1-2. San a wantu sani di e meke u kee?

 ALA sama di de ya, kee wan leisi kaba. Son leisi a wan sani pasa di e meke u fii bun. Son leisi a piisii we piisii, we bali lafu, da te fii denki ala wi ain e lon wataa. Son sama kee di den si a beibi fu den a fosi leisi. Taawan bali kee di den miti wan famii fu den di a langa den á be si.

² Ma den pisiten aini u libi di we moo kee, a te wi abi polobelema efuso te we tyali. Kande wan sama libi ogii anga u. Kande u siki efuso wan sama di u lobi dede. Te den sani ya e pasa, we fii enke fa Yelemiya be e fii na a pisiten di den Babilonsama be poli Yelusalem. Yelemiya be taki: ‘Mi e kee dyullu . . . Mia poi tan mi á kee.’​—Tyali 3:48, 49.

3. Fa Yehofa e fii te den sama di e dini en e pina? (Yesaya 63:9)

³ Yehofa e si te we kee fu di wi abi booko-ede. Ai si te sani e moo wi. Beibel e taigi u taki Yehofa e si te den sama di e dini en e tyali. Neen meke a de kabakaba fu langa wan ana gi u te we begi en (Ps. 34:15). Yehofa Gadu de enke wan dda di lobi u, neen meke a naw daaidaai fu yeepi u te ai si we kee.​—Leisi Yesaya 63:9.

4. Sowtu toli aini Beibel wo luku?

 ⁴ We leisi aini Beibel san Yehofa be du te den sama di be e dini a fositen be e pina. We si a sani ya te u poti pakisei a sama enke Hana, David anga Kownu Heskiya. Wo luku san be pasa anga den sama ya. San Yehofa be du fu yeepi den, anga fa den toli fu den e gi u taanga-sikin te sama e libi ogii anga u aini a ten ya efuso te we tyali.

TE WE TYALI

5. Fa den sani di be e miti Hana be e meke a fii?

⁵ A omen sani be e miti Hana di be e meke ai tyali. Wan fu den sani a taki Hana be abi wan meti den e kai Penina. Ná pikin soso a uman ya be e soso Hana, bika a be abi omen pikin. Ma Hana á be poi meke pikin (1 Sam. 1:1, 2). Yali go yali kon Penina be e soso Hana. Fai be o fii efu a yu a sani ya be e miti? Ná pikin tyali Hana be e tyali. Beibel e taki: ‘A be e kee, nyan seefi aa be e wani nyan.’​—1 Sam. 1:6, 7, 10.

6. Pe Hana go fu fende taanga-sikin?

⁶ Wan fu den sani di yeepi Hana fu kisi enseefi baka na a go di a be e go na a tabernakel fu dini Yehofa. Di a de ape, a begi Yehofa taki: ‘Gaantangi mi e begi i baa, poti pakisei na a nowtu fi i uman saafu. Ná feegete mi’ (1 Sam. 1:10b, 11). Hana taigi Yehofa fa a be e fii anga san a be e pakisei. Yehofa be musu e tyali. Ma a be musu e fii bun tu di Hana begi en fu a yeepi en, bika a be e si en enke en umanpikin di de a nowtu!

7. Fa Hana fende taanga-sikin baka di a taigi Yehofa fa ai fii?

⁷ Fa Hana fii baka di a taigi Yehofa fa ai fii? Fa a fii baka di Gaan Pilisite Eli taigi en taki Yehofa o aliki a begi fi en? Beibel e taigi u taki: ‘A gwe neen a go nyan. I be man si neen fesi taki aa be e kusumi moo’ (1 Sam. 1:17, 18). Winsi fa sani á be kengi wantenwanten tokuso Hana be fii moo bun, bika a be e taigi Yehofa fa ai fii. A be fika ala sani gi en. Yehofa be si a fuka fu Hana, a be si di ai kee, neen meke a belesi en bakaten anga wan manpikin.​—1 Sam. 1:19, 20; 2:21.

8-9. Te u luku san Hebrewsama 10:24, 25 e taki, da saide u mu go a den komakandaa? (Luku a fowtow tu.)

⁸ San we leli. Wan sani e miti i nownow di e meke ye kee? We kande wan  mati fii efuso wan famii fii dede. Te den sowtu sani ya e miti u we wani de u wawan. Ma leti enke Hana u mu go na a tabernakel tu, dati a den komakandaa di we go ala wiki. U mu meke moiti go winsi u nai fii so bun. (Leisi Hebrewsama 10:24, 25.) Den sani di wo leli a den komakandaa ya anga den tekisi di wo leisi o meke u fii bun baka. Den o yeepi u fu pakisei sani di bun. Den o yeepi u fu wa buuya winsi sani á kengi wanboowanboo.

