1-2. Saide na ala Kelesten mu sabi fa sani o waka anga den sama di o go a hemel?

GAANSE fu den sama di e dini Yehofa aini a ten ya a ná salufu Kelesten. Den sama ya abi a howpu fu libi fu teego a goontapu. Ma wantu salufu Kelesten de a goontapu ete. Den Kelesten ya e pakisei fa sani o de di den o go a hemel. Den sama di ná abi a howpu fu go a hemel mu sabi den sani ya tu, bika a wooko di den salufu Kelesten o go du a hemel o tyai wini gi den tu. Neen meke ala Kelesten mu wani sabi fa sani o waka gi den sama di o go a hemel.

² Gadu meke wantu fu den bakaman fu Yesesi sikiifi fa sani o waka gi den sama di o go a hemel. Apostel Yohanisi a be wan fu den sama ya. A be taki: ‘Nownow wi a Gadu pikin, ma wi á sabi ete san wi o toon bakaten. San u sabi, a taki di Gadu o soi enseefi wi o de enke en, bika wi o poi si en enke fa a de tuutuu’ (1 Yoh. 3:2). A sani ya e soi taki den salufu Kelesten á sabi fa den o de di den o go hemel. Ma u sabi taki den o si Yehofa te den o go anda. Beibel nai taki finifini fa sani o de gi den sama di o go a hemel. Ma den sani di apostel Pawlesi sikiifi e yeepi u fu sabi pikinso fu a toli ya. Den salufu Kelesten o de makandaa anga Kelestesi te ‘a o puu ala den tiimakiti, den tiiman anga den sama di abi makiti a pasi’. Den o de makandaa  anga en tu te a o puu dede, ‘a lasiti feyanti’ a pasi. Baka dati Yesesi anga den sama di o tii makandaa anga en, o saka denseefi a Yehofa ondoo da o de ala sani gi ala sama (1 Kor. 15:24-28). Wi e angii fu si den sani ya. *

3. Enke fa 1 Korentesama 15:30-32 e soi, da fa a biibi di Pawlesi be e biibi taki Gadu o weki en baka be e yeepi en?

³ A biibi di Pawlesi be e biibi taki Gadu be o weki en baka, be e yeepi en fu holidoo te tesi be e miti en. (Leisi 1 Korentesama 15:30-32.) A be taigi den Korentesama taki: ‘Ala dei mi sa dede.’ A taigi den tu taki: ‘Mi feti anga ogii meti a Efeise’. Kande na a feti di a be feti anga tuutuu ogii meti a Efeise a be e taki (2 Kor. 1:8; 4:10; 11:23). Ma kande a den Dyu di be e buuse en a be e kai ‘ogii meti’ (Toli 19:26-34; 1 Kor. 16:9). Ná pikin sani be e miti Pawlesi. Ma winsi fa den sani ya be e miti en, a be e piisii bika a be sabi taki sani be o go bun aini a ten di e kon.​—2 Kor. 4:16-18.

4. Fa a biibi di wi e biibi taki Yehofa o weki den sama di dede e taanga Kelesten aini a ten ya? (Luku a fowtow a fesise fu A Wakititolen.)

⁴ A ten di wi e libi nownow á makiliki tu. A omen ogii e miti son baala anga sisa. Son fu den e tan a peesi pe feti e feti. A iniiwan dei den sa dede. Taawan e tan aini kondee pe lanti tapu a wooko fu Yehofa Kotoigi. Mi anga i sa waka a den baala anga sisa ya baka, bika winsi fa den sani ya e miti den, tokuso den e dini Yehofa. Den sabi taki winsi den dede nownow, Yehofa o gi den wan moo bun libi aini a ten di e kon.

5. San sa swaki a howpu di wi abi taki Gadu o weki den sama di dede baka?

⁵ Pawlesi be taigi den Kelesten aini a ten fi en taki den be mu luku bun anga den sama di nai biibi taki den sama di dede o weki baka. Den sama ya be e taki: ‘Meke u nyan diingi, bika tamaa wi o dede.’ A ná a ten fu Pawlesi wawan sama be e denki so. Kande di Pawlesi taki a sani ya, na a sani di sikiifi a Yesaya 22:13 a be e taki. Den sama fu a ten fu Yesaya á be e meke moiti fu toon Gadu mati, a soso piisii be de a den ede. Den Islayelisama be e pakisei taki: ‘Meke u libi a libi, bika wi á sabi on dei wi o dede.’ A so den sama fu a ten ya e denki tu. Sani miti den Islayelisama di be e denki so. Neen meke u mu luku bun fu a á miti wi enke den.​—2 Kolon. 36:15-20.

