1, 2. (a) Sowtu wini baala anga sisa fende di den meke a yeye fu Gadu tii den? (b) Sowtu akisi wi o luku aini a artikel ya?

WAN sisa fu Kanada taki, a de koloku fu di ai meke a yeye fu Gadu tii en. A sani ya yeepi en anga den polobelema fi en. Wan baala fu Balasilikondee di toow 23 yali taki, na a meke di en anga en uman e meke a yeye fu Gadu tii den, meke den de koloku. Wan baala fu Filipeinikondee taki, na a meke di ai meke a yeye fu Gadu tii en, meke a abi wan kiin kosensi. A sani ya yeepi en tu fu libi bun anga baala anga sisa fu taa nasi.

² Den toli ya e soi taki, a omen wini wi e fende te wi e meke a yeye fu Gadu tii wi. San o yeepi u fu meke a yeye fu Gadu tii wi moo bun? A fosi sani, u mu meke moiti fu fusutan san Beibel taki fu wan sama di e meke a yeye fu Gadu tii en efuso di e denki enke fa Yehofa e denki. Wi o luku dii akisi aini a artikel ya. (1) San a wani taki fu meke a yeye fu Gadu tii wi? (2) San o yeepi u fu u biibi kon moo taanga? (3) Fa a meke di wi o meke moiti fu denki enke  Yesesi o yeepi u fu a yeye fu Gadu tii wi?

3. San Beibel e taki fu wan sama di e denki enke fa libisama e denki anga wan sama di e meke a yeye fu Gadu tii en?

³ Den sani di apostel Pawlesi taki, e yeepi u fu sabi on ten wan sama e meke „a yeye fu Gadu” tii en anga on ten wan sama e denki „enke libisama”. (Leisi 1 Korentesama 2:14-16.) Wan sama di e denki enke fa libisama e denki „á poi teke den sani fu a yeye fu Gadu, bika ai si den enke don sani. A á poi sabi den sani ya tu”. Ma na a taase, wan sama di e meke a yeye fu Gadu tii en „e ondoosuku ala sani”. Boiti dati ai „denki enke fa Yesesi e denki”. Pawlesi gi u taanga-sikin fu u meke a yeye fu Gadu tii wi. Sowtu taa sani e soi taki wan sama di e denki enke fa libisama e denki, anga wan sama di e meke a yeye fu Gadu tii en, a ná aseefi?

4, 5. San o yeepi i fu sabi efu wan sama e denki enke fa libisama e denki?

⁴ Fa den sama di e du san a sondu sikin wani e denki? Wan sama di e denki enke fa libisama e denki abi den manii fu den sama fu a goontapu ya. Den nai booko den ede anga taawan. Pawlesi taki den sama ya abi a yeye fu a goontapu. Neen meke den e „taanga-yesi Gadu” (Efeisesama 2:2). A yeye ya e gi sama taanga-sikin fu du san taawan e du. A den sani di den e si fu bun sani namo den e du. Den ná abi toobi anga den weiti fu Gadu. Wan sama di e denki enke fa libisama e denki, e moo booko en ede anga sani enke balinen anga moni.

⁵ Beibel taki wan sama di e denki enke fa libisama e denki e du „den sani di a sondu sikin” wani (Galasiyasama 5:19-21). Di Pawlesi sikiifi a fosi biifi gi den Kelesten fu Korente, a kai wantu taa sani di den sama ya e du. Den sama di abi a yeye fu goontapu nai yeepi sama fu libi na a wan. Den e paati bee. Den e gi taawan taanga-sikin fu den á saka denseefi. Den e tyai sama go a kuutu. Den ná abi lesipeki gi den sama di e teke fesi. Boiti dati den e si nyanyan anga diingi enke a moo pelensipali sani aini a libi. Den sowtu sama ya nai meke moiti fu den á sondu te tesi miti den (Odo 7:21, 22). Yudasi sikiifi taki son wan fu den sama ya, á be o abi a yeye fu Yehofa moo.​—Yudasi 18, 19.

