1. Saw yeepi i fu toon wan sama di e du sani enke Yesesi?

 A WAN foondoo sani fu si fa wan pikin e goo kon bigi te enke a toon gaansama. Sani á poi tapu den fu goo kon bigi, bika a so Gadu meke u. Ma efu u wani du sani enke Yesesi, wi abi fu meke moiti  b (1 Kor. 13:11; Heb. 6:1). U mu meke moiti fu wi anga Yehofa toon moo bun mati. Wi abi a santa yeye fanowdu fu yeepi u fu kon abi den manii fu Yehofa. A santa yeye o yeepi u tu fu sabi du son sani. Aw yeepi u fu teke seeka gi den faantiwowtu di u sa fende aini a ten di e kon.​—Odo 1:5.

2. San Genesesi 1:27 e leli u? San wo luku aini a artikel ya?

² Di Yehofa meke libisama, a meke mannengee anga umansama. (Leisi Genesesi 1:27.) Mannengee anga umanpikin á meke na aseefi fasi. Den manii fu den kengi tu. Yehofa meke den fu man du son wooko. Neen meke den abi koni anga son manii fanowdu fu du den wooko ya (Gen. 2:18). Aini a artikel ya, wo luku san wan yonkuu sisa sa du fu toon wan sama di e du sani enke Yesesi. Aini a taa artikel wo luku fa yonkuu baala sa waka a Yesesi baka.

3-4. Pe yonkuu sisa sa fende sama di den sa waka a den baka? (Luku a fowtow tu.)

³ Beibel e taki fu omen uman di be lobi Yehofa. Den be  e du sani enke fa Yehofa wani. (Luku a artikel di den e kai ‘Vrouwen in de Bijbel: Wat kunnen we van ze leren?’) Den uman ya ‘soi na ala fasi taki den e aliki Gadu’ leti enke fa a tekisi fu a sutudi ya e soi. Boiti den uman ya, den yonkuu sisa sa waka a den sisa aini a kemeente baka di e dini Yehofa anga den hii ati.

⁴ Yonkuu sisa, i sabi wantu sisa dii sa waka a den baka? Pakisei den moin manii fu den. Bakadati dai meke moiti fu kon abi den manii ya tu. Aini den paragraaf di e kon wo taki fu dii pelensipali manii di wan sisa mu abi.

5. Saide Kelesten uman mu abi sakafasi?

⁵ Efu u wani du sani enke Yesesi, da u mu abi sakafasi. Efu wan uman abi sakafasi, en anga Yehofa o de bun mati. En anga taawan o de bun mati tu (Yak. 4:6). Wan uman di lobi Yehofa de kabakaba fu du san sikiifi a 1 Korentesama 11:3 (1 Kor. 11:3). A tekisi ya e soi sama Yehofa gi a faantiwowtu fu teke fesi aini a kemeente anga a osofamii. c

6. San yonkuu sisa sa leli fu a fasi fa Lebeka soi sakafasi?

⁶ Luku a toli fu Lebeka. Lebeka a be wan koni uman. Aa be e feele fu du sani di o tyai wini gi en osufamii. A be abi deki-ati (Gen. 24:58; 27:5-17). Ma toku a be abi lesipeki anga sakafasi (Gen. 24:17, 18, 65). Efii de kabakaba fu holibaka gi Yehofa leti enke Lebeka, yu osufamii anga a kemeente o waka ai baka.

7. Ester be sabi san a poi du anga san aa poi du. San yonkuu sisa e leli fu a sani ya?

⁷ Wan sisa di e du sani enke Yesesi sabi san a poi du anga san aa poi du. Beibel taki wan sama di abi a manii ya ‘koni’ (Odo 11:2). Ester be abi a manii ya. Aa be e fii enseefi. Baka di a toon kownu uman seefi, a be e aliki Mordekai te a be poti en a pasi. A be e du san a taigi en tu (Est.  2:10, 20, 22). Iseefi mu abi a gwenti fu e akisi baala anga sisa di abi ondoofeni fai sa du son sani. Te wan sama poti yu a pasi i mu aliki tu. Efi ye du a sani ya, da ye soi taki ye waka a Ester baka.​—Tit. 2:3-5.

