Nono, nawan peesi aini Beibel efuso taa fositen buku wi e leisi a sani de.

Na a fasi fa den sikiifi a tekisi ya aini son Beibel e meke son sama denki taki den Kelesten fu a ten fu den apostel be e dopu gi dedesama, di á be dopu fosi den dede. A Saanantongo Nyun Testamenti sikiifi a tekisi ya so: ‘Efu a tru tak’ dedesma no o opo baka, fu sanede den e teki dopu gi den?’

Meke u luku san wantu Beibel ondoosukuman taki. Wan man den e kai Gregory Lockwood taki ‘nawan peesi aini Beibel efuso taa fositen buku e soi taki den Kelesten fu fosi be e dopu gi dedesama’. Na aseefi sani ya wan taa ondoosukuman den e kai Gordon D. Fee taki tu. A sikiifi taki: ‘Nawan peesi aini Beibel e taki fu a toli ya. Fositen buku á de di e taki fi en tu. Nawan peesi aini a Nyun Testamenti e soi taki wan Kelesten be dopu gi dedesama. Nawan buku e soi taki den keliki di be opo baka di den apostel dede be e du a sani ya tu.’

Yesesi be taigi den bakaman fi en taki den mu ‘meke sama toon en bakaman, da den dopu den. Den mu leli den ala den sani di a taigi den’ (Mat. 28:19, 20). A sani ya e soi taki fosi wan sama dopu, a mu sabi Yehofa anga en Manpikin, a mu e biibi den, a mu e du san den taki. Wan sama di dede á poi du den sani ya. Wan Kelesten di de a libi á poi du den sani ya gi wan dedesama tu.​—Peleik. 9:5, 10; Yoh. 4:1; 1 Kor. 1:14-16.

Da san Pawlesi be wani taki?

Son sama a Korente á be e biibi taki dedesama o weki baka (1 Kor. 15:12). Pawlesi soi den taki den á be e denki bun. A soi den taki a omen leisi a misi fu dede. Ma a be e biibi taki te a be o dede, Gadu be o weki en baka enke wan makiti yeye, leti enke fa a be weki Yesesi baka.​—1 Kor. 15:30-32, 42-44.

Den salufu Kelesten a Korente be mu fusutan taki a omen tesi be o miti den fu di den e waka a Yesesi baka. Ma efu den be holidoo te enke den dede, Gadu o weki den baka. Beibel taki den sama di ‘dopu’ enke Kelestesi Yesesi, ‘dopu fu dede leti enke en’ tu (Rom. 6:3). A sani ya wani taki tesi be o miti den te enke den dede, ma efu den be holidoo Gadu be o weki den baka leti enke Yesesi.

Wantu yali baka di Yesesi dopu a taigi den apostel fi en taki: ‘Wi o dopu aseefi dopu di mi o dopu’ (Malik. 10:38, 39). Yesesi á be e taki fu a dopu di a dopu aini wataa. Ma a be wani soi den apostel fi en taki sama o kii en bakaten fu di ai du san Gadu wani. Pawlesi be taki den salufu Kelesten be o ‘pina leti enke Kelestesi fu den sa fende a gudu di Gadu be paamisi den’ (Rom. 8:16, 17; 2 Kor. 4:17). Dati wani taki denseefi be o abi fu dede fosi den be sa weki baka fu go a hemel.

A disi Pawlesi taki: ‘Sowtu wini den sama di dopu, ma di dede bakaten o fende? Efu a tuu taki dedesama ná o weki baka, da saide sama e dopu a sowtu dopu ya?’