1. Saw yeepi wan baala fu go a fesi?

 KOWNU David be taigi Salomo taki: ‘Ná feele, soi taki yu a wan mannengee, abi deki-ati’ (1 Kow. 2:1-3). Ala baala aini a ten ya mu wooko anga a sani di David taki ya. Efii wani sani waka bun anga i, i mu e wooko anga den leli fu Beibel. I mu e wooko anga den weiti fu Yehofa tu (Luk. 2:52). Saide a de taanga fanowdu fu yonkuu baala meke moiti fu toon Kelesten di e du sani enke Yesesi?

2-3. Saide a de taanga fanowdu fu yonkuu baala go a fesi?

² A omen faantiwowtu wan baala e abi aini a kemeente anga en osufamii. Kande enke yonkuu baala ye pakisei sowtu faantiwowtu i sa tyai bakaten. Kande i wani du a fuuten diniwooko. Kande i wani toon wan dinali efuso wan owluman bakaten. Kande ye pakisei fu toow efuso meke pikin (Efe. 6:4; 1 Tim. 3:1). Efii wani du den sani ya, i mu meke moiti fu e du sani enke Yesesi. b Na a sani ya o yeepi i fu tyai den faantiwowtu ya bun.

³ Saw yeepi i fu de wan sama di e du sani enke Yesesi? Wo luku wantu sani di o yeepi i fu toon wan baala di e waka a Yesesi baka. Fai sa seeka gi den faantiwowtu dii sa fende bakaten? Saw yeepi i fu tyai den faantiwowtu ya bun?

4. Sama baka i sa waka? (Luku a fowtow tu.)

⁴ Luku sama baka i sa waka. A Beibel abi toli fu omen man di yonkuu baala sa waka a den baka. Den man ya be  lobi Yehofa. A omen gaan wooko den be e du gi a foluku fu Yehofa. I sa waka a den baala fii kemeente baka tu di e meke moiti fu du sani enke Yesesi. Kande son wan fu den baala ya ai famii (Heb. 13:7). Ma a moo bun sama dii sa waka neen baka, a Yesesi (1 Peit. 2:21). Luku fa den sama ya e tyai denseefi. Poti pakisei a den bun manii fu den (Heb. 12:1, 2). Bakadati dai luku fai sa waka a den baka.

5. Saw yeepi i fu e denki bun fosi i du wan sani? Saide a de taanga fanowdu fu du a sani ya? (Psalm 119:9)

⁵ Meke moiti fu abi ‘koni anga fusutan’ (Odo 3:21). Wan man di koni e denki bun fosi a du wan sani. Neen meke i mu meke moiti fu e denki bun fosi i du wan sani. Saide? Bika gaanse fu den yonkuman fu a goontapu ya a san den fii den e du. Den nai denki fosi den du wan sani (Odo 7:7; 29:11). Den felon anga den poku fu a ten ya sa meke u denki enke den sama di nai libi enke fa Gadu wani. Ma saw yeepi i fu toon wan man di koni? Ondoosuku Beibel fu si fa Yehofa e denki fu son sani, dai meke moiti fu si sowtu wini yo fende tei wooko anga san a taki. Bakadati wooko anga sai leli, da a so yo meke Yehofa piisii. (Leisi Psalm 119:9.) Efi ye meke moiti fu e denki bun fosi i du wan sani, a sani ya o yeepi i fu toon wan sama di e du sani enke Yesesi (Odo 2:11, 12; Heb. 5:14). Meke u luku tu sani di e soi taki a abi wini te we meke moiti fu denki bun fosi u du wan sani. Wo luku den tu sani ya: (1) Fai mu tyai iseefi tei de makandaa anga sisa anga (2) tei mu luku fa ye modo.

6. Fa a denki di yonkuu baala o denki fosi den du sani, o yeepi den fu soi lesipeki gi den sisa?

⁶ Te ye denki fosi i du wan sani, a sani ya o yeepi i fu soi lesipeki gi umansama. A ná wan fowtu sani efu wan baala wani leli sabi wan sisa moo bun. Ma wan baala di e denki bun fosi a du wan sani, naw taki efuso du sani di o meke wan sisa denki taki a lobi en. Efu a naabi a pakisei fu toow anga en, a naw sikiifi sani di o meke a sisa denki taki a abi fii gi en (1 Tim. 5:1, 2). Efu ai leli sabi wan sisa di a wani  toow anga en, a naw du sani fu poli a sisa nen. En anga en wawan naw go a peesi, ma ala yuu aw meke wan taa sama di ai fitoow go anga den.​—1 Kor. 6:18.

