1. Fa sama aini a ten fu Beibel be e si beele?

 BEELE a wan fu den sani di den sama aini a ten fu Beibel be e nyan ala yuu (Gen. 14:18; Luk. 4:4). Neen meke te Beibel e taki fu beele, a nyanyan ai taki (Mat. 6:11; Toli 20:7). Yesesi seefi be koboloiki beele di a be du tu fu den wonduu fi en (Mat. 6:9, 10). Wan fu den wonduu di a be du sikiifi a Yohanisi kapitel 6. Te wo taki fu a toli ya, wo luku saw sa leli fi en aini a ten ya.

2. On ten omen dunsu sama be abi nyanyan fanowdu?

² Baka di den apostel fu Yesesi be kaba peleiki a omen peesi. En anga den go aini wan boto, neen den go a wan peesi pe den be sa boo pikinso (Malik. 6:7, 30-32; Luk. 9:10). Den be go a wan koo peesi a Betsaida. Ma sama be kon yee taki Yesesi be de ape, neen meke omen dunsu sama booko kon ape. Di Yesesi si den aa sende den gwe. A leli den sani fu a Kownukondee. A be e deesi den sama di be siki tu. Di a peesi be bigin dunguu, den apostel be e akisi denseefi san den be o fende fu gi den sama fu den nyan. Son wan fu den sama be abi wan pikin sani fu kaw, ma gaanse fu den be o abi fu go suku sani fu nyan a den kampu (Mat. 14:15; Yoh. 6:4, 5). San Yesesi be o du?

YESESI MEKE DEN FENDE BEELE A WAN WONDUU FASI

3. San Yesesi be taigi den apostel fi en fu du? (Luku a fowtow a fesise fu A Wakititolen.)

³ Yesesi be taigi den apostel fi en taki: ‘Aa de fu den  gwe, u gi den sani fu nyan’ (Mat. 14:16). Ma den á be o poi gi ala den sama sani fu nyan, bika a wan sani fu 5000 manengee be de ape. Efii be o teli ala den uman anga den pikin, da a wan sani fu 15.000 sama den be mu gi nyanyan (Mat. 14:21). Andreyas taki: ‘Wan pikin boi de ya anga feifi beele anga tu pikin fisi, ma a naw sai den somen sama ya’ (Yoh. 6:9). Anga wan sowtu alisi den e kai gerst den be e meke a beele ya. Den pikin fisi a be dee sawtu fisi. Ma den feifi beele anga den tu pikin fisi á be o sai den somen sama di be de ape.

4. San a tekisi fu Yohanisi 6:11-13 e leli u? (Luku a fowtow tu.)

⁴ Fu di Yesesi be wani soi switifasi gi den sama, meke a be akisi den fu sidon aini kulu aini a gaasi (Malik. 6:39, 40; leisi Yohanisi 6:11-13.) Bakadati Yesesi gi en Dda daa fu den beele anga den fisi. Di Yesesi du a sani ya, a be wani soi taki a Yehofa na a Sama di be gi den a nyanyan. A be e soi taki a be e teke en fu bigi tu. A sani ya e soi taki a pelensipali fu u waka a Yesesi baka te we begi fosi u nyan, winsi aw wawan de efuso winsi u de anga taa sama. Bakadati Yesesi meke den bakaman fi en paati a nyanyan gi den sama. Den nyan te den bee fuu. A nyanyan be ipi te, den sama á be poi kaba nyan ala, ma Yesesi á be wani a fika poli. Neen meke a taigi den bakaman fi en fu piki den beele di be fika, bika den be sa nyan mi en moo lati. A toli ya e soi taki Yesesi á be e poli sani. Useefi sa waka neen baka tu. Efi ya wan dda efuso mma, i sa luku a toli ya anga den pikin fii fu soi den  saide a pelensipali fu begi fosi den nyan anga fu soi switifasi gi taawan. I sa soi den taki leti enke Yesesi, den á mu e poli nyanyan.

5. San den sama be wani du di den si den sani di Yesesi be du a dei de? Ma san Yesesi du bakaten?

⁵ Den sama be e foondoo, bika Yesesi a be wan bun leliman, a be du omen wonduu fu deesi siki sama. Den be sabi taki Mosesi be taki Gadu be o sende wan polofeiti gi den. Neen meke kande den be e akisi denseefi taki: ‘A sa de taki a Yesesi na a polofeiti di Gadu be o sende?’ (Deit. 18:15-18) Son wan fu den be e denki taki Yesesi be o de wan bun tiiman di be o man solugu a foluku. Neen meke den ‘be wani poti en enke kownu anga taanga’ (Yoh. 6:14, 15). Efu Yesesi be meke den poti en enke kownu, da a be o de na a se fu den Dyu, bika a ten de a Rome be e taki gi den. Ma Yesesi á du a sani ya. Neen meke en wawan subi go na a mongo. Winsi fa sama be wani dwengi en, toku aa teke se aini politiki. We leli wan moin sani fu a toli ya.