8. Enke fa 1 Timotiyesi 2:9, 10 e soi, da fa den sisa sa soi taki den nai du sani fu sama poti pakisei a den te a abi fu du anga den koosi di den e wei?

⁸ Ná pikin moin Ester be moin, ma toku aa be e du sani fu sama poti pakisei neen (Est. 2:7, 15). San den sisa sa leli fu a toli fu Ester? Wan fu den sani di we leli fu a toli fu Ester, sikiifi a 1 Timotiyesi 2:9, 10. (Leisi.) Pawlesi e taigi umansama aini a tekisi ya taki den mu e wei koosi a wan fasi di e soi taki den de anga kiin fusutan. Den Giiki wowtu di Pawlesi koboloiki aini a tekisi ya, e soi taki wan uman mu e wei koosi di fiti. A mu holi a fii fu taawan a pakisei tu. We poolo anga den sisa di e meke moiti fu wooko anga a sani di Pawlesi taki ya.

9. San a toli fu Abigayeli e leli u?

⁹ Fosi i du wan sani, i mu denki sowtu bakapisi aw abi. A de taanga fanowdu fu wan sisa abi a manii ya. A sani ya o yeepi en fu sabi san bun, anga san á bun. Luku a toli fu Abigayeli. A man fi en be du wan don sani di be sa tyai ogii gi a hii osufamii fi en. Abigayeli á daaidaai, a du wan sani wantenwanten. A denki bun fosi a du sani, neen meke a kibii a libi fu omen sama (1 Sam. 25:14-23, 32-35). Te we denki bun fosi u du sani, a sani ya e yeepi u fu sabi on ten u mu taki anga on ten u mu de pii. A sani ya o yeepi u tu fu wa taki efuso du sani di o meke taawan fii wan fasi.​—1 Tes. 4:11.

10-11. Sowtu wini yu anga taawan o fende te ye leisi anga te ye sikiifi bun? (Luku a fowtow tu.)

¹⁰ Wan Kelesten sisa mu leli du sani di o yeepi en aini en libi. Son sani di wan meisyo e leli te a yonkuu sa yeepi en bakaten. Meke u luku wantu toli.

¹¹ Meke moiti fu leisi bun, i mu sabi sikiifi tu. Aini son kondee, sama nai si en enke a de fanowdu fu wan umansama leli leisi efuso sikiifi. Ma ala Kelesten mu man du den sani ya  d (1 Tim. 4:13). Neen meke ya mu meke sani tapu i fu leli leisi efuso sikiifi. Sowtu wini yo fende? Tei sabi leisi efuso sikiifi, a sani ya sa yeepi i fu fende wooko. Boiti dati, aw moo makiliki gii fu sutudeli a Wowtu fu Gadu. Yo man leli taawan tu. Ma a moo pelensipali sani a taki yu anga Yehofa o toon moo bun mati, bika yo man leisi a Wowtu fi en. Yo man teke ten pakisei sai leisi tu.​—Yow. 1:8; 1 Tim. 4:15.

12. Fa Odo 31:26 sa yeepi i fu e taki bun anga taawan?

 ¹² Leli fai mu taki anga taawan. Enke Kelesten u mu e taki bun anga taawan. U sa meke moiti fu wooko anga san Yakowbesi be taki. A be taki: ‘Mi lobi baala, ala u mu gaw fu yee, ma wa mu gaw fu taki’ (Yak. 1:19). Te ye aliki bun te taawan e taki, da ye soi taki ‘ye fii’ gi den (1 Peit. 3:8). Efi ya kaba fusutan san wan sama taki efuso fa ai fii, da a bun fu poti wantu akisi gi en. Ma ya mu akisi en sani di o meke a fii wan fasi. Baka te a piki i, i mu denki bun fosi i taki wan sani (Odo 15:28). Akisi iseefi taki: ‘A wan bun sani mio taki? Aw gi a sama taanga-sikin? A sani di mio taki e soi taki mi abi lesipeki efuso switifasi? I sa leli fu den sisa di sabi taki anga sama. (Leisi Odo 31:26.) Poti pakisei na a fasi fa den e taki. Te ye taki bun anga taawan, aw moo makiliki gii fu meke mati. Yu anga den o poi libi na a wan tu.

