:7; Openb. 7:14, 15). Yu e fende wini tu, fu di i nai biibi falisi leli moo. Yesesi be taki: „Wi o sabi a tuu, da a tuu o meke u fii” (Yoh. 8:32). Ai bigi gi u taki Yehofa fii u na a fasi ya.

15. Sowtu wini wi o fende aini a ten di e kon?

¹⁵ Aini a ten di e kon wi o moo fii, di Yesesi o poli ala den falisi keliki, anga den libisama tiimakiti di e fooseli sama. Gadu o kibii „wan gaan kulu sama” di e dini en. Baka dati a o meke den piisii fu a libi aini wan paladeisi a goontapu  (Openb. 7:9, 14). Wan gaan kulu sama di be dede, o weki baka tu. Den sama ya seefi o abi a okasi fu kon fii fu ala den takuu bakapisi di a sondu fu Adan tyai gi libisama.​—Toli 24:15.

16. San na a moo gaan fasi fa libisama o fii?

¹⁶ Aini a Dunsu Yali Tii, Yesesi anga den salufu Kelesten di o tii makandaa anga en, o yeepi libisama fu abi wan sikin di nai gaandi efuso siki moo. Den o yeepi u tu fu du sani enke fa Gadu wani ala yuu. A ten ya o de enke a Piisii-yali fu den Islayelisama. Na a ten de, ala den sama di e dini Yehofa anga den hii ati o fii fu sondu.

17. Enke fa Yesaya 65:21-23 e soi, da san o pasa anga a foluku fu Gadu aini a ten di e kon? (Luku a fowtow a fesise fu A Wakititolen.)

¹⁷ Yesaya 65:21-23 e taki fa a libi a goontapu o de. (Leisi en.) Beibel á taki u ná o wooko aini a ten de, ma ai soi taki a foluku fu Gadu o du wooko di e meke den piisii. Na a kaba fu a Dunsu Yali Tii fu Kelestesi „den sani di Gadu meke o fii fu a sikin di e dede. Den o fii a wan foondoo fasi enke pikin fu Gadu”.​—Rom. 8:21.

18. Saide u sa biibi taki wi o nyan bun fu a libi aini ten di e kon?

¹⁸ Leti enke fa Yehofa be seeka sani gi den Islayelisama fu teke boo baka te den wooko taanga, a so a o yeepi a foluku fi en aini a Dunsu Yali Tii fu si wooko anga a teke di den mu teke boo enke fa ai si den. Wi o abi ten fu dini Gadu, bika libisama abi Gadu fanowdu fu man de koloku tuutuu. Ala den sama di e dini Gadu anga den hii ati o piisii na a ten fu a Dunsu Yali Tii fu Kelestesi, bika wi o du wooko di u lobi. Wi o man dini Gadu enke fa a wani tu.