1. Te we luku a biibi di Abalaham be abi, da san we akisi useefi son yuu?

 A OMEN sama yee fu a toli fu Abalaham, ma toku gaanse fu den á sabi tyaipi sani fi en. Ma i sabi omen sani fu a toli fi en. I sabi taki Beibel e kai Abalaham ‘a dda fu ala sama di e biibi’ (Rom. 4:11). Kande ye akisi iseefi taki: ‘Mi poi abi aseefi biibi di Abalaham be abi?’ Eeye, i poi.

2. Saide a pelensipali fu ondoosuku a toli fu Abalaham? (Yakowbesi 2:22, 23)

² Wan sani di o yeepi u fu abi biibi leti enke Abalaham, a te we sutudeli a toli fi en. Na ala yuu Abalaham be e du san Gadu be taigi en. A be komoto neen osu go tan a wan faawe kondee. A omen yali langa a tan aini tenti. Boiti dati, a be de kabakaba fu gi Isaki a wan kodo manpikin fi en enke ofaandi. Fu di Abalaham biibi be taanga, meke a be poi du ala den sani ya. (Leisi Yakowbesi 2:22, 23.) Yehofa wani wi anga en de mati. A wani yu anga en de mati tu. Neen meke a be meke Pawlesi anga Yakowbesi sikiifi sani fu a toli fu Abalaham. Wo luku san Romesama kapitel 4 anga Yakowbesi kapitel 2 e taki fu Abalaham. Pawlesi anga Yakowbesi taki pelensipali sani fu a toli fi en.

3. Fu sowtu tekisi Pawlesi anga Yakowbesi be taki?

³ Pawlesi anga Yakowbesi taki aseefi sani di sikiifi a Genesesi 15:6. A taki: ‘Fu di [Abalaham] be e biibi Yehofa, meke a be e si en enke wan sama di e libi a wan letifasi.’ A  te wan sama e du sani enke fa Yehofa wani da ai si en enke wan sama di e libi a wan letifasi. Ai bigi giw taki winsi fa wi abi sondu, toku Yehofa poi si wi enke wan sama di e libi a wan letifasi. U sabi taki a so i wani Gadu si i tu. Wo luku now saide Yehofa be e si Abalaham enke wan sama di be e libi a wan letifasi anga saw mu du efu u wani Gadu si u so tu.

4. Saide ai taanga gi libisama fu libi a wan letifasi?

⁴ Aini a biifi di Pawlesi be sikiifi gi den Kelesten fu Rome, a be taki ala wi abi sondu (Rom. 3:23). Efu ala wi abi sondu, da saide Gadu e si wi enke sama di e libi a wan letifasi? Fu fende a piki fu a akisi ya, Pawlesi be taki fu a toli fu Abalaham.

5. Saide Yehofa be e si Abalaham enke wan sama di be e libi a wan letifasi? (Romesama 4:2-4)

⁵ A ten di Abalaham be e tan aini a kondee Kaana-an, Yehofa be e si en enke wan sama di be e libi a wan letifasi. Ma a ná fu di Abalaham be e holi a Weiti fu Mosesi meke Gadu be e si en enke wan sama di be e libi a wan letifasi. Faw du sabi a sani ya? (Rom. 4:13) A ten di Yehofa be taki Abalaham be e libi a wan letifasi, a Weiti fu Mosesi á be de ete. A baka wan sani fu 400 yali fosi den be bigin wooko anga a Weiti fu Mosesi. Da saide Gadu be e si Abalaham enke wan sama di be e libi a wan letifasi? Na a bun-ati fu Yehofa meke a be e si Abalaham enke wan sama di be e libi a wan letifasi, bika en biibi be taanga.​—Leisi Romesama 4:2-4.

6. Saide Yehofa sa si sama di abi sondu enke sama di e libi a wan letifasi?

⁶ Pawlesi be taki ‘a biibi e meke Gadu si wan sama enke wan sama di e libi a wan letifasi’ (Rom. 4:5). Bakadati a taki: ‘David seefi be taki a ná den sani di wan sama e du e meke ai de koloku, ma a te Gadu e si en enke wan sama di e libi a wan letifasi. A be taki: ‘Koloku fu den sama di fende paadon fu den sondu, anga den sama di Gadu wasi den sondu fu den puu. Koloku fu a sama di Yehofa nai pakisei den sondu fi en moo’” (Rom. 4:6-8; Ps. 32:1, 2). Gadu e gi den sama di e biibi en paadon fu den sondu fu den. Te a gi den paadon kaba, a nai pakisei den sondu fu den moo. Ai si den sama ya enke sama di naabi sondu, fu di den e soi taki den e biibi en.

