1-2. (a) San Yehofa be taigi dii fu den apostel fu Yesesi? San den du di a taigi den a sani ya? (b) San wi o luku aini a artikel ya?

BAKA a Paskafesa fu a yali 32, apostel Peitilisi, Yakowbesi, anga Yohanisi si wan fisyun. Wan leisi di den anga Yesesi be de a wan mongo, den si fa Yesesi kengi leti a den fesi. Beibel e taki: ‘En fesi be e beenki enke a san. En koosi seefi be e beenki enke faya’ (Mat. 17:1-4). Baka dati den yee a siten fu Gadu. A taigi den taki: ‘Disi a mi Manpikin, mi lobi en, ai meke mi piisii. U mu aliki en’ (Mat. 17:5). Apostel Peitilisi, Yakowbesi, anga Yohanisi soi taki den be fusutan a sani di Yehofa be taigi den, bika a den hii libi langa den aliki Yesesi. Ala sama di e dini Yehofa aini a ten ya mu meke moiti fu waka a den apostel ya baka.

² Aini a artikel di pasa, u be luku taki efu u wani aliki Yesesi, u mu tapu anga son sani di u be gwenti du. Aini a artikel ya, wi o luku tu sani di Yesesi taki u mu du.

3. Enke fa Mateyesi 7:13, 14 e soi, da san u mu du?

³ Leisi Mateyesi 7:13, 14. Yaaso Yesesi e taki fu tu doo di e tyai sama go a tu pasi, wan ‘baala pasi’ anga wan ‘sumaa pasi’. Nawan peesi aini Beibel e soi taki ete wan pasi de, dati wani taki i musu fu teke wan fu den pasi ya. Na  ala sama mu luku gi denseefi on di fu den pasi ya den o waka. A disi na a moo pelensipali bosoloiti di yu o teke, bika a wan kodo pasi e tyai sama go a teego libi.

4. Fa sani e waka na a baala pasi?

⁴ U mu holi a pakisei taki den tu pasi a ná aseefi. A omen sama e waka na ‘a baala pasi’. Saide? Bika a pasi ya á taanga fu waka. Gaanse fu den sama di e waka na a pasi ya e luku fa taawan e du sani, da den waka a den baka. Den sama di e waka na a pasi ya, nai fusutan taki a Saatan na a fesiman fu a pasi ya. Den á sabi tu taki a dede ai tyai ala den go.​—1 Kor. 6:9, 10; 1 Yoh. 5:19.

5. Sowtu moiti son sama meke fu fende a sumaa pasi?

⁵ A sumaa pasi á de enke a baala pasi. Yesesi be taki ‘a sumaa pasi’ á makiliki fu fende, neen meke a wantu sama namo e waka na a pasi ya. San e meke a pasi ya taanga fu fende? Aini vers 15 Yesesi be taigi den bakaman fi en taki den mu luku bun anga falisi polofeiti (Mat. 7:15). Nownow a omen dunsu keliki de a hii goontapu. Ala den keliki ya e taki a den abi a tuu biibi. A sani ya e meke sama buuya te, da den nai sabi sowtu keliki den mu go. Neen meke omen sama nai wani suku a sumaa pasi moo seefi. Ma efu yu e meke moiti, yu o fende a pasi ya. Yesesi be taki: ‘Efu wi e du san mi taki, da wi a mi bakaman tuutuu. Wi o sabi a tuu, da a tuu o meke u fii’ (Yoh. 8:31, 32). Wi e gafa i, bika yu á waka a den somen sama di de na a baala pasi baka, ma i tan meke moiti fu fende a tuu. Di i fende en, neen i sutudeli a Wowtu fu Gadu. Baka dati, i du san ai akisi i. A so i soi taki yu e aliki Yesesi. Wan fu den sani di i be leli, a taki Yehofa á wani u mokisa a tuu leli anga falisi leli. I be leli tu taki yu á mu e fii fesa di nai kai anga den sani di Beibel e taki. Ma aini den ten di pasa i si taki a ná ala yuu a makiliki fu du san Yehofa taki (Mat. 10:34-36). Kande a be taanga gi i fu kengi son sani di i be gwenti du, toku i meke moiti kengi den sani ya. Saide? A di i lobi u Dda di de a hemel. I wani a piisii anga i. Ná pikin poolo Yehofa e poolo te ai luku a moiti di yu e meke fu dini en!​—Odo 27:11.

6. Enke fa Psalm 119:9, 10, 45, anga 133 e soi, da san o yeepi u fu wi á komoto na a sumaa pasi?

⁶ San o yeepi i fu tan na a sumaa pasi? Meke u luku wan ageisitoli. Meke u taki yu e lei anga wagi a wan mongo sikin. Lanti poti sikotu na a mongo sikin, bika efu a wagi fi i go koosube tumisi, a sa kai go a ondoo. A sani ya be sa tyai ogii gi i. A fu a bun fi yu ede lanti poti a sikotu ya. Neen meke i ná o kuutu taki lanti e tapu i fu lei a pe i wani. Den weiti fu Yehofa aini Beibel de enke a sikotu ya. A den e yeepi u fu wi a komoto na a sumaa pasi.​—Leisi Psalm 119:9, 10, 45, 133.

