FA I be o fii efu wan bun mati fi i sende wan biifi gi i? Pawlesi, wan bun mati fu Timotiyesi be sende wan biifi gi en. A biifi ya na a pisi fu Beibel di u sabi enke 2 Timotiyesi aini a ten ya. Timotiyesi be musu poolo di a fende a biifi ya. Kande a suku wan koo peesi neen a sidon leisi san a mati fi en be wani taigi en. Fosi Timotiyesi bigin leisi a biifi kande a be e akisi enseefi taki: ‘Fa a sa e go anga Pawlesi nownow? Kande a sikiifi aini a biifi ya fa mi sa du mi wooko moo bun. Kande a o soi mi fa mi sa yeepi den baala anga sisa tu efuso fa mi sa du a peleikiwooko moo bun.’ Te wi e leisi a biifi ya, wi e si taki Pawlesi taki fu ala den sani ya. Meke u poti pakisei a wantu sani aini a biifi ya di u sa wooko anga den.

Na a bigin fu a biifi kaba Timotiyesi be man si taki Pawlesi be e si en enke wan bun mati fi en, bika a be kai en ‘wan pikin di a lobi’ (2 Tim. 1:2). Na a pisiten fu a yali 65 Pawlesi sende a biifi ya gi Timotiyesi. A ten de, a wan sani fu 30 yali Timotiyesi be abi. En a be wan owluman kaba. A moo enke tin yali en anga Pawlesi be wooko makandaa. Ná pikin sani Pawlesi be leli en.

Timotiyesi be musu fende taanga-sikin di a yee fa Pawlesi be e holidoo winsi san be e miti en. A ten di a sikiifi a biifi ya gi Timotiyesi, a be de a sitaafu-osu a Rome. A á be fika langa moo fu den kii en (2 Tim. 1:15, 16; 4:6-8). Aini a biifi ya Pawlesi taigi Timotiyesi taki a o ‘holidoo winsi san e miti en’. A sani ya soi Timotiyesi taki Pawlesi be abi deki-ati (2 Tim. 2:8-13). Leti enke fa Timotiyesi be fende taanga-sikin di a yee fa Pawlesi holidoo, a so useefi o fende taanga-sikin tu te wi e leisi biifi ya.

Pawlesi taigi Timotiyesi taki a mu teke en fu bigi taki Gadu gi en wan wooko fu du. A taigi en taki a mu du a wooko ya ‘fayafaya’ (2 Tim. 1:6). A Giiki wowtu fu ‘san Gadu gi i’ di Pawlesi kai aini a tekisi ya a ‘karisma’. A wowtu ya wani taki wan sama gi i wan kado, wan sani di yu á wooko fi en. A kado di Gadu be gi Timotiyesi, na a  gaandi di a be gi en fu wooko aini a kemeente.​—1 Tim. 4:14.

San Timotiyesi be mu du anga a kado ya? Pawlesi taigi en taki a mu du en wooko ‘fayafaya’. Leti enke fa wan sama e poti udu a wan faya fu a á dede, a letiso Timotiyesi be mu du sani di be o yeepi en fu tan du a wooko fi en fayafaya. Na aseefi sani u mu du tu.

Di Timotiyesi e leisi a biifi di a bun mati fi en sende gi en, a si wan taa sani di be o yeepi en fu du a wooko fi en moo bun. Pawlesi taki: ‘Meke a santa yeye di de aini u yeepi i fu kibii a gudu di i fende’ (2 Tim. 1:14). San a be a gudu ya? A gudu ya na a tuu leli di Pawlesi kai aini vers 13. Dati a den sani di sikiifi aini a Wowtu fu Gadu (2 Tim. 1:13). Timotiyesi be mu leli sama aini a kemeente, ma a be mu leli sama tu di á be sabi Yehofa ete (2 Tim. 4:1-5). Timotiyesi a be wan owluman tu, neen meke a be mu luku den sikapu fu Gadu (1 Peit. 5:2). Efu Timotiyesi be wani du den wooko ya bun, a be mu begi Yehofa fu a gi en santa yeye. A be mu wooko anga a Wowtu fu Gadu tu.​—2 Tim. 3:14-17.

Leti enke Timotiyesi, useefi mu leli sama san sikiifi aini a Wowtu fu Gadu (Mat. 28:19, 20). Efu u wani du a wooko ya bun, u mu e begi Gadu fu a yeepi u. U mu abi a gwenti fu e sutudeli a Wowtu fi en tu (Rom. 12:11, 12; 1 Tim. 4:13, 15, 16). Kande wi abi moo faantiwowtu aini a kemeente. Kande wi a owluman, spesuutu-pionili efuso wi e du wan taa fuuten diniwooko. Efu wi abi den sowtu gaandi ya, u mu begi Yehofa fu a yeepi u fu du u wooko bun, a so wi e soi taki wi abi sakafasi. U mu teke en fu bigi taki a gi wi a gaandi fu dini en na a fasi ya. U mu soi tu taki wi abi en fanowdu fu man du a wooko di a gi u.

Wan fu den wooko fu Timotiyesi a be fu leli taawan fu tyai faantiwowtu. Pawlesi be taigi en taki: ‘Taigi den man di e aliki Gadu ala yuu den sani di mi taigi i, . . . da den man ya seefi o koni sai fu leli taawan’ (2 Tim. 2:2). Pawlesi be membee Timotiyesi baka taki a mu leli taa baala den sani di a be leli en. Na aseefi sani ya owluman mu du tu. Wan owluman di e du en wooko bun, ná o daaidaai fu leli taa baala fu du son wooko. A ná o feele taki sama o moo poti pakisei na a baala fu di a moo sabi a wooko. A ná o dyalusu tu te a si taki a baala sabi du son sani moo en. Pe fu wan owluman dyalusu, a o meke moiti fu leli taa baala finifini fa den mu du den wooko di a gi den, a ná o kibii sani gi den. A ná wooko namo owluman mu leli den baala, ma den mu yeepi den tu fu toon Kelesten di abi ondoofeni. Den mu yeepi den fu den anga Yehofa toon moo bun mati. Te den o du a sani ya, den baala o poi du moo gi a kemeente.

Timotiyesi be musu lobi a biifi di Pawlesi be sende gi en. Kande a omen leisi a leisi en go kon, da ai meke moiti fu si fa a sa wooko anga den sani di a taigi en.

Useefi wani wooko anga den sani di Pawlesi taki aini a biifi ya. Fa u sa du a sani ya? U mu du a wooko fu u fayafaya, u mu kibii a gudu di Yehofa gi u, u mu leli taawan ala den sani di u sabi tu. Te wi e du den sani ya, da wi e soi taki wi e ‘du u wooko bun’.​—2 Tim. 4:5.