Nda John Mills dopu aini 1913 a New York. A ten de a be abi 25 yali. A Baala Russell be holi a dopu-lezing. Baka dati neen nda go a Trinidad. Di a doo ape a toow anga Constance Farmer. A sisa ya a be wan Beibel ondoosukuman di be e peleiki fayafaya. Nda be e yeepi en mati William Brown fu daai a felon di den e kai „Photo-Drama of Creation” (A fowtow dalaama di e soi fa Gadu meke sani). Den du a sani ya te enke den baala sende Baala Brown anga en uman go a West Afiikan aini 1923. Mma anga nda a be salufu Kelesten. Den du a peleikiwooko go doo a Trinidad.

Mma anga nda meke neigin pikin, fo meisyo anga feifi boi. Den kai a fosiwan Rutherford, a nen fu a baala di be e tii a wooko a ten de. A mi na a du fu tu pikin. Mi meke a 30 december 1922. Den gi mi a nen fu a baala di be abi a faantiwowtu fu seeka den artikel gi a buku di den e kai The Golden Age (nownow den e kai en Ontwaakt!). Den be e kai a baala ya Clayton Woodworth. Mma anga nda poti ala wi a sikoo, ma toku den be e gi u taanga-sikin fu poti Yehofa a fesi. Mma be abi a koni fu yeepi taawan fu fusutan Beibeltekisi. Nda be lobi gi u Beibel toli. A be e taki anga ala en sikin, a so a be e gei enke den sani di a be e taki be e pasa leti a u fesi.

Sani waka bun di mma anga nda yeepi u fu lobi Yehofa. Fu den feifi boi, dii go na a Gileyad sikoo. Dii fu den sisa fu u pionili omen yali a Trinidad anga Tobago. A fasi fa u mma anga u dda tyai denseefi anga a leli di den gi u, yeepi u fu lobi Yehofa. A taanga-sikin di den gi u yeepi u fu de enke „bon di e meke boomiki aini a dyali fu a Gadu fu u”.​—Ps. 92:13.

Peleikiwooko komakandaa be e holi a wi osu. Pionili be lobi kon a wi osu tu. Te den be kon den be lobi gi toli fu baala George Young. A baala ya a be wan zendeling di be komoto a Kanada kon a Trinidad. Mma anga nda be lobi gi toli fu baala Brown anga en uman di be foloisi go a West Afiikan.  A den sani ya gi mi taanga-sikin fu bigin anga a peleikiwooko di mi be abi tin yali.

Na a ten de den buku fu u be e kuutu den falisi keliki, den giili bisnisman anga den politiki palitei. Na a sani ya meke den keliki fesiman be meke den lanti fu Trinidad tapu den Kotoigi fu paati den buku fu den aini 1936. U kibii den buku, neen u paati den te enke den kaba. U be e waka a sitaati anga bord, u be e lei baisigii da u be e paati pampila. Den Kotoigi fu a pisi fu Tunapuna be abi wan wagi anga wan bokusu neen tapu. U be e go peleiki makandaa anga den a den moo faawe pisi fu Trinidad. A ten de a be wan simpan ten. A den sani ya gi mi taanga-sikin fu dopu di mi be abi 16 yali.

A leli di mi fende fu mma anga nda, anga den taa sani di mi ondoofeni meke mi be wani toon wan zendeling. Winsi fa mi be go na Aruba fu holibaka gi Baala Edmund W. Cummings aini 1944, toku mi be wani toon zendeling ete. U be piisii di u si taki tin fu den sama di u be kai, kon na a Membeefesa aini 1945. A taa yali neen a fosi kemeente opo na a Tabiki ya.

A á teke langa neen mi peleiki gi wan uman a wookope de e kai Oris Williams. A uman ya be meke ala moiti fu soi mi taki den sani di a leli neen keliki á fowtu. Ma di a bigin sutudeli a Beibel, a kon sabi a tuu, neen a dopu a 5 yanuari 1947. Bakaten u be kon lobi useefi, neen u toow. A bigin pionili aini November 1950. A libi fu mi anga Oris be e switi gi mi.