⁹ Te u de a den komakandaa, den baala anga sisa e gi u taanga-sikin. Den e soi taki den lobi u. Ala den sani ya e meke u fii moo bun (1 Tes. 5:11, 14). Wan baala di be e pionili lasi en uman aini dede. A baala ya taki: ‘Te anga now mi e kee. Son yuu mi e sidon mi wawan da mi e kee. Ma den komakandaa e yeepi mi fu kisi miseefi baka. A fasi fa den baala anga sisa e poti pakisei a mi e meke mi fii taki a ná mi wawan de. Son yuu mi e kusumi, mi e booko mi ede. Ma solanga mi doo a den komakandaa, mi e fii moo bun.’ Te u de a den komakandaa Yehofa sa koboloiki den baala anga sisa fu de enke wan ahala gi u.

10. Faw sa waka a Hana baka te we kusumi?

¹⁰ Hana be fende taanga-sikin di a be begi Yehofa tu. Useefi sa ‘fika ala den polobelema’ fu u gi en, da u biibi taki aw yeepi u (1 Peit. 5:7). Wan sisa di fufuuman be kii a man fi en e taki: ‘Ná pikin tyali mi be e tyali. Mi be e si enke noiti moo mio piisii baka. Ma a sani di be e yeepi mi na a begi di mi be e begi Yehofa. Mi be e si tuutuu taki a de enke wan Dda di lobi en pikin. Son yuu mia be e sabi san fu taki te mi be e begi, ma tokuso Yehofa be fusutan mi. Te mi be e buuya mi be e akisi en fu a yeepi mi. Da wantenwanten mi be e fii moo bun, mi be e sabi san fu du.’ Yehofa e fusutan i te ye taigi en fa ye fii. Neen meke winsi sani á kengi tokuso a poi yeepi i fu kisi iseefi baka (Ps. 94:19; Filip. 4:6, 7). I sa biibi taki aw pai i fu a moiti di ye meke fu dini en anga i hii ati.​—Heb. 11:6.

TE WAN SAMA DII LOBI LIBI OGII ANGA I

11. Fa David be e fii di sama be e libi ogii anga en?

¹¹ A omen sani be e miti David aini en libi di be e meke a kee. Wan hii pisiten a omen sama á be lobi en. Seefi wantu fu den mati anga famii fi en be e libi ogii anga en. Den be e puubei fu kii en tu (1 Sam. 19:10, 11; 2 Sam. 15:10-14, 30). Wan leisi di den sani ya be e miti en a sikiifi taki: ‘Mi weli fu geme. Ala neti mi e kee. Mi e kee te, da ala mi bedi e nati tyimoo anga den wataa ain fu mi.’ Fu saide David be e fii so? We enseefi taki a ‘fu di sama e libi ogii anga mi’ (Ps. 6:6, 7). Ná pikin kusumi David be e kusumi di sama be e libi ogii anga en. A sani ya be e hati en te da ai kee.

12. Te u luku a sani di sikiifi a Psalm 56:8, da san David be sabi?

¹² Winsi fa omen sani be e miti David, toku a be sabi taki Yehofa lobi en. A be sikiifi taki: ‘Yehofa o yee fa mi e kee’ (Ps. 6:8). Wan taa leisi baka  a be sikiifi a sani di u poi leisi aini Psalm 56:8. (Leisi en.) Den wowtu ya e soi u taki Yehofa lobi u, ai booko en ede anga u tu. David be e fii enke Yehofa be e poti den wataa ain fi en aini wan bataa efuso sikiifi den aini wan buku. A be sabi taki Yehofa be e si san e miti en. Boiti dati, a be sabi tu taki Yehofa sabi fa ai fii.

13. San noiti wa mu feegete winsi sama e libi ogii anga u? (Luku a fowtow tu.)

¹³ San we leli. Ye fii booko-saka fu di wan sama dii be e fitoow libi ogii anga i? Kande ye kusumi fu di a sama di yu anga en be abi mofu fu toow gwe fika i efuso kande i toow booko a wan fasi di ya be denki. Ma kande a wan sama dii lobi gwe fika Yehofa tu. Wan baala di toowpaa waka gi en taki: ‘Mia poi biibi taki a sani ya miti mi. Mi be e fii booko-saka, mi be e tyali, mi ati be e boon tu.’ Efu sama e libi ogii anga i, a bun fu holi a pakisei taki Yehofa naw gwe fika i noiti. A baala be taki: ‘Mi kon si taki libisama sa libi ogii anga u, ma a Yehofa aw siton mongo. Ala yuu a de kabakaba fu yeepi u. Noiti ai gwe fika den sama di e dini en anga den hii ati (Ps. 37:28). Yehofa lobi i moo libisama. Son yuu wan sama dii lobi sa libi ogii anga i, bika sama e kengi. Ma Yehofa Gadu nai kengi. Ala yuu a de ape fu holibaka gi u, bika a lobi u tuutuu (Rom. 8:38, 39). A winsi fa sama e libi ogii anga u, tokuso u Dda di a hemel de ape gi u.