7. Fa a denki di yonkuu baala o denki fosi den du sani o yeepi den fu modo a wan fasi di fiti?

⁷ Wan taa fasi fa wan yonkuman sa soi taki a koni, a te ai poti pakisei na a fasi fa ai modo. Gaanse fu den sama di e meke den koosi di e de a wenkii nai wooko anga den leli fu Yehofa. Den nai libi wan kiin libi tu. Den koosi di den e meke e soi fa den e denki. Den e meke koosi di e meke mannengee gei umanpikin. Wan yonkuman di e meke moiti fu denki enke fa Yesesi e denki e luku bun fosi a wei wan koosi. Ai meke moiti fu wooko anga san Beibel taki. Te taawan aini a kemeente luku fa ai wei koosi, den sa waka neen baka. I sa akisi iseefi taki: ‘Den koosi di mi e wei e soi taki mi e holi taawan a pakisei? Den e soi taki mi e denki bun fosi mi du wan sani? A fasi fa mi e wei koosi e meke taawan si taki mi e dini Yehofa anga mi hii ati?’ (1 Kor. 10:31-33; Tit. 2:6) Efi ye denki bun fosi i du wan sani, a ná den baala anga sisa wawan o lesipeki i, ma Yehofa o piisii anga i tu.

8. Fa wan yonkuu baala sa du sani fu sama sa fitoow en?

⁸ Sama mu man fitoow i. Efii wani sama fitoow i, dai mu du ala den wooko fii bun. I mu du den anga i hii ati tu (Luk. 16:10). I sa waka a Yesesi baka. Te den be gi Yesesi wan wooko fu du, a be e du ala san a poi fu du a wooko fi en bun. Aa be e fika en wooko go du taa sani. A du ala den wooko di Yehofa be gi en, winsi fa son wan fu den wooko ya á be makiliki gi en. A be lobi sama, moomoo den bakaman fi en. A be lobi den te neen a dede gi den (Yoh. 13:1). Wan fasi fai sa waka a Yesesi baka, a te ye wooko taanga fu du den wooko di den baala gii. Efi ya sabi du wan wooko, soi sakafasi dai akisi wan sama di sabi du a wooko fu a yeepi i. I mu e soi taki ye booko yu ede anga a wooko di den baala gii (Rom. 12:11). Du ala sai poi fu du a wooko fii te enke i kaba. Du en enke ‘a Yehofa ye du en gi, ná gi libisama’ (Kol. 3:23). Fu di yu abi sondu meke yo go e meke fowtu. Neen meke i mu abi sakafasi dai taigi den baala sowtu fowtu i meke.​—Odo 11:2.

9. Saide wan yonkuu baala mu leli du sani?

⁹ Efii wani toon wan sama di e du sani enke Yesesi, i mu sabi son sani aini a libi. Den sani ya o yeepi i fu tyai gaan faantiwowtu aini a kemeente. Den o yeepi i fu wooko solugu iseefi anga yu osufamii. Den sani ya o yeepi i tu fu de wan bun osufamii edeman. Boiti dati, den o yeepi i fu meke mati anga taawan. Meke u luku wantu sani dii mu sabi efii wani toon wan sama di e du sani enke Yesesi.

10-11. Sowtu wini wan baala o fende te a sabi leisi anga sikiifi bun? Sowtu wini a kemeente o fende fu di a sabi du den sani ya? (Psalm 1:1-3) (Luku a fowtow tu.)

 ¹⁰ Meke moiti fu leisi bun, i mu sabi sikiifi tu. Beibel taki efu wan sama wani piisii, efu a wani en libi waka bun, a mu e meke moiti fu leisi Beibel ala dei. A mu e sidon pakisei san a leisi tu. (Leisi Psalm 1:1-3.) Te ye leisi Beibel ala dei ye kon sabi fa Yehofa e denki. A sani ya o yeepi i fu denki bun sani. Aw yeepi i tu fu denki bun fosi i du wan sani (Odo 1:3, 4). A kemeente abi den sowtu baala ya fanowdu. Saide?