Den kai u fu go na a Gileyad sikoo aini 1955. Fu di u be wani go na a sikoo ya, meke u fika a wooko di u be e du. U seli wi osu anga taa sani neen u foloisi komoto na Aruba. U kaba du fu 27 kalasi fu Gileyad a 29 yuli 1956, baka dati neen den sende u go a Nigeliya.

Oris taki: „Te mi luku fa mi libi waka, mi kon si taki a yeye fu Yehofa poi yeepi i fu pasa omen tesi te yu e du a fuuten diniwooko. Winsi fa a man fu mi be wani toon zendeling mi dati á be wani du a wooko ya. Mi be wani seeka mi osu, meke pikin da mi tan a osu kiya den. Ma di mi kon fusutan taki a de taanga fanowdu fu paati a bun nyunsu neen mi kengi pakisei. Di mi komoto a Gileyad, mi be de kabakaba fu du a zendeling wooko. Di u go aini a sipi di den e kai Queen Mary, baala Worth Thornton di be e wooko makandaa anga Baala Knorr kon gi wi odi. A taigi u taki wi o wooko a Betel. Mi á mu koli i, mi á be wani go wooko a Betel. Ma a á teke langa fosi mi bigin lobi a wooko a Betel. Mi du omen sowtu wooko a Betel. Ma a wan di mi be moo lobi, a pe mi be mu e teke telefon anga bali wadaa gi den sama di e kon luku Betel. Mi lobi sama. A wooko ya meke mi miti omen baala anga sisa fu Nigeliya. Son wan fu den be e doo weliweli, wataa be e kii den, angii be e kii taawan tu. A omen fu den futu be e weti te den be doo ape. A be e switi gi mi fu yeepi den anga den sani di den be abi fanowdu. Mi be e piisii winsi sowtu wooko mi be mu du a Betel bika mi be sabi taki a Yehofa mi be e du en gi.” Eeye, ala wooko di wi e du gi Yehofa e yeepi u fu go a fesi.

Di a famii be kon makandaa wan leisi a Trinidad, Baala Brown be gi wantu moin ondoofenitoli fu Afiikan. Baka dati miseefi taki fa a wooko e go a Nigeliya. Baala Brown lolo mi a neki neen a taigi nda taki: „Johnny, noiti i go na Afiikan, ma Woodworth go!” Neen nda taigi mi taki: „Go so doo ye Worth! Go so doo!” A taanga-sikin di mi fende fu den man ya di be abi ondoofeni, yeepi mi fu tan wooko anga mi hii ati gi Yehofa.

Aini 1962, mi be piisii taki mi be fende a okasi ete wan leisi fu go na a du fu 37 kalasi fu a Gileyad sikoo. A sikoo ya be holi tin mun. Baala Wilfred Gooch, di be e teke fesi na a Beikantoo fu Nigeliya, go na a du fu 38 kalasi. Baka a sikoo den sende en go a Ingiisikondee. Di a baala ya gwe neen den gi mi a faantiwowtu fu teke fesi na a Beikantoo fu Nigeliya. Leti enke Baala Brown, mi go a omen peesi fu Nigeliya fu go luku den baala anga sisa. A sani ya yeepi mi fu kon sabi omen baala anga sisa moo bun. Mi be kon moo  lobi den tu. Winsi fa den ná abi son gudu di den sama aini den gudu kondee abi, toku den e tifeedi. Boiti dati a fasi fa den e piisii e soi taki a ná gudu e meke sama abi wan bun libi. A be e gi mi piisii fu si taki den be e wei koosi di fiti anga di kiin te den e kon a komakandaa winsi fa den be pooti. Te wi abi konkelesi da omen fu den e waka anga toloki efuso bolekajas * (a wan besi di opo a sikin se). Son leisi sama be e sikiifi nongo a den besi ya. Wan fu den be sikiifi taki: „A pikinpikin doopu wataa e fuu wan se.”