6. Fa wan sama di e meke a yeye fu Gadu tii en e tyai enseefi?

⁶ Ma wan sama di e meke a yeye fu Gadu tii en, e meke moiti fi en anga Yehofa á poli. Ai du ala san a man fu waka a Yehofa baka (Efeisesama 5:1). Ai meke moiti fu denki enke fa Yehofa e denki. Ai biibi taki Yehofa de tuutuu. Ala yuu te a de fu du wan sani, ai holi den weiti fu Yehofa a pakisei (Psalm 119:33; 143:10). A nai du „den sani di a sondu sikin wani”, ma ai meke moiti fu abi den „manii di a yeye e meke sama abi”.​—Galasiyasama 5: 22, 23.

7. San Beibel e taki fu den sama di e denki enke fa Gadu e denki?

⁷ Yesesi taki den sama di e meke a yeye fu Gadu tii den, de koloku. Mateyesi 5:3 taki: „Wan sama o de koloku  te a sabi taki a abi Gadu fanowdu, bika den o fende a Kownukondee fu hemel.” Romesama 8:6 e soi taki efu u wani libi fu teego, u mu meke moiti fu denki enke fa Yehofa e denki. A tekisi taki: „Te wan sama e poti pakisei a den sani di a sikin wani, da a o tyai dede gi en. Ma te wan sama e poti pakisei a den sani fu a yeye, da a o fende libi. Sani o go bun anga en tu.” A sani ya e soi taki efu wi e denki enke fa Yehofa e denki, wi anga Yehofa o de mati. U ná o go e du sani di o meke u kosensi fon u. Boiti dati wi o abi a howpu fu libi fu teego.

8. Saide a á makiliki ala yuu fu denki enke fa Gadu e denki?

⁸ A omen ogii e pasa aini a goontapu di wi e libi ya. Fu di wi e tan a sama aini di nai denki enke fa Gadu e denki, meke u mu meke moiti fu den á poli u. Efu u nai meke moiti fu denki enke fa Yehofa e denki, a goontapu ya o meke u denki enke fa a sondu sikin wani. San u mu du fu a sani ya á miti u? San o yeepi u fu denki enke fa Yehofa e denki?

9. (a) San o yeepi u fu denki enke fa Gadu e denki? (b) Sama baka u sa waka?

⁹ Wan pikin mu teke leli a den gaansama fi en. A mu meke moiti fu waka a den baka. A leti so u mu meke moiti fu waka a den mati fu Yehofa baka. A sani ya o yeepi u fu sabi san u mu du fu denki enke fa Yehofa e denki. Boiti dati, efu u poti pakisei na a libi fu den sama di be e du san a sondu sikin wani, wi o sabi san wi á mu du (1 Korentesama 3:1-4). Beibel e taki fu sama di be e denki enke fa Gadu e denki anga sama di be  e du san a sondu sikin wani. Meke u taki fu wantu sama di u sa waka a den baka. Den sama ya na: Yakopu, Maliya anga Yesesi.

10. Fa Yakopu soi anga a fasi fa a be e libi taki ai denki enke fa Yehofa e denki?

¹⁰ Leti enke fa sani e miti wi aini a ten ya, a so omen sani miti Yakopu. En eigi baala, Esau, be wani kii en. En pai be e meke moiti ala sowtu fasi fu bidiigi en. Ma Yakopu be e biibi taki Yehofa be o du san a be paamisi Abalaham. A be sabi taki en osufamii be o fende a belesi di Yehofa be paamisi Abalaham tu. Neen meke a be e solugu en osufamii bun (Genesesi 28:10-15). Yakopu á be e meke den sama di be e du san a sondu sikin wani, meke a feegete den paamisi fu Yehofa. Di a be si enke en baala be o du ogii anga en, a begi Yehofa fu a yeepi en. A taigi Yehofa taki: „I be taigi mi taki: ’Mi o belesi yu. Mi o meke den bakapikin fi i ipi enke a santi fu se di sama á poi teli’” (Genesesi 32:6-12). Yakopu be e soi anga a fasi fa a be e libi taki a be e biibi anga en hii ati taki Yehofa be o du san a paamisi.

