1, 2. (a) San e soi taki Yehofa Kotoigi anga den taa keliki a ná aseefi? (b) San wi o leli aini a artikel ya anga a taawan?

A OMEN sama e akisi Yehofa Kotoigi taki: „Sama a u fesiman?” Ala den taa keliki abi wan man efuso wan uman enke fesiman. Neen meke den wani sabi a sani ya. Ai switi gi u fu taigi sama taki u ná abi wan sondu libisama enke u fesiman, ma a Yesesi a u fesiman. Ai aliki en Dda Yehofa.—Mateyesi 23:10.

² Aini a ten ya, Yehofa poti wantu baala fu tii a foluku fi en a goontapu ya. A kulu baala ya na „a koni saafu di u sa fitoow” (Mateyesi 24:45). Ma fa u du sabi taki a Yehofa seefi poti en manpikin enke fesiman fu tii wi? Wi o luku dii sani di o yeepi u fu fusutan a toli ya. Winsi fa Yehofa poti son libisama fu teke fesi, tokuso wi o si kiin taki neen seefi e tii en foluku.—Yesaya 58:11.

3. San be e yeepi Mosesi fu tii a foluku fu Gadu?

³ A santa yeye be e yeepi den sama di Gadu poti fu tii en foluku. Gadu be poti Mosesi enke fesiman fu den Islayelisama. San yeepi en fu du a wooko ya?  Yehofa be gi Mosesi „en santa yeye”. (Leisi Yesaya 63:11-14.) Neen meke u sa taki a Yehofa seefi be e tii en foluku, bika na a santa yeye fi en be e yeepi Mosesi.

4. San e soi taki Gadu be gi Mosesi en santa yeye? (Luku a fowtow na a bigin.)

⁴ Sama be man si taki na a santa yeye e yeepi Mosesi? Eeye! A santa yeye be e meke Mosesi du wonduu. A yeepi en fu meke Farao, wan makiti tiiman fu Egepte, kon sabi sama a Yehofa (Ekisodesi 7:1-3). A santa yeye yeepi Mosesi fu tii a foluku fu Gadu anga pasensi. Mosesi á be de enke den ogii-ati tiiman fu den taa kondee (Ekisodesi 5:2, 6-9). Den sani ya e soi kiin taki a Yehofa seefi be poti Mosesi fu tii a foluku fi en.

5. Sama a den taa sama di Yehofa be gi santa yeye fu tii en foluku?

⁵ Sama a den taa sama di Yehofa be gi santa yeye fu tii en foluku? Beibel taki: „A yeye fu Gadu be de anga Yowsuwa” (Deitolonomi 34:9). „A Yeye fu Yehofa kon a Gidiyon” (Kuutubakaa 6:34). „A yeye fu Yehofa be de anga David” tu (1 Samuweli 16:13). Ala den man ya be e biibi taki a yeye fu Gadu poi yeepi den fu du sani di denseefi á poi du (Yowsuwa 11:16, 17; Kuutubakaa 7:7, 22; 1 Samuweli 17:37, 50). A sani ya e soi kiin taki a Yehofa be e gi den a kaakiti fu du gaan sani, neen meke a Yehofa u mu gafa.

6. Saide Yehofa be wani den Islayelisama aliki den sama di be e teke fesi?

⁶ San den Islayelisama be mu du di den si taki Gadu be gi Mosesi, Yowsuwa, Gidiyon anga David en santa yeye? Den be mu lesipeki den. Luku san Yehofa taki di a foluku be e kuutu Mosesi. A taki: „On ten den sama ya o lesipeki mi?” (Numeri 14:2, 11). Wi e si kiin taki a Yehofa seefi e poti sama a wani fu tii en foluku. Te a foluku be e aliki den sama ya, da a Yehofa den be e aliki.

