TE WE luku den tyaipi kado di Yehofa giw, a sani ya e meke we piisii. Ai bigi giw taki Yehofa giw a okasi fu diingi sopi. Beibel e soi u taki win a wan kado di Yehofa giw. Ai taki: ‘Beele e meke sama piisii. Win e meke a libi switi tu’ (Peleik. 10:19; Ps. 104:15). Kande i si taki son sama abi a gwenti fu diingi pasa peesi. Boiti dati, den sama aini a goontapu e si a gwenti fu diingi sopi wan taa fasi. Saw yeepi wan Kelesten fu du sani anga koni?

Winsi pe we tan efuso pe u kiya, u mu du sani enke fa Gadu wani. Wa mu du sani enke fa den sama na a pisi pe we tan e denki. Efu we du sani enke fa Gadu wani wo de koloku.

Kande i si taki den sama aini a goontapu lobi diingi sopi pasa peesi. Son sama lobi diingi, bika den taki ai meke den fii bun. Taawan e diingi sopi fu di den wani feegete den polobelema fu den. A son peesi te sama e diingi sopi pasa peesi, da den e taki ya wan tuutuu mannengee.

Kelesten e fende leli fu a Sama di meke den. Ai taigi u saw miti den sama di e diingi pasa peesi. Odo 23:29-35 e taki finifini fu den sani di e miti wan sama di e diingi pasa peesi. a Daniel, wan owluman fu Europa e pakisei fa en libi be de di aa be e dini Yehofa. A taki: ‘Mi be gwenti diingi tyaipi sopi. Neen meke a omen don bosoloiti mi be e teke. Fu di mi be e du sani so, meke a omen sani miti mi. Mi ati e boon a miseefi te mi e pakisei a ten de.’

Faw sa du sani anga koni te a abi fu du anga sopi? Saw yeepi u fu koti pasi gi den sani di e miti den sama di e diingi pasa peesi? A sani di o yeepi u, a te we si sopi enke fa Gadu e si en.

Meke u luku san Beibel e taki fu sopi anga saide son sama e diingi sopi.

Beibel nai taki a fowtu fu diingi sopi. Ma ai soi taki a diingi di sama e diingi win e meke den piisii. Beibel taki: ‘I mu e piisii te ye nyan. I mu e piisii te ye diingi win’ (Peleik. 9:7). Wan leisi Yesesi be diingi win. A so den taa sama di be e dini Yehofa be e diingi win tu.​—Mat. 26:27-29; Luk. 7:34; 1 Tim. 5:23.

Beibel nai taki a fowtu fu diingi sopi. Ma ai soi kiin taki aa bun te sama e diingi sopi fu te den duungu. Ai taki: ‘Wa mu diingi win te enke u duungu’ (Efe. 5:18). Beibel e soi tu taki ‘sopiman . . . naw fende a Kownukondee fu Gadu’ (1 Kor. 6:10). Yehofa e kuutu sama di e diingi pasa peesi. Ai kuutu sopiman tu. Pe fu u du sani enke den sama na a pisi pe u kiya, a moo bun fu u du sani enke fa Gadu wani.

Son sama e taki winsi den diingi tyaipi sopi toku den nai duungu. Ma a sani ya sa meke ogii miti den. Beibel e soi taki te wan sama e ‘diingi tyaipi win’ a sani ya sa meke ogii miti en. A sani ya sa meke en anga Yehofa poli tu (Tit. 2:3; Odo 20:1). Yesesi seefi be taki aw taanga gi wan sama di e ‘diingi pasa maiki’ fu go aini a nyun goontapu  (Luk. 21:34-36). Saw yeepi Kelesten fu koti pasi gi den sani di e miti den sama di e diingi pasa peesi?

Te we luku efu wo diingi sopi, wa mu du sani enke fa den sama na a pisi pe u kiya, efuso ogii sa miti u. Kelesten e du sani enke fa Yehofa wani te a abi fu du anga nyanyan anga sopi. Beibel e soi u taki: ‘Winsi a nyan ye nyan, winsi a diingi ye diingi, ala san ye du mu gi Gadu gaandi’ (1 Kor. 10:31). Luku wantu akisi anga wantu leli fu Beibel di u sa teke ten pakisei:

Mi e diingi sopi fu di mi wani taawan lobi mi? Ekisodesi 23:2 e taki: ‘Ya mu waka na a gaan kulu sama baka.’ Yehofa be e wasikoi den Islayelisama taki den be mu luku bun anga den foluku di e du sani di aa lobi. A sani ya pelensipali gi wi aini a ten ya tu. Efu we du sani enke den sama aini a goontapu te a abi fu du anga sopi, u naw du sani enke fa Yehofa wani moo. Wi anga en naw de mati moo tu.​—Rom. 12:2.

Mi e diingi sopi fu di mi wani soi taawan taki mi kofaliki? A son peesi den e si en enke wan kowownu sani te sama e diingi tyaipi sopi (1 Peit. 4:3). Ma Beibel e soi wi a 1 Korentesama 16:13 taki: ‘U mu de na ain, meke moiti fu taanga u biibi.’ Te wan sama e diingi tyaipi sopi da a sani ya wani taki a kofaliki? Nono. Sopi e meke sama á poi denki kiin. Ai meke den teke don bosoloiti tu. Neen meke te wan sama e diingi tyaipi sopi da dati á wani taki a kofaliki, ma ai soi taki a don. Yesaya 28:7 taki den sama di e komoto na a pasi fu di den e diingi sopi pasa peesi o naki futu.