14. Sowtu taanga-sikin we fende a Psalm 34:18?

¹⁴ Efu sama e libi ogii anga u, u sa fende taanga-sikin fu den sani di David be taki a Psalm 34:18. (Leisi en.) Wan ondoosuku e soi taki den wowtu ‘sama di lasi-ati’ ain a tekisi ya, e soi go a ‘den sama di e fii enke den naabi nawan howpu moo’. Ma fa Yehofa e yeepi den sama di e fii so? Leti enke fa wan dda di lobi en pikin e koi en te ai kee, a letiso Yehofa e booko en ede anga u bika a de ‘koosube’ fu u. Te we fii booko-saka fu di sama libi ogii anga u efuso fu di den gwe fika u, Yehofa sabi fa we fii. A de kabakaba fu yeepi u tu. Son leisi winsi we fii enke u naabi fa, tokuso ai gi wi a kaakiti fu go doo. Ai gi u howpu tu di o yeepi fu  pasa den tesi di o miti u aini a ten di e kon.​—Yes. 65:17.

YEHOFA E SI TE WE KEE TE U SIKI

15. Sowtu sani be e gi Heskiya booko-ede?

¹⁵ Di Kownu Heskiya fu Yuda be abi 39 yali, a be kon fusutan taki a abi wan siki di á poi deesi. Yehofa be sende polofeiti Yesaya fu taigi kownu Heskiya taki a siki ya be o kii en (2 Kow. 20:1). Di Heskiya yee a sani ya, ná pikin kee a kee. A begi Yehofa fu a yeepi en.​—2 Kow. 20:2, 3.

16. San Yehofa be du gi Heskiya?

¹⁶ Di Yehofa yee a begi fu Heskiya anga di a si fa a be e kee, tyali kisi en neen meke a taigi en taki: ‘Mi yee a begi fii. Mi si den wataa ain fii. Mi o meke i kon betee baka.’ Bakaten Yehofa be sende polofeiti Yesaya fu go taigi Heskiya taki a be o meke a libi moo langa. A be taigi en tu taki, a be o fii Yelusalem puu a den Asiriyasama ana.​—2 Kow. 20:4-6.

17. Fa Yehofa e yeepi u te u siki? (Psalm 41:3) (Luku a fowtow tu.)

¹⁷ San we leli. Sai sa du efu yu abi wan siki di á poi deesi? Taigi Yehofa fa ye fii. Aw aliki i winsi ye kee te ye begi en. Beibel e leli u taki ‘Yehofa, a Dda di abi tyali-ati, a Gadu di e toosutu sama’ o holibaka gi u winsi sowtu tesi e miti u (2 Kor. 1:3, 4). Aini a ten ya Yehofa naw puu ala den polobelema fu u, ma aw gi u a kaakiti fu holidoo. (Leisi Psalm 41:3.) Aw gi u en santa yeye. Aw gi u koni tu. Den sani ya o yeepi fu wa buuya (Odo 18:14; Filip. 4:13). Wan taa sani di e meke u fii bun, a di a paamisi u taki sama naw siki moo aini a ten di e kon.​—Yes. 33:24.

18. Sowtu tekisi e gii taanga-sikin tei siki efuso te yu abi booko-ede? (Luku a faki di den e kai ‘ Wantu tekisi di e yeepi u fu fii bun baka’.)

¹⁸ Den sani di Yehofa be taigi Heskiya be toosutu en. Useefi sa fende toosutu te we luku san Yehofa e taigi wi aini Beibel te wi abi booko-ede. Den o yeepi u fu kisi useefi baka (Rom. 15:4). Di wan sisa a West Afiikan be kisi kanker, ná pikin tyali a be e tyali. A be e kee. A taki: ‘Wan tekisi di e toosutu mi a Yesaya 26:3. Winsi fa wa poi puu den polobelema fu u, tokuso a tekisi ya e soi u taki Yehofa o yeepi u fu kisi useefi baka, aw yeepi u fu holidoo te tesi e miti u.’ Yu abi wan tekisi di e gii  taanga-sikin te ye fii enke ya poi moo fu dii siki?

19. Saw pasa aini a ten di e kon?

¹⁹ Fu di we libi aini den lasti dei meke a omen sani o miti wi aini ten di e kon. Ma leti enke faw si aini den toli fu Hana, David, anga Kownu Heskiya, Yehofa e si te ibiiwan fu we tyali, neen meke u mu e begi en daw taigi en fa we fii te sani e moo wi. Noiti u mu gwe fika den baala anga sisa efuso a kemeente fu di wi abi polobelema. Efu we meke moiti ala yuu fu e leisi a Beibel fu fende taanga-sikin, a sani ya o yeepi u fu dini Yehofa go doo. Aw belesi u tu. Aini a ten di e kon u naw tyali moo, sama naw libi ogii anga u moo, u naw kee moo fu di we tyali (Openb. 21:4). A soso wataa-ain fu piisii o de a ten de.