1. Saide Yesesi taki a de enke wan sikapuman gi den bakaman fi en?

YESESI be taki a de enke wan sikapuman gi den bakaman fi en (Yoh. 10:14). Yesesi maiki enseefi anga wan sikapuman, bika sikapu e sabi a siten fu a sikapuman fu den. Wan man di e koi a omen kondee be si taki a sani ya a tuu. A taki: ‘Wan leisi u be wani meke wan felon gi wantu sikapu. U kai den ala sowtu fasi fu den kon moo koosube, ma a gei enke den á be e yee u seefi. Bakaten, a pikin boi di be e luku den sikapu kon. A á kaba kai den seefi fosi den bigin waka neen baka, bika den be sabi a siten fi en.’

2-3. (a) Fa den bakaman fu Yesesi e soi taki den e aliki en? (b) San wi o luku aini a artikel ya, anga a taawan?

² A toli fu a man ya meke u pakisei a sani di Yesesi be taigi den disipel fi en. A be taigi den taki: ‘Den sikapu fu mi o aliki san mi e taki’ (Yoh. 10:16). Ma aini hemel Yesesi de nownow, da fa wi o man aliki en? A moo pelensipali fasi fa wi e soi taki wi e aliki Yesesi, a te wi e du san a taki.​—Mat. 7:24, 25.

³ Aini a artikel ya anga a taawan di e kon, wi o luku wantu sani di Yesesi be taki. A be taki u mu tapu anga son sani di u be gwenti du. Ma a be taigi u tu san a wantu sani di u mu bigin du. Wi o poti pakisei fosi a tu sani di Yesesi taki wi á mu du.

4. Enke fa Lukasi 12:29 e soi, da san sa meke wi e booko wi ede son yuu?

⁴ Leisi Lukasi 12:29. Yesesi be taigi den bakaman fi en taki den á be mu e booko den ede moo anga den sani di  den be abi fanowdu fu tan a libi. A be sabi taki den be e booko den ede anga san den o nyan, san den o wei, efuso pe den o tan. U sabi taki noiti Yesesi o taigi u fu du wan sani di o tyai takuu bakapisi gi u. Toku a ná ala yuu a makiliki fu du a sani di a taki ya. Saide?

5. Saide son sama e booko den ede anga den sani di den abi fanowdu?

 ⁵ Son sama e booko den ede anga nyanyan, koosi efuso peesi fu tan. Kande den e tan aini wan pooti kondee. Nyanyan sani lobi dii a den sowtu kondee ya, bunbun wooko e taanga fu fende tu. Kande a sama di be e solugu a osufamii kon dede. Efu a gaan ogii ya miti wan osufamii, a sa taanga gi den fu fende den sani di den abi fanowdu. A COVID-19 siki di paati a hii goontapu, meke omen sama lasi den wooko (Peleik. 9:11). Efu wan fu den sani ya e miti i, da san o yeepi i fi i nai booko yu ede moo?

6. San be pasa anga apostel Peitilisi wan leisi?

⁶ Wan leisi di apostel Peitilisi, anga den taa apostel be de aini wan boto na a se fu Galileya, wan gaan winta be e wai. Di den luku, neen den si Yesesi e waka na a wataa tapu kon na a boto. Peitilisi bali taigi en taki: ‘Masaa, efu a yu de ape, da taigi mi fu mi waka na a wataa tapu kon miti i.’ Di Yesesi piki en, ‘a saka komoto aini a boto neen a bigin waka na a wataa tapu e go a Yesesi’. Ma luku san pasa bakaten. A tekisi taki: ‘Di a si fa a winta e wai taanga, a bigin feele. Baka dati a bigin saka go a ondoo neen a bali taki: “Masaa yeepi mi baa!”’ Yesesi langa ana kisi en. Di Peitilisi be e  poti ala en pakisei a Yesesi, a be poi waka na a wataa tapu winsi fa a winta be e wai taanga. Ma di a bigin poti pakisei na a fasi fa a winta e wai, a kon feele. Na a sani ya meke a bigin saka go a ondoo.​—Mat. 14:24-31.

7. San a toli fu Peitilisi e leli u?

⁷ A toli fu Peitilisi e leli u wan pelensipali sani. Di a saka komoto aini a boto, a á be denki taki sani be sa puu en pakisei a Yesesi. A be wani waka na a wataa tapu te enke a doo Yesesi, ma a ná so sani waka. A meke a gaan winta, puu en pakisei a Yesesi. A tuu taki mi anga i ná o go waka a wataa tapu, ma a omen tesi e miti u. Efu wi á tan poti pakisei a Yehofa anga den sani di a paamisi u, da saafisaafi wi o gwe fika en. Nawan fu wi á wani a sani ya pasa anga u. Neen meke winsi sowtu tesi e miti u, u mu tan holi a pakisei taki Yehofa poi yeepi u. Fa u sa du a sani ya?

8. San o yeepi u fu wi á booko wi ede tumisi anga den sani di wi abi fanowdu?

⁸ A omen wini wi o fende te wi e fitoow Yehofa. U Dda di de a hemel paamisi u taki a o solugu u te wi e poti a Kownukondee fi en a fesi (Mat. 6:32, 33). Ala yuu Yehofa e du san a paamisi (Deit. 8:4, 15, 16; Ps. 37:25). Efu Yehofa poi solugu den foo anga den boomiki, da u ná abi fu booko wi ede anga san wi o nyan efuso san wi o wei. U sa biibi taki a o yeepi u fu fende san wi abi fanowdu fu pasa den dei (Mat. 6:26-30; Filip. 4:6, 7). Leti enke fa wan mma anga dda di lobi den pikin fu den e du ala san den poi fu solugu den, a so Yehofa o solugu u tu, bika a lobi u. Eeye, i sa biibi taki Yehofa o gi i san yu abi fanowdu.

9. San a toli fu wan toowpaa e leli u?

⁹ Meke u luku wan ondoofenitoli di e soi fa Yehofa e solugu den sama fi en. Wan leisi, wan toowpaa di e du a fuuten diniwooko be lei wan yuu langa anga a pikin booko wagi fu den go teke wantu sisa di be e tan a wan loweman kampu tyai kon a komakandaa. A baala taki: ‘Baka a komakandaa, u kai den sisa fu kon nyan a wi osu. A di u kai den fosi u kisi useefi taki u ná abi nawan sani a osu fu gi den.’ Fa den be o du? A baala taki: ‘Di u doo osu, u si tu gaan saka anga nyanyan sani a u baka doo. Wi á be sabi sama be poti den de. A Yehofa namo be solugu u so.’ Bakaten, a wagi fu a toowpaa ya booko. Den be abi en fanowdu fu go a peleikiwooko, ma den á be abi moni fu seeka en. Di den tyai a wagi go a den sama di e meke wagi, wan man kon, neen a akisi den taki: ‘Sama abi a wagi ya?’ A baala piki en taki neen wagi, ma a booko. A man taigi en taki: ‘Mi ná abi toobi efu sani mu seeka neen. A pilisisi a wagi ya a uman fu mi wani, aseefi kololu ya. Omen mi mu gi i fi en?’ A moni di a man pai den fu a booko wagi fu den be sai fu bai wan taa wagi. A baala taki: ‘Mi á poi taigi u fa u be e fii a dei de. U be si kiin taki a Yehofa be e solugu u.’

10. Fa Psalm 37:5 e yeepi u fu wi á booko wi ede moo anga den sani di wi abi fanowdu?

¹⁰ U ná abi fu e booko wi ede anga sani enke nyanyan anga taa sani di wi abi fanowdu, bika na ala yuu Yehofa e solugu u. (Leisi Psalm 37:5; 1 Peit. 5:7). Meke u taki pikinso baka fu den sani di u be kai aini  paragraaf 5. Kande na a dda be e solugu a osufamii, efuso kande a  iseefi be e wooko fu solugu iseefi. Ma efu a dda kon lasi libi, efuso kande i lasi i wooko, da i ná abi fu feele, Yehofa o fende wan taa fasi namo fu solugu i. Aini den paragraaf di e kon wi o luku wan taa sani di Yesesi be taki wi á mu du.

11. Enke fa Mateyesi 7:1, 2 e soi, da san Yesesi taki wi á mu du moo? Saide a sani ya á makiliki?

¹¹ Leisi Mateyesi 7:1, 2. Yesesi be sabi taki fu di den bakaman fi en abi sondu, meke a makiliki den be sa e poti pakisei a den fowtu fu taawan. A sani ya be o meke den e kuutu denseefi. Neen meke a taigi den taki: ‘Wi á mu kuutu sama moo.’ Kande yu e meke moiti fi i nai kuutu den baala anga sisa fi i, ma ala wi a sondu libisama, neen meke a sani ya á makiliki. A bunbun moiti u mu meke fu u nai kuutu taawan moo enke fa Yesesi taigi u.

12-13. Te wi e poti pakisei na a fasi fa Yehofa be libi anga Kownu David, da fa a sani ya o yeepi u fu wi á kuutu taawan moo?

¹² U sa waka a Yehofa baka te u luku a fasi fa ai libi anga u. Yehofa nai poti pakisei a den fowtu di wi e meke, ma a den bun sani di wi e du ai poti pakisei. Wi e si a sani ya kiin te u luku fa a be libi anga David. A omen gaan sondu David be du. A be siibi anga Batseiba, a uman fu wan taa man. Efu dati á sai neen a meke sama kii a man ya fi en uman ede (2 Sam. 11:2-4, 14, 15, 24). A sani di David du ya be musu hati den taa uman fi en. Boiti dati, a sani ya be tyai takuu bakapisi gi taa sama aini a osufamii (2 Sam. 12:10, 11). Wan taa leisi baka, David soi taki a á be e fitoow Yehofa. A be meke sama teli omen suudati Islayeli abi, winsi fa Yehofa á be sende en fu du a sani ya. Kande David be bigin fii enseefi fu di a be abi tyaipi suudati. Kande a be bigin si enke na a sani de be e meke a wini den feti fi en. San a be a bakapisi fu a sani di a du ya? Yehofa meke wan takuu siki kisi a foluku. A wan sani fu 70.000 Islayelisama dede fu a siki ya.​—2 Sam. 24:1-4, 10-15.

¹³ Efi i be e tan a Islayeli na a pisiten di a sani ya pasa, fa i be o si David? I be o si en enke wan sama di á bun moo fu dini Yehofa? Yehofa á be si enke David á bun moo. A be e poti pakisei a den somen bun di David be du. A be luku tu taki den sani di David du be hati en tuutuu. A meke moiti fu kengi en manii tu. Neen meke Yehofa gi en paadon. A be sabi taki David be lobi en anga en hii ati, a be wani du san bun. A nai bigi gi i taki a den bun sani di yu e du Yehofa e poti pakisei noh?​—1 Kow. 9:4; 1 Kolon. 29:10, 17.

14. San o yeepi wan Kelesten fu a á kuutu taawan moo?

¹⁴ Yehofa ná abi nawan fowtu, toku ai gi sondu libisama paadon. Neen meke wi di abi sondu mu e moo gi taawan paadon te den e meke fowtu. A makiliki fu si den fowtu di taawan e meke, ma efu wi e meke moiti fu si sani enke fa Yehofa e si sani, u ná o go e poti pakisei a den fowtu fu den. Te wan dyamanti á seeka ete a nai beenki, ma toku den sama di sabi sani fu dyamanti e sabi kaba fa a dyamanti o de te a o seeka. Ná pikin moin a o moin. A so u mu e meke moiti fu si den bun manii fu den baala anga sisa fu u tu winsi fa den e meke fowtu. Te wi e du a  sani ya, da wi e soi taki wi e waka a Yehofa anga Yesesi baka.

15. Fa a sabi di wi o sabi san e miti den baala anga sisa fu u, o yeepi u fu wi á kuutu den?

¹⁵ U mu e meke moiti fu si den bun manii fu u baala anga sisa, ma dati wawan á sai. Sowtu taa sani o yeepi u fu u nai kuutu den? Meke u luku wan toli. Wan leisi di Yesesi be de na a tempel, a si wan pooti uman poti tu kopoo sensi aini a moni-kedee. Yesesi á kuutu a uman ya taki a moni di a poti ná ipi. Di a luku a libi fu a uman moo fini, a si taki na ala san a be abi a gi de, anga en hii ati a be gi Yehofa san a be abi tu. Neen meke Yesesi gafa a uman ya.​—Luk. 21:1-4.

16. San a toli fu Veronica e leli u?

¹⁶ Meke u luku a toli fu wan sisa den e kai Veronica. Wan sisa di ná abi man be de aini a kemeente pe Veronica be e go. Veronica taki: ‘A sisa ya anga a boi fi en á be e de a komakandaa anga peleikiwooko ala yuu. Neen meke mi be e kuutu den aini mi ati. Ma wan leisi mi wooko anga a mma aini a peleikiwooko. A taigi mi taki a boi fi en be e siki. Neen wawan be mu sabi fa a o solugu en. A be e du ala san a poi fu yeepi a boi fi en fu toon Yehofa mati tu. Son leisi te a siki fu a boi be moo en, den á be e poi kon a komakandaa a dei de, da den be e go a wan taa kemeente a wiki de.’ Veronica taki: ‘Noiti  mi be sabi taki a so sani be e miti a sisa ya. Nownow mi e lesipeki a moiti di ai meke fu dini Yehofa.’

17. San Yakowbesi 2:8 taki u mu du? Fa u sa du a sani ya?

¹⁷ San u mu du efu u si taki wi e kuutu wan baala efuso wan sisa? U mu holi a pakisei taki na ala den baala anga sisa fu u, u mu lobi. (Leisi Yakowbesi 2:8.) Begi Yehofa da yu akisi en fu a yeepi i fi yu á kuutu taawan moo. Baka te i begi Yehofa, i mu suku fu sabi a sama di i be e kuutu moo bun. A sani ya o yeepi i fu fusutan saide ai du son sani. I sa wooko makandaa anga en aini a peleikiwooko, efuso i sa kai en kon a yu osu. Te yu e meke moiti fu kon sabi i baala efuso sisa moo bun, yu e soi taki yu e waka a Yehofa anga Yesesi baka. Yu e soi tu taki yu á wani kuutu taawan moo, enke fa a sikapuman fu u taigi u.

18. Fa wi e soi taki wi e aliki a sikapuman fu u?

¹⁸ Leti enke fa wan sikapu e aliki a siten fi en sikapuman, a so den bakaman fu Yesesi e du san a taki. Te wi e meke moiti fu u nai booko wi ede tumisi anga den sani di wi abi fanowdu, anga te u nai kuutu taawan, da Yehofa anga Yesesi o belesi u. Winsi yu abi a howpu fu go a hemel, efuso fu tan a goontapu ya, toku i mu du ala san i poi fu aliki a sikapuman fu u (Luk. 12:32; Yoh. 10:11, 14, 16). Aini a taa artikel, wi o luku tu sani di Yesesi be taigi den bakaman fi en fu du.