A Yehofa e gi sama kaakiti. Neen meke efu wa wani diingi pasa peesi, da ‘u mu de na ain, u meke moiti fu taanga u biibi’ tu (Ps. 18:32). Wan Kelesten sa du a sani ya te ai kenisikenisi anga te ai teke bosoloiti di naw meke en anga Yehofa poli. Yesesi anga Yehofa a tuutuu mati. Sama be e  lesipeki Yesesi, bika a be abi deki-ati. A be de kabakaba fu du san bun tu.

Mi e diingi sopi fu di mi wani feegete den polobelema fu mi? Wan Psalm sikiifiman be taki: ‘Te sani be e moo mi, a yu [Yehofa] be e toosutu mi fu mi sa piisii baka’ (Ps. 94:19). Efi ye booko yu ede anga wan sani, i sa biibi taki Yehofa o yeepi i. A ná sopi o yeepi i. Wan fu den sani di o yeepi i fi ya booko yu ede tumisi a te ye begi Yehofa. Wan taa sani di o yeepi i, a te ye taki anga wan sama di abi ondoofeni aini a kemeente. Sopi nai yeepi sama anga den polobelema fu den. Wan sama di e diingi sopi pasa peesi nai poi denki kiin, ai taanga gi sowan sama fu du san bun (Hos. 4:11). Daniel di u be taki fi en kaba taki: ‘Mi be e booko mi ede. Mi be e tan pakisei den sani di mi du. Mi be e diingi sopi fu feegete den booko-ede fu mi, ma den polobelema fu mi be kon moo ipi. Mi anga omen fu den mati fu mi poli. Mia be e lesipeki miseefi.’ San yeepi Daniel? A taki: ‘Mi be kon si taki sopi nai yeepi mi, mi be abi Yehofa fanowdu. Di mi suku yeepi a Yehofa, mi be poi tapu anga a diingi di mi be e diingi sopi.’ Yehofa de kabakaba fu yeepi u, winsi we si enke u naw poi tapu anga a gwenti ya.​—Filip. 4:6, 7; 1 Peit. 5:7.

Efi ye diingi sopi son yuu, i sa akisi iseefi den sani ya: ‘Wan famii efuso wan mati fu mi taki anga mi fu a fasi fa mi e diingi sopi?’ Efu a so, da kande yu abi wan gwenti efuso wan polobelema dii seefi á poti pakisei. ‘Mi e diingi moo enke san mi be gwenti?’ A sani ya sa pasa anga wan sama di á be gwenti diingi sopi. Te fu kaba a sa kon toon wan sama di e diingi pasa peesi. ‘Mi poi tan wantu dei efuso moo langa sondee fu diingi sopi?’ Efi ya poi tan sondee fi ya diingi sopi, dai mu suku yeepi a dataa fu tapu anga a diingi di ye diingi.

A omen sani e miti den sama di e diingi sopi, neen meke son Kelesten bosoloiti taki  den naw diingi nawan sani di abi sopi aini. Taawan fu den nai diingi, fu di den á lobi fa ai tesi. Efu wan mati fii teke a bosoloiti ya, i sa lesipeki a bosoloiti di a teke. Ya mu kuutu en.

Kande i si taki a abi wini tei sabi a fesi on fuu yo diingi. Kande wan leisi aini a wiki te ye nyan. Son sama e luku sowtu sopi den o diingi, win efuso bii. Den nai diingi sani di abi taanga sopi. Te wan sama e taki a fesi on fuu aw diingi, ai moo makiliki gi en fu du san a taki. Boiti dati, wan Kelesten di biibi taanga nai booko en ede anga san sama o denki fi en, bika a sabi a fesi kaba on fuu aw diingi. A de kabakaba fu wooko anga san a taki.

A bun fu holi a fii fu taawan a pakisei tu. Romesama 14:21 taki: ‘A moo bun fu wa nyan meti, diingi win efuso du wan taa sani di o meke u baala dyakata.’ Faw sa wooko anga a sani di a tekisi ya taki? Lobi i baala anga sisa. Kow taki yu anga wan sama di á kaba lobi sani fu sopi de a wan peesi. Sai sa du? A be o moo bun fi ya diingi. A so ye soi taki i lobi a sama. Efii du a sani ya, da ye soi taawan taki ye lesipeki den. Ye soi den taki i lobi den tu. Boiti dati, ye soi taki i nai denki iseefi namo.​—1 Kor. 10:24.

Boiti taki u mu holi a fii fu taawan a pakisei, den tiiman e poti weiti te a abi fu du anga sopi. Enke Kelesten we wooko anga den weiti fu lanti. Wan fu den weiti ya e soi a yali dii mu doo fu man diingi sopi. Boiti dati, ai soi taki efii diingi sopi, ya mu lei wagi.​—Rom. 13:1-5.

A omen kado Yehofa giw. Wan fu den kado ya na a luku di useefi sa luku san wo nyan anga san wo diingi. Den sani di we du mu soi taki we teke a kado di u Dda a hemel giw fu bigi.