1, 2. San wan baala be kon fusutan? San a du di a fusutan a sani ya?

ROBERT dopu di a be abi 15 yali, ma a á be e booko en ede anga a waaleiti. A taki: „Mi á be e du nawan ogii. A san mi be mu du mi be e du. Mi be e go a komakandaa. Boiti dati wantu leisi aini a yali, mi be e du a yeepi pioniliwooko. Neen meke a be gei enke mi biibi be taanga. Ma mi be e mankei wan sani.”

² A di Robert toow fosi, neen a kon fusutan san a be e mankei. En anga en uman be lobi poti akisi fu Beibel gi denseefi. En uman be sabi a Beibel bun, neen meke a be poi piki den akisi. Ma Robert á be sabi den piki, neen meke sen be e kisi en. A taki: „A gei mi á be sabi nawan sani. Mi be kon si taki ’efu mi wani yeepi mi uman fi en biibi kon moo taanga, mi mu daai wan ana’.” Na a sani de a du tu. A taki: „Mi bigin sutudeli Beibel finifini. A so mi bigin fusutan en moo bun. Mi leli omen sani, ma a moo gaan wini di mi fende,  na a toon di mi anga Yehofa toon mati.”

3. (a) San a toli fu Robert e leli u? (b) San wi o luku aini a artikel ya?

³ A toli fu Robert e leli u wan sani. Kande u sabi sani fu Beibel. Kande wi e go a komakandaa anga a peleikiwooko ala yuu. Ma dati á wani taki u biibi taanga. Kande den ten di pasa u meke moiti fu meke a yeye fu Gadu tii wi. Ma te wi e ondoosuku useefi, wi e si pe u mu go a fesi ete (Filipisama 3:16). Wi o luku dii akisi aini a artikel ya: (1) San o yeepi u fu sabi efu wi e meke a yeye fu Gadu tii wi? (2) San u mu du fu meke a yeye fu Gadu tii wi moo bun? (3) Fa wi o tyai useefi efu a yeye fu Gadu e tii wi?

4. Sama mu du san sikiifi a Efeisesama 4:23, 24?

⁴ Di u bigin dini Yehofa, u meke moiti fu kengi a fasi fa u be e libi. Ma winsi u dopu, wi á kaba ete. Beibel taki: „U mu e meke moiti fu denki taa fasi” (Efeisesama 4:23, 24). Fu di wi abi sondu, meke u mu e meke moiti ala yu fu go a fesi. Winsi wi e dini Yehofa omen yali kaba, toku u mu meke moiti fu u biibi á swaki.​—Filipisama 3:12, 13.

5. San u mu akisi useefi efu u wani sabi efu wi e meke a yeye fu Gadu tii wi?

⁵ Winsi u yonkuu efuso u gaandi, ala u mu ondoosuku useefi. U mu e akisi useefi taki: ’Mi biibi e kon moo taanga? Mi e waka a Yesesi baka? Fa a fasi fa mi e tyai miseefi te mi de a komakandaa e soi? San den toli di mi e gi e soi? San den koosi di mi e wei, a fasi fa mi e sutudeli anga a fasi fa mi e modo e soi? San mi e du te taawan poti mi a pasi? San mi e du te mi e fii fu du wan sani di á bun? Mi biibi taanga?’ (Efeisesama 4:13) Den sowtu akisi ya sa yeepi u fu sabi efu wi e go a fesi.

6. San a den taa sani di o yeepi u fu sabi efu wi e meke a yeye fu Gadu tii wi?

⁶ Son leisi wi abi taawan fanowdu fu yeepi u fu sabi efu wi e meke a yeye fu Gadu tii wi. Apostel Pawlesi be taki, den sama di e du san a sikin wani efuso sama di e denki enke fa libisama e denki nai fusutan taki Gadu á lobi a fasi fa den e libi. Ma wan sama di e meke a yeye fu Gadu tii en, e fusutan fa Yehofa e denki. Den sabi taki Yehofa á lobi te sama e  du san a sondu sikin wani (1 Korentesama 2:14-16; 3:1-3). A nai taanga gi den owluman di e denki enke fa Kelestesi e denki fu sabi efu wan Kelesten e tyai enseefi enke fa a sikin wani. Te den si a sani ya den e meke moiti fu yeepi a sama. San yu o du efu den owluman e meke moiti fu yeepi i? Yu o du san den soi i? Efu u du san den soi u, wi e soi taki u wani go a fesi.​—Peleikiman 7:5, 9.

7. Fa u du sabi taki den leli fu Beibel wawan á poi meke u biibi taanga?

⁷ Den leli fu Beibel wawan á poi taanga u biibi. Kownu Salomo be sabi Yehofa bun. Son wan fu den sani di a taki sikiifi aini Beibel. Ma bakaten en biibi be kon swaki, neen meke a go dini falisi gadu (1 Kownu 4:29, 30; 11:4-6). San wi abi fanowdu boiti den leli fu Beibel? U mu meke moiti fu u biibi á swaki (Kolosesama 2:6, 7). San o yeepi u fu u biibi taanga?