¹¹ Den baala anga sisa abi baala fanowdu di o man yeepi den fu fusutan san Beibel e taki (Tit. 1:9). Tei sabi sikiifi anga leisi bun, a sani ya o yeepi i fu man holi lezing di o gi taawan taanga-sikin. Yo man gi piki tu di e gi taawan taanga-sikin. Yo man sikiifi sai sutudeli. Ma a ná dati wawan. Yo man sikiifi sai leli a den lezing di den baala e holi a den komakandaa anga den konkelesi. Bakaten i sa koboloiki den sani ya fu taanga a biibi fi yu anga taawan.

12. Saw yeepi i fu e taki bun anga taawan?

¹² Leli fai mu taki anga taawan. Wan baala mu sabi fa fu taki bun anga taawan. A mu aliki bun te taawan e taki. A mu luku bun fu aa taki sani di o meke taawan fii wan fasi (Odo 20:5). Te wan sama e taki, i mu aliki en bun, i mu luku fa ai poti en fesi, da yo sabi fa a sama e fii. Efii nai de makandaa anga taawan i naw man sabi den sani ya. Efu anga telefon namo ye taki anga sama, sani enke email efuso app, i naw sabi taki anga sama. Neen meke i mu e suku okasi fu gi toli anga taawan te yu anga den miti.​—2 Yoh. 12.

13. San a wantu taa sani di wan baala mu leli du? (1 Timotiyesi 5:8) (Luku a fowtow tu.)

¹³ Leli fai mu solugu iseefi. Wan baala di e waka a Yesesi baka mu man solugu enseefi anga en osufamii. (Leisi 1 Timotiyesi 5:8.) Aini son kondee a den dda e leli den boi wooko di den sa du bakaten. Son yuu a wan famii fu den e leli den. Taawan a sikoo den e leli son wooko. A naabi toobi fai leli wan wooko, ma toku i mu sabi wan wooko dii sa du bakaten (Toli 18:2, 3; 20:34; Efe. 4:28). Sama mu sabi yu enke wan sama di e wooko taanga. Tei bigin anga wan wooko, i mu tei ati te enke i kaba en. Efi ye du i wooko na a fasi ya, a naw taanga gii fu fende wooko. Den naw puu yu a wooko lawlaw tu. Efu wan baala sabi du den sani di u taki na a pisi ya, a sani ya o yeepi en fu tyai faantiwowtu aini a kemeente anga en osufamii. Meke u  luku wantu faantiwowtu dii sa fende aini a ten di e kon.

14. Fa wan baala sa seeka a fesi fu man du a fuuten diniwooko?

¹⁴ Fuuten diniwooko. A omen yonkuu baala bigin du a fuuten diniwooko aini den yonkuu yali. Te wan baala bigin pionili yonkuuyonkuu, a sani de e yeepi en fu sabi fa a mu libi anga ala sowtu sama. Ma a ná dati wawan. Ai leli fa fu wooko bun anga a moni di ai fende tu (Filip. 4:11-13). Wan sani di o yeepi yonkuu baala fu du a fuuten diniwooko bakaten, a te den e bigin du a yeepi-pioniliwooko. A omen baala du a yeepi-pioniliwooko wan pisiten. A sani ya e yeepi den fu man du a fuuten diniwooko bakaten. Fu di omen yonkuu baala bigin pionili meke bakaten den fende a kai fu go yeepi anga a bow wooko. Taawan fende a gaandi fu go wooko a Betel.

15-16. San wan yonkuu baala sa du fu toon wan dinali efuso owluman?

