Mi meke aini 1927 a wan pikin foto koosube fu Chicago Illinois, U.S.A. Mma anga nda be abi feifi pikin​—Jetha, Don, Karl, Joy anga mi. Ala u be e dini Yehofa anga u hii ati. Jetha go na a du fu tu kalasi fu a Gileyad sikoo aini 1943. Don, Karl, anga Joy go a Betel a Brooklyn, New York, aini 1944, 1947, anga 1951. Fu di den be e poti a Kownukondee na a fosi peesi aini den libi, meke ná pikin piisii den be e piisii. A fasi fa mma anga nda anga den baala anga sisa fu mi be e tyai denseefi, be gi mi taanga-sikin fu du moo gi Yehofa.

Fu di mma anga nda be lobi Gadu, meke den be e leisi a Beibel ala dei. Den be e leli wi enke pikin fu lobi Gadu tu. Nda á be e lesipeki den keliki moo baka di a komoto na a Fosi Goontapu Feti aini Europa. Mma be e gi Gadu daa taki nda be daai kon a osu baka libilibi. Wan leisi a taigi en taki: ‘Karl, kow gwa keliki baka enke faw be gwenti.’ Neen nda piki en taki: ‘Mio waka tyai i go, ma mi naw kon aini a keliki.’ Neen Mma akisi en taki: ‘Saide?’ Neen a piki en taki: ‘Di a feti be e feti, den keliki fesiman fu aseefi keliki be e begi gi den suudati di be o feti anga denseefi. Sowtu wan fu den se Gadu be de?’

Baka di mma gwa keliki, tu Kotoigi sisa koko aw doo. Den gi nda tu buku di den be e kai Leti. Den buku ya be e taki fu a Beibel buku Openbaring. Nda be wani sabi moo, neen meke a teke den buku. Di mma si den buku, a bigin leisi den wanten. Wan dei di mma be e leisi nyunsu, a si taki den be e kai sama di be wani sutudeli Beibel fu sutudeli aini a Leti buku. Di mma go, wan gaandi mma opo a doo gi en. A be holi wan fu den buku a tapu. Neen mma akisi en taki: ‘A yaaso ye sutudeli den buku ya?’ A uman piki en taki, ‘Eeye a mma i sa kon aini’. A taa wiki di mma be e go, a tyai ala u go anga en. Fanafu a dei de, u be e go ala wiki.

Di u be go a wan fu den komakandaa, a baala di be e teke fesi akisi mi fu leisi Psalm 144:15, pe e soi taki den sama di e dini Yehofa o de koloku. A tekisi ya be doo mi ati. Mi be lobi 1 Timotiyesi 1:11, pe ai taki  a Yehofa na ‘a koloku Gadu’ anga Efeisesama 5:1, di e soi u taki ‘u mu du sani enke fa u sabi taki Gadu seefi be o du sani’. Mi be kon fusustan wanten taki mi be mu dini Yehofa, a sama di meke ala sani anga piisii, mi be mu teke a sani yaaso fu bigi tu. Mi be puubei fu du den tu sani ya aini mi libi.

A komakandaa peesi di be de moo koosube be de wan sani fu 32 kilometer fu Chicago. Ma tokuso wa be e misi den komakandaa. Mi man membee ete taki wan leisi, a baala di be e teke fesi be gi Jetha wan piki. Di mi be e aliki san ai taki, mi pakisei taki: ‘Mi be sabi a sani de. Te mi be sabi so, mi be sutu mi ana fu gi a piki ya.’ Mi be bigin seeka miseefi fu e gi piki a den komakandaa. Ma a moo pelensipali sani, a taki leti enke den tu baala anga sisa fu mi, mi be kon moo koosube a Yehofa. Neen meke mi dopu aini 1941.

