I leisi ala Den Wakititolen fu a yali ya? Luku efii poi piki den akisi ya osi:

Faw sa waka a Yehofa baka te u luku a fasi fa ai si umansama?

Yehofa nai paatibee, a nai si enke manengee bun moo umansama. Gadu e aliki umansama. Ai poti pakisei a fa den e fii anga san a den booko-ede fu den. Ai gi den wooko fu du aini en olikanisâsi tu.​—w24.01, blz. 15-16.

Faw sa du san sikiifi a Efeisesama 5:7, pe e taki: ‘Ná paa anga den?’

Apostel Pawlesi be wasikoi u fu wi á paa anga sama di o meke a taanga gi u fu libi enke fa Yehofa wani. U mu holi a pakisei taki a omen peesi u sa miti den sowtu sama ya, ma boiti dati den e de a internet tu.​—w24.03, blz. 22-23.

Anga sowtu toli u mu luku bun?

Son yuu sama di abi a bun fu wi a pakisei sa taigi u omen sani di ná tuu. Sama di wa sabi a internet sa sende omen lei toli gi u fu leisi tu. U mu luku bun anga den sama di daai baka gi a tuu biibi, bika a omen lei den e taki fu a olikanisâsi.​—w24.04, blz. 12.

San u sabi fu a fasi fa Yehofa o kuutu Kownu Salomo, den sama fu Sodom anga Gomora anga den sama di be dede na a pisiten fu a fuudu? San wa sabi?

Wa sabi efu Yehofa naw gi ala den fiya wan opobaka. Ma saw sabi a taki en a wan Gadu di e koti kuutu a wan leti-fasi. A abi tyali-ati, a poi si san de aini wi ati tu.​—w24.05, blz. 3-4.

San wani taki Yehofa de enke wan ‘Siton mongo’ gi u? (Deit. 32:4)

Yehofa de enke wan kibii peesi gi u. U sa fitoow en, bika ala yuu ai du san a taki. Yehofa nai kengi, u sa biibi taki aw du san a paamisi u aini a ten di e kon.​—w24.06, blz. 26-28.

Saw yeepi i fu teke gwenti aini wan nyun kemeente?

Efii go a wan nyun kemeente, a bun fii fitoow Yehofa. Aw yeepi i leti enke fa a be e yeepi den sama di be e dini en aini a ten di pasa. Ná poti pakisei a den sani di a gaandi kemeente be e du. Ná maiki den tu kemeente anga denseefi. Du ala sai poi fu wooko makandaa anga den baala anga sisa a pei go, dai meke nyun mati.​—w24.07, blz. 26-28.

San we leli fu den 3 ageisitoli di sikiifi a Mateyesi kapitel 25?

A ageisitoli fu den sikapu anga den kaabita e leli u taki u mu dini Yehofa anga u hii ati, noiti u mu gwe fika en. A ageisitoli fu den 5 koni yonkuu uman di á be siibi anga man anga den 5 donwan e leli u taki u mu de seekaseeka ala yuu. A ageisitoli fu den talenti e leli u taki, u mu wooko taanga gi Yehofa. Wa mu lesi.​—w24.09, blz. 20-24.

On hei a pikin baikon na a doomofu fu a tempel fu Salomo be de?

Aini 2 Koloniki 3:4 son kopi fu den gaandi Beibel be e taki aini a tekisi ya taki a baikon be hei wan sani fu 53 meter. Taa kopi enke a Kodex Alexandrinus anga a Kodex Ambrosianus di den be fende wan sani fu 600 yali baka a ten fu den fosi Kelesten, e taki a be hei wan sani fu 9 meter. Te u luku fa den osu be e meke a fositen, da disi e kai anga ‘a fasi a sikotu fu a tempel be deki’.​—w24.10, blz. 31.

San wani taki wan dinali mu de ‘a man fu wan uman’? (1 Tim. 3:12)

A sani ya wani taki a baala mu toow anga wan uman namo. Aa mu e waka gi en toowpaa tu. Aa mu e poolo gi taa umansama efuso poti pakisei a den a wan fasi di á fiti.​—w24.11, blz. 19.

Saide u sa taki den sani di sikiifi a Yohanisi 6:53 á be e soi go a fa a Membeefesa be mu holi?

Di Yesesi be taki aini Yohanisi 6:53 fu nyan en sikin anga diingi en buulu, anga den Dyu fu Galileya aini a yali 32 a be e taki. Den Dyu ya be mu soi ete taki den e biibi Yesesi anga den hii ati. Ma wan yali bakadati, di a seeka sani fu holi a Membeefesa a fosi leisi a Yelusalem, anga den 11 bakaman fi en a be e taki. Den man ya be o fende a gaandi fu tii makandaa anga en a hemel.​—w24.12, blz. 10-11.