¹⁵ Dinali efuso owluman. Den baala mu meke moiti fu man doo a maiki fu toon owluman. Bika a kemeente abi owluman fanowdu fu yeepi den baala anga sisa. Beibel taki den baala di e meke moiti fu toon owluman e ‘suku fu du wan bun wooko’ (1 Tim. 3:1). Ma wan baala abi fu toon wan dinali fosi a toon wan owluman. Den dinali e yeepi den owluman anga omen wooko. Den owluman anga den dinali e wooko taanga fu yeepi den baala anga sisa. Den e du a peleikiwooko fayafaya tu. Solanga wan baala doo 17 yali a sa toon wan dinali. Wan dinali di e du en wooko bun, sa toon wan owluman te a abi 20 yali.

¹⁶ Saw yeepi i fu man doo a maiki fu toon dinali efuso owluman? Beibel taki finifini san wan baala mu du fu man fende den gaandi ya. A sani di o yeepi wan baala fu doo den maiki ya, a te ai wooko anga san Beibel taki. A mu lobi Yehofa, en osufamii anga a kemeente (1 Tim. 3:1-13; Tit. 1:6-9; 1 Peit. 5:2, 3). Meke moiti fu fusutan den tekisi di e soi sowtu manii wan baala mu abi fu man fende gaandi aini a kemeente. Begi Yehofa fu a yeepi i fu kon abi den manii ya. c

17. Fa wan yonkuu baala sa seeka fu toon wan bun osufamii edeman? (Luku a fowtow tu.)

¹⁷ Osufamii edeman. Yesesi be taki son Kelesten baala á be o toow (Mat. 19:12).  Ma efii toow, yo toon osufamii edeman (1 Kor. 11:3). Yehofa wani wan man lobi en uman. A wani a man solugu en uman tu. A mu e gi en uman taanga-sikin te abi booko-ede. A mu e yeepi en fi en biibi taanga tu (Efe. 5:28, 29). Den sani di u taki aini a artikel ya sa yeepi i fu de wan bun osufamii edeman. U be si taki i mu abi lesipeki gi umansama, sama mu man fitoow i. Efii meke moiti fu abi den manii ya, yo de wan bun osufamii edeman.

18. Fa wan yonkuu baala sa seeka a fesi fu man de wan bun dda?

¹⁸ Tei meke pikin. Baka tei toow, kande yo meke pikin. Sai sa leli fu Yehofa fu man de wan bun dda? A omen sani i sa leli fu Yehofa (Efe. 6:4). Yehofa be e taigi en Boi Yesesi taki a lobi en. A be e taigi en tu taki ai meke a piisii (Mat. 3:17). Efii toon wan dda, meke moiti fu e taigi den pikin fii ala yuu taki i lobi den. I mu e gafa den fu den bun sani di den e du. Den dda di e waka a Yehofa baka sa yeepi den pikin fu den fu toon Yehofa mati. Wan fasi fai sa teke seeka fu de wan bun dda, a te ye taigi taawan aini yu osufamii taki i lobi den. I mu lobi yeepi den baala anga sisa aini a kemeente. Soi den tu taki i lobi den (Yoh. 15:9). A sani ya o yeepi i fu de wan bun dda efii meke pikin bakaten. Yehofa sa koboloiki i nownow tu fu de wan taanga-sikin gi yu osufamii anga a kemeente.

19-20. Saw yeepi wan yonkuu baala fu toon wan sama di e du sani enke Yesesi? (Luku a fowtow a fesise fu A Wakititolen.)

¹⁹ Yonkuu baala, a ná wanboowanboo yo toon wan sama di e du sani enke Yesesi. A sani di o yeepi i, a te ye paa anga sama di e meke moiti a waaleiti, te ye meke moiti fu denki bun fosi i du wan sani, sama mu man fitoow i, i mu leli du son sani. Boiti dati, i mu seeka a fesi gi son faantiwowtu dii sa fende.

²⁰ Son yuu tei pakisei den gaandi di wan baala sa fende, yo si enke i naw poi tyai den faantiwowtu ya. Ma i poi tyai den faantiwowtu ya, bika Yehofa o yeepi i (Yes. 41:10, 13). Den baala anga sisa o yeepi i tu. Tei meke moiti te enke i toon wan sama di e du sani enke Yesesi, yo piisii. A omen wooko yo man du aini a olikanisâsi. Yonkuu baala, u lobi i ye. Meke Yehofa de anga i, te ye meke moiti fu toon wan sama di e du sani enke Yesesi.​—Odo 22:4.