11. Fa u du sabi taki Maliya be e denki enke fa Yehofa e denki?

¹¹ Pakisei Maliya. A di Maliya be e denki enke fa Yehofa e denki, meke Yehofa be meke a toon Yesesi mma. Leisi san Maliya taki di a go luku Sakaliya anga Elisabet. Den sama ya a be en famii. (Leisi Lukasi 1:46-55.) Wi e si kiin taki Maliya be lobi a Wowtu fu Gadu. A be sabi den Hebrew buku fu Beibel bun (Genesesi 30:13; 1 Samuweli 2:1-10; Maleyaki 3:12). Boiti dati, di Maliya be de anga bee, en anga Yowsefu wakiti te enke Yesesi meke fosi den  siibi anga denseefi. A wooko di Gadu be gi den be pelensipali gi den moo den fii fu den (Mateyesi 1:25). Di Yesesi be e kon bigi, Maliya be e luku ala den sani di Yesesi be e du. A be e aliki den sani di a be e leli sama tu. A á be e feegete „den sani di a be e taki” (Lukasi 2:51). A be lobi den sani di a Wowtu fu Gadu be taki fu a Mesiyas. Useefi mu meke moiti ala yuu fu du san Yehofa wani, leti enke Maliya.

12. (a) Fa Yesesi soi taki ai waka neen Dda baka? (b) Fa u sa soi taki wi e waka a Yesesi baka? (Luku a fowtow na a bigin.)

¹² Fu ala den sama di be de a goontapu ya, a Yesesi na a sama di be e moo denki enke fa Yehofa e denki. Di Yesesi bigin du a wooko di en Dda be sende en fu kon du, a be soi taki a de enke en Dda. A fasi fa a be e denki anga a fasi fa a be e fii, e soi taki a be de enke en Dda. A be e libi enke fa Yehofa wani. Boiti dati a be lobi den weiti fi en (Yohanisi 8:29; 14:9; 15:10). Luku san Yesaya taki fu Yehofa anga san Malikisi sikiifi fu a fasi fa Yesesi be e booko en ede anga taawan. (Leisi Yesaya 63:9; Malikisi 6:34.) Wi e booko wi ede anga den sama di abi yeepi fanowdu, enke Yesesi? Wi e poti ala u pakisei na a paati di u mu paati a bun nyunsu? (Lukasi 4:43) Sama di e denki enke fa Yehofa e denki, e booko den ede anga taawan. Boiti dati, den e meke moiti fu yeepi den.

13, 14. (a) San wi e leli fu den sama fu a ten ya di e denki enke fa Yehofa e denki? (b) Gi wan ondoofenitoli.

¹³ Aini a ten ya, a omen baala anga sisa di e denki enke fa Yehofa e denki, e meke moiti fu waka a Yesesi baka. Kande yu e si fa den e du a peleikiwooko anga den hii ati, fa den lobi kai sama kon a den osu anga fa den e soi taki den e booko den ede anga taawan. Winsi fa den abi sondu, toku den e du ala san den man fu abi bun manii. Den e meke moiti fu du san Yehofa wani. Rachel, wan sisa fu Balasilikondee taki: „Mi be lobi den modo fu a goontapu. Neen meke mi be e wei koosi di á fiti. Ma di mi kon sabi a waaleiti, mi meke moiti fu denki enke fa Yehofa e denki. A á be makiliki gi mi fu kengi. Ma di mi kengi, mi e moo piisii. Boiti dati a yeepi mi fu sabi saide mi de a libi.”