8, 9. (a) San o yeepi u fu u biibi á swaki? (b) Saide u mu sutudeli Beibel, da u teke ten pakisei san u leisi? (Luku a fowtow na a bigin.)

⁸ Apostel Pawlesi be gi den Kelesten taanga-sikin fu ’den meke moiti fu toon gaan sama aini a biibi’ (Hebrewsama 6:1). Fa u sa du a sani ya? Wan fu den sani di o yeepi u, na a buku Meki Gado tan lobi yu! A buku ya o yeepi i fu wooko anga den leli fu Beibel. Efi i sutudeli a buku ya kaba, taa buku de di sa yeepi i fi i biibi taanga (Kolosesama 1:23). U mu sidon pakisei den sani di u leli, da wi akisi Yehofa fu a yeepi u fu si fa u sa wooko anga den aini u libi.

⁹ A fu di u wani libi enke fa Yehofa wani, meke u mu sutudeli Beibel, da u teke ten pakisei san u leli (Psalm 40:8; 119:97). U mu tan faawe fu sani di sa swaki u biibi.​—Titesi 2:11, 12.

10. San yonkuuwan mu du efu den wani den biibi kon moo taanga?

 ¹⁰ Efu yu a wan yonkuuwan, i sabi san i wani du gi Yehofa? Wan baala di e wooko a Betel lobi taki anga den yonkuuwan di e dopu a den gaan komakandaa. A lobi akisi den san den o du baka te den dopu. Son wan fu den sabi san den wani du gi Yehofa. Den wani du a fuuten diniwooko. Taawan wani go yeepi a pe moo peleikiman de fanowdu. Ma son wan fu den yonkuuwan á sabi san den wani du. Kande den e si enke a á de fanowdu fu pakisei a fesi san den wani du gi Yehofa. Efu yu a wan yonkuuwan akisi iseefi taki: ’A fu mma anga nda ede mi e go a peleikiwooko? Mi anga Yehofa a mati tuutuu? Ala u mu pakisei san u wani du gi Yehofa. A den sani di wi o du gi Yehofa o yeepi u fu u biibi kon moo taanga.​—Peleikiman 12:1, 13.

11. (a) San u mu du efu u wani go a fesi? (b) Sama fu Beibel ten u sa waka neen baka?

¹¹ Te u sabi san u mu du fu go a fesi, u mu meke moiti wanten, bika na a go di wi e go a fesi, o yeepi u fu fende a teego libi (Romesama 8:6-8). Yehofa sabi taki wi o go e meke  fowtu, neen meke a gi wi a santa yeye fu yeepi u. Ma useefi mu meke moiti. Baala John Barr, wan fu den baala di be e tii a wooko fu wi, be taki fu a sani di sikiifi a Lukasi 13:24. A be taki: „A omen sama á poi pasa a sumaa doo, fu di den nai meke moiti sai.” U mu de enke Yakopu. A suwa anga wan engel wan hii neti. A di a engel belesi en fosi, neen a fika en (Genesesi 32:26-28). Winsi fa a wan piisii sani fu sutudeli Beibel, toku wi á mu si a Beibel enke den simpan buku di sama e bai e leisi. U mu meke moiti fu fende leli aini di o yeepi u.

12, 13. (a) San o yeepi u fu du san Romesama 15:5 taki? (b) Saide wi o fende wini efu u waka a Peitilisi baka? (c) San i mu du efi i wani go a fesi? (Luku a faki „ San o yeepi i fu go a fesi?”)

¹² Efu wi e meke moiti fu u biibi kon moo taanga, a santa yeye o yeepi u fu kengi a fasi fa wi e denki. Wi o bigin denki enke fa Yesesi e denki (Romesama 15:5). A santa yeye poi yeepi u fu fika den manii fu u di á bun. A poi yeepi u fu abi manii di Yehofa lobi tu (Galasiyasama 5:16, 22, 23). Efu u si enke wi e feti a goontapu gudu efuso piisii baka, wi á mu weli fu begi Yehofa en santa yeye fu yeepi u fu poti pakisei a den moo pelensipali sani (Lukasi 11:13). Pakisei apostel Peitilisi. A ná ala yuu a be e denki enke Yesesi (Mateyesi 16:22, 23; Lukasi 22:34, 54-62; Galasiyasama 2:11-14). Ma toku noiti a gi abaa, neen meke Yehofa yeepi en. Peitilisi leli fu denki enke Yesesi. Useefi sa meke moiti fu denki enke Yesesi.

