1. Saide Abalaham be e biibi taki a be o meke wan pikin?

 YEHOFA be paamisi en mati Abalaham taki a den bakapikin fi en be o meke ala den foluku fu goontapu fende belesi (Gen. 15:5; 22:18). Abalaham be e fitoow Yehofa anga en hii ati, neen meke a be e biibi taki Yehofa be o du san a paamisi en. A ten di Yehofa be paamisi den a sani ya Abalaham be abi 100 yali, Sala be abi 90 yali. Ma den á be abi nawan pikin ete (Gen. 21:1-7). Beibel taki: ‘Abalaham be e biibi, a be abi a howpu taki a be o toon a dda fu omen foluku leti enke fa Gadu be taigi en’ (Rom. 4:18). U sabi taki a sani di Gadu be paamisi Abalaham be kon tuu. A be toon a dda fu Isaki, a pikin di a be e angii fi en. Saide Abalaham be e biibi taki Yehofa be o du san a paamisi?

2. Saide Abalaham be e biibi taki Yehofa be o du san a paamisi en?

² Abalaham anga Yehofa a be tuutuu mati. Neen meke ‘a be e biibi anga en hii ati taki Gadu be poi du a sani di a be paamisi en’ (Rom. 4:21). Fu di Abalaham biibi be taanga, meke Gadu be e si en enke wan sama di e libi a wan letifasi (Yak. 2:23). Enke fa Romesama 4:18 e soi, da Abalaham be abi biibi anga howpu. Meke u luku san Pawlesi be taki fu howpu aini kapitel 5 fu Romesama.

3. San Pawlesi taki fu howpu?

 ³ Pawlesi be taki saide u sa biibi taki ‘a howpu fu u nai meke u lasi-ati’ (Rom. 5:5). A yeepi u fu fusutan tu taki a howpu di wi abi sa kon moo taanga. Te wo ondoosuku Romesama 5:1-5, da pakisei fai biibi o kon moo taanga te ye pakisei a howpu fu u. Wo taki fosi fu a moin howpu di Pawlesi be taki. A howpu di nai meke u lasi-ati.

4. Sowtu toli Pawlesi taki a Romesama 5:1, 2?

⁴ Leisi Romesama 5:1, 2. Pawlesi be sikiifi den wowtu ya gi a kemeente fu Rome. Den baala anga sisa fu Rome biibi be taanga. Den sani di den be leli fu Yehofa anga Yesesi be yeepi den fu toon wan Kelesten. ‘Gadu be e si den enke sama di e libi a wan letifasi fu di den e biibi.’ Neen meke a salufu den anga a santa yeye. A sani ya meke den biibi be kon moo taanga.

5. Sowtu howpu den salufu Kelesten abi?

⁵ Baka wan pisiten, Pawlesi be sikiifi wan biifi gi den salufu Kelesten fu a howpu di den abi. A Gadu ‘seeka a sani ya gi den santawan’ (Efe. 1:18). Pawlesi be soi den Kelesten fu Kolose tu sowtu wini a howpu fu den be o tyai gi den. A be taki: ‘A di we biibi meke wo fende den sani di den seeka a hemel giw’ (Kol. 1:4, 5). Den salufu Kelesten abi a howpu fu libi fu teego a hemel. Den o tii makandaa anga Yesesi.​—1 Tes. 4:13-17; Openb. 20:6.

6. San wan salufu baala taki fu a howpu fi en?

⁶ Den salufu Kelesten e piisii anga a howpu di den abi. Wan fu den baala ya a be Frederick Franz. A baala ya be taki fa a be e si a howpu fi en. A taki: ‘We biibi taki a howpu di wi abi o kon  tuu. Mi e biibi tu taki ala den 144.000 sama o fende ala den sani di Yehofa paamisi den. Moo so gaandi á de.’ Baka omen yali di baala Franz dini Yehofa anga en hii ati, neen a taki aini 1991 taki: ‘Moo we wakiti, moo wi abi a okasi fu soi taki ai bigi giw taki u fende a gaandi ya. Winsi u mu wakiti omen miliyun yali, toku wo tan wakiti. Nownow mi e si a howpu di wi abi enke wan gaan sani moo enke fa mi be e si en fosi.’