¹⁴ Reylene, a wan sisa di e tan a Filipeinikondee. A sisa ya be abi wan taa polobelema. Anga ala fa a be de a waaleiti, tokuso a be e du ala san a be man fu fende hei sikoo pampila fu a be sa fende wan bun wooko. Ma baka wan pisiten, a á be e booko en ede anga a waaleiti moo. A taki: „Mi be bigin fii taki wan sani be e mankei aini mi libi. Wan sani di be pelensipali moo a wooko di mi be abi.” Na a sani ya meke Reylene bigin kengi a fasi fa a be e denki. Boiti dati, a meke a dini di a be e dini Yehofa toon a moo pelensipali sani aini en libi. Nownow ai biibi a sani di Yehofa paamisi a Mateyesi 6:33, 34. A sisa ya taki: „Anga mi hii ati mi e biibi taki Yehofa o solugu mi!” Kande i sabi baala anga sisa di e fitoow Yehofa tu. Te wi e si fa den e meke moiti fu de enke Yesesi, wi e wani waka a den baka.​—1 Korentesama 11:1; 2 Tesalonikasama 3:7.

15, 16. (a) San u mu du efu u wani de enke Yesesi? (b) San o yeepi u fu denki enke Yesesi?

¹⁵ Fa u sa waka a Yesesi baka? 1 Korentesama 2:16 taki, u mu „denki enke fa Kelestesi e denki”. Romesama 15:5 e membee wi taki, u mu „denki enke Yesesi Kelestesi”. Efu u wani de enke Yesesi, u mu meke moiti fu sabi fa ai denki, fa a be e booko en ede anga taawan anga fa a be e du sani. Yesesi a be Yehofa mati. Na a sani de a be a moo pelensipali sani aini en libi di a be de a goontapu. Efu u waka a Yesesi baka, wi o moo lobi Yehofa. Neen meke u mu meke moiti fu denki enke Yesesi.

¹⁶ San o yeepi u fu denki enke Yesesi? Den bakaman fi en si fa a be e du wonduu, fa a be e leli sama, fa a be e libi bun anga ala sowtu sama, anga fa a be e meke Yehofa tii en. Den taki: „U si ala den sani di a du” (Toli 10:39). Wi á poi si Yesesi aini a ten ya. Ma den Beibel buku Mateyesi, Lukasi, Malikisi anga Yohanisi, e yeepi u fu sabi fa Yesesi be de. Efu wi e leisi den buku ya, wi o sabi fa Yesesi be e denki. A sani ya o yeepi u fu „waka soifili neen baka”. Wi o „denki enke fa ai denki” tu.​—1 Peitilisi 2:21; 4:1.

17. Sowtu wini wi o fende efu wi e denki enke Yesesi?

¹⁷ Sowtu wini wi o fende te wi e denki enke Yesesi? Leti enke fa gusontu nyanyan e gi u kaakiti, a so a denki di wi o denki enke Yesesi o taanga u biibi. Saafisaafi wi o sabi san Yesesi be o du te u mu du wan sani. A sani ya o yeepi u fu du sani di o tyai wini gi u. Den sani di wi o du, o meke Yehofa piisii. Boiti dati, u kosensi ná o fon u. Den sani ya e gi u taanga-sikin fu „meke moiti fu denki enke Masaa Yesesi Kelestesi”. Na so noh?​—Romesama 13:14.

18. San a artikel ya leli i?

¹⁸ A artikel ya yeepi u fu sabi on ten u sa taki wan sama e denki enke fa Yehofa e denki. U taki fu wantu sama di u sa waka a den baka fu di den be e meke a yeye fu Yehofa tii den. U si tu taki efu wi e denki enke Yesesi, wi o man denki enke fa Yehofa e denki. Boiti dati wi anga Yehofa o toon mati. Ma moo sani de ete di u sa leli. San o yeepi u fu sabi efu wi e denki enke fa Yehofa e denki? San o yeepi u fu moo denki enke fa Yehofa e denki? Fa wi o tyai useefi efu wi e denki enke fa Yehofa e denki? Wi o taki fu den toli ya aini a taa artikel.