¹³ Bakaten Peitilisi kai wantu manii di o yeepi u fu denki enke Yesesi. (Leisi 2 Peitilisi 1:5-8.) U mu du ala san u man fu dwengi useefi, fu abi pasensi, fu lobi u baala anga sisa anga fu abi taa bun manii. U sa akisi useefi ala dei taki: ’Sowtu manii mi mu meke moiti fu abi tide di o yeepi mi fu go a fesi?’

14. Fa wi o tyai useefi efu wi e meke a yeye fu Gadu tii wi?

¹⁴ Te taawan luku a fasi fa wi e tyai useefi te u de a wooko efuso sikoo, den mu e si taki wi e denki enke Yesesi. A fasi fa wi e taki anga taawan anga a fasi fa wi e du sani, mu soi tu taki wi e meke moiti fu waka a Yesesi baka. Efu wi e denki enke en, u ná o wani nawan sani poli wi anga Yehofa. Efu wi e meke a yeye fu Gadu tii wi, u ná o meke wi ati koli u fu du sani di á bun. Fosi u du wan sani, u mu akisi useefi taki: ’Sowtu pisi fu Beibel sa yeepi mi? Efu a Yesesi be de a mi peesi san a be o du? San mi mu du fu Yehofa piisii?’ Ala yuu u mu e pakisei den sani ya fosi u du wan sani. Meke u luku on ten a de fanowdu fu akisi useefi den sani ya. Wi o luku tu fa Beibel sa yeepi u fu du sani anga koni.

15, 16. Fa a denki di yu e denki enke Yesesi o yeepi i (a) te yu e luku anga sama yu o toow? (b) te yu e suku mati?

 ¹⁵ Te yu e luku anga sama yu o toow. Wan fu den tekisi di sa yeepi u te wi e suku wan sama fu toow, a 2 Korentesama 6:14, 15. (Leisi.) Pawlesi soi aini a tekisi ya taki, wan sama di e meke a yeye fu Gadu tii en anga wan sama di e du san a sikin wani, nai denki go na a wan se. Fa a tekisi ya sa yeepi i te yu e luku anga sama yu o toow?

¹⁶ Te yu e suku mati. Wan fu den tekisi di sa yeepi u te wi e suku mati, a 1 Korentesama 15:33. (Leisi.) Wan sama di e meke a yeye fu Gadu tii en, nai paa anga sama di sa swaki en biibi. Pakisei fa i sa wooko anga san sikiifi aini a tekisi ya. Fa a sa yeepi i fu du sani anga koni te yu e taki anga sama a internet? Fa a sa yeepi i te i mu luku efu yu o pee game anga sama di yu á sabi a internet?

17-19. Fa a meke di wi o meke a yeye fu Gadu tii wi o yeepi u (a) fu wi á du sani di ná abi wini? (b) fu poti a Kownukondee a fesi? (c) te wi anga taawan abi sani?

¹⁷ Sani di sa swaki u biibi. Luku san sikiifi a Hebrewsama 6:1. (Leisi.) San a den „lawlaw sani” di a tekisi taki wi á mu du? Den sani ya a sani di ná abi wini. Den nai yeepi u fu go a fesi. Fosi u du wan sani, u mu luku san a tekisi ya taki, da u akisi useefi taki: ’Mi o fende wini fu a sani di mi wani du ya? A de fanowdu fu mi du a wooko ya? Saide mi á mu holibaka gi den olikanisâsi di e meke moiti fu sani go moo bun a goontapu?

¹⁸ Den sani di u sa du fu go a fesi. Di Yesesi be e leli sama na a mongo, a be soi u san u mu poti a fesi (Mateyesi 6:33). Wan sama di e meke a yeye fu Gadu tii en, e poti a Kownukondee a fesi. Te u pakisei a sani di Yesesi taki, u mu akisi useefi taki: ’Mi mu go a hei sikoo? Mi mu teke a wooko ya?’

¹⁹ Te yu anga taawan abi sani. A sani di Pawlesi taigi den Kelesten fu Rome, sa yeepi u te wi anga taawan abi sani (Romesama 12:18). Wi e waka a Yesesi baka, neen meke wi e „meke moiti fu libi bun anga ala sama”. San wi e du te wi anga taawan abi sani? Ai taanga gi i fu wooko anga san taawan taki? Taawan sabi wi enke sama di e meke moiti fu libi bun anga taawan?​—Yakowbesi 3:18.

20. Saide i wani a yeye fu Gadu tii yu?

²⁰ Den toli di u luku e soi taki Beibel poi yeepi u fu du sani di e soi taki a yeye fu Gadu e tii wi. Efu u meke a yeye fu Gadu tii wi, wi o de koloku. Robert di u be taki fi en na a bigin taki: „Di mi toon Yehofa mati, mi toon wan moo bun man anga wan moo bun dda. Mi de koloku.” Efu wi e du ala san u man fu meke a yeye fu Gadu tii wi, useefi o fende wini. Wi o de koloku aini a ten ya, ma aini a ten di e kon wi o fende a „tuutuu libi”.​—1 Timotiyesi 6:19.