A sani di a nongo ya taki a ná lei! Ala pikin sani di wi e du gi Yehofa e yeepi u fu a wooko go a fesi. Aini a yali 1974 Nigeliya be de a du fu tu kondee a goontapu di be doo wan ondoo dunsu peleikiman. Na Ameekan be de a fosi kondee di be doo so ipi peleikiman. A wooko be go a fesi tuutuu!

Na a pisi ten ya feti booko a Nigeliya aini 1967 te anga 1970. A omen mun a beikantoo á be poi sende sani gi den baala anga sisa fu u di be de a Biafran. Biafran be de na a taase fu a Niger liba. A á be makiliki ma toku u be musu tyai buku anga taa sani gi den. A sani di be yeepi u fu abaa a liba ya ala den leisi, a begi anga a fitoow di u be e fitoow Yehofa.

Mi á poi feegete den sani di be sa miti u te u be e abaa a Niger liba. U be sa dede, kisi takuu siki, boiti dati i be abi den suudati di á be e daaidaai fu sutu. Te u be pasa den suudati fu lanti wi á be kaba ete. Sani be e moo simpan te u be doo Biafran. Omen suudati di be e feti anga lanti be tapu den pasi na a pisi ape. Wan neti mi be de aini wan paliboto na a Niger liba. U puu komoto a Asaba te doo Onitsha fu gi den owluman fu Enugu taanga-sikin. Wan taa leisi u go gi den owluman fu Aba taanga-sikin. Den sama fu Aba á be mu leti faya aini den osu. Di wi anga den baala fu Port Harcourt miti, u be abi fu tapu a komakandaa gawgaw anga begi, bika den suudati fu lanti be bigin feti anga den taa fetiman koosube pe u be de.

Den komakandaa ya be de taanga fanowdu, bika den yeepi den baala anga sisa fu poti den booko ede aini Yehofa ana. Boiti dati u be man gi den taanga-sikin fu den á teke se. U gi den taanga-sikin tu fu libi na a wan anga denseefi. Den Kotoigi fu Nigeliya holidoo na a ten fu a feti ya. Den soi taki den lobi denseefi tuutuu. Winsi fa den taa sama á be lobi denseefi, toku den Kotoigi be e libi na a wan. Ai bigi gi mi taki mi be man holibaka gi den a ten de.

Aini 1969 Baala Milton G. Henschel a be fesiman fu a konkelesi di den e kai „Peace on Earth” (Freide a goontapu). A konkelesi ya be holi aini Yankee sitadiyon a New York. Mi be abi a gaandi fu wooko makandaa anga en. Mi leli omen sani fi en. A bun taki mi be wooko makandaa anga en, bika aini 1970 u be mu holi wan gaan konkelesi a Lagos aini Nigeliya. A nen fu a konkelesi ya a be „Men of Goodwill” (Sama di Gadu lobi). Efu Yehofa á be holibaka gi u, wi á be o poi holi a konkelesi ya, bika a di a feti kaba neen u sete sani fu holi en. Fositoon u be abi sowan gaan konkelesi a Nigeliya. A be holi aini 17 tongo. A 121.128 sama be kon na a konkelesi ya. Baala Knorr anga Henschel anga wantu taa Kotoigi fu Ameekankondee anga Ingiisikondee be yuu opalani, fu kon na a konkelesi. A 3775 sama dopu na a konkelesi ya. Den be ipi moo den sama di be dopu na a Pinksterfesa aini a yali 33! Noiti ete mi be wooko taanga so enke di mi be mu yeepi anga a konkelesi ya. Wi á be poi biibi taki a so ipi nyun baala anga sisa u be fende.

Den moo enke 30 yali di mi wooko a Nigeliya, mi be abi a gaandi fu du a kelen wooko. Son leisi mi be e du a zone opziener wooko a West Afiikan tu. Den zendeling be e teke en fu bigi te u be e poti pakisei a den anga te u be e gi den taanga-sikin. Mi be e piisii te u be e yeepi den fu membee taki a wooko di den e du pelensipali. A wooko ya leli mi taki te yu e poti pakisei a sama, a sani ya e yeepi den fu du den wooko anga moo piisii. Ai yeepi den baala anga sisa fu libi na a wan tu.

