Apostel Pawlesi be sikiifi wan biifi gi Timotiyesi neen a taigi en taki: ‘Mi e taigi i a fesi Gadu anga Kelestesi anga den engel di a teke fu du son wooko gi en taki, i mu aliki ala den sani di mio taigi i. Meke moiti ala yuu fu kon sabi a fini fu wan toli. Yu á mu paatibee.’​—1 Tim. 5:21.

Fu sabi sowtu engel den e taki ya, wo luku sowtu engel den á kai aini a kulu ya. Fu taki en kiin, a ná den 144.000 sama di o go tii a hemel a tekisi ya e taki fi en. Di Pawlesi be sikiifi a biifi ya gi Timotiyesi, den sama di be o go tii makandaa anga Yesesi á be bigin kisi wan opobaka ete fu go a hemel. Den apostel anga den taa salufuwan, á be toon makiti yeye a hemel ete. Wa poi taki, a den a ‘den engel di Gadu teke fu du son wooko gi en’.​—1 Kor. 15:50-54; 1 Tes. 4:13-17; 1 Yoh. 3:2.

Den ‘engel di Gadu teke fu du son wooko gi en’ a ná den engel di be taangayesi Gadu na a ten fu a fuudu. Den engel ya be holibaka gi Saatan, neen den toon ogii yeye. A so den toon feyanti fu Yesesi tu (Gen. 6:2; Luk. 8:30, 31; 2 Peit. 2:4). Aini a ten di e kon, den o iti den go aini a dipi peti di nai doo doti. A 1000 yali langa den o tan ape. Da bakadati Yehofa o poli den makandaa anga Saatan.​—Yud. 6; Openb. 20:1-3, 10.

Den engel di Pawlesi be e taki ‘Gadu teke fu du son wooko gi en’ be musu de den engel a hemel di be e wooko makandaa anga ‘Gadu anga Kelestesi Yesesi’.

A omen dunsudunsu engel de di e dini Yehofa anga den hii ati (Heb. 12:22, 23). Ma a ná ala den engel ya e du aseefi wooko (Openb. 14:17, 18). Bika tei luku, Yehofa be akisi wan engel fu kii 185.000 Asiriya suudati (2 Kow. 19:35). Kande wan kulu engel o fende a faantiwowtu fu ‘go puu den sama di e meke taawan sondu, anga den sama di e du ogii aini a Kownukondee fu Yesesi (Mat. 13:39-41). Taawan kande o fende a gaandi fu go ‘teke ala den sama di Gadu kai’ fu go tii a hemel (Mat. 24:31). Son wan fu den engel e ‘holibaka gi u’ fu ogii á miti u.​—Ps. 91:11; Mat. 18:10; luku Mateyesi 4:11; Lukasi 22:43 tu.

Den ‘engel di a teke fu du son wooko gi en’ di kai aini 1 Timotiyesi 5:21 e soi go kande a den engel di be mu yeepi fu sani waka bun aini den kemeente. Aini a biifi di Pawlesi sikiifi, a soi fa owluman mu tyai den faantiwowtu fu den anga fa den sama aini a kemeente mu soi lesipeki gi den. Owluman á mu e ‘paatibee. Den mu e meke moiti fu sabi a fini fu wan toli’ te den e teke wan bosoloiti. A pelensipali taki den owluman e du a sani ya bika ‘Yehofa, Yesesi anga den engel di a teke fu du son wooko’ e luku fa den e solugu a kemeente. Sowan fu den engel abi a faantiwowtu fu yeepi a kemeente, taawan e kibii den sama di e dini Yehofa, den e holibaka gi a peleikiwooko. Taawan e tyai bosikopu gi Yehofa.​—Mat. 18:10; Openb. 14:6.