13. Fai sa leli du sani a osu? (Luku a fowtow tu.)

¹³ Leli du sani a osu. Gaanse leisi a umansama e du gaanse fu den wooko di mu du a osu. Kande i mma efuso wan sisa fii di sabi du sani sa leli i fai mu du osu wooko. Wan sisa den e kai Cindy taki: ‘Wan fu den moo bun sani di mi leli fu mma, a taki yo piisii te ye wooko taanga. Mma leli mi boli, a leli mi fu kiin sani anga fu nain koosi. A leli mi fu koboloiki mi moni anga koni tu te mi e bai sani. Fu di mi leli den sani ya, meke mi poi solugu miseefi. Mi man du moo gi Yehofa tu. Boiti dati, mma leli mi fu soi switifasi gi taawan. A sani ya meke mi kon sabi omen baala anga sisa di mi sa waka a den baka’ (Odo 31:15, 21, 22). Wan uman di e wooko taanga, di abi switifasi, anga di sabi du sani a osu a wan belesi gi den sama fi en osufamii anga a kemeente.​—Odo 31:13, 17, 27; Toli 16:15.

14. San a toli fu Crystal leli i? Sai mu holi a pakisei?

¹⁴ Leli du sani iseefi. A leli di u mu leli fu du sani useefi a wan sani di ala Kelesten mu du (Filip. 4:11). Wan sisa den e kai Crystal taki: ‘Mma anga nda be e gi mi taanga-sikin fu leli du wan sani a sikoo di mi be sa du bakaten. Nda be gi mi taanga-sikin fu leli wooko anga moni. Mi fende wini di mi wooko anga san a taigi mi.’ A bun tei sabi fai mu fende moni. Ma dati wawan á sai. I mu sabi fai mu koboloiki a moni di ye fende tu, bika a sani ya o yeepi i fi ya bai sani dii naabi fanowdu (Odo 31:16, 18). A bun tei naabi tyaipi sani. A wan koni sani tu te ye bai soso den sani di yu abi fanowdu. Efi ye du den sani ya, yo man du moo gi Yehofa.​—1 Tim. 6:8.

15-16. Fa yonkuu sisa di á toow e yeepi taawan? (Malikisi 10:29, 30)

¹⁵ Efi ye meke moiti fu abi manii di Yehofa lobi anga fu leli du wan sani, a sani ya o yeepi i te yo teke bosoloiti aini a ten di e kon. Meke u luku wantu sani dii sa du.

¹⁶ I sa tan wan pisiten sondee fii toow. Enke fa Yesesi be taki, son sisa nai toow, winsi fa den sama na a pisi pe den e tan e si den wan fasi (Mat. 19:10-12). Taawan fu den nai toow, fu di kande den abi taa polobelema. I sa biibi taki Yehofa anga Yesesi nai sii wan fasi fu di ya toow, den nai si enke i naabi fa. A hii goontapu den sisa di á toow e du omen sani aini a kemeente. Fu di den sisa ya e booko den ede anga taawan, meke den e kon de enke sisa anga mma gi omen baala anga sisa.​—Leisi Malikisi 10:29, 30; 1 Tim. 5:2.

17. Fa wan yonkuu sisa sa seeka gi a fuuten diniwooko?

¹⁷ Fuuten diniwooko. A den sisa e du gaanse fu a peleikiwooko di e du a hii goontapu (Ps. 68:11). Ye seeka sani fu du a fuuten diniwooko? I sa du a pioniliwooko. I sa yeepi du bow wooko efuso wooko a Betel. Taigi Yehofa san a den maiki fii. Taki anga taa sama di doo denseefi maiki di yu abi. Luku sai sa du fu du a fuuten diniwooko. Bakadati dai meke wan sikeima di o yeepi i fu doo a maiki fii. Te ye du a fuuten diniwooko, ye fende a okasi fu du omen sani gi Yehofa.