7. Fa yonkuuwan mu si a sumaa pasi?

⁷ Yonkuuwan, yu e fii enke den weiti fu Yehofa ibi tumisi? Yu e fii enke den e tapu i fu piisii? A so Saatan wani i denki. Saatan wani i fii enke den sama di e waka na a baala pasi e moo piisii. Te yu e si den sani di den taa piki a sikoo e du, kande yu e fii enke yu e lasi. A omen  sani yu e si a internet tu di e meke a gei enke den sama di nai dini Yehofa e moo libi a libi. * Yehofa e soi u kiin sowtu wini wi o fende efu u tan na a sumaa pasi. Ma yu á mu feegete taki Saatan nai taigi den sama di e waka na a pasi fi en taki a dede de na a kaba fu a pasi ya.​—Ps. 37:29; Yes. 35:5, 6; 65:21-23.

8. San yonkuuwan sa leli fu a toli fu Olaf?

⁸ Luku a toli fu wan yonkuu baala den e kai Olaf. * Wantu taa pikin a sikoo be wani a siibi anga uman namonamo. Di a soi den taki en a wan Yehofa Kotoigi di e meke moiti fu libi enke fa Beibel e taki, omen fu den meisyo aini a kalasi be si enke den be o poi koli en fu siibi anga den. Ma Olaf á meke den sani ya buuya en. A ná dati na a wan kodo tesi di miti a baala ya. A taki: ‘Den muneli  anga den yefolow be e dwengi mi namonamo fu go a hei sikoo. Den be taigi mi taki efu mi á go a hei sikoo, mi ná o poi abi wan bun libi, efuso fende wan bunbun wooko.’ San yeepi Olaf fu tan du sani enke fa Yehofa wani? A taki: ‘Mi be abi bun mati aini a kemeente. Den be de enke mi famii. Mi be e sutudeli Beibel ala yuu tu. O moo mi be e sutudeli, o moo mi be e si taki a disi na a tuu. Na a sani ya yeepi mi fu mi á du sani di Yehofa á lobi.’

9. San wan sama mu du efu a wani tan na a sumaa pasi?

⁹ Saatan wani i komoto na a sumaa pasi di o yeepi i fu fende teego libi. A wani i abaa go na a baala pasi di o ‘tyai i go dede’ (Mat. 7:13). Efi i wani tan na a sumaa pasi, i mu e aliki Yesesi ala yuu. Yu á mu e si a sumaa pasi enke wan sani di e tapu i fu du san i wani, ma i mu si en enke wan sani di e kibii i. Aini den paragraaf di e kon, wi o poti pakisei na a taa sani di Yesesi taki u mu du.

10. Enke fa Mateyesi 5:23, 24 e soi, da san Yesesi taki u mu du?

¹⁰ Leisi Mateyesi 5:23, 24. Yesesi be e taki fu wan sani di be pelensipali gi den Dyu. Ala den be sabi a moiti di wan sama mu meke fu doo na a pilisite anga a ofaandi fi en. Meke u taki wan sama pinapina doo na a tempel anga wan meti di a be wani tyai enke ofaandi. Faisi ai langa a meti gi a pilisite, a so ai membee taki en baala abi wan sani anga en. San a mu du? A tekisi taki a mu fika a ofaandi na a tempel da a gwe. Saide? San be pelensipali moo a ofaandi di a be o tyai gi Yehofa? Yesesi taigi den kiin taki: ‘Go meke en bun anga i baala fosi.’

11. San Yakopu du fu meke en bun anga Esau?

¹¹ U sa leli omen sani fu Yakopu, te u luku a moiti di a be meke fu meke en bun anga en baala. Baka di Yakopu tan wan sani fu 20 yali aini wan taa kondee, Gadu sende wan engel kon taigi en taki a mu foloisi go neen kondee baka (Gen. 31:11, 13, 38). Ma a sani ya á be makiliki, bika fosi a be foloisi, en gaan baala Esau be sweli taki a o kii en (Gen. 27:41). Yakopu be e feele taki en baala be ‘o suku fu kii en’ di a be o daai go a osu baka (Gen. 32:7). San Yakopu du fu meke en bun anga en baala? A fosi sani di a du, a begi Yehofa. Baka dati, a sende kado gi Esau (Gen. 32:9-15). Di en anga en baala miti, Yakopu gi en baala gaandi. A á boigi wan efuso tu leisi, ma a boigi seibin leisi gi en baala. Fu di Yakopu be abi sakafasi, meke a be poi meke en bun anga en baala.​—Gen. 33:3, 4.