7. Fa engel be yeepi Mosesi?

⁷ Den engel e yeepi den sama di Gadu poti fu tii en foluku. (Leisi Hebrewsama 1:7, 14.) Yehofa be meke en engel yeepi Mosesi. A „be sende wan engel go neen na a makabusi”, fu taigi en taki a mu go fii den Islayelisama, da a tii den (Toli 7:35). Baka dati, Gadu meke engel gi Mosesi weiti di be e soi fa a foluku mu libi (Galasiyasama 3:19). Yehofa taigi en tu taki: „Tyai a foluku go a pe mi taigi i. A engel fu mi o waka ai fesi” (Ekisodesi 32:34). Beibel á taki den Islayelisama be si fa den engel be e  yeepi Mosesi. A fasi fa Mosesi be e tii a foluku, be e soi kiin taki den engel be e yeepi en.

8. Fa engel yeepi Yowsuwa anga Heskiya?

⁸ Sama a den taa sama di den engel be yeepi? Beibel taki ’a edeman fu den engel fu Yehofa’, be yeepi Yowsuwa fu wini den Kana-ansama (Yowsuwa 5:13-15; 6:2, 21). A ten di kownu Heskiya be e tii a foluku fu Gadu, da den Asiriya suudati be wani poli Yelusalem. Ná pikin ipi den suudati ya be ipi. Ma aini wan neti namo „a engel fu Yehofa go na a kampu fu den Asiriya suudati neen a kii 185.000 suudati”.—2 Kownu 19:35.

9. San den Islayelisama be mu du, winsi a sondu libisama be e tii den?

⁹ Den engel ná abi sondu. Ma den man di den be e yeepi, a sondu libisama. U sabi taki wan leisi Mosesi á gi Yehofa a gaandi di a be mu gi en (Numeri 20:12). Yowsuwa á be akisi Gadu fosi a meke wan kuudei anga den Gibiyonsama (Yowsuwa 9:14, 15). Wan leisi Heskiya be soi taki a abi bigifasi (22 Koloniki 32:25, 26). Winsi fa den man ya a be sondu libisama, toku den Islayelisama be mu aliki den. Den Islayelisama be man si kiin taki Yehofa be e meke den engel fi en yeepi den man ya. A sani ya e soi kiin taki a Yehofa be e tii a foluku fi en.

10. Fa a Weiti fu Gadu be yeepi Mosesi?

¹⁰ A Wowtu fu Gadu yeepi den sama di be e tii en foluku. Beibel e kai a Weiti di Gadu be gi den Islayelisama, „a Weiti fu Mosesi” (1 Kownu 2:3). Ma Beibel e soi kiin taki a Yehofa be gi den a Weiti ya. Mosesi seefi be mu du san a Weiti taki (2 Koloniki 34:14). Di Yehofa be taigi en fa a mu meke a tabernakel, „Mosesi du ala san Yehofa be taigi en. A du leti so.”—Ekisodesi 40:1-16.

11, 12. (a) San Yosiya anga den taa kownu di be e tii a foluku fu Gadu be mu du? (b) Fa a Weiti fu Gadu be yeepi den man di be e teke fesi?

¹¹ Yowsuwa be abi a Wowtu fu Gadu fanafu di a bigin tii Gadu foluku. Yehofa be taigi en taki: „I mu e leisi en saafi dei anga neti, da yu o man du ala san sikiifi aini” (Yowsuwa 1:8). Den kownu di be e tii a foluku fu Gadu baka Yowsuwa, be mu e leisi a Weiti ala dei tu, den be mu meke wan kopi fi en, den be mu du „ala san a Weiti taki”.—Leisi Deitolonomi 17:18-20.

¹² Fa a Weiti be e yeepi den man di be e tii a foluku fu Gadu? Pakisei a toli fu kownu Yosiya. Di den fende a Weiti fu Mosesi, neen a seketasi fu Yosiya bigin leisi en gi en. * (Luku a maiki a ondoo.) „Di a kownu yee san sikiifi aini a Weiti buku, a piiti en koosi wanten.” A Wowtu fu Gadu gi Yosiya taanga-sikin fu poli ala den falisi gadu di be de aini a kondee. Baka dati, neen a seeka sani fu holi wan gaan Paskafesa. A Paskafesa de na a moo gaan wan di be holi (2 Kownu  22:11; 23:1-23). Yosiya anga den taa man di be e teke fesi be e du san a Wowtu fu Gadu taki, neen meke den be de kabakaba fu tii a foluku enke fa Gadu wani. A sani ya yeepi a foluku fu aliki Gadu.