7-8. Sowtu howpu gaanse sama di e dini Yehofa abi? (Romesama 8:20, 21)

⁷ A ná ala sama di e dini Yehofa abi aseefi howpu. Sama enke Abalaham abi a howpu fu libi fu teego a goontapu ya te Gadu Kownukondee o tii (Heb. 11:8-10, 13). Pawlesi be sikiifi fu a moin howpu ya. (Leisi Romesama 8:20, 21.) Dii kon sabi den sani di Yehofa paamisi u, da sai wani si aini a ten di e kon? Fa ye fii taki wan dei i naw abi sondu moo? Fa ye fii dii kon sabi taki den sama fii di dede o kon a libi baka? Na a howpu di Yehofa giw e yeepi u fu poti pakisei a den sani di a paamisi u.

⁸ Winsi wi abi a gaandi fu libi a goontapu efuso a hemel, toku a moin howpu di wi abi e meke u piisii. A sani ya e meke u moo angii fu si den sani di Yehofa paamisi u. Den sani di Pawlesi sikiifi e soi taki a sani ya a tuu. Meke u luku fa den sani di a sikiifi e kai anga a howpu fu u. Baka di wo luku den sani di Pawlesi be sikiifi, wo kon si taki den sani di Yehofa paamisi wo kon tuu.

9-10. Enke fa Pawlesi taki, da saw sabi o miti u? (Romesama 5:3) (Luku a fowtow tu.)

⁹ Leisi Romesama 5:3. Pawlesi be taki te tesi e miti u, da a howpu fu we  kon moo taanga. Aa makiliki fu biibi a sani ya. Ma fu taki en kiin ala sama di e dini Yehofa poi holidoo te tesi e miti den. Pakisei den sani di Pawlesi be taigi den Kelesten fu Tesalonika. A be taigi den taki:‘Di u be de makandaa anga u, u be taigi u a fesi taki u be o nyan pina. Na a sani ya pasa tu’ (1 Tes. 3:4). A sikiifi gi den Kelesten fu Korente tu taki: ‘Baala, u wani u sabi sowtu tesi miti u . . . A be ibi giw te, u denki taki u be o dede.’​—2 Kor. 1:8; 11:23-27.

¹⁰ A omen sowtu tesi e miti wi enke Kelesten tu (2 Tim. 3:12). Fa a de anga yu? Tesi miti i fu di ye meke moiti fu waka a Yesesi baka? Kande i mati efuso i famii e soso i fu di ye dini Yehofa. Kande den e libi ogii anga i. Kande i basi efuso den sama a wookope e soso i fu di ye taki a tuu (Heb. 13:18). Efuso, kande lanti á wani i peleiki gi taa sama. Pawlesi taki winsi sowtu tesi e miti u, toku u poi piisii. Saide a taki a sani ya?

11. Saide u mu de kabakaba fu holidoo winsi sowtu tesi e miti u?

¹¹ U poi piisii winsi tesi e miti u, bika u sabi taki a sani ya o yeepi u fu abi wan pelensipali manii. Romesama 5:3 e taki, ‘banowtu o meke u holidoo’. Tesi e miti ala Kelesten, neen meke u mu de kabakaba fu holidoo winsi sowtu tesi e miti u. Wo man fende ala den sani di Yehofa paamisi u te we meke moiti fu holidoo. Wa wani de enke den sii di Yesesi be taki kai a siton tapu. Den sama ya teke a Wowtu fu Gadu wantenwanten anga piisii. ‘Ma di banowtu efuso tesi miti den’, den gi abaa (Mat. 13:5, 6, 20, 21). Aa makiliki fu pasa den tesi di e miti u, ma a omen wini we fende te we meke moiti fu holidoo. San a den wini di we fende?

12. Sowtu wini we fende te we holidoo?

¹² Yakowbesi be taki fu den wini di we fende te we meke moiti fu holidoo. A be taki: ‘Ma u mu holidoo, wa mu gi abaa, da wo bun na ala fasi, u naw abi nawan fowtu. U naw mankei nawan sani tu’ (Yak. 1:2-4). Yakowbesi be taki holidoo de enke wan sama di abi wan wooko di a mu du. A abi wan maiki di a wani doo. Holidoo e yeepi u fu abi moo pasensi, fu abi moo biibi, anga fu moo fitoow Gadu. Boiti dati, a omen taa wini we fende te we holidoo.

13-14. Sai pasa te we holidoo? Sai pasa anga a howpu fu u? (Romesama 5:4)

¹³ Leisi Romesama 5:4. Pawlesi taki te we holidoo, ‘da Gadu o fende u bun’. Ma a sani ya á wani taki Yehofa e piisii te tesi e miti u. Ma ai piisii fu di we holidoo. A sabi di u sabi taki Yehofa e piisii te we holidoo, e giw taanga-sikin.​—Ps. 5:12.