12. San a toli fu Yakopu e leli u?

¹² A omen sani Yakopu du fosi a go miti en baala Esau. A begi Yehofa fu a yeepi en. Baka dati a luku san enseefi be sa du fu meke en bun anga en baala. Di den miti, Yakopu á kwali anga Esau fu luku sama be abi leti. A moo pelensipali sani gi en, a be fu meke en bun anga en baala. Fa u sa waka a Yakopu baka?

13-14. San i mu du efi i du wan sani di hati i baala efuso sisa?

¹³ Ala sama di e waka na a sumaa pasi, wani libi bun anga den baala anga sisa fu  den (Rom. 12:18). San i mu du efi i si taki i du wan sani di hati i baala efuso sisa? Leti enke Yakopu, i mu begi Yehofa fu a yeepi i. Akisi en fu a belesi a moiti di yu o meke fu seeka sani anga i baala efuso sisa baka.

¹⁴ Fosi i go meke en bun anga wan sama, a bun fu akisi iseefi taki: ‘Mi de kabakaba fu akisi en paadon? Mi de kabakaba fu poti den fii fu mi a wan se? Fa Yehofa anga Yesesi o fii di mi o meke moiti fu seeka sani anga mi baala efuso sisa?’ Den sowtu akisi ya o yeepi u fu meke moiti fu seeka sani anga u baala efuso sisa enke fa Yesesi taki. A so wi e soi taki wi e waka a Yakopu baka.

15. Fa a sani di sikiifi a Efeisesama 4:2, 3 sa yeepi u fu meke en bun anga u baala efuso sisa?

¹⁵ Fa i denki sani be o waka efu Yakopu be abi heimembee? We, sani á be o go bun seefiseefi. Te u wani meke en bun anga u baala efuso sisa aini a ten ya, u mu abi sakafasi leti enke Yakopu. (Leisi Efeisesama 4:2, 3.) Odo 18:19 e taki: ‘A moo makiliki fu feti wini wan foto, moo enke fu meke i baala ati koo baka te yu anga en pasa wan sani. Son toobi de enke a udu di den e sooto den gaan doo fu wan foto.’ Ma te yu abi sakafasi, a sani ya o yeepi i fu akisi i baala efuso sisa paadon. A so yu anga en o poi meke en bun baka.

16. San u mu du fosi u go taki anga u baala efuso sisa? Saide u mu du a sani ya?

¹⁶ I mu sabi a fesi san yu o taki fosi i go fu meke en bun anga i baala. Di yu o go taki anga en, yu á mu go suku leti. Kande biginbigin a o taki sani di hati i. A sani ya sa meke yu ati boon. Ma efu yu e suku fu soi en taki a nai wawan fowtu, yu anga en ná o poi meke en bun. Holi a pakisei taki a meke di yu anga i baala mu meke en bun, pelensipali moo sama abi leti.​—1 Kor. 6:7.

17. San a toli fu Gilbert e leli u?

¹⁷ A bunbun moiti wan baala den e kai Gilbert be abi fu meke, fu libi na a wan anga taawan. A taki: ‘Wan pisiten, mi anga wan koosube famii fu mi á be e fende en. A moo enke tu yali langa mi meke moiti fu taki anga en a wan switifasi fu u be sa meke en bun baka.’ San Gilbert du moo? Gilbert taki: ‘Fosi mi go taki anga  en, mi be e begi Yehofa. Mi be e luku tu san mi be o piki en di a be o taki sani fu hati mi. Mi be mu de kabakaba fu gi en paadon winsi san a be o taki. Mi leli taki pe fu mi e suku sama abi leti, a moiti mi mu meke fu u be sa libi na a wan baka.’ Sowtu wini Gilbert fende? A taki: ‘Tide na a dei, mi anga ala den famii fu mi e libi bun anga useefi. Fu di mi du sani enke fa Yehofa wani, meke mi kosensi nai fon mi tu.’

18-19. San u mu du efu u du wan sani di hati u baala efuso sisa? Saide a pelensipali fu du a sani ya?

¹⁸ San i mu du te i kon sabi taki i du wan sani di hati i baala efuso sisa? Meke moiti fu seeka sani anga en baka enke fa Yesesi be taki. Begi Yehofa fu a yeepi i. A santa yeye fi en o yeepi i fu libi bun anga i baala anga sisa. Efu yu e du sani na a fasi ya, yu o piisii. A so yu e soi tu taki yu e aliki Yesesi.​—Mat. 5:9.

¹⁹ Ai bigi gi u taki Yehofa e koboloiki Yesesi Kelestesi, ‘a ede fu a kemeente’, fu soi u fa u mu du sani (Efe. 5:23). Leti enke apostel Peitilisi, Yakowbesi anga Yohanisi, u mu du ala san u poi fu ‘aliki Yesesi’ (Mat. 17:5). Aini a artikel ya, u leli taki wan fasi fa u sa aliki Yesesi, a te wi e meke en bun anga u baala anga sisa. Te wi e du a sani ya, wi o poi tan na a sumaa pasi di e tyai u go a teego libi. Yehofa o belesi wi aini a ten ya, ma a o moo belesi u, aini a ten di e kon.