1-2. San mma anga dda sa du te a pikin fu den e akisi den sani fu Gadu efuso a Beibel?

 MMA anga dda, u sabi taki á nawan makiliki sani fu kiya pikin. Neen meke wi e gii daa efu yu a wan sama di abi yonkuu pikin. U sabi taki a omen moiti ye meke fu yeepi den fu kon sabi Yehofa (Deit. 6:6, 7). Ma o moo a pikin fii e kon bigi, kande a omen sani aw go e akisi i. Sani enke: Saide meke Yehofa á wani u du son sani? Saide meke we holi son weiti? A omen taa sani aw go e akisi yu ete.

² Biginbigin kande yo go e booko yu ede taki a pikin fii e poti den akisi ya. Kande yo bigin denki taki a nai biibi den sani di sikiifi aini Beibel. Ma san u mu holi a pakisei a taki te wan pikin e kon bigi a omen sani aw wani sabi, bika na a sani ya o yeepi en fi en biibi taanga (1 Kor. 13:11). Neen meke aa de fii feele. Te a pikin fii e poti akisi, i sa koboloiki a ten de fu leli en son sani. Den akisi di a pikin fii e poti o yeepi en fu fusutan sani moo bun.

3. San wo luku aini a artikel ya?

³ Aini a artikel ya, wo taki fa mma anga dda sa yeepi den pikin (1) Fu den biibi taanga anga fu biibi den sani di sikiifi aini Beibel, (2) fu kon si saide a bun fu e holi useefi a den weiti fu Yehofa anga (3) fu taigi taawan san den e biibi. Wo luku tu saide a bun taki den pikin e poti akisi anga on ten mma anga dda sa taki anga den pikin fu a biibi fu den.

 YEEPI I PIKIN FI EN BIIBI TAANGA ANGA FU BIIBI DEN SANI DI BEIBEL E LELI

4. San wan pikin sai akisi enseefi? Saide ai akisi en seefi den sani ya?

⁴ Kelesten mma anga dda e fusutan taki a ná fu di den abi wan taanga biibi, da dati wani taki den pikin fu den biibi o taanga tu. Ala sama fiya abi fu wooko na a biibi fi en. A so a de anga den pikin tu. Son leisi wan pikin sa akisi enseefi taki: ‘Fa mio du sabi efu wan Gadu de tuutuu? Mi sa biibi den sani di sikiifi aini Beibel? Neen meke a Beibel e gi u taanga-sikin fu ‘ondoosuku ala sani’ (Rom. 12:1; 1 Tes. 5:21). Ma fai sa yeepi i pikin fu taanga en biibi?

5. San mma anga dda sa du fu yeepi den pikin fu biibi san Beibel e taki? (Romesama 12:2)

⁵ Gi a pikin fii taanga sikin fu ondoosuku luku efu den sani di ai leli a tuu. (Leisi Romesama 12:2.) Efu a pikin fii abi wan tu akisi, i sa leli en fa enseefi sa go ondoosuku sani. I sa soi en fa a sa wooko anga a Index van Wachttoren-publicaties anga a Ondrosuku Bijbel moro fini​—Gi Yehofa Kotoigi. Bakadati a sa go na a pisi di den e kai ‘A Beibel’, da a suku a pisi di e soi taki a Gadu meke sama sikiifi en. A sani ya o yeepi en fu si taki a Beibel na a ‘wowtu fu Gadu’ (1 Tes. 2:13). I sa soi en fa a sa go ondoosuku sani fu a foto Ninifei a pe den Asiriya sama be e tan. Aini den ten di pasa omen sama di á be e biibi aini Beibel be taki a toli fu a foto Ninifei a be wan anainsitoli. Ma na a pisi ten fu a yali 1850 ondoosukuman kon fende sani fu a foto ya di e soi taki a foto Ninifei be de tuu. A sani ya o yeepi en fu biibi den sani di sikiifi aini Beibel (Sef. 2:13-15). Boiti dati, Beibel polofeititoli e soi taki a foto Ninifei be o kisi poli. Efu a pikin wani sabi fa a polofeititoli ya kon tuu, a sa luku a artikel di den e kai ‘I be sabi a sani ya?’ aini A Wakititolen fu november 2021. I sa gi en taanga-sikin fu maiki den sani di ai leli aini den buku fu a olikanisâsi anga den sani di koniman ondoosuku. Te a si taki den sani ya e kai anga denseefi, da dati o yeepi en fu moo biibi san Beibel e taki.