13. San e soi taki den sama di be e tii a foluku fu Gadu anga den sama di be tii den taa foluku a ná be aseefi?

¹³ Den tiiman fu den taa foluku be e wooko anga libisama koni. A omen sani den á be sabi. Den tiiman fu Kana-an anga den foluku fu den be e libi a wan fa ná fiti fasi. Den be e libi anga den eigi famii, den be e makume, den be e didon anga meti, den be e boon den pikin enke ofaandi gi den gadu fu den, den be e dini falisi gadu (Lefitikesi 18:6, 21-25). Den sama di be e tii Babilon anga Egepte á be abi den weiti di Gadu be gi a foluku fi en fu yeepi den fu den á libi wan tyobo libi (Numeri 19:13). A foluku fu Gadu be man si kiin fa den man di be e teke fesi be e yeepi den fu dini Yehofa a wan kiin fasi. Den be e yeepi den fu den á pakisei sani di á fiti anga fu den á libi wan fa ná fiti fasi. A sani ya e soi kiin taki a Yehofa seefi be e tii a foluku fi en.

14. Saide Yehofa be e sitaafu son wan fu den man di be e tii en foluku?

¹⁴ A ná ala den kownu di be e tii a foluku fu Gadu be e du sani enke fa Yehofa wani. Son wan fu den kownu á be e du sani enke fa a santa yeye, den engel, anga a Wowtu fu Gadu soi den. Son leisi Yehofa be e kaasi den man ya. A be e puu son wan fu den enke kownu (1 Samuweli 13:13, 14). Ma bakaten Yehofa poti wan fesiman di ná abi sondu.

15. (a) Fa den polofeiti soi taki wan bun fesiman be o kon? (b) Sama na a fesiman ya?

¹⁵ A omen ondoo yali a fesi Yehofa be paamisi taki a o meke wan sama di ná abi sondu, tii a foluku fi en. Mosesi be taigi den Islayelisama taki: „U Gadu Yehofa o poti wan fu u enke polofeiti. A polofeiti ya o de enke mi. U mu aliki en” (Deitolonomi 18:15). Yesaya be taki a sama ya „o de enke fesiman anga edeman” (Yesaya 55:4). Daniyeli be sikiifi taki a Mesiyas be o toon ’a fesiman’ (Daniyeli 9:25). Di a ten doo, neen Yesesi soi taki neen na a sama di be o tii a foluku fu Gadu. (Leisi Mateyesi 23:10.) Den disipel fu Yesesi be e waka neen baka, den be e biibi taki a Gadu poti en fu tii a foluku fi en (Yohanisi 6:68, 69). Saide den be e biibi taki a Yesesi Gadu poti fu tii en foluku?

16. Fa u du sabi taki a santa yeye be e yeepi Yesesi?

 ¹⁶ A santa yeye be e yeepi Yesesi. Di Yesesi dopu neen Yohanisi si fa „hemel opo, neen a yeye fu Gadu saka kon neen enke wan doifi”. Baka dati, „a yeye fu Gadu tyai en go aini a sabana wanten” (Malikisi 1:10-12). Di Yesesi be de a goontapu ya, a santa yeye fu Gadu be e yeepi en te a be e leli sama. A be yeepi en fu du wonduu tu (Toli 10:38). Boiti dati, a santa yeye be yeepi Yesesi fu abi bun fasi enke lobi, piisii anga biibi (Yohanisi 15:9; Hebrewsama 12:2). Fesiman á de di be abi a santa yeye fu Gadu enke Yesesi. A sani ya e soi kiin taki a Yehofa poti Yesesi enke fesiman fu tii a foluku fi en.

17. Fa den engel yeepi Yesesi?

¹⁷ Engel be e yeepi Yesesi. Baka di Yesesi dopu, „den engel kon yeepi en” (Mateyesi 4:11). Fosi a dede, „neen wan engel komoto a hemel kon gi en taanga-sikin” (Lukasi 22:43). Yesesi be sabi taki solanga a be abi yeepi fanowdu, Yehofa be o sende engel kon yeepi en.—Mateyesi 26:53.