¹⁴ Holi a pakisei taki a omen tesi be e miti Abalaham. Ma fu di a be e holidoo, meke Yehofa be e piisii anga en. Yehofa be e si Abalaham enke en mati. A be e si en enke wan sama di be e libi a wan letifasi (Gen. 15:6; Rom. 4:13, 22). A so Yehofa e si u tu. A ná den wooko di we du efuso den gaandi di wi abi e meke Yehofa piisii anga u. Ma na a holi di we holidoo winsi sowtu tesi e miti u. Winsi i gaandi efuso yonkuu, winsi sowtu sani e miti i, winsi ya poi  du sai be sa wani du gi Yehofa, ala u poi holidoo. Ye holidoo winsi fa wan tesi e miti i nownow? Efi ye holidoo, holi a pakisei taki ye meke Yehofa piisii. A sabi di u sabi taki Yehofa e piisii anga u te we holidoo e meke u fii bun. A howpu fu u e moo taanga tu.

15. San Pawlesi taki a Romesama 5:4, 5? San son sama e akisi denseefi?

¹⁵ Pawlesi taki te we holidoo te tesi e miti u we meke Yehofa piisii. A taki: ‘Te Gadu fende u bun, da wo abi howpu. A howpu de nai meke u lasi-ati’ (Rom. 5:4, 5). Son sama e foondoo te den yee a sani ya. Saide? Bika Pawlesi be taki a Romesama 5:2 taki den Kelesten fu Rome be abi howpu. Den be fende a okasi fu den anga Gadu toon mati. Neen meke wan sama sa akisi enseefi taki: ‘Efu den Kelesten ya be abi howpu kaba, da saide Pawlesi taki fu howpu baka?’

16. Sai meke a howpu fu wan sama kon moo taanga? (Luku a fowtow tu.)

¹⁶ Wo fusutan a sani di Pawlesi taki te we si howpu enke wan sani di sa kon moo taanga. Pakisei a sani ya: Ye membee a fosi leisi ete di wan sama be soi i sani fu a paladeisi? Kande i poolo dii yee taki wo libi fu teego aini wan paladeisi a goontapu. Ma ya be sabi efu a sani ya o pasa tuutuu. Moo i be e kon sabi Yehofa anga den sani di a paamisi u, moo i be e biibi taki den sani di a taki o kon tuu.

17. Fa a howpu fu we kon moo taanga baka te u dopu?

¹⁷ Baka tei dopu, ye kon sabi Yehofa moo bun. Ye kon moo lobi en tu. Tei kon moo lobi Yehofa, ye moo biibi den sani di a paamisi u (Heb. 5:13–6:1).  Kande i si aini i libi taki a sani di sikiifi a Romesama 5:2-4 a tuu. A omen tesi be e miti i, ma i holidoo. I sabi taki Yehofa lobi i. I sabi taki ye meke a piisii tu. Neen meke ye moo biibi taki aw du den sani di a paamisi. A howpu fii e kon moo taanga tu. Ye biibi taki den sani di Gadu paamisi wo kon tuu. Neen meke ye du sani taa fasi, ye libi taa fasi anga den famii fii tu. Ye meke moiti fu du sani anga koni. Boiti dati, ye luku fa ye koboloiki a ten fii.

18. Saw sa biibi?

¹⁸ Baka di apostel Pawlesi taki Gadu fende u bun, a taki wan pelensipali sani di abi fu du anga a howpu di wi abi. A taki den sani di we howpu o kon tuu. Saide u sa biibi a sani ya? Pawlesi taigi ala Kelesten taki: ‘A howpu de nai meke u lasi-ati, bika Gadu poti a lobi fi en aini wi ati di a gi wi a santa yeye’ (Rom. 5:5). Wi abi ala den sani di e yeepi u fu biibi den sani di Gadu paamisi.

19. Saw sabi fu a howpu fu u?

¹⁹ Pakisei a sani di Yehofa be paamisi Abalaham. Yehofa be e piisii anga en. En anga en a be mati tu. Den sani di Gadu be paamisi Abalaham be kon tuu. Beibel taki: ‘Baka di Abalaham holi pasensi a fende a sani di Gadu be paamisi en’ (Heb. 6:15; 11:9, 18; Rom. 4:20-22). Aa be lasi-ati. Iseefi sa fende den sani di Gadu paamisi u tu te ye holidoo. Na ala yuu i mu e piisii, bika i sabi taki den sani di Gadu paamisi wo kon tuu. Den naw meke i lasi-ati (Rom. 12:12). Pawlesi be taki: ‘Meke a Gadu di e gi sama howpu meke u piisii na ala sowtu fasi, meke a giw freide tu fu di we fitoow en.’​—Rom. 15:13.