 A di Yehofa yeepi u meke u be man holidoo na a ten fu a feti. Neen be e yeepi u te u be siki tu. U be e si taki Yehofa e belesi wi ala yuu. Oris taki:

„A omen leisi malaaliya kisi u. Wan leisi, a fawfaw u be abi fu tyai Worth go na ati-osu a Lagos. Den be taigi mi taki kande a ná o meke en. Ma mi poolo taki a kisi enseefi baka. Di a kisi enseefi, a bigin taki fu Gadu Kownukondee anga a man di be e yeepi en na a ati-osu. A nen fu a man ya a Mr. Nwambiwe. Bakaten mi anga Worth go na a man ya baka fu yeepi en fusutan Beibel moo bun. A kon aini a waaleiti. Bakaten a toon owluman aini a kemeente na Aba. Mi be abi a gaandi fu yeepi omen sama fu kon sabi Yehofa. Son wan fu den sama ya be de dipi aini a Moslim biibi. A be e gi u piisii tuutuu fu leli sabi den baala anga sisa fu Nigeliya, den gwenti fu den, anga a tongo fu den. U be kon lobi den anga u hii ati.”

Wan fu den taa sani di u leli a taki: Efu u wani du u wooko bun te u go yeepi a wan taa kondee, u mu meke moiti fu lobi den baala anga sisa winsi den gwenti fu den anga den gwenti fu wi a ná aseefi.

Baka di u wooko a Betel a Nigeliya, a olikanisâsi sende u go enke zendeling na a tabiki di de e kai Sint Lucia aini 1987. U be lobi a peesi, ma toku u be abi fu teke gwenti. Aini Afiikan manengee e toow anga omen uman, ma aini Sint Lucia man anga uman e libi anga denseefi sondee fu toow. A Wowtu fu Gadu yeepi omen fu den Beibelsutudi fu kengi.

Fu di u kon gaandi meke den baala di e tii a wooko sende u go na a edekantoo a Brooklyn aini 2005. Mi e gi Yehofa daa ala dei taki mi be abi Oris. Aini a yali 2015 Oris kon lasi libi. A dede fi en du mi ogii te. A be wan uman di be abi bun manii. Ná pikin lobi mi be lobi en den 68 yali di u toow. U leli taki wan sama sa de koloku aini a toowlibi anga a kemeente te ai lesipeki den sama di e teke fesi, te a abi sakafasi, te ai gi taawan paadon anga te a abi den manii di a santa yeye e meke sama abi.

Te sani á be e go enke fa u wani, u be e wakiti Yehofa fu a yeepi u fu tan du a wooko fu wi enke fa a wani. Den wooko di u be abi a gaandi fu du yeepi wi fu si fa a olikanisâsi go a fesi aini den ten di pasa. U sabi tu taki sani o go moo bun aini a ten di e kon!​—Yes. 60:17; 2 Kor. 13:11.

Yehofa belesi a wooko di mma, nda anga taa baala anga sisa du a Trinidad anga Tobago. Nownow a 9892 Kotoigi de ape. Aini Aruba a omen baala anga sisa e wooko taanga fu meke a fosi kemeente pe mi be de go a fesi. Nownow a 14 kemeente de na a tabiki de. Nigeliya abi 381.398 Kotoigi nownow. Sint Lucia abi 783 baala anga sisa di e holibaka gi Yehofa Kownukondee.

Nownow mi pasa 90 yali. Psalm 92:14 taki den sama di e tan aini a osu fu Yehofa „o tan goo, winsi den ede uwii kon weti. Den o fatu ala yuu. Den o moin tu”. Mi e piisii taki mi abi a gaandi fu wooko gi Yehofa. Den sani di mma anga nda leli mi yeepi mi fu dini Yehofa anga mi hii ati. Yehofa abi bun-ati bika a yeepi mi fu de enke wan „bon di e meke boomiki aini a dyali fu a Gadu fu u”.​—Ps. 92:13.