7. Saide u sa taki den sama di be e dini Yehofa a fositen be e libi a wan letifasi?

⁷ Winsi fa Beibel e soi taki Abalaham, David anga taa sama di be e dini Yehofa anga den hii ati be e libi enke fa Gadu wani, toku den be abi sondu. Ma fu di den be abi biibi meke Gadu be e si den enke sama di be e libi a wan letifasi, moomoo tei be maiki den anga den sama di á be e dini en (Efe. 2:12). Aini a biifi di Pawlesi be sikiifi gi den Kelesten fu Rome, a be taki efu wan sama wani de Gadu mati da a mu abi biibi. Fu di Abalaham anga David be abi biibi meke Gadu be e si den enke en mati. Efu useefi abi biibi, wo de Gadu mati tu.

8-9. Sowtu fowtu denki son sama abi te den e leisi den sani di Pawlesi anga Yakowbesi sikiifi? Saide den e denki so?

⁸ A omen ondoo yali kaba den kelikifesiman nai go na a wan se te den e taki fu den sani di wan sama mu du fu soi taki a abi biibi. Den e leli sama taki solanga den  e biibi Yesesi Kelestesi sani o go bun anga den. Son yuu den e taki: ‘Efi ye biibi Yesesi, yo fii.’ A omen fu den e taki na a sani ya Pawlesi be e leli sama, bika a be taki: ‘A ná den sani di wan sama e du e meke ai de koloku, ma a te Gadu e si en enke wan sama di e libi a wan letifasi’ (Rom. 4:6). Boiti dati, son sama e taki sani o go bun anga i te ye go a den peesi di den keliki e si enke santa peesi anga te ye du bun sani. Den e koboloiki a tekisi fu Yakowbesi 2:24 fu soi taki den abi leti. Ai taki: ‘A ná biibi wawan e meke Gadu si wan sama enke wan sama di e libi a wan letifasi, ma a mu du sani fu soi a biibi fi en tu.’

⁹ Na a sani ya meke son Beibel sabiman e si enke Pawlesi anga Yakowbesi á be e go na a wan se tu. Son kelikifesiman e taki Pawlesi be e biibi taki solanga wan sama abi biibi, da Gadu e si en enke wan sama di e libi a wan letifasi. Ma Yakowbesi be taki a den sani di wan sama e du, o meke Gadu si en enke wan sama di e libi a wan letifasi. Wan sabiman di e ondoosuku sani fu keliki taki Yakowbesi á be e fusutan saide Pawlesi taki biibi wawan sai kaba fu Gadu si wan sama enke wan sama di e libi a wan letifasi. A taki Yakowbesi á be e holibaka gi a sani di Pawlesi taki ya. Ma toku Yehofa meke Pawlesi anga Yakowbesi sikiifi den sani ya (2 Tim. 3:16). Neen meke wo ondoosuku san Pawlesi anga Yakowbesi be taki. Wo luku den sani di den taki aini den taa vers.

10. Fu san Pawlesi be taki? (Romesama 3:21, 28) (Luku a fowtow tu.)

¹⁰ Fu san Pawlesi e taki a Romesama kapitel 3 anga 4? Pawlesi e taki fu den sani di wan sama e du enke fa a Weiti fu Mosesi  be e soi. (Leisi Romesama 3:21, 28.) A gei enke aini a ten fu Pawlesi son Dyu Kelesten be e si enke den mu holi a Weiti fu Mosesi ete. Neen meke Pawlesi be taki fu a toli fu Abalaham fu soi taki a ná te wan sama e holi a Weiti fu Mosesi da Gadu o si en enke wan sama di e libi a wan letifasi, ma a te wan sama abi biibi. A sani ya e giw taanga-sikin, bika efu we fitoow Gadu anga Kelestesi, Gadu o si wi enke sama di e libi a wan letifasi.

11. Fu sowtu sani Yakowbesi be taki?

¹¹ Ma na a taase den sani di Yakowbesi taki wan sama mu du, a ná den sani di a Weiti fu Mosesi be e taki. Aini Yakowbesi kapitel 2, Yakowbesi e taki fu den sani di wan Kelesten e du ala dei. Den sani ya e soi efu wan Kelesten biibi taanga tuutuu. Meke u luku tu sani di Yakowbesi be taki.

12. Fa Yakowbesi soi taki a pelensipali fu du sani di e soi taki we biibi? (Luku a fowtow tu.)

¹² A fosi sani di Yakowbesi taki: Wan Kelesten mu libi bun anga ala sama. A be tyai a toli ya kon a kiin di a be taki fu wan man di be du bun gi wan guduman, ma a be e wisiwasi wan pootiman. Yakowbesi be taki a man ya e si enke ai biibi, ma den sani di ai du nai soi taki a abi biibi (Yak. 2:1-5, 9). Du fu tu sani di Yakowbesi taki a fu wan sama di si taki wan baala efuso wan sisa naabi koosi efuso nyanyan, ma a nai du nawan sani fu yeepi en. A sama ya taki a abi biibi, ma den sani di ai du nai soi taki a abi biibi. Yakowbesi sikiifi taki ‘a biibi fi en dede’.​—Yak. 2:14-17.