6. Fa mma anga dda sa yeepi den pikin fu denki bun fu son sani? (Luku a fowtow tu.)

⁶ Yeepi a pikin fii fu si taki den sani di Beibel e taki a tuu. A omen okasi mma anga dda sa fende fu taki anga den pikin fu den. Den takimakandaa ya o yeepi den pikin fu biibi san Beibel e taki. Den sa taki anga den pikin fu den te den go  koi a wan peesi, te den go a goon, te den wawan de a wan peesi efuso te den go luku a Beikantoo. Efu u go a wan fu den peesi ya, neen u si wan sani di Beibel be taki a fesi, dai sa taki anga a pikin fu a toli ya. Pakisei a sani ya: Kande i sa taigi a pikin fii fu a Moab-siton. A siton ya gaandi wan sani fu 3000 yali, a de aini Faansikondee na a foto Parijs. A nen Yehofa sikiifi na a siton ya tu. Efu kande ya poi go a pe a siton ya de, i sa luku fowtow fi en fu kon sabi moo fu a toli ya. Den baala meke wan fu a siton ya tu, a de na a edekantoo fu Yehofa Kotoigi a Warwick a New York. Ma wan pelensipali sani sikiifi neen. A sikiifi taki, Kownu Meisa fu Moab á be wani saka enseefi a Islayeli ondoo. We na aseefi sani ya Beibel e taki tu (2 Kow. 3:4, 5). Te a pikin fii e si taki den sani di Beibel e taki a tuu, da a sani ya o taanga en biibi.​—Luku 2 Koloniki 9:6 tu.

7-8. (a) Saw sa leli fu den sani di Gadu meke? (Luku a fowtow tu.) (b) Sai sa akisi a pikin fu yeepi en biibi taki wan sama de di meke ala sani?

⁷ Gi a pikin taanga-sikin fu poti pakisei a den sani di Yehofa meke. Solanga yu anga a pikin fii e go a wan peesi, i sa yeepi en fu poti pakisei a den sani di Yehofa meke. Saide? Bika ala den sani ya e soi fa Yehofa koni. Wan koniman di e ondoosuku sani den e kai Nicola Fameli taki: Te u luku den sani enke den palaneiti, den sitali, a fasi fa a sikin fu a nkola meke, den sowtu a sowtu guun uwii anga a geli boomiki fu a zonnebloem da a omen moin spiraal patroon we si (Dati na a kofaliki fasi fa den sani ya meke. Kande a sikin fu den efuso fa den e de omen aini kulu). a

⁸ A omen sani den pikin e leli a sikoo. Den e leli fa son wan fu den sani ya bigi, fa den de efuso kande fa den e wooko. Ma pakisei a sani ya: Fa fu den bon? Ala den fiya abi lutu. Te den lutu fu wan bon beli, da a bon e taampu gingin. Te fu kaba, a bon e meke taka, da den taka ya e gi uwii. Baka wan pisiten den e gi boomiki, da den e meke nyanyan. Ma fa a du kon taki ala den sani ya seeka so? Sama meke taki den bon e gi nyanyan te a yuu fu den doo? Efu a pikin fii e teke ten pakisei den sani ya, aw si kiin taki wan Gadu de di meke ala sani (Heb. 3:4). Te a pikin fii e kon moo bigi, i sa akisi en taki: ‘Efu a Gadu na a sama di meke u, da aa poi soi u faw mu libi fu u sa de koloku  tuutuu noh? Bakadati i sa soi en taki, aini a Beibel Gadu soi u faw mu libi efu u wani de koloku.