18. Saide wan sisa mu luku bun anga sama aw toow? (Luku a fowtow tu.)

¹⁸ Kande i wani toow. Aini a artikel ya, u taki fu wantu manii dii mu abi anga wantu sani dii mu sabi du. Efi ye du den sani ya yo de wan bun uman. Efi ye pakisei fu toow aini a ten di e kon, i mu luku bun anga sama yo toow. A wan fu den moo pelensipali bosoloiti dii sa teke aini libi. Holi a pakisei taki tei toow i mu wooko anga den sani di a man fi ye taki (Rom. 7:2; Efe. 5:23, 33). Neen meke akisi iseefi taki: ‘Ai meke moiti fu denki anga fu du sani enke Yesesi? Ai si a dini di ai dini Yehofa enke a moo pelensipali sani aini en libi? Ai du sani anga koni? Te a meke wan fowtu ai taki a fowtu tuu? Ai lesipeki umansama? Aw poi yeepi mi fu mi anga Yehofa tan de mati? Aw poi solugu mi?  Aw de mi bun mati? A poi tyai faantiwowtu bun? Sowtu faantiwowtu a abi aini a kemeente? Fa ai tyai en faantiwowtu?’ (Luk. 16:10; 1 Tim. 5:8) Efii wani fende wan bun man, da iseefi mu meke moiti fu de wan bun uman tu.

19. Saide wan uman sa piisii te den e kai en wan ‘yeepiman’ gi a man fi en?

¹⁹ Beibel taki wan bun uman a ‘wan yeepiman’ gi a man fi en. ‘A wan sama di fiti en’ (Gen. 2:18). A sani ya wani taki umansama á pelensipali? Nono. A wan gaandi wan uman abi fu holibaka gi en osufamii. Holi a pakisei taki Beibel seefi e kai Yehofa wan ‘yeepiman’ (Ps. 54:4; Heb. 13:6). Wan uman a wan tuutuu yeepiman gi a man fi en te ai holibaka gi en. Te en man teke wan bosoloiti, ai holibaka gi en fu sani sa waka bun. Boiti dati, fu di a lobi Yehofa meke ai du ala san a poi fu meke taawan si den bun manii fu a man fi en (Odo 31:11, 12; 1 Tim. 3:11). Wan fasi fai sa seeka iseefi fu de wan bun uman aini a ten di e kon, a te ye meke moiti fu kon moo lobi Yehofa anga te ye yeepi den sama fi yu osufamii anga a kemeente.

20. San wan mma sa du gi den sama fi en osufamii?

²⁰ Tei meke pikin. Baka tei toow, kande yu anga i man o meke pikin (Ps. 127:3). Neen meke a bun fu teke ten pakisei san a wani taki fu de wan bun mma. Aini a artikel ya, u taki fu wantu manii dii mu abi. U taki fu wantu sani dii mu sabi du tu. Den sani ya o yeepi i te yo toow efuso te yo toon wan mma. Te yu abi switifasi anga pasensi, den sama fi yu osufamii o go e piisii. Den pikin fii o si taki ye booko yu ede anga den. Den o si taki i lobi den tu.​—Odo 24:3.

21. Fa ye si den sisa fu u? Saide ye si den so? (Luku a fowtow a fesise fu A Wakititolen.)

²¹ Den sisa, u lobi u ye, bika we wooko taanga. We du ala saw man gi Yehofa anga a foluku fi en (Heb. 6:10). We meke moiti fu abi manii di Yehofa lobi. We meke moiti fu sabi du son sani. Den sani ya musu e meke we piisii. We meke taa sama piisii tu. Boiti dati, den sani ya e seeka u gi den faantiwowtu di u sa tyai aini a ten di e kon. U pelensipali gi a olikanisâsi fu Yehofa tuutuu.