18, 19. Fa Yesesi be e meke a Wowtu fu Gadu tii en? Fa a Wowtu fu Gadu be e yeepi en te a be e leli sama?

¹⁸ A Wowtu fu Gadu be e yeepi Yesesi. Fanafu di Yesesi bigin du a diniwooko fi en a goontapu ya te enke a dede, a be e du san a Wowtu fu Gadu taki. Di a be de fu dede seefi, a be e taki fu polofeiti toli di be  abi fu du anga a Mesiyas (Mateyesi 4:4; 27:46; Lukasi 23:46). Ma den keliki fesiman fu a ten de, á be de enke Yesesi. Te den be e si taki a Wowtu fu Gadu á be e go na a se di den wani, da den be e leli den sama san den wani. Yesesi be soi san a Wowtu fu Gadu be taki fu den keliki fesiman. A be taki: „A mofu a foluku ya e gafa mi, ma a nai doo den ati. A sosokaali den e dini mi, bika a den weiti fu libisama den e leli taawan” (Mateyesi 15:7-9). Noiti Yehofa o meke wan sama tii a foluku fi en efu a nai du san en Wowtu taki.

¹⁹ Te Yesesi be e taki anga sama, a be e soi den san a Wowtu fu Gadu taki. Te den keliki fesiman be e sitee anga en, a á be e taigi den san enseefi denki. A san de aini a Wowtu fu Gadu a be e soi den (Mateyesi 22:33-40). Efu Yesesi be wani, a be sa gafa fu a fasi fa en libi be de a hemel, efuso a be sa taki fu den sani di a meke, fu soi sama fa a kofaliki. A be lobi a Wowtu fu Gadu, neen meke a be e taigi taawan san sikiifi aini. ’A be e meke den fusutan finifini san sikiifi aini Gadu Buku.’—Lukasi 24:32, 45.

20. (a) Fa Yesesi be e gi Yehofa gaandi? (b) San e soi taki Yesesi anga Herodes Agripa I á be de aseefi?

²⁰ Winsi fa sama be e foondoo fu a fasi fa Yesesi be e leli den, tokuso Yesesi á be wani teke a gaandi. Ala yuu a Yehofa, a sama di leli en, a be e gi a gaandi (Lukasi 4:22). Wan leisi wan guduman be puubei fu gi Yesesi gaandi, a kai en ’Bun Leliman’, ma Yesesi soi sakafasi, a á be wani teke a gaandi. A taigi en taki: „Saide i taki mi bun? Nawan sama bun. A wan kodo sama di bun, a Gadu” (Malikisi 10:17, 18). Baka aitin yali Herodes Agripa I bigin tii Yudeya. A man ya á be de enke Yesesi. Wan leisi di den be e holi wan komakandaa, Herodes wei kownu koosi. Di den sama di be e aliki en, yee san a taki, neen den bali taki: „A ná libisama e taki ya, a wan gadu e taki ya!” Herodes be lobi te sama e gafa en, neen meke „a engel fu Yehofa naki en wanten, bika a á gi Gadu gaandi. Neen woon nyan en kii” (Toli 12:21-23). A sani ya e soi kiin taki a ná Yehofa be poti Herodes enke tiiman. Ma Yesesi soi taki Gadu poti en enke fesiman, neen meke ala yuu a be e gi Yehofa gaandi, bika neen na a moo Gaan Fesiman.

21. San wi o luku aini a taa artikel?

²¹ A ná wantu yali namo Yehofa wani Yesesi tii en foluku. Di Yesesi weki baka, a taigi den disipel fi en taki: „Mi fende ala makiti a hemel anga goontapu.” A taki tu: „Mi o de anga u te enke a kaba fu a goontapu doo” (Mateyesi 28:18-20). Ma fa Yesesi o man tii a foluku fu Gadu a pe a de a hemel anda? Sama Yehofa o poti fu teke peesi gi Yesesi a goontapu? Fa Kelesten o du sabi sama Gadu poti fu tii en foluku a goontapu ya? A taa artikel o piki den akisi ya.