Efu a sani ya a be tuu, da fa a libi be o de? Pakisei a sani ya, wan boi fu wan baala kii enseefi. Di a sani ya pasa, a ná pikin hati a hati a baala. A akisi enseefi efu Yehofa be si a fesi taki en anga en uman be o poi pasa a tesi ya. A omen ongooku e miti wi aini a goontapu ya. U mu biibi taki Yehofa e luku a fesi san anga san o miti u?

Te u luku 1 Korentesama 10:13 wi e si taki Yehofa nai luku a fesi efu wi o man holidoo, fosi wan tesi miti u. Saide u sa taki a sani ya? Wi o luku fo sani di o yeepi u fu fusutan a toli ya.

A fosi sani, Yehofa gi libisama a okasi fu luku san den wani du anga den libi. A nai dwengi u fu libi enke fa a wani (Deitolonomi 30:19, 20; Yowsuwa 24:15). Te wi e du sani di Yehofa lobi, u sa biibi taki a o yeepi u fu sabi san u mu du (Odo 16:9). Ma te u du wan sani sondee fu denki bun fosi, da wi o abi fu tyai den bakapisi fu a fowtu di u meke (Galasiyasama 6:7). Efu a Yehofa e taki a fesi san mu miti u te u meke wan fowtu, da i si enke a gi wi a okasi fu du san u wani tuutuu?

Du fu tu, Yehofa nai kibii wi gi ongooku (Peleikiman 9:11). Son leisi ongooku e miti sama fu di den de a wan peesi a wan ten di den á be sabi taki ogii o pasa ape. Yesesi be taki fu wan ongooku di be kii 18 sama, fu di wan tolen be kai a den tapu. A soi kiin taki a ná Gadu be kii den (Lukasi 13:1-5). A ná wan koni sani fu denki taki te wan ongooku pasa, da Gadu e luku sama a o meke tan a libi anga sama a o fika fu dede.

Du fu dii sani, ala u mu soi taki u nai gwe fika Yehofa. Saatan taki a di Yehofa e gi a foluku fi en sani meke den e dini en. A taki te tesi miti u wi o gwe fika Yehofa (Yopu 1:9-11; 2:4; Openbaring 12:10). Efu Yehofa e kibii u gi tesi, da a be o gei enke Saatan abi leti.

Du fu fo, Yehofa nai luku a fesi fu sabi ala den sani di o miti u. A tuu taki Yehofa poi sabi ala den sani di o pasa a fesi (Yesaya 46:10). Ma Beibel e soi taki a ná ala yuu ai koboloiki a koni fi en fu sabi sani a fesi (Genesesi 18:20, 21; 22:12). Yehofa a wan Gadu fu lobi. Ai du sani a wan leti fasi, neen meke a nai puu a gaandi di a gi u fu du san u wani anga u libi a wi ana.—Deitolonomi 32:4; 2 Korentesama 3:17.

Da san Pawlesi be abi a pakisei di a taki Yehofa „ná o meke tesi di yu á poi tyai, miti yu”? A sani di Pawlesi taki e soi san Yehofa e du te wan tesi miti u, a ná fosi tesi miti u ai du den sani ya.  * (Luku a maiki a ondoo.) Efu wi e fitoow Yehofa a o yeepi u fu pasa ala den polobelema di e miti u (Psalm 55:22). Wi o luku tu sani di meke Pawlesi taki a sani ya.

A fosi sani di meke Pawlesi taki a sani ya, a fu di den tesi di e miti u, e miti ’taa sama’ tu. Solanga u de aini a goontapu fu Saatan, wi o abi taanga ten. Kande ongooku miti u tu. Ma efu wi e fika useefi gi Yehofa, wi o poi pasa den tesi ya. Wi o holidoo tu (1 Peitilisi 5:8, 9). Na  a bigin fu 1 Korentesama kapitel 10, Pawlesi kai wantu tesi di be e miti den Islayelisama aini a sabana (1 Korentesama 10:6-11). Den sama di be e fitoow Yehofa be pasa den tesi ya. Ma son wan fu den Islayelisama ná aliki Yehofa. Den gwe fika Yehofa fu di den á be e biibi en.

Du fu tu sani di meke Pawlesi taki a sani ya a fu di, „u sa fitoow Gadu”. San a sani ya wani taki? Te u luku san Yehofa du gi a foluku fi en den ten di pasa, da wi e si taki ala yuu ai yeepi den sama di „lobi en anga den sama di e holi den weiti fi en” (Deitolonomi 7:9). Wi e si taki ala yuu Yehofa e du san a paamisi (Yowsuwa 23:14). U sa fitoow taki (1) Yehofa ná o gi pasi taki a tesi ibi gi u te da wi á poi holidoo. Boiti dati (2) a o ’yeepi u fu holidoo’.

Fa Yehofa e „yeepi” den sama di e fitoow en? A tuu taki a poi puu a tesi. Ma holi a pakisei taki Pawlesi be taki Yehofa o ’yeepi u fu u holidoo’. Son leisi a kaakiti ai gi wi fu u sa holidoo. Meke u luku wantu fasi fa ai du a sani ya.

• Yehofa e „toosutu u te u de aini banowtu” (2 Korentesama 1:3, 4). A sa koboloiki a Beibel fu yeepi u fu wi a buuya te tesi miti u. Ai koboloiki en santa yeye anga a koni saafu di u sa fitoow tu.—Mateyesi 24:45; Yohanisi 14:16, Romesama 15:4.

• Yehofa sa koboloiki en santa yeye fu yeepi u fu sabi san u mu du (Yohanisi 14:26). A santa yeye sa yeepi u fu membee wan pisi aini Beibel di sa yeepi u fu du sani anga koni.

• Yehofa sa koboloiki den engel fu yeepi u tu.—Hebrewsama 1:14.

• Yehofa sa meke den baala anga sisa yeepi u tu. Den sa gi u taanga-sikin anga den sani di den e taki efuso du.—Kolosesama 4:11.

San den sani di Pawlesi sikiifi a 1 Korentesama 10:13 e leli u? Yehofa nai taki a fesi sowtu tesi mu miti u. Ma u sa biibi taki efu wi e fitoow en, a o yeepi u fu pasa ala den tesi di e miti u. U sabi tu taki ala yuu Yehofa o yeepi u fu holidoo.