YEEPI A PIKIN FU FUSUTAN DEN WINI DI AW FENDE TE AI WOOKO ANGA DEN LELI FU BEIBEL

9. On ten a pikin sai poti son akisi?

⁹ Efu a pikin fii e akisi i saide Beibel e taki wa mu du son sani, dai mu meke moiti fu kon fusutan saide a poti a akisi ya. A bun fii akisi iseefi taki: A biibi a pikin fu mi nai biibi den sani di Beibel e leli, efuso a taanga ai taanga gi en fu taigi taawan san ai biibi? Efii wani yeepi a pikin fu fusutan saide we du son sani, i sa sutudeli a I sa piisii fu teego! buku anga en. b

10. Fai sa yeepi a pikin fii fu toon Yehofa mati?

¹⁰ Yeepi a pikin fii fu toon Yehofa mati. Te ye sutudeli anga a pikin fii, i sa koboloiki den akisi anga den ageisitoli aini a Piisii fu teego!-buku fu kon fusutan fa ai denki fu son sani (Odo 20:5). Toli 8 e soi fa Yehofa e booko en ede anga u anga sowtu wini we fende fu di we libi enke fa Gadu wani. Kande baka tei taki fu 1 Yohanisi 5:3, i sa akisi en taki: ‘Di u kon sabi kaba taki Yehofa de enke wan bun mati gi u, da faw mu si den sani di ai taigi u?’ Den sowtu akisi ya o yeepi a pikin fu fusutan taki a di Yehofa lobi u meke a gi u weiti.​—Yes. 48:17, 18.

11. Fai sa yeepi a pikin fii fu wooko anga den leli fu Beibel? (Odo 2:10, 11)

¹¹ Soi a pikin sowtu wini we fende te we wooko anga den leli fu Beibel. Te we leisi Beibel efuso a deiwowtu makandii u sa taki fa Beibel e yeepi wi enke osufamii. Kande i sa soi a pikin saide a bun fu wooko taanga anga saide u mu e taki a tuu ala yuu (Heb. 13:18). I sa soi en tu fa den leli fu Beibel e yeepi u fu moo piisii (Odo 14:29, 30). Efu a pikin e si den wini di we fende te we holi den weiti fu Yehofa, a sani ya o yeepi en fu wooko anga den leli fu Beibel tu.​—Leisi Odo 2:10, 11.

12. Fa wan dda yeepi a boi fi en fu si taki a soso wini aw fende te ai wooko anga den leli fu Beibel?

¹² Steve, wan dda di e tan a Frankrijk e taki fa en anga en uman e yeepi a boi fu den di den e kai Ethan fu kon fusutan taki a di Yehofa lobi u meke ai gi u weiti. A dda e taki, we akisi a boi fu u taki: ‘Saide Yehofa wani u holi den weiti fi en? Fa a sani ya e soi taki a lobi u? San sa pasa efu u nai holi den weiti fu Yehofa?’ Den sowtu takimakandaa ya yeepi Ethan fu kon si taki den sani di Beibel e taki a tuu. Steve taki: ‘A maiki di u wani doo, a fu yeepi en fu si taki Yehofa koni moo wi enke libisama, neen meke a bun te we aliki en ala yuu.’

13. Fa mma anga dda sa yeepi den pikin fu wooko anga den leli fu Beibel?

¹³ Leli a pikin fii fu wooko anga den leli fu Beibel. Wan fasi faw sa du a sani ya, a te a pikin e leisi wan sikoo buku. Kande den sama di de aini a buku e du omen sani di Yehofa á lobi. Kande a buku ya e gi sama taanga-sikin fu waka a den sama ya baka, winsi fa den e libi wan hululibi. Wan sani dii sa du enke mma efuso dda, a fu akisi a pikin fa Yehofa e si den sani di den sama e du aini a buku (Odo 22:24, 25; 1 Kor. 15:33; Filip. 4:8). A sani ya o yeepi en fu peleiki gi a muneli efuso a yefolow. Aw poi taigi den taa pikin tu  fa ai si den sani di den sama e du aini a buku.

LELI A PIKIN FU TAKI FU DEN SANI DI AI BIIBI

14. Sowtu toli e taanga gi yonkuuwan fu taki anga sama fi en?

¹⁴ Son wan fu den yonkuuwan e feele fu taigi taawan san den e biibi. Den e feele te den mu taigi sama saide den nai biibi taki libisama kon fu mongii paansu. Saide? Bika son yuu a fasi fa den muneli anga den yefolow e taki fu a toli ya, sa meke i si enke wi a mongii paansu. Fai sa yeepi a pikin fii fu biibi taki den sani di ai leli aini Beibel a tuu?

