A BEIBEL buku Daniyeli e taki fu wan kownu den e kai Belsasar. Ma a omen yali langa son sabiman di e suku fu fende fowtu aini a Beibel, be e taki a Kownu ya á be de tuutuu (Dan. 5:1). Den be fende taki ondoosukuman á be fende nawan sani di e soi taki Belsasar be de tuu. Ma aini a yali 1854 den kengi a fasi fa den be e denki. San meke den kengi pakisei?

Aini 1854, wan man fu Ingiisikondee den e kai John Taylor go ondoosuku wantu booko peesi a pe a foto Ur be de fosi. A peesi ya de aini Irak. Na ape a man ya kon fende wantu gaandi sani di be meke anga tokotoko. Son wan fu den sani ya be langa wan sani fu fo doin (10 cm). Sani be sikiifi a den. Wan begi be sikiifi a wan fu den sani ya. Den be e begi langa libi gi wan kownu fu Babilon di den e kai Nabonidus anga en fosi manpikin Belsasar. Den sabiman di e suku fu fende fowtu aini a Beibel seefi be abi fu piki taki a sani di den fende ya, e soi taki Belsasar be de tuu.

Beibel nai soi namo taki Belsasar be e libi fosi, ma ai soi tu taki a be wan kownu. Winsi fa den sabiman be abi fu piki taki Belsasar be de tuu, toku den á be e kaba biibi taki Belsasar a be kownu. Wan pisiten fu a yali 1875, wan ondoosukuman den e kai William Talbot be sikiifi taki son sama e taki „Bel-sar-ussur [Belsasar] be e tii makandaa anga en dda Nabonidus. Ma nawan buweisi de di e soi taki a sani ya a tuu”.

Bakaten sama kon fende taa gaandi pisi tokotoko pe sikiifi taki wan pisiten a omen yali langa Kownu Nabonidus, a dda fu Belsasar á be de a Babilon. Sama be e tii a foto te Nabonidus á be de a Babilon? Wan buku (Encyclopaedia Britannica) taki „di Nabonidus be de aini wan taa kondee, a poti Belsasar enke kownu. A poti en enke fesiman fu gaanse fu den suudati fi en tu”. A sani ya e soi taki wan pisiten Belsasar be e tii enke kownu a Babilon. Di wan ondoosukuman den e kai Alan Millard luku den sani ya, neen a taki „a Beibel buku Daniyeli á lei di a kai Belsasar ’kownu’”.

Winsi sama á be fende den buweisi ya, tokuso a foluku fu Gadu be o biibi den sani di sikiifi aini a Beibel buku Daniyeli, bika aini a Wowtu fu Gadu a sikiifi.​—2 Tim. 3:16.