1, 2. (a) San Yehofa meke u sabi? (b) San Yehofa paamisi wi a Yesaya 46:10, 11 anga 55:11?

A FOSI tekisi fu Beibel taki wan sani di á taanga fu fusutan. A taki: „Na a bigin Gadu be meke hemel anga goontapu” (Genesesi 1:1). A ná ala den sani di Gadu meke wi e si. Boiti dati wi á kaba sabi son sani di a meke. Sani enke hemel, a mun, sitali, a san, anga a zwaartekracht (Peleikiman 3:11). Ma Yehofa meke u sabi saide a meke goontapu anga libisama. A meke libisama anga den manii di enseefi abi. A be wani den libi fu teego a goontapu (Genesesi 1:26). Den be o de en pikin, da a be o de den Dda.

² Aini du fu dii kapitel fu Genesesi wi e leisi taki sani á be waka enke fa Yehofa wani (Genesesi 3:1-7). Ma polobelema á de di Yehofa á poi losi. Sani á de di poi tapu Yehofa fu du san a wani tu (Yesaya 46:10, 11; 55:11). U sa biibi taki san Yehofa be wani na a bigin, o pasa na a yuu di a mu pasa.

3. (a) San a wantu pelensipali leli fu Beibel? (b) Saide wi o taki fu den sani ya? (c) Sowtu akisi wi o luku?

 ³ U sabi saide Yehofa meke goontapu anga libisama. U sabi tu san Yesesi o du fu meke sani waka enke fa Yehofa wani. Disi a wantu pelensipali leli fu Beibel. Kande di u bigin sutudeli Gadu Wowtu a den sani ya a den fosi sani di u leli. Ma u wani yeepi taawan fu sabi den sani ya tu. A yali ya, wi abi wan moin okasi fu du a sani ya te wi e kai sama fu kon na a Membeefesa (Lukasi 22:19, 20). Efu den kon na a Membeefesa, den o leli moo fu den sani di Gadu wani du gi libisama. Neen meke a be o bun fu bigin denki san wi o akisi den sama fu gi den taanga-sikin fu kon na a Membeefesa. Wi o taki fu dii akisi aini a artikel ya: Saide Gadu meke goontapu anga libisama? Saide sani á waka enke fa Gadu be wani? Saide a dede fu Yesesi o meke sani waka enke fa Gadu wani?

4. Fa den sani di Gadu meke e gi en gaandi?

⁴ A Yehofa meke ala sani. A meke ala sani a wan foondoo fasi (Genesesi 1:31; Yelemiya 10:12). San wi e si te u luku den moin sani di Gadu meke anga a fasi fa a sete den? Te u luku den moo pikin sani di a meke te doo den gaanwan, da wi e si taki a ná fu soso a meke den, ala den abi wini. Te i pakisei a fasi fa libisama sikin meke, efuso te i si wan beibi, fa yu e fii? Fa yu e fii te i si fa a san e saka? U lobi den sani ya, bika di Yehofa meke u, a meke u sabi san moin anga san á moin.—Leisi Psalm 19:1; 104:24.

5. San Yehofa du fu meke sani waka bun gi den sani di a meke?

⁵ Yehofa poti weiti gi den sani di a meke. A poti weiti gi den meti, bon anga den taa sani di a meke. A poti weiti fu soi libisama fa den mu tyai denseefi tu. A di a wani sani waka bun gi den sani di a meke a hemel anga goontapu, meke a poti den weiti ya gi den (Psalm 19:7-9). Ala den sani di a meke abi den peesi pe den mu tan. Den abi den wooko di den mu du tu. Wan fu den sani ya na a zwartekracht. Na a kaakiti ya e meke a winta e tan a goontapu. Neen e meke a se e tan neen peesi. Na a kaakiti ya e meke u man maiki a yuu tu. Efu zwartekracht á be de, libi á be o de a goontapu. Den weiti di Yehofa poti gi den sani di a meke, e meke sani waka bun a hemel anga goontapu. A sani ya e soi taki a ná fu soso a meke goontapu anga libisama. Te wi e peleiki, u sa yeepi sama fu kon sabi a sama di meke den foondoo sani di wi e si.—Openbaring 4:11.

6, 7. San a wantu fu den sani di Yehofa be gi Adan anga Efa?

 ⁶ Yehofa be wani libisama libi fu teego a goontapu (Genesesi 1:28; Psalm 37:29). Yehofa lobi gi sama sani. A gi Adan anga Efa omen kado. (Leisi Yakowbesi 1:17.) Yehofa gi den a okasi fu luku san den wani du. A gi den a okasi fu soi lobi. A gi den a okasi tu fu toon mati anga taawan. Gadu be e taki anga Adan. A soi en fa a mu tyai enseefi. A soi en fa a be mu solugu enseefi, den meti, anga a paladeisi (Genesesi 2:15-17, 19, 20). Yehofa meke Adan anga Efa a wan foondoo fasi. Den be man tesi, den be man fii, den be man si, den be man yee. Den be man sumee den bun sani di a be meke gi den tu. A sani ya be yeepi den fu tan aini a moin peesi di a be seeka gi den. Adan anga Efa be abi omen switi wooko fu du tu. Noiti den á be o kaba leli sani.