6. Faw sa soi taki we waka a Yesesi baka? (Luku a fowtow tu.)

⁶ Aini a ten ya, sama naw akisi u fu gi den nyanyan a wan wonduu fasi, fu deesi siki sama efuso fu meke u toon kownu. Ma den sa gi u taanga-sikin fu sitemu gi wan sama di den e si enke o man tii wi a  wan bun fasi. Yesesi á be e mumui anga politiki. Neen meke a be taki: ‘A Kownukondee fu mi a ná fu a goontapu ya’ (Yoh. 17:14; 18:36). Aini a ten ya, Kelesten e meke moiti fu waka a Yesesi baka anga ala san den e du. We holibaka gi a Kownukondee fu Gadu. We leli sama fu a Kownukondee ya, we begi fu a kon tu (Mat. 6:10). U sa leli moo sani fu a wonduu di Yesesi be du, neen meke wo luku san a wantu taa sani di u sa leli fi en.

‘DEN Á BE FUSUTAN A WONDUU FU DEN BEELE’

7. San Yesesi be du? San den apostel du di den si a sani di Yesesi du? (Yohanisi 6:16-20)

⁷ Baka di Yesesi gi den sama nyanyan, a meke den apostel fi en teke boto fu go a Kaperna-um baka. Ma Yesesi be subi go na a mongo, bika aa be wani den sama poti en enke kownu. (Leisi Yohanisi 6:16-20.) Di den be de aini a boto, a wataa bigin seke, bika wan gaan winta be e wai. Bakaten Yesesi e waka na a wataa tapu kon a den. A be taigi Peitilisi fu waka na a wataa tapu kon miti en (Mat. 14:22-31). Faisi Yesesi go aini a boto, a wataa á be e seke moo, ala a wataa koo pii. Den disipel fi en be foondoo, neen meke den taki: ‘Yu a Gadu Manpikin tuu’ a (Mat. 14:33). A baka di Yesesi waka na a wataa tapu fosi den taki a sani ya, a ná di a be du a wonduu fu gi den sama nyanyan. Luku san Malikisi be taki fu a toli ya. A be taki: ‘[Den apostel] fi en foondoo di den si a sani ya. Bika winsi fa den be si a wonduu fu den beele toku den á be fusutan ete taki a be sa du a wonduu ya (Malik. 6:50-52). Den disipel fu Yesesi á be fusutan a kaakiti di Yehofa be gi en fu du wonduu. Den sani di Yesesi taki fu a wonduu di a be du anga den beele, e leli u wan taa sani.

8-9. Saide den sama be go suku Yesesi? (Yohanisi 6:26, 27)

⁸ Den sama di Yesesi be gi nyanyan, be soi taki anga den sani di den be abi fanowdu namo den be e booko den ede. Saide u taki so? Bika a taa dei di den si taki Yesesi anga den apostel fi en be gwe, den go aini sowan fu den boto di be komoto a Tiberiyas soso fu be poi doo pe Yesesi anga den bakaman fi en be de. Den go te a Kaperna-um fu go suku Yesesi (Yoh. 6:22-24). A di den be wani leli moo sani fu a Kownukondee meke den be go suku Yesesi? Nono. Den be wani Yesesi gi den sani fu nyan baka. Faw du sabi a sani ya?

⁹ Luku san pasa di den sama fende Yesesi koosube fu Kaperna-um. Yesesi taigi den taki den be e suku en fu di den wani sani fu nyan. ‘Den be nyan te den bee fuu.’ Ma a taigi den taki den ‘mu wooko gi a nyanyan di nai poli’. (Leisi Yohanisi 6:26, 27.) A be taki neen Dda o gi den a nyanyan ya. Den sama ya be musu foondoo di den yee taki nyanyan de di o meke den fende teego libi. San na a nyanyan di Yesesi be e taki fi en ya? Fa den sama be o fende en?

10. San den sama be mu du fu ‘fende teego libi’?

¹⁰ Den Dyu be wani sabi san den mu du fu fende a nyanyan ya. Kande den be e pakisei den sani di a Weiti fu Mosesi be e taki den mu du. Ma Yesesi taigi den taki: ‘Efu u wani Gadu fende u bun, daw mu biibi a sama di a sende kon’  (Yoh. 6:28, 29). Efu den be wani ‘fende teego libi’, da den be mu biibi a sama di Gadu be sende kon. Yesesi be taigi den a sani ya kaba (Yoh. 3:16-18, 36). Boiti dati, a be e taigi den san den mu du fu fende teego libi.​—Yoh. 17:3.

11. Fa den Dyu soi taki anga nyanyan wawan den be e booko den ede? (Psalm 78:24, 25)

¹¹ Den Dyu á be wani biibi Yesesi. Neen meke den be akisi en taki: ‘Da san yo du fu meke u biibi i? Sowtu wonduu yo du?’ (Yoh. 6:30) Den taki den sama na a ten fu Mosesi be e fende mana a wan wonduu fasi. Na a mana den be e nyan ala dei. (Neh. 9:15; leisi Psalm 78:24, 25.) We si kiin taki den sama ya anga soso sani fu nyan den be e booko den ede. Di Yesesi be e taki fu a ‘tuutuu beele di e komoto a hemel’ den ná akisi seefi san a be wani taki anga a sani ya (Yoh. 6:32). Anga den sani di den be abi fanowdu namo den be e booko den ede, neen meke di Yesesi be e taigi den san den mu fu fende teego libi, den á be e fusutan en. San a toli ya e leli u?