13. San Yakowbesi taki fu biibi anga a du di u mu e du bun gi taawan? (Yakowbesi 2:25, 26)

¹³ Di Yakowbesi be e taki fu den sani di wan sama mu du fu soi biibi, a be taki  fu Rakab. (Leisi Yakowbesi 2:25, 26.) A yee namo Rakab be yee sani fu Yehofa neen a be kon fusutan taki Yehofa e holibaka gi den Islayelisama (Yow. 2:9-11). Den sani di Rakab du e soi taki a be abi biibi. A be kibii tu Islayeliman di be kon luku a kondee fu sama á kii den. Neen meke winsi fa a uman ya be abi sondu toku Gadu be e si en enke wan sama di be e libi a wan letifasi. A so Gadu be e si Abalaham tu. A toli fu Rakab e soi taki a den sani di wan sama e du e soi efu a abi biibi tuutuu.

14. Saide u sa taki den sani di Pawlesi anga Yakowbesi sikiifi e kai anga denseefi?

¹⁴ Enke faw si, da di Pawlesi anga Yakowbesi be e taki fu biibi anga den sani di wan sama mu du fu soi biibi, na aseefi sani den be e taki, ma den á taki en na aseefi fasi. Pawlesi be taigi den Dyu Kelesten taki Yehofa á be o si den enke sama di e libi a wan letifasi te den e holi a Weiti fu Mosesi namo. Ma Yakowbesi be taki a den bun di we du gi taawan e soi taki wi abi biibi.

15. San a wantu sani di u sa du fu soi taki wi abi biibi? (Luku a fowtow tu.)

¹⁵ Yehofa á taki a te we du sani pilisisi enke Abalaham da wi abi biibi. A omen sani de di u sa du fu soi biibi. U sa bali wadaa gi den nyun sama di kon aini a kemeente. U sa yeepi den baala anga sisa fu u di de a nowtu tu. Boiti dati, u sa du bun gi den famii fu u. A den sani ya Yehofa lobi. Efu we meke moiti fu du den sani ya, Yehofa o belesi u (Rom. 15:7; 1 Tim. 5:4, 8; 1 Yoh. 3:18). Wan fu den moo bun fasi faw sa soi taki wi abi biibi, a te we du  a peleikiwooko anga u hii ati (1 Tim. 4:16). Ala u sa soi anga den sani di we du taki we biibi taki den sani di Yehofa paamisi wo kon tuu. We soi anga den sani di we du tu taki a fasi fa Yehofa wani u libi na a moo bun fasi fu libi. Efu we meke moiti fu du den sani ya, da u sa biibi taki Gadu o si wi enke sama di e libi a wan letifasi. Wi anga en o de mati tu.

16. Sowtu howpu Abalaham be abi?

¹⁶ Romesama kapitel 4 e taki fu wan taa pelensipali sani di u sa leli fu Abalaham: U mu abi howpu. Yehofa be paamisi Abalaham taki neen be o meke tyaipi foluku a goontapu fende belesi. Pakisei fa Abalaham be musu e piisii te a be e pakisei den sani di Gadu paamisi en (Gen. 12:3; 15:5; 17:4; Rom. 4:17). Abalaham be abi 100 yali, Sala be abi 90 yali, ma den á be meke pikin ete. A be gei enke den á be o poi abi nawan manpikin. A sani ya be de enke wan tesi gi Abalaham. Toku ‘a be abi a howpu taki a be o toon a dda fu omen foluku’ (Rom. 4:18, 19). Te fu kaba a sani di Abalaham be e howpu kon tuu. A toon a dda fu Isaki. A pikin di a be wani senten.​—Rom. 4:20-22.

17. Faw du sabi taki Gadu sa si wi enke sama di e libi a wan letifasi?

¹⁷ Leti enke Abalaham u sa de Gadu mati. U sa de sama di e libi a wan letifasi tu. Pawlesi be taki: ‘Den wowtu “Gadu be e si en enke wan sama di e libi a wan leti-fasi” nai teli gi Abalaham wawan, ma den e teli giw tu. Gadu o si wi enke sama di e libi a wan letifasi fu di we biibi en, a sama di meke Masaa Yesesi kon a libi baka’ (Rom. 4:23, 24). Leti enke Abalaham u mu e fitoow Yehofa. U mu e du bun sani tu. Boiti dati, u mu e biibi taki Yehofa o du den sani di a paamisi u. Aini Romesama kapitel 5 Pawlesi e taki fu a howpu fu u. Wo luku a toli ya aini a taa artikel.