Mi man membee a konkelesi di u be go a Cleveland, Ohio aini 1942. A osufamii fu u be e tan makandaa anga omen taa osufamii aini tenti koosube fu pe a konkelesi be e holi. A omen taa baala anga sisa aini moo enke 50 taa foto aini Ameekan be e aliki a konkelesi a telefon tu. Na a ten de, den be e feti a di fu Tu goontapu feti, neen meke den be e moo buuse den Yehofa Kotoigi. Te neti den baala be e kon a wan anga den wagi fu den, da den be e gi a fesi fu den wagi go a doose fu a kampu. Den be e taki fiti anga denseefi taki aini ibiiwan fu den wagi, wan sama be o go e koti wakiti te enke peesi kiin. Te den be si taki sama be o kon fu du ogii anga den, da den be o leti den faya fu a wagi fu den, da den be o toeter. Da den taawan be o lon fu go yeepi den. Mi be kon si taki, a foluku fu Yehofa e de seekaseeka ala yuu. Nawan ogii a be pasa, fu di mi be e fii enke nawan sani á be o miti u, meke mi be poi siibi bun.

Baka wan tu yali te mi e membee a konkelesi di u be go, mi kon fusutan taki noiti mma á be e senuwe efuso feele. A be poti ala en fitoow a Yehofa anga a olikanisâsi fi en. Noiti mio feegete a sani di mma be du ya.

Aa teke langa fosi a konkelesi de holi, neen mma toon wan kowownu pionili. Neen meke di a baala e holi a lezing ná pikin aliki a be e aliki. Di u go a osu neen a taigi u taki: ‘Mi wani pionili go doo. Ma mi naw poi pionili go doo, efu a mi wawan mi e du ala den wooko a osu.’ Bakadati a akisi u efu sa yeepi en anga den wooko. Neen u taki ‘Eeye’. Ala sama be abi wan wooko e du aini osu. U be mu e kiin den kambaa fosi u go nyan. Da te u be e go a sikoo, a be e go luku efu ala sani de taa a den peesi. Da bakadati a be e go aini a peleikiwooko. Winsi fa a be e abi tyaipi sani e du tokuso ala yuu a be e poti pakisei a wi enke pikin. A be e boli e wasi, a be e seeka ala sani gi u. Son leisi te u be komoto a sikoo u be e go peleiki anga en tu. A sani ya be e yeepi u fu fusutan san a wani taki fu de wan pionili.

Mi bigin pionili di mi abi wan sani fu 16 yali. Winsi fa nda á be toon wan Kotoigi ete, tokuso a be lobi fa mi be e tyai miseefi. Wan neti mi taigi en taki winsi fa mi e meke ala moiti tokuso mia fende nawan sama ete di wani mi sutudeli Beibel anga en. Bakadati neen mi akisi en taki: ‘I wani mi sutudeli Beibel anga i? Baka di a denki pikinso fu a toli, neen a taigi mi taki: ‘Eeye u sa sutudeli.’ Ná pikin piisii mi piisii taki a nda a be a fosi Beibelsutudi fu mi!

Baka di u sutudeli wan pisiten, neen u abaa go na a buku di den e kai: ‘De waarheid zult u vrij maken.’ Mi be kon si taki nda be e yeepi mi fu gi leli moo bun, bika wan dei di mi anga en e sutudeli neen a taigi mi taki: ‘Mi si san a buku e taki. Ma fai du sabi taki a sani di sikiifi ape a tuu?’ We fu taki en kiin, mia be sabi taki a be o akisi mi so wan sani neen meke mi taigi en taki: ‘Te wo sutudeli baka da mio piki i.’ Di u sutudeli baka, mi be poi piki en tuu. Mi be go ondoosuku sani, neen mi fende wantu tekisi di e holibaka gi a pisi di u be e luku. A sani ya be taanga mi biibi, ma a be yeepi nda tu. A be e du den sani di a be e leli, neen bakaten a dopu aini 1952.

Mi foloisi komoto a osu di mi be abi 17 yali. Jetha toon wan zendeling. A pisiten de Don be bigin wooko a Betel. Fu di mi be e si fa den be e piisii meke miseefi be wani du wan sani tu, neen meke mi poti mi nen fu go a Betel anga a Gileyad sikoo neen mi fika ala sani gi Yehofa. Baka wan pisiten neen den kai mi go a Betel aini 1952.

A omen wooko mi du aini a olikanisâsi den yali di pasa, a omen nyun sani mi leli tu. Aini den 75 yali di mi de a Betel, mi leli fa fu meke buku. Mi leli fa fu sende teke sani anga sende sani go a taa kondee gi baala anga sisa. Mi be e yeepi anga moni toli tu. Ma wan fu den sani di be e meke mi moo piisii a den sani di mi be e leli te den baala be e holi sani enke, a Betel lezing, a deiwowtu anga omen taa sani ete.