SAN MOO PELENSIPALI

12. Fa Yesesi soi san moo pelensipali?

¹² Disi a wan fu den pelensipali sani di we leli fu a toli di sikiifi a Yohanisi kapitel 6. U mu si a aliki di u mu aliki Gadu anga a de di wi anga en de mati enke den moo pelensipali sani. Di Saatan be tesi Yesesi, Yesesi be taigi en taki: ‘A ná beele namo sa meke sama tan a libi, ma a te den e du ala san Yehofa taki’ (Mat. 4:3, 4). Boiti dati, na a sani ya a be soi go tu di a be e holi a lezing na a mongo (Mat. 5:3). Neen meke u mu akisi useefi taki: ‘Mi e si a de di mi anga Gadu de mati pelensipali moo den sani di mi abi fanowdu?’

13. (a) Saide aa fowtu fu poti pakisei a nyanyan? (b) Anga san Pawlesi taki u mu luku bun? (1 Korentesama 10:6, 7, 11) (Luku a fowtow tu.)

¹³ Aa fowtu fu begi fu den sani di wi abi fanowdu, u sa piisii fu den sani ya tu (Luk. 11:3). Beibel taki meke ala sama ‘nyan, diingi, da a piisii anga a taanga wooko di a du’. ‘Na a tuu Gadu e gi pasi fu a sani ya pasa’ (Peleik. 2:24; 8:15; Yak. 1:17). Ma u mu de na ain, bika den sani di wi abi fanowdu á mu de den moo pelensipali sani aini u libi. Pawlesi be taki fu a sani ya aini a biifi di a be sende gi den Kelesten fu Korente. A be taki fa den Islayelisama be tyai denseefi di den be de aini a sabana koosube fu Sinai mongo. A taki u mu luku bun fu wa ‘angii fu du ogii enke fa [den Islayelisama] be e angii fu du den sani de’. (Leisi 1 Korentesama 10:6, 7, 11.) A wan wonduu Yehofa be du fu gi den Islayelisama nyanyan aini a sabana. Ma fu di giili be e kisi den gi nyanyan, meke sani be miti den (Num. 11:4-6, 31-34). Di den dini a gowtu kaw, den soi taki nyanyan, diingi anga piisii be moo pelensipali gi den (Ek. 32:4-6). Pawlesi be taki fu a toli ya fu wasikoi den Kelesten fosi Yelusalem anga a tempel be poli. Useefi e libi na a kaba fu a goontapu ya. Neen meke u mu poti pakisei na a sani di Pawlesi be taigi den Kelesten, da u naw meke aseefi fowtu di den be meke.

14. San Beibel e taki fu nyanyan?

¹⁴ Yesesi taki u mu begi ‘gi san wi abi fanowdu’. A taki u mu begi fu sani waka enke fa Gadu wani tu (Mat. 6:9-11). Fai si enke a goontapu o de a ten de? Beibel taki goontapu o lai nyanyan. Yesaya 25:6-8 e soi taki aw de lopulopu. Psalm 72:16 e taki: ‘Te a den mongo ede seefi  nyanyan o de pasa maiki. A nyanyan di a kownu o koti o ipi enke den bon fu Libanon. Den sama di e tan aini a foto o ipi enke a gaasi a goontapu.’ Kande ya poi wakiti fu boli wan sani dii lobi aini a nyun goontapu. Yo paandi i eigi doloifigoon, da iseefi o nyan den sii fi en (Yes. 65:21, 22). Ala sama a goontapu o piisii te den sani ya o pasa.

15. San den sama di o weki baka o leli? (Yohanisi 6:35)

¹⁵ Leisi Yohanisi 6:35. Pakisei den sama di Yesesi be gi den beele anga den fisi. Winsi fa sowan fu den sama ya á be e biibi Yesesi, toku den o weki baka. Kande yu anga wantu fu den o miti (Yoh. 5:28, 29). Den sama ya mu kon fusutan san Yesesi be wani taki anga den wowtu ya: ‘A mi na a beele di e gi libi. Efu wan sama e waka a mi baka, angii naw kii en moo.’ Den sama ya mu biibi taki Yesesi dede gi den. A ten de ala den sama di o weki baka anga den pikin di o meke aini a nyun goontapu, mu kon sabi Yehofa anga den sani a abi a pakisei. Ná pikin switi aw switi te wo leli den sama ya. Aw switi moo den nyanyan di wo nyan aini a nyun goontapu.

16. San wo luku aini a taa artikel?

¹⁶ Aini a artikel ya, u luku wan pisi fu a toli di sikiifi a Yohanisi kapitel 6. Ma moo sani de ete di u sa leli fu a toli ya. Den Dyu di Yesesi be e taki anga den be mu aliki bun te a be e taki anga den, a dati u mu tu. Aini a taa artikel wo go doo anga a toli di sikiifi a Yohanisi kapitel 6.