⁷ San a wan taa sani di Yehofa be abi a pakisei gi libisama? Di Yehofa be meke Adan anga Efa den be man meke pikin di á be abi sondu. Den pikin di den be o meke seefi be o meke pikin tu, te enke a goontapu be fuu anga sama. Yehofa be wani mma anga dda lobi den pikin fu den leti enke fa a be lobi Adan anga Efa. Yehofa be gi libisama a goontapu anga ala den sani di de a goontapu. A goontapu a be fu den. Nawan sama be o puu en a den ana.—Psalm 115:16.

8. Saide Gadu gi Adan anga Efa a weiti di sikiifi a Genesesi 2:16, 17?

⁸ Sani á go enke fa Yehofa be wani. Saide? Yehofa be gi Adan anga Efa wan weiti fu soi den taki a ná ala sani a be gi den pasi fu du. A be taigi den taki: „I sa nyan den sii fu ala den bon di de aini a dyali te a sai yu. Ma a bon di den e kai sabi bun anga ogii, yu á mu nyan a sii fi en, bika a dei di yu o nyan en, yu o dede namo” (Genesesi 2:16, 17). A weiti ya á be taanga gi den fu fusutan. A á be taanga gi den fu holi tu, bika a omen taa switi sii be de aini a dyali.

9, 10. (a) San na a lei di Saatan lei gi Yehofa? (b) San Adan anga Efa du? (Luku a fowtow na a bigin.)

⁹ Saatan Didibii koboloiki wan sineki fu koli Efa fu a ná aliki en Dda Yehofa. (Leisi Genesesi 3:1-5; Openbaring 12:9). Saatan du enke a wan gaan sani taki Adan anga Efa á be mu nyan den sii fu wan fu den bon fu a dyali. A leti enke a be taigi den taki: ’U wani taigi mi taki wi á poi du san u wani?’ Baka dati a taigi Efa taki: „I ná o dede seefi.” Ma a lei Saatan lei! Baka dati a puubei fu soi Efa taki a ná abi fu aliki Gadu. A taigi en taki: „Gadu sabi taki a dei di wi o nyan a sii fu a bon, wi ain o opo.” Saatan  taki a di Yehofa sabi taki den o kon sabi son sani, meke a á be wani den nyan a sii. A taigi den taki: „Wi o kon de enke Gadu, wi o sabi san bun anga san ogii.”

¹⁰ Adan anga Efa be abi a okasi fu luku san den be o du. Den be mu luku efu den be o aliki Gadu efuso a sineki. A tyali, bika den ná aliki Gadu. Den á be wani Yehofa enke den Dda moo, neen meke den holibaka gi Saatan. Di den du a sani de, Yehofa á be e kibii den moo.—Genesesi 3:6-13.

11. Saide Yehofa be abi fu du wan sani di Adan anga Efa sondu?

¹¹ Di Adan anga Efa taangayesi Gadu, neen den kon abi sondu. Boiti dati, den be toon Gadu feyanti, bika Yehofa „á poi si ogii na ain” (Habakuk 1:13). Efu Yehofa á be du wan sani di Adan anga Efa sondu, da ala den sani di a meke a hemel anga goontapu, be o de fu soso. Engel anga libisama be o akisi denseefi efu den be sa fitoow Yehofa. Ma Yehofa e holi den weiti di enseefi poti, a nai pasa den (Psalm 119:142). Winsi fa Adan anga Efa be sa du san den be wani, tokuso den á be poi koti pasi gi den sani di be o miti den fu di den ná aliki Yehofa. Bakaten den dede, neen den toon doti baka, bika anga doti Gadu be meke den.—Genesesi 3:19.

12. San pasa anga den pikin fu Adan?

¹² Di Adan anga Efa nyan a sii, Yehofa á be poi teke den aini en osufamii moo. A puu den aini a dyali fu Eden. De á be poi go aini a dyali de moo (Genesesi 3:23, 24). Yehofa fika den fu den fii a bakapisi fu a sani di den du. (Leisi Deitolonomi 32:4, 5.) Neen meke den á be poi soi den fasi fu Yehofa moo sondee fu meke fowtu. Adan lasi a bun libi di en anga den pikin fi en be o abi. A sondu anga dede namo a be man gi den pikin fi en (Romesama 5:12). Adan puu teego libi a den pikin fi en ana. En anga Efa á be poi meke pikin di ná abi sondu. Den pikin fu den seefi á be poi meke pikin di ná abi sondu. Fanafu di Saatan meke Adan anga Efa toon Gadu feyanti, neen ai feti fu ala sama waka a den baka.—Yohanisi 8:44.