Mi leli omen sani fu mi pikin baala Karl tu di a kon a Betel aini 1947. A be lobi sutudeli sani fu Beibel. A be sabi gi leli tu. A be yeepi mi wan leisi anga wan lezing di mi be mu holi. Mi taigi en taki mi be abi ala sani kaba, ma mia be sabi fa mi be mu meke a lezing. Neen a akisi mi taki: ‘Joel, san na a thema fii? Mi be fusutan wantenwanten san a be wani leli mi. Mi be mu fika ala den pikinpikin  sani di mi be wani poti aini a lezing, da mi taki fu den moo pelensipali wan. Noiti moo mi feegete a sani de.

Wan fu den sani di e yeepi i fu piisii te i de a Betel, a te ye du ala sai poi aini a peleikiwooko. Mi sabi ete wan leisi mi anga wan baala be e peleiki neen u miti wan uman a New York. A uman ya be fende a Wakititolen anga a Ontwaakt kaba. Di u go neen u taigi en taki: ‘Tide we taki anga sama fu toli aini Beibel di o gi den taanga-sikin.’ Bakadati a taigi u taki: ‘Efu a fu Beibel we taki da u sa kon.’ U leisi omen tekisi gi en, u taki anga en fu a Kownukondee anga a nyun goontapu. We a uman ya be lobi a toli, neen meke a taa wiki di u go a kai wantu mati fi en fu kon aliki. Bakaten en anga en man toon Kotoigi.

A pisiten di mi si taki mi kaba fu toow, a baka 10 yali fosi mi miti a sama di mi toow anga en. A sani di yeepi mi fu fende wan bun uman na a begi di mi be e begi Yehofa. Mi be e akisi miseefi tu taki: ‘San mi wani du anga mi libi baka te mi toow?’

Di mi go na a konkelesi di holi a Yankee stadion aini 1953, neen mi miti wan sisa den e kai Mary Aniol. Neen anga mi sisa Jetha be de aini a du fu 2 kalasi fu a Gileyad sikoo. Den tu man be lobi wooko makandaa. Di mi anga en taki a gi mi toli fa a be lobi peleiki anga fa sani be e waka a den Beibelsutudi fi en. Di u kon leli sabi useefi moo bun, neen u kon si taki a den seefi maiki wi abi. Bakadati u si taki u lobi useefi neen u toow na a april aini 1955. Mary a tuutuu wan kado di Yehofa gi mi. A omen sani mi e leli fi en. A naabi toobi sowtu wooko a be e du, ala yuu a be e piisii. Boiti taki a be lobi wooko taanga, aa be e daaidaai fu poti a Kownukondee a fesi aini en libi (Mat. 6:33). A dii yali langa u be de aini a kelen-wooko, neen den sende u go a Betel aini 1958 enke toowpaa.

A omen sani mi leli fu Mary. Di u toow biginbigin u be e leisi Beibel makandaa. Kande wan sani fu 15 vers ala dei. Baka te u be leisi da u be e taki fu den tekisi, fu luku faw sa wooko anga den aini u libi. Mary be lobi taigi mi sani di a be leli na a Gileyad sikoo efuso a pisiten di a be e du a zendeling wooko. A omen wini mi fende fu den sani ya, bika den be e yeepi mi fu fusutan sani moo bun anga fu holi lezing moo bun. A omen sisa mi be poi gi taanga-sikin tu.​—Odo 25:11.

A lobi uman fu mi Mary, dede aini 2013. Ná pikin angii mi e angii fi en. Neen meke mi o fitoow Yehofa ala yuu. Mi de kabakaba fu teke a leli di ai gi mi tu (Odo 3:5, 6). Mi e fende taanga-sikin te mi e pakisei den sani di wo poi du aini a nyun goontapu. A omen nyun sani wo leli fu Yehofa tu, a Gaan leliman fu u! Mia poi gi en daa fu ala den sani di a leli mi te anga now. Mi e piisii tuutuu taki a soi mi bun-ati.