15. Saw yeepi yonkuuwan fu biibi taki den sani di den e leli aini Beibel a tuu?

¹⁵ Yeepi a pikin fu taki fu den sani di ai biibi. Aa de fu sen kisi a pikin fii efu ai biibi taki wan Sama de di meke ala sani (2 Tim. 1:8). A omen koniman seefi e biibi taki den sani di we si á kon fu denseefi. Te den luku den sani di de a goontapu, den e si taki a wan sama di koni tuutuu meke den. Neen meke den nai biibi taki libisama kon fu mongii paansu. Wan sani di sa yeepi a pikin fii, a te ai akisi den baala anga sisa san yeepi den fu biibi taki wan sama de di meke ala sani. c

16. Fa mma anga dda sa yeepi den pikin fu den te den e taigi taawan taki wan Sama de di meke ala sani? (1 Peitilisi 3:15) (Luku a fowtow tu.)

¹⁶ Yeepi a pikin fii fu taigi taawan saide ai biibi taki wan Sama de di meke ala sani. (Leisi 1 Peitilisi 3:15.) U sa luku den artikel di e taki fu a toli ya a jw.org (‘JONGE MENSEN VRAGEN​—Schepping of evolutie?’) A omen fasi de ape di e soi fa a pikin fii sa taigi taawan san ai biibi. U sa luku wan fu den penti ya daw luku fa a be o du en, te a mu taki anga wan sama fu san ai biibi efuso leli. Membee en taki aa mu go sitee taki anga den pikin a sikoo. Gi en taanga-sikin fu taki kiin te ai taki fu san ai biibi, da taawan o man fusutan en bun. Kande wan fu den pikin a sikoo taki: ‘Mi dati, a si na mi biibi ye, senten di mi de mia si Gadu ete.’ Wan Kelesten sa piki taki: ‘Kow taki i de aini wan gaan busi e waka,  neen te fu kaba i si wan moin wataa peti di meke anga siton. Kande ala sani mesee te a de taa. Sai be o pakisei? We, i be musu denki taki a wan sama musu meke a wataa peti ya. Ná so noh! A letiso a de anga a goontapu ya tu, a wan sama meke en.’

17. Fa mma anga dda sa gi den pikin fu den taanga-sikin fu suku okasi fu taki anga taawan fu a Beibel?

¹⁷ Gi den pikin fii taanga-sikin fu taki anga taawan fu a Beibel (Rom. 10:10). I sa si a leli di ye leli taawan sani fu Beibel enke tei mu leli pee gitali. Biginbigin yo leli pee wan singi di á taanga tumisi. Ma di yo kon gwenti en, a naw taanga gii moo fu pee. A so a de tu te ye leli taawan san ye biibi. Aa de fii taki omen kofaliki sani, ma taki a wan fasi di o meke taawan fusutan i. Kande i sa akisi wan pikin a sikoo taki: ‘I sabi taki den koniman a den sani di den si a goontapu den e meke? Meke mi soi i wan moin felon.’ Dai sa soi en wan fu den felon di den e kai ‘A wan sama meke en’? Bakaten dai taki: ‘Efu sama e gafa den koniman fu den sani di den meke, da sama u mu gafa te we luku den sani di de a goontapu?’ Kande bakaten a sama o wani sabi moo sani fu Yehofa.

TAN YEEPI A PIKIN FII FU TAANGA EN BIIBI

18. Fa mma anga dda sa tan yeepi den pikin fu den?

¹⁸ We libi aini wan goontapu pe gaanse sama nai dini Yehofa (2 Peit. 3:3). Neen meke mma anga dda, te ye sutudeli anga den pikin fii, gi den taanga-sikin fu sutudeli toli di o yeepi den fu moo lesipeki Yehofa. Yeepi den fu teke ten pakisei san den e leli. Taki anga a pikin fu den sani di Yehofa meke. A sani ya o yeepi en fu a moo fitoow en. Yeepi en tu fu a fusutan den polofeititoli di kon tuu kaba. Begi anga a pikin fii, begi gi en. Efu we meke moiti fu du den sani ya, u sa biibi taki Yehofa o belesi a moiti di we meke. Aw yeepi den pikin fu u tu fu den anga en toon mati.​—2 Kolon. 15:7.