Yehofa be taigi den Islayelisama taki den mu santa. A taigi den taki: ‘Wi á mu e waka e paati lei fu poli taawan nen. Wi á mu suku fu kii taawan. A mi a Yehofa.’​—Lef. 19:2, 16.

San den wowtu ‘wi á mu suku fu kii taawan’ wani taki? Wan Dyu buku di e taki fu Lefitikesi taki: ‘A taanga fu fusutan san a sani ya wani taki, bika efi i be o taki en pilisisi enke fa a sikiifi aini Hebrewtongo, da a be o de “ná taampu na a libi fu wan taawan efuso ná taampu koosube fu a libi fu wan taawan”. Wi á kaba sabi san den be wani taki anga a sani de.’

Son ondoosukuman e si enke na aseefi sani di den be taki aini vers 15 e go doo ete. Vers 15 e taki: ‘Wi á mu e koti kuutu a wan fasi di á fiti. Winsi a wan pootiman efuso wan guduman, wi á mu paati bee. U mu e koti kuutu a wan letifasi’ (Lef. 19:15). Efu a so a de, da den wowtu ‘wi á mu suku fu kii taawan’ di sikiifi aini vers 16 a be fu soi den Islayelisama taki den á mu libi ogii anga taawan te den e koti kuutu, te den e du bisnis, efuso te den e seeka wan toli anga den famii. Den á be mu bidiigi taawan fu di den wani fende wini gi denseefi. A tuu taki wi á mu du den sani ya, ma toku wan taa fasi de fa u sa fusutan a tekisi ya.

Poti pakisei a den fosi wowtu fu a vers ya. Gadu taigi den sama fi en taki den á be mu e waka e paati lei fu taawan fu poli den nen. A tuu taki te sama e taki sama sani, a omen polobelema ai tyai (Odo 10:19; Peleik. 10:12-14; 1 Tim. 5:11-15; Yak. 3:6). Ma te sama e paati lei fu wan sama fuseefi fu di a wani poli a sama nen, da a moo ogii seefi. Son leisi sama e lei gi taawan fuseefi winsi fa a sabi taki a sani de sa tyai dede gi a sama. Na a sani ya den be du anga Naabot. Fu di sama lei gi a man ya, meke den fiingi siton naki en te enke a dede sondee fu a du wan ogii (1 Kow. 21:8-13). A toli ya e soi kiin taki wan sama di e paati lei fu taawan fuseefi, e du wan sani di sa tyai dede gi a taawan, enke fa Lefitikesi 19:16 e taki.

Son leisi son sama e paati lei fu taawan fu di ai buuse en. Aini 1 Yohanisi 3:15, wi e leisi taki: ‘Ibiiwan sama di e buuse en baala, a wan kiiman. U sabi taki nawan kiiman e libi fu teego.’ Baka di Gadu taigi den aini Lefitikesi 19:16 taki den á mu e suku fu kii taawan, a taigi den aini vers 17 taki: ‘Yu á mu e buuse i baala aini yu ati.’​—Lef. 19:17.

Winsi wi á kaba sabi pilisisi san Lefitikesi 19:16 wani taki, toku ai leli Kelesten wantu pelensipali sani. Wi á mu e denki ogii fu u baala te da u bigin paati lei fi en. Efu u be o dyalusu anga u baala, efuso e paati lei fu wan baala efuso sisa fu di wi á kaba lobi en, da a leti enke ‘wi e suku fu kii en’. Bika a sani de be o soi taki wi e buuse a baala efuso a sisa. Noiti u mu buuse wan taa sama.​—Mat. 12:36, 37.