Nono a ná dati a tekisi ya wani taki. A tekisi ya e taki fu wan sama di e holidoo winsi sowtu polobelema e miti en.

Saide u sa taki a sani ya? Den taa vers fu a pisi ya e taki: ‘Yu á mu e libi enke den ogii sama di e koti lulu fu teke a osu fu wan leti-ati sama. Yu á mu poli den sani fi en. Bika winsi wan sama di e libi a wan letifasi kai seibin toon, a o opo taampu baka, ma den ogii sama o kai te ogii miti den. Yu á mu poolo te i feyanti kai. Te a naki en futu, yu á mu poolo.’​—Odo 24:15-17.

Son sama e denki taki a te wan sama e sondu omen leisi da a meke en bun anga Gadu baka Odo 24:16 e taki. Tu kelikifesiman fu Ingiisikondee be sikiifi taki a omen kelikifesiman a fositen anga a ten ya e biibi a sani ya. Den e biibi taki winsi wan sama du wan gaan sondu omen leisi, en anga Gadu ná o poli solanga a sama e soi taki a sani di a du e hati en. Wan sama di nai meke moiti fu feti anga den sondu fii fi en be sa koboloiki a tekisi ya fu soi taki winsi ai sondu omen leisi Gadu o gi en paadon.

Ma a ná dati a tekisi ya wani taki.

A omen sani a Hebrew wowtu ‘kai’ di sikiifi aini vers 16 anga 17 wani taki. Son leisi a wani taki wan sani kai a doti. Kande wan meti kai a mindii pasi, wan sama kai komoto a wan daki tapu, efuso wan pikin siton kai a doti (Deit. 22:4, 8; Amos 9:9). Ma son leisi den e koboloiki a wowtu ya a wan ageisi fasi tu. Psalm 37 e taki: ‘Te wan sama e libi enke fa Yehofa wani, neen e soi en fa a mu waka. Winsi a sama ya kai, tokuso a ná o didon fika a doti. Bika Yehofa e holi en neen ana fu opo en taampu baka.’​—Ps. 37:23, 24; Odo 11:5; 13:17; 17:20.

Edward H. Plumptre, wan man di e ondoosuku sani fu fositen taki: ‘Sama á be e koboloiki a Hebrew wowtu “kai” te den be e taki fu wan sama di sondu.’ Wan taa ondoosukuman taki fa ai fusutan a tekisi ya. A taki: ‘A tekisi ya e soi taki a sosokaali sama e suku fu du ogii anga a foluku fu Gadu, bika den e holidoo winsi san e miti den. Ma sama di e du ogii nai holidoo.’

Den sani ya e soi kiin taki a tekisi fu Odo 24:16 nai taki fu sama di e sondu omen leisi, ma ai taki fu sama di e holidoo winsi san e miti den. Aini a ten ya a omen sani e miti den sama di e dini Gadu. Son leisi a siki e fooseli den. Kande lanti e du ogii anga den fu di den e dini Yehofa. Ma winsi san e miti den, den sa biibi taki noiti Yehofa o gwe fika den, ala yuu a o holibaka gi den sama di e dini en. Pakisei ala den leisi di Yehofa meke sani waka bun anga den sama di e dini en te tesi be e miti den. Beibel taki: ‘Yehofa e yeepi ala den sama di de fu kai. Ai opo ala den sama di didon a doti fu di den booko-saka.’​—Ps. 41:1-3; 145:14-19.

‘Wan leti-ati sama’ nai poolo te sani e miti taawan. Ma ai fende taanga-sikin fu di a sabi taki ‘sani o waka bun gi den sama di e lesipeki a tuu Gadu’.​—Peleik. 8:11-13; Yopu 31:3-6; Ps. 27:5, 6.