13. San Yehofa abi a pakisei gi libisama?

¹³ Yehofa lobi libisama ete. Winsi fa Adan anga Efa gwe fika en, tokuso a wani toon mati anga libisama. Boiti dati a á be wani nawan fu den  dede (2 Peitilisi 3:9). Neen meke Gadu sete sani wanten fu gi libisama a okasi fu toon en mati baka. Meke u luku fa a be o man du a sani ya sondee fu pasa den weiti di enseefi poti.

14. (a) San Gadu du fu puu sondu anga dede gi libisama enke fa a sikiifi a Yohanisi 3:16? (b) Sowtu akisi u mu yeepi den sama fu fusutan?

¹⁴ Leisi Yohanisi 3:16. Gaanse fu den sama di wi e kai kon na a Membeefesa sabi a tekisi ya a ede. Ma fa a dede fu Yesesi opo a pasi gi u fu fende teego libi? Te wi e kai sama kon na a Membeefesa, te u de na Membeefesa anga te u go luku den baka a Membeefesa, da wi e fende a okasi fu yeepi den kon sabi a piki fu a akisi ya. O moo den e kon fusutan san Yesesi du gi u, o moo den o kon si taki Yehofa lobi libisama. Den o fusutan tu taki Yehofa a wan koni Gadu. San u sa leli den fu a dede di Yesesi dede gi u?

15. Saide u sa taki Yesesi anga Adan a ná be aseefi?

¹⁵ Yehofa meke wan sama di ná abi sondu kon pai gi u. A man ya be mu du san Yehofa wani winsi san e pasa. A be mu de kabakaba fu dede gi libisama (Romesama 5:17-19). Yehofa meke Yesesi, a fosi engel di a meke a hemel, kon a goontapu enke wan libisama (Yohanisi 1:14). A so Yesesi kon a goontapu enke wan sama di ná abi sondu, leti enke fa Adan á be abi  sondu. Ma Yesesi be du ala sani enke fa Gadu be wani. A á be de enke Adan. Winsi sowtu tesi be e miti en, tokuso a be e holi den weiti fu Gadu.

16. Saide u sa taki a wan gaan bun Gadu du gi u di a meke Yesesi dede gi u?

¹⁶ Fu di Yesesi á be abi sondu, meke a be poi dede gi libisama fu fii den fu sondu anga dede. Yesesi teke Adan peesi. Yesesi á be abi sondu, a be e aliki Gadu ala ten (1 Timotiyesi 2:6). A dede gi u, neen meke ala sama, man, uman anga pikin abi a okasi fu libi fu teego (Mateyesi 20:28). A dede di Yesesi dede gi u, meke Gadu man du den sani di a abi a pakisei gi libisama.—2 Korentesama 1:19, 20.

17. Sowtu wini wi o fende fu di Yesesi dede gi u?

¹⁷ A paiman di Yehofa pai gi u á be makiliki gi en (1 Peitilisi 1:19). A lobi u te, neen meke a be de kabakaba fu meke a wan kodo manpikin fi en kon dede gi u (1 Yohanisi 4:9, 10). A so Yesesi teke a peesi fu Adan enke u dda (1 Korentesama 15:45). A ná teego libi wawan Yesesi opo pasi gi u fu fende, ma a opo a pasi gi u fu kon aini a osufamii fu Yehofa baka. A paiman di Yehofa pai gi u, o puu sondu gi u. Neen meke Yehofa o man teke wi aini en osufamii sondee fu a pasa en eigi weiti. Pakisei fa a libi o switi te den sama di holidoo ná o abi sondu moo. Den engel a hemel anga den sama di o de a goontapu ya o toon wan famii. Wi o toon Gadu pikin.—Romesama 8:21.

18. On ten Yehofa „o de ala sani gi ala sama”?

¹⁸ Winsi fa den fosi gaansama fu u gwe fika Yehofa, tokuso Yehofa lobi libisama ete, neen meke a sende en manpikin kon dede gi u. Winsi fa wi a sondu libisama, toku Saatan á poi tapu u fu dini Yehofa. Yehofa o yeepi u fu toon sama di e libi a wan leti fasi, fu di Yesesi dede gi u. Pakisei fa a libi o de te „ala den sama di sabi a Manpikin, anga den sama di soi taki den e biibi en”, o fende teego libi (Yohanisi 6:40). U Dda di lobi u, di abi ala koni, o du ala den sani di a paamisi u. A o puu sondu gi u tu. Yehofa „o de ala sani gi ala sama”.—1 Korentesama 15:28.

19. (a) San wi o du efu wi e si a dede di Yehofa sende en manpikin kon dede gi u enke wan gaan sani? (Luku a faki „ Ná weli fu suku den sama di wani aliki”.) (b) San wi o luku aini a taa artikel?

¹⁹ Efu wi e teke a kado di Yehofa gi u fu bigi, wi o wani taki anga taawan fu a gaan bun di a du gi u. Ala sama mu sabi taki, a di Yehofa lobi u meke a sende en Manpikin kon dede gi u, fu u sa fende teego libi. Ma a ná dati wawan a o du gi u. A o meke sama si kiin taki a sani di Saatan be taki aini Eden a wan lei. Aini a taa artikel wi o si fa a du a sani ya.