6. San yu o du efi yu e biibi tuutuu taki Gadu o weki den sama di dede?

⁶ Efu wi e biibi tuutuu taki Gadu o weki den sama di dede, da wi o luku bun anga sama wi e paa. Den Kelesten fu Korente be mu luku bun fu den nai paa anga sama di nai biibi a sani ya. Saide? Efu wi abi mati di e du san den ati fii fu di den nai biibi den sani di Gadu paamisi u, sani ná o waka u bun. Efu wi e paa anga den sowtu sama ya, wi o bigin denki enke den. Den sowtu mati ya sa meke i bigin du sani di Yehofa e buuse. Neen meke Pawlesi be taki: ‘U mu kisi useefi, da u du san bun. Wi á mu e sondu.’​—1 Kor. 15:33, 34.

7. Enke fa 1 Korentesama 15:35-38 e soi, da sowtu sani sama o akisi u kande fu den sama di o weki baka?

⁷ Leisi 1 Korentesama 15:35-38. Kande wan sama di nai biibi taki sama o weki  baka sa akisi i taki: ‘Sowtu sikin den sama di dede o abi te den o weki baka?’ A be o bun fu poti pakisei a san Pawlesi be taki fosi i piki a sama, bika a omen sowtu sani sama e biibi. Ma san Beibel seefi e taki?

8. Sowtu ageisitoli sa yeepi u fu fusutan taki Gadu poi gi den sama di o go a hemel wan sikin di fiti den?

⁸ Te wan sama dede, en sikin e poli te enke a toon doti baka. Ma a Sama di meke ala sani poi weki en baka, da a gi en wan taa sikin (Gen. 1:1; 2:7). Pawlesi be gi wan ageisitoli di e soi taki Gadu ná abi fu gi a sama aseefi sikin di a be abi. A be taki te i paandi wan sii, da ai poli fosi a bigin goo. Te a sii goo, a ná a sii di i be paandi yu e si moo, ma ai toon wan bon. Pawlesi be wani soi wi anga a ageisitoli ya taki a Sama di meke u sa gi u iniiwan sowtu sikin di a wani te a o weki u baka.

9. Enke fa 1 Korentesama 15:39-41 e soi, da omen sowtu sikin de?

⁹ Leisi 1 Korentesama 15:39-41. Pawlesi be taki Gadu á meke ala sani di de a libi na aseefi fasi. Sani enke kaw, foo, anga fisi ná abi aseefi sowtu sikin. A san anga a mun, a ná aseefi tu. Pawlesi taki ‘ala den sitali moin a den fasi’. Kande te yu e luku go a tapu ala den e gei gi i. Ma den sani di koniman meke fu si den moo bun e soi taki yu abi gaan lebi sitali, pikin weti sitali, anga taya sitali enke a san. Pawlesi taki: ‘Den sani di de a hemel meke a den fasi. Den sani di de a goontapu meke a den fasi.’ San Pawlesi be wani taki anga a sani ya? Libisama anga yeye á meke na aseefi fasi. U sikin meke anga dugudugu anga buulu, ma yeye sikin meke taa fasi. Dati na a sowtu sikin di den engel abi.

10. Sowtu sikin den sama di o weki baka fu go a hemel o abi?

¹⁰ Baka dati Pawlesi taki: ‘A so sani o de tu te Gadu o weki den sama di dede baka. A sikin di dede e poli, ma a sikin di  o opo baka ná o poli noiti moo.’ U sabi taki te wan sama dede, en sikin e poli te enke a toon doti baka (Gen. 3:19). Da fa wan sama o weki baka anga ‘wan sikin di ná o poli moo’? A ná den sama di be weki baka a goontapu ya Pawlesi be e taki. Bika u sabi taki Eliya, Elisa anga Yesesi be weki dedesama, ma den sama ya be dede baka. Den sama di Pawlesi be e taki aini a tekisi ya, a den sama di o weki baka fu go a hemel.​—1 Kor. 15:42-44.

11-12. Anga sowtu sikin Gadu be weki Yesesi baka? San Pawlesi taki fu den salufu Kelesten?

¹¹ Di Yesesi be de a goontapu, a be abi wan libisama sikin. Ma Gadu weki en enke ‘wan yeye di e gi libi’, neen a go a hemel baka. A letiso a de anga den salufu Kelesten tu. Gadu o gi den wan sikin di poi tan a hemel. Pawlesi be taki: ‘Leti enke fa wi e gei a sama di meke anga doti, a so wi o gei a sama di de a hemel tu.’​—1 Kor. 15:45-49.

¹² A bun fu holi a pakisei taki Yesesi á be weki baka anga wan libisama sikin. Pawlesi be taki: ‘Dugudugu anga buulu á poi go aini a Kownukondee fu Gadu’ a hemel (1 Kor. 15:50). Den apostel anga den taa salufu Kelesten á be o poi go a hemel anga wan libisama sikin di e poli. On ten den salufu Kelesten be o kon a libi baka? Pawlesi be taki a yuu di den be o go a hemel á be doo ete. A ná di den be o dede da den be o go a hemel wantenwanten. A pisiten di Pawlesi sikiifi 1 Korentesama, wantu fu den bakaman fu Yesesi be dede kaba. Apostel Yakowbesi a be wan fu den sama ya (Toli 12:1, 2). Den taa apostel anga taa salufu Kelesten be o dede bakaten tu.​—1 Kor. 15:6.

13. Fa u be o du sabi taki Yesesi kon baka?

¹³ Yesesi anga Pawlesi be taki fu wan pelensipali sani di be mu pasa ete. Dati  na a yuu di Kelestesi be o kon baka. Fa u be o sabi taki Kelestesi kon? Beibel taki feti be o feti na ala se, seke-doti anga gaan daaiwinta be o kii sama, takuu siki be o paati a hii goontapu, anga omen taa ogii. Fanafu a yali 1914 neen u bigin si ala den sani ya a hii goontapu. Ma wan taa pelensipali sani be o pasa tu. Yesesi be taki a bun nyunsu fu a Kownukondee fu Gadu be o paati ‘na a hii goontapu fu ala sama yee. Baka dati a kaba o kon’ (Mat. 24:3, 7-14). Pawlesi be taki ‘te Masaa be o kon’, da den salufu Kelesten di be dede kaba be o weki baka fu go a hemel.​—1 Tes. 4:14-16; 1 Kor. 15:23.

14. San e pasa anga den salufu Kelesten di e dede baka di Yesesi kon?

¹⁴ Den salufu Kelesten di e dede aini a ten ya e go a hemel faisi den dede. Saide u sa biibi a sani ya? Aini 1 Korentesama 15:51, 52 Pawlesi taki: ‘Wi aliki, mi o taigi u wan santa kibii toli: A ná ala wi o dede, ma na ala wi o kengi. Di den o boo a lasiti tutu da wantenwanten, fosi i pingi yu ain, den sama di dede o kon a libi baka. Den o weki baka anga wan sikin di ná o poli noiti moo.’ A sani di Pawlesi taki aini a tekisi ya e pasa nownow. Di den taa baala fu Kelestesi ya o go a hemel den o piisii, bika ‘den o de anga Masaa fu teego’.​—1 Tes. 4:17.

15. Sowtu wooko den salufu Kelesten o du a hemel?

¹⁵ Beibel e taigi u sowtu wooko den sama di go a hemel o du anda. Yesesi be taigi den taki: ‘Mi o gi a sama di o wini a feti, di o du san mi taki te enke a kaba  doo, makiti fu tii den foluku. A o de enke wan sikapuman di e tii den sikapu fi en anga wan ayee tiki. A o naki den booko pisipisi leti enke te wan sama e booko doti patu. Mi o gi en aseefi makiti di Nda gi mi’ (Openb. 2:26, 27). Den sama di o go a hemel o du san Yesesi taki, den o tii den foluku anga wan ayee tiki.​—Openb. 19:11-15.

16. Fa libisama o wini dede?

¹⁶ Den sama di o go a hemel o wini a feyanti fu u di den e kai dede (1 Kor. 15:54-57). Den o yeepi Yesesi puu ala sowtu ogii a goontapu. Miliyunmiliyun taa Kelesten o ‘pasa a gaan banowtu’ go aini a nyun goontapu (Openb. 7:14). Den sama ya o si fa dede o lasi en makiti te omen miliyun sama o weki baka. Ná pikin piisii wi o piisii di a sani ya o pasa (Toli 24:15). Ala den sama di á gwe fika Yehofa o fii fu a sondu sikin di Adan be fika gi den di be e meke den dede. Den sama ya o libi fu teego.

17. Enke fa 1 Korentesama 15:58 e soi, da san u mu du nownow?

¹⁷ Den Kelesten a Korente be musu fende taanga-sikin di den leisi san Pawlesi be taki fu a weki di dedesama o weki baka. Ala sama di e dini Yehofa aini a ten ya mu teke ten leisi a biifi ya. A be taigi den taki den mu e ‘wooko taanga gi Masaa’. (Leisi 1 Korentesama 15:58.) Efu wi e wooko taanga gi Masaa, ná pikin belesi wi o fende aini a ten di e kon. Yehofa o gi u sani di wi á be denki taki u be sa fende wan dei. Di a yuu de o doo wi o si kiin taki a ná fu soso u